Neʼe Uga Nātou ʼAki ‘Te ʼu Gāue Taulekaleka ʼa Te ʼAtua’

“E tou fagono ki tanatou fagonogono i atatou lea te u gaue [“taulekaleka,” MN ] a te Atua.”—Gaue 2:11.

1, 2. Koteā te meʼa fakaofoofo neʼe hoko ʼi Selusalemi ʼi te Penikosite ʼo te taʼu 33 ʼo totatou temi?

ʼI TE tahi uhu ʼo te fasiga taʼu mātala ʼo te taʼu 33 ʼo totatou temi, neʼe hoko te meʼa fakaofoofo ki te ʼu tagata pea mo te ʼu fafine, ko te ʼu tisipulo ʼa Sesu Kilisito neʼe nātou fakatahitahi ki te ʼapi ʼi Selusalemi. “Fokifape nee mavae mai te lagi he uʼulu o hage ko he mapuhi a he matagi malohi, pea nee ina aofi katoa te api nee natou nonofo ai. Pea nee ha kia natou he u aleloʼi afi . . . Nee natou fonu katoa ite Laumalie-Maonioni, onatou lea ki ihiʼaga lea.”—Gaue 2:2-4, 15.

² Neʼe maʼopoʼopo mai te hahaʼi kaugamālie ki te muʼa ʼapi. Neʼe kau ai te kau Sutea mai te ʼu fenua kehe, ko ‘te hahaʼi ʼe nātou manavasiʼi ki te ʼAtua’ pea neʼe nātou ʼōmai ki Selusalemi ki te lafeti ʼo te Penikosite. Neʼe nātou ʼofolele koteʼuhi neʼe palalau te ʼu tisipulo ki ‘te ʼu gāue taulekaleka ʼa te ʼAtua’ ʼi te ʼu lea kehekehe. Neʼe lava hoko feafeaʼi he meʼa feiā logola ko nātou fuli ʼaia neʼe ko te kau Kalilea?—Gaue 2:5-8, 11.

3. Koteā te logo neʼe fakahā e te ʼapositolo ko Petelo ki te hahaʼi ʼi te Penikosite?

³ ʼI te kau Kalilea ʼaia neʼe kau ai te ʼapositolo ko Petelo. Neʼe ina fakamahino ʼi te ʼu kiʼi vāhaʼa ki muʼa atu, ko Sesu Kilisito neʼe fakapogi e te hahaʼi heʼe faitotonu. Kae neʼe kua fakatuʼuake e te ʼAtua tona ʼAlo mai te mate. Ki muli age, neʼe hā ia Sesu ki tana ʼu tisipulo e tokolahi, kia Petelo pea mo ʼihi neʼe nātou nonofo fakatahi mo ia. Ia ʼaho pe e hogofulu ki muʼa atu, neʼe hake Sesu ki selo. Neʼe ko ia ʼaē neʼe ina folahi ifo te laumālie maʼoniʼoni ki tana ʼu tisipulo. Neʼe ʼi ai koa he ʼuhiga ʼo te ʼu meʼa ʼaia kia nātou ʼaē neʼe kau ki te Penikosite? Ei. ʼAki te mate ʼo Sesu neʼe ina faka fealagia ai ke fakamolemole ia tanatou ʼu agahala pea ke nātou maʼu te “meʼa ʼofa ʼo te laumālie maʼoniʼoni” mo kapau ʼe nātou haga tui kia te ia. (Gaue 2:22-24, 32, 33, 38, MN ) Kae neʼe feafeaʼi ki te hahaʼi ʼaē neʼe nātou logo ki ‘te ʼu gāue taulekaleka ʼa te ʼAtua’? Pea ʼe lava tokoni feafeaʼi te fakamatala ʼaia kia tatou ʼo ʼuhiga mo tatatou tauhi kia Sehova?

Neʼe Uga Nātou Ki Te Gāue!

4. Koteā te lea faka polofeta ʼa Soele neʼe hoko ʼi te ʼaho ʼo te Penikosite ʼo te taʼu 33 ʼo totatou temi?

⁴ ʼI te folahi ifo ʼo te laumālie maʼoniʼoni ki te kau tisipulo, neʼe nātou foimo faka mafola atu aipe mo ʼihi ʼi Selusalemi ia te logo lelei ʼo te maʼuli, ʼo nātou kamata faka mafola ki te hahaʼi ʼaē neʼe maʼopoʼopo ʼi te uhu ʼaia. ʼAki tanatou faka mafola ʼaia, neʼe nātou fakahoko ia te lea faka polofeta neʼe kua fakahā ia sēkulō e valu ki muʼa atu e Soele, te foha ʼo Petuele: “ ʼE ʼau folahi . . . anai toku laumālie ki te faʼahiga kakano fuape, pea ʼe mahino papau ia, ʼe lea faka polofeta anai tokotou ʼu foha pea mo tokotou ʼu ʼofafine. Pea ko takotou kau matuʼa, ʼe nātou moemisi anai ki he ʼu moemisi. Pea ko takotou kau tūpulaga, ʼe nātou sisio anai ki he ʼu meʼa ʼe hā age kia nātou. Pea ʼo feiā mo te kau tagata kaugana pea mo te kau fafine kaugana, ʼi te ʼu ʼaho ʼaia, ʼe ʼau folahi anai kia nātou toku laumālie . . . ʼi muʼa ʼo te hoko mai ʼo te ʼaho lahi pea mo fakamanavahe ʼo Sehova.”—Soele 1:1; 2:28, 29, 31; Gaue 2:17, 18, 20.

5. Koteā ʼaē neʼe fakakikite ʼo ʼuhiga mo te kau Kilisitiano ʼo te ʼuluaki sēkulō? (Vakaʼi te kiʼi nota ʼi te lalo pasina.)

⁵ Ko tona faka ʼuhiga koa neʼe ʼamanaki fakatuʼuake e te ʼAtua he kau polofeta, ko he ʼu tagata mo he ʼu fafine, ohage ko Tavite, mo Soele, pea mo Tepola, ke nātou fakakikite te ʼu meʼa ʼaē ka hoko ki te ka haʼu? Kailoa. Ko ‘te ʼu foha pea mo te ʼu ʼofafine, mo te ʼu tagata kaugana pea mo te ʼu fafine kaugana’ Kilisitiano ʼaē ka fakakikite, ʼe takitaki anai nātou e te laumālie maʼoniʼoni ʼo Sehova ke nātou tala ‘te ʼu gāue taulekaleka’ ʼaē neʼe fai e Sehova pea kei ina fai pe. Koia ʼe nātou liliu anai ko he kau fakahoko palalau ʼo te Māʼoluga.a Kae neʼe feafeaʼi ki te hahaʼi?—Hepeleo 1:1, 2.

6. ʼI tanatou fakalogo ki te akonaki ʼa Petelo, neʼe koteā te meʼa neʼe fia fai e te tokolahi?

⁶ Neʼe ʼi ai te meʼa neʼe fia fai e te tokolahi ʼo te hahaʼi ʼaia, ʼi tanatou ʼosi logo ki te faiakonaki ʼa Petelo. Neʼe nātou “tali ʼaki tonatou loto katoa tana akonaki” pea “neʼe papitemaʼi [nātou], pea ʼi te ʼaho ʼaia neʼe teitei toko tolu afe te ʼu nefesi ʼaē neʼe hilifaki kia nātou.” (Gaue 2:41, MN ) ʼI tonatou ʼuhiga Sutea pea mo poloselite, neʼe kua nātou mahino ki te ʼu meʼa ʼaē ʼi te Tohi-Tapu. Pea ko te ʼatamai mālama ʼaia, pea mo tanatou tui ki te ʼu meʼa ʼaē neʼe akoʼi age e Petelo, neʼe feala ai ke papitemaʼi nātou “i te Huafa o te Tamai, mo te Alo, mo te Laumalie-Maonioni.” (Mateo 28:19) ʼI tanatou ʼosi papitema “neʼe nātou haga mulimuli aipe ki te akonaki ʼa te kau ʼapositolo.” ʼI te temi ʼaia, neʼe nātou kamata fakahā ki te hahaʼi te ʼu meʼa foʼou ʼaē kua nātou tui kiai. ʼIo, “ ʼi te ʼaho fuli pe, neʼe nātou ʼolo tuʼumaʼu ki te fale lotu, . . . ʼo nātou fakavikiviki ki te ʼAtua pea neʼe tali lelei nātou e te hahaʼi fuli.” ʼAki te gāue faka mafola ʼaia, “neʼe hoko atu pe te hilifaki e Sehova kia nātou ʼi te ʼaho fuli te hahaʼi kua hāofaki.” (Gaue 2:42, 46, 47, MN ) Neʼe tuputupu te ʼu kokelekasio ʼi te ʼu koga meʼa ʼaē neʼe nonofo ai te kau tisipulo foʼou ʼaia. Pea ʼe mahino ia neʼe hoko te tuputupu ʼaia ʼuhi ko tanatou faka mafola mālohi ia te “logo lelei” ʼi tanatou toe liliu kiō nātou.—Kolose 1:23, MN.

ʼE Mālohi Te Folafola ʼa Te ʼAtua

7. (a) Koteā ʼaē ʼe ina taki mai te hahaʼi ʼo te ʼu puleʼaga kehekehe ki te kautahi ʼa Sehova ia ʼaho nei? (b) Koteā te ʼu fealagia ʼe tou sio kiai ʼi te malamanei pea mo te ʼu potu ʼaē ʼe tou nonofo ai? (Vakaʼi te kiʼi nota ʼi te lalo pasina.)

⁷ E feafeaʼi ki te hahaʼi ʼaē ʼe nātou fia kaugana ia ʼaho nei ki te ʼAtua? ʼE tonu foki ke nātou ako fakalelei te Folafola ʼa te ʼAtua. Ka nātou fai te faʼahi ʼaia, ʼe nātou ʼiloʼi ai ko Sehova ʼe ko te ʼAtua “manavaʼofa pea mo lotoʼofa, tuai ʼi te ʼita pea mo mohu ʼi te agaʼofa pea mo te moʼoni.” (Ekesote 34:6; Gaue 13:48) ʼE nātou mahino ai ki te fakatuʼutuʼu agalelei ʼa Sehova ʼo ʼuhiga mo te totogi ʼaē neʼe foaki e Sesu Kilisito, pea ʼaki tona taʼataʼa kua feala ai ke fakamaʼa nātou mai tanatou ʼu agahala fuli. (1 Soane 1:7) Pea ʼe nātou loto fakafetaʼi ki te fakatuʼutuʼu ʼa te ʼAtua moʼo “fakatuʼuake ʼo te kau faitotonu pea mo te kau heʼe faitotonu.” (Gaue 24:15, MN ) ʼI te malave ʼaupito ʼo tonatou ʼofa ki te Matapuna ʼo ‘te ʼu gāue taulekaleka’ ʼaia, neʼe nātou fia faka mafola ai te ʼu moʼoni taulekaleka ʼaia. Pea neʼe nātou foaki ai tonatou maʼuli, pea mo papitema ke nātou kaugana ki te ʼAtua pea mo nātou haga “tuputupu [aipe] ʼi te ʼatamai mālama totonu ʼa te ʼAtua.”b—Kolose 1:10b, MN; 2 Kolonito 5:14.

8-10. (a) ʼE hā feafeaʼi “ ʼe mālohi” te Folafola ʼa te ʼAtua ʼi te meʼa neʼe hoko ki te fafine Kilisitiano? (b) Koteā te ako ʼe koutou maʼu mai te fakamatala ʼaia ʼo ʼuhiga mo Sehova pea mo tana felogoi mo tana ʼu kaugana? (Ekesote 4:12)

⁸ ʼE maʼuhiga moʼoni te ʼatamai mālama ʼaē ʼe maʼu e te ʼu kaugana ʼa te ʼAtua ʼi tanatou ako te Tohi-Tapu. ʼE gāue te taʼi ʼatamai mālama ʼaia ʼi ʼonatou loto, ʼe ina fetogi tanatou ʼu faʼahiga manatu, pea ʼe maʼuli ia nātou. (Hepeleo 4:12) Ohage ko te fafine ʼe higoa ko Camille neʼe gāue ʼi te fale maʼa te hahaʼi vaivai. ʼI te ʼu hahaʼi matuʼa ʼaē neʼe tokaga kiai neʼe kau ai ia Martha, neʼe ko te Fakamoʼoni ʼa Sehova. Pea neʼe tonu ke leʼoleʼo tuʼumaʼu ia Martha he neʼe kua lahi fau te puli ʼo tona ʼatamai. Neʼe tonu ke fakamanatuʼi age tona temi kai—ʼo toe feiā aipe mo te folo ʼo tana meʼa kai. Kae ko te meʼa e tahi neʼe mole puli ʼi te ʼatamai ʼo Martha, pea ʼe tou vakaʼi anai te faʼahi ʼaia.

⁹ ʼI te tahi ʼaho, neʼe sio ia Martha ʼe tagi ia Camille he neʼe lahi fau tona ʼu fihifihia. Neʼe fāʼufua e Martha ia Camille pea neʼe ina fakaʼui age ke fai hana ako Tohi-Tapu. Kae neʼe feala koa kia Martha ke ina fai he ako Tohi-Tapu? Ei! Logola neʼe mole kei faʼa lelei tona ʼatamai, kae neʼe mole heʼeki galo ia Martha tona ʼAtua fakaofoofo, pea mo te ʼu moʼoni taulekaleka ʼaē neʼe ina ako ʼi te Tohi-Tapu. Lolotoga te ako, neʼe akoʼi e Martha ia Camille ke ina lau te ʼu palakalafe, ke ina kumi te ʼu vaega faka Tohi-Tapu, pea mo lau te fehuʼi ʼi lalo ʼo te pasina, pea ke tali kiai. Neʼe nā fai feiā lolotoga te kiʼi temi, pea logola te ʼu tuʼakoi ʼo Martha kae neʼe tuputupu ia Camille ʼi tana mahino ʼaē ki te Tohi-Tapu. Neʼe mahino kia Martha ʼe ʼaoga kia Camille ke fakatahi mo te hahaʼi ʼaē ʼe nātou fia tauhi ki te ʼAtua. Pea ki te faʼahi ʼaia, neʼe ina foaki age te kofu pea mo te ʼu sūlie ʼo Camille, ke teuteu lelei mokā ʼalu ki tana ʼuluaki fono ʼi te Fale ʼo Te Puleʼaga.

¹⁰ ʼAki te tokaga ʼofa ʼa Martha, mo tana faʼifaʼitaki pea mo tana tui mālohi, neʼe uga ai ia Camille ke fia tuputupu ʼi te faʼahi fakalaumālie. Neʼe mahino kia ia neʼe maʼuhiga ʼaupito te ʼu meʼa ʼaē neʼe akoʼi age e Martha, koteʼuhi kua teitei galo pe kia Martha te ʼu meʼa fuli, kae gata pe ki te ʼu meʼa ʼaē neʼe ina ako ʼi te Tohi-Tapu neʼe heʼeki galo ia te ia. Ki muli age, ʼi te ʼalu leva ʼa Camille ki te tahi fale maʼa te hahaʼi vaivai, neʼe mahino kia ia kua tonu ke haʼele ki muʼa ʼi te faʼahi fakalaumālie. ʼI tana maʼu tona ʼuluaki faigamālie, neʼe ʼalu ki te Fale ʼo Te Puleʼaga, pea neʼe ina tui te kofu mo te ʼu sūlie ʼaē neʼe foaki age e Martha, pea neʼe ina fakaʼui tana ako Tohi-Tapu. Neʼe tuputupu ia Camille pea neʼe papitema ai.

ʼE Uga Tatou Ke Tou Maʼuliʼi Te ʼu Lekula ʼa Sehova

11. ʼO mole gata pe ʼi te gāue mālohi ʼi te fai faka mafola, ʼe tou lava fakahā feafeaʼi neʼe uga tatou e te logo ʼo te Puleʼaga?

¹¹ Ia ʼaho nei, ohage ko Martha pea mo Camille, ko te toko ono miliona tupu kau Fakamoʼoni ʼa Sehova ʼe nātou faka mafola te “Logolelei . . . o te Puleaga” ʼi te malamanei. (Mateo 24:14; 28:19, 20) Ohage ko te kau Kilisitiano ʼo te ʼuluaki sēkulō, neʼe uga mālohi nātou e ‘te ʼu gāue taulekaleka ʼa te ʼAtua.’ ʼE nātou fakafetaʼi ʼi tanatou maʼu te pilivilesio ke nātou fua te huafa ʼo Sehova pea mo fakafetaʼi ʼi tana folahi ifo tona laumālie maʼoniʼoni kia nātou. Koia, neʼe nātou faiga ai ke nātou “haʼele ʼi he ʼaluʼaga ʼe tau mo feʼauga mo Sehova, ke [nātou] lelei katoa kia te ia,” ʼo nātou maʼuliʼi tana ʼu pelesepeto ʼi te ʼu potu fuli ʼo tonatou maʼuli. Tahi ʼaē meʼa, ʼe tonu ke tou fakaʼapaʼapa ki te ʼu lekula ʼa te ʼAtua ʼo ʼuhiga mo totatou ʼu teu pea mo te faʼahiga gaohi ʼo totatou ʼulu.—Kolose 1:10a, MN; Tito 2:10.

12. Koteā te tokoni lelei ʼe tou maʼu ʼo ʼuhiga mo te ʼu teu pea mo te faʼahiga gaohi ʼo te ʼulu ia 1 Timoteo 2:9, 10?

¹² Ei, neʼe fai e Sehova te ʼu lekula ʼo ʼuhiga mo tatatou ʼu faʼahiga teu. Neʼe fakahā e te ʼapositolo ko Paulo te tahi ʼu fakatuʼutuʼu ʼa te ʼAtua ʼo ʼuhiga mo te faʼahi ʼaia. “ ʼE ʼau loto ki te ʼu fafine ke nātou teuteu ʼaki he teu ʼe lelei, ʼaki te agavaivai pea mo te fakapotopoto, ke ʼaua naʼa nātou fai he ʼu fī ʼulu, peʼe ko he aulo, mo ni ʼu mataʼi tofe, mo ni ʼu mutuʼi meʼa totogi kovi, kae ke nātou teuteu ʼi hona ʼaluʼaga ʼe tau mo feʼauga mo te ʼu fafine ʼaē ʼe nātou lau ʼe nātou fakaʼapaʼapa ki te ʼAtua, ko tona faka ʼuhiga ʼaki he ʼu gāue ʼe lelei.”c Koteā te ako ʼe tou maʼu mai te ʼu palalau ʼa Paulo?—1 Timoteo 2:9, 10, MN.

13. (a) Koteā te faka ʼuhiga ʼo te ʼui ʼaē ke tou “teuteu ʼaki he teu ʼe lelei”? (b) He koʼe ʼe tou lava ʼui ko te ʼu lekula ʼa Sehova ʼe mole mamafa fau?

¹³ ʼE hā ʼi te ʼu palalau ʼa Paulo ʼe tonu ki te kau Kilisitiano ke nātou “teuteu ʼaki he teu ʼe lelei.” ʼE mole tonu ke nātou meʼa noaʼi tonatou ʼu teu, pea mo te gaohi ʼo tonatou ʼulu. Ko te hahaʼi fuli, tatau aipe mo nātou ʼaē ʼe māsisiva, ʼe nātou lava muliʼi te ʼu taʼi lekula ʼaia ʼaki hanatou fakamaʼa te ʼu ʼaluʼaga fuli ʼo tonatou sino. Ohage la, ʼi te taʼu fuli ko te kau Fakamoʼoni ʼi te Potu Saute ʼo Amelika ʼe nātou haʼele ʼi te ʼu kilometa ʼi te vao matuʼa, pea mo fagona lolotoga ni ʼu hola ʼi te ʼu kiʼi vaka ke feala hanatou kau ki tanatou ʼu fakatahi lalahi. ʼE feala ke tō he tahi ki te vaitafe peʼe mahae tona ʼu mutuʼi meʼa ʼi tanatou ʼu feʼoloʼaki ʼi te vao matuʼa ʼi te fagona ʼaia. Pea ka aʼu mai te hahaʼi ki te koga meʼa ʼaē ʼe fai ai te fakatahi lahi, ʼe lagi kua nātou ʼuli. Koia ʼe nātou maʼu he temi moʼo tui te ʼu foʼi fakamaʼu ʼo tonatou ʼu mutuʼi meʼa, mo tonatou ʼu meʼa toho, mo fai tanatou ʼu fō pea mo fakamolemole tonatou ʼu mutuʼi meʼa ʼaē ka nātou tui ki te fakatahi. ʼE maʼuhiga kia nātou tonatou fakaafe ʼaē ke nātou kakai ʼi te laupapa ʼo Sehova, pea ʼe nātou fia teuteu lelei kiai.

14. (a) Koteā te faka ʼuhiga ʼo te ʼui ʼaē ke tou teu “ ʼaki te agavaivai pea mo te fakapotopoto”? (b) Koteā te faka ʼuhiga kia tatou ke tou teuteu ‘ohage ko ni hahaʼi ʼe nātou fakaʼapaʼapa ki te ʼAtua’?

¹⁴ Neʼe toe ʼui e Paulo ʼe tonu anai ke tou teuteu “ ʼaki te agavaivai pea mo te fakapotopoto.” ʼE mole tou tui anai he ʼu mutuʼi meʼa ʼe hā ai tatatou fia fakahāhā, peʼe ko he ʼu mutuʼi meʼa ʼe mata faikehe, peʼe ko he ʼu mutuʼi meʼa ʼe tupu ai he sioʼi ʼo tatou ʼaki he ʼu holi kovi, peʼe tou mulimuli fau ki te faiteuteu ʼo te temi ʼaenī. ʼE tonu foki ke hā ʼi tatatou faiteuteu ‘ ʼe tou fakaʼapaʼapa ki te ʼAtua.’ ʼE ko he faʼahi ʼe tonu ke tou fakakaukauʼi. ʼE mole tonu pe ke tou teuteu lelei ʼi te ʼu temi ʼaē ʼe tou ʼolo ai ki te ʼu fono kae tou meʼa noaʼi leva totatou ʼu teu ʼi te tahi ʼu lakaga. Tuʼumaʼu pe ʼe tonu ke tou fakahā ʼi totatou ʼu teu ia tatatou manavasiʼi, mo tatatou fakaʼapaʼapa heʼe ko tatou ko te kau Kilisitiano pea mo te kau minisi ʼi te temi fuli. ʼE mahino ia ʼe tou tui anai totatou ʼu mutuʼi meʼa gāue, pea mo totatou ʼu mutuʼi meʼa ako ʼo mulimuli pe ki te ʼu meʼa ʼaē ka tou fai. Kae ʼe tonu anai ke tou teu fakaʼapaʼapa. Kapau ʼe ʼasi tuʼumaʼu ʼi totatou ʼu teu ʼe tou tui ki te ʼAtua, pea ʼe mahino ia ʼe mole tou tuʼania anai peʼe tou ufiufi ʼi te fagonogono faigamālie ʼuhi ko tatatou faiteuteu.—1 Petelo 3:15.

‘ ʼAua Naʼa Koutou Manako Ki Te Malamanei’

15, 16. (a) He koʼe ʼe maʼuhiga ke mole tou faʼifaʼitakiʼi te malamanei ʼo ʼuhiga mo tana ʼu faʼahiga teu pea mo te faʼahiga gaohi ʼo te ʼulu? (1 Soane 5:19) (b) He koʼe ʼe tonu ke tou tekeʼi te ʼu faʼahiga teu pea mo te faʼahiga gaohi ʼo te ʼulu ʼo te temi nei?

¹⁵ Ko te tokoni ʼaē ʼe tuʼu ia 1 Soane 2:15, 16, ʼe toe tokoni mai ki tatatou filifili ʼo totatou ʼu mutuʼi meʼa pea mo te gaohi ʼo totatou ʼulu. ʼE tou lau fēnei: “Aua tautou ofa i te malama-nei, mo te u mea i te malama-nei. Kapau e i ai he tahi e ofa i te malama-nei, e mole mau te ofa o te Tamai ia te ia, koteuhi ko meafuape e mau i te malama-nei, te holi a te kakano mo te holi a te mata pea mo te fiaha i te u koloa, e mole haù ia mai te Tamai, kae e haù mai te malama-nei.”

¹⁶ ʼE ʼalutahi te tokoni ʼaia mo totatou temi! ʼI te kua lahi fau ʼo te ʼu fakahala, ʼe mole tonu ke tou tuku te malamanei ke ina puleʼi ia tatatou faiteuteu. ʼI te ʼu taʼu ʼaenī, kua ʼāsili kovi te ʼu faʼahiga teu pea mo te faʼahiga gaohi ʼo te ʼulu. Māʼia mo te faʼahiga teuteu ʼa te hahaʼi ʼi te ʼu gāue pea mo te hahaʼi maʼu tuʼulaga, ʼe mole ko he faʼifaʼitaki lelei tuʼumaʼu ki te kau Kilisitiano. Koia ʼe tonu ai ke tou manatuʼi tuʼumaʼu ʼe “[mole tou] muliʼi te tuʼu ʼo te ʼu faʼahiga meʼa ʼaenī” mo kapau ʼe tou maʼuliʼi te ʼu lekula ʼa te ʼAtua pea mo tou “fakahā ia meʼa fuli te akonaki ʼo totatou Hāofakiʼaga, te ʼAtua.”—Loma 12:2, MN; Tito 2:10, MN.

17. (a) Koteā te ʼu fehuʼi ʼe tonu ke tou fai mokā ʼe tou totogi hotatou ʼu mutuʼi meʼa? (b) He koʼe ʼe tonu ke tokaga te ʼu tagata ʼohoana ke tau mo feʼauga te ʼu mutuʼi meʼa ʼo tonatou famili?

¹⁷ ʼI muʼa ʼo hakotou totogi ʼo hokotou ʼu mutuʼi meʼa, ʼe lelei ke koutou fai te ʼu fehuʼi ʼaenī: ‘He koʼe ʼe ʼau fia toʼo te faʼahiga teu ʼaia? ʼE faka ʼuhiga koa ki he tahi ʼe ʼiloa—ko he tahi koa ʼe ʼau leleiʼia? ʼE fakaʼaogaʼi koa te ʼu mutuʼi meʼa ʼaia e he ʼu hahaʼi ʼe nātou fakaneke te loto faʼitaliha peʼe ko te fakafeagai ki te puleʼaga?’ ʼE tonu ke tou vakavakaʼi fakalelei te ʼu mutuʼi meʼa ʼaē ʼe tou totogi. Kapau ko he kofu fafine peʼe ko he vala, e feafeaʼi tona loa? E feafeaʼi tona faʼahiga tui? ʼE mata fakaʼapaʼapa koa, mo lelei, pea mo tau mo totatou ʼuhiga Kilisitiano? Peʼe efihia fau koa ʼo ʼasi lelei ai te ʼu koga ʼo totatou sino, peʼe fālahi fau? Koutou fai te fehuʼi ʼaenī: ‘ ʼE fakatupu tūkia anai koa ki he tahi mo kapau ʼe ʼau tui te ʼu mutuʼi meʼa ʼaia?’ (2 Kolonito 6:3, 4) He koʼe ʼe tonu ke tou tokakaga ki te ʼu meʼa ʼaia? Koteʼuhi ʼe ʼui fēnei e te Tohi-Tapu: “Neʼe mole fai e Kilisito te meʼa ʼaē ʼe lelei pe kia te ia.” (Loma 15:3, MN ) Ko te ʼu pule famili Kilisitiano ʼe tonu ke nātou tokakaga ki tonatou ʼu famili ke nātou ʼai he ʼu mutuʼi ʼe tau mo feʼauga. ʼI tanatou fakaʼapaʼapa ki te kolōlia ʼo te ʼAtua ʼaē ʼe nātou tauhi ki ai, ʼe lototoʼa te ʼu pule famili ʼo foaki he ʼu tokoni mālohi pea mo ʼofa mokā ʼe ʼaoga ki tonatou ʼu famili.—Sakopo 3:13.

18. He koʼe ʼe tonu ke koutou tokakaga ki tokotou faʼahiga teu pea mo te faʼahiga gaohi ʼo tokotou ʼulu?

¹⁸ Ko te logo ʼaē ʼe tou fakahā ʼe haʼu mai ia Sehova, ia ia ʼaē ko te faʼifaʼitaki ʼo te fakaʼapaʼapa pea mo te maʼoniʼoni. (Isaia 6:3) ʼE uga tatou e te Tohi-Tapu ke tou faʼifaʼitakiʼi ia ia “ohage ko he fānau ʼofaina.” (Efeso 5:1, MN ) ʼAki totatou ʼu mutuʼi meʼa pea mo te gaohi ʼo totatou ʼulu, ʼe lava ʼui ai e te hahaʼi ʼe lelei peʼe kovi tatatou Tāmai ʼe ʼi selo. Kae ʼe mahino ia ʼe tou fia fakafiafia tona loto!—Tāʼaga Lea 27:11.

19. Koteā te ʼu tapuakina ʼe tou maʼu mokā tou fakahā ‘te ʼu gāue taulekaleka ʼa te ʼAtua’ ki te hahaʼi?

¹⁹ Koteā takotou manatu ki ‘te ʼu gāue taulekaleka ʼa te ʼAtua’ ʼaē neʼe koutou ako? ʼE ko he pilivilesio lahi tatatou ako te moʼoni! Pea kua fakamolemole tatatou ʼu agahala heʼe tou haga tui ki te taʼataʼa ʼaē neʼe liligi e Sesu Kilisito. (Gaue 2:38) Koia kua feala ai ke tou palalau faʼifaʼitaliha ki te ʼAtua. ʼE mole tou tuʼaniaʼi te mate ohage ko te hahaʼi ʼaē ʼe mole ʼi ai hanatou ʼamanaki. Kae ʼe fakapapau mai e Sesu, “ko nātou fuli ʼaē ʼe nonofo ʼi te ʼu falemaka fakamanatu ʼe nātou logo anai ki tona leʼo pea ʼe nātou hū mai anai ki tuʼa.” (Soane 5:28, 29, MN ) Neʼe agalelei Sehova ʼi tana fakahā mai te ʼu meʼa fuli ʼaia kia tatou. Pea tahi, neʼe ina folahi mai kia tatou tona laumālie maʼoniʼoni. Koia, ko tatatou loto fakafetaʼi ki te ʼu meʼa ʼofa fuli ʼaia ʼe tonu ke nātou uga tatou ke tou fakaʼapaʼapa ki tana ʼu lekula māʼoluga pea mo fakavikiviki mālohi kia te ia, ʼo tala ki te hahaʼi ‘te ʼu gāue taulekaleka ʼaia.’

[Kiʼi nota]

ʼE Koutou Tali Feafeaʼi Anai?

• Koteā ‘te ʼu gāue taulekaleka ʼa te ʼAtua’ neʼe logo kiai te hahaʼi ʼi te Penikosite ʼo te taʼu 33 ʼo totatou temi, pea koteā ʼaē neʼe nātou fai?

• ʼE liliu feafeaʼi he tahi ko he tisipulo ʼa Sesu Kilisito, pea koteā ʼaē ʼe fakamaʼua ki he tisipulo?

• He koʼe ʼe maʼuhiga ke tou tokaga ki totatou ʼu teu pea mo te faʼahiga gaohi ʼo totatou ʼulu?

• Koteā te ʼu meʼa ʼe tonu ke tou tokagaʼi ke tou ʼiloʼi peʼe lelei he faʼahiga teu?

[Paki ʼo te pasina 15]

Neʼe fakahā e Petelo kua fakatuʼuake Sesu mai te mate

[Paki ʼo te pasina 17]

ʼAki tokotou ʼu teu, ʼe vikiʼi koa te ʼAtua ʼaē ʼe koutou tauhi ki ai?

[Paki ʼo te pasina 18]

ʼE tonu ke tokakaga te ʼu mātuʼa Kilisitiano ke tau mo feʼauga te ʼu mutuʼi meʼa ʼo tonatou famili