ʼE Tonu Ke Tou Feafeaʼi Mo Te ʼu ʼAhiʼahi?

TE ʼU ʼahiʼahi! ʼE tou tau fuli mo te ʼu ʼahiʼahi. ʼE feala ke hoko te faʼahi ʼaia heʼe mole felogoi he toko lua ʼuhi ko tonā ʼu agaaga, peʼe ko he ʼu fihifihia faka ekonomika, peʼe ko te mahaki, peʼe ko he ʼu fakahala, peʼe ko he ʼu fakaneke ʼo he ʼu kaugā ako ke kita fai he meʼa ʼe kovi, peʼe ko te fakataga, peʼe ko he ʼu faigataʼaʼia ʼi tatatou mole pipiki ki te ʼu meʼa ʼo te mālama peʼe ko te tauhi tamapua, pea mo te tahi ʼu tupuʼaga. Logope he faʼahiga ʼahiʼahi, kae ʼe tautau fakatupu ai he hoha lahi. E feafeaʼi hatatou tauʼi fakalelei ia te ʼu faʼahi ʼaia? ʼE ʼi ai koa he meʼa ʼe feala ke fua lelei ai kia tatou?

Te Tokoni ʼAē ʼe Lelei ʼAupito

Ko te Hau ko Tavite neʼe hoko ki ai te ʼu ʼahiʼahi ʼi tona maʼuli katoa, kae neʼe mate agatonu. Koteā ʼaē neʼe tupu ai tana lava kātakiʼi? Neʼe ina fakahā te tupuʼaga ʼo tona mālohi ʼi tana ʼu palalau ʼaenī: “Ko Sehova ko toku Tagata Tauhi Ōvi. ʼE mole ʼau masiva anai.” Pea neʼe ina toe ʼui fēnei: “Tatau aipe peʼe ʼau haʼele ʼi te sia ʼo te fakapōʼuli, ʼe mole ʼau mataku ki he meʼa kovi, heʼe ke nofo mo ʼau; ko tou tokotoko pea mo tou kauʼi ʼakau ʼe ko te ʼu meʼa ʼaē ʼe nā fakafimālieʼi ʼau.” (Pesalemo 23:1, 4) Ei, ko Sehova ʼe lagolago tuʼumaʼu kia tatou. Neʼe tokoni kia Tavite ʼi te ʼu temi neʼe faigataʼa ʼaupito ai tona maʼuli, pea ʼe ina lava fai te faʼahi ʼaia maʼa tatou mo kapau ʼe ʼaoga.

ʼE lava tokoni feafeaʼi mai ia Sehova kia tatou? ʼE fakahā mai e te Tohi-Tapu ʼo ina ʼui fēnei: “Koutou ʼahiʼahi pea mo koutou vakaʼi ko Sehova ʼe lelei.” (Pesalemo 34:8) ʼE ko he fakaafe lelei, kae koteā koa tona faka ʼuhiga? ʼE ko he fakaloto mālohi ke tou tauhi kia Sehova pea ke tou fetogi totatou maʼuli ke ʼalutahi mo tona finegalo. Ko tona faka ʼuhiga ke tou līaki tatatou faʼahiga faʼifaʼitaliha kae tou fai he ʼu sakilifisio. ʼI ʼihi ʼaluʼaga, ʼe lava iku ai ki he ʼu ʼahiʼahi—te ʼu fakataga pea mo te ʼu mamahi. Kae ko nātou ʼaē ʼe nātou tali ia te fakaafe ʼa Sehova mo tonatou loto katoa, ʼe mole tonu anai ʼi he temi ke nātou fakahemala ki te tonu ʼaia neʼe nātou fai. ʼE taupau fakalelei anai ia Sehova kia nātou. ʼE ina takitaki anai ia nātou pea mo tokaga kia nātou ʼi te faʼahi fakalaumālie. ʼE lagolago anai kia nātou ʼi te ʼu ʼahiʼahi, ʼaki tana Folafola, tona laumālie maʼoniʼoni, pea mo te kokelekasio faka Kilisitiano. Pea ʼe ina fakapale anai ia nātou ʼaki te maʼuli heʼegata.—Pesalemo 23:6; 25:9; Isaia 30:21; Loma 15:5.

Ko nātou ʼaē ʼe nātou fakatotonu ke nātou fetogi tonatou maʼuli ke nātou tauhi kia Sehova pea mo nātou pipiki maʼu ki te tonu ʼaia, ʼe nātou tokagaʼi ʼe fakahoko e Sehova tana ʼu fakapapau fuli. Neʼe hoko te faʼahi ʼaia ki te kau Iselaele ʼaē neʼe nātou muliʼi ia Sosue ʼo aʼu ki te Kele ʼo Te Fakapapau. ʼI tanatou ʼosi fakalaka ʼi te Solotane, neʼe ʼi ai te ʼu ʼahiʼahi neʼe tonu ke nātou kātakiʼi, mo te ʼu tau, pea mo te ʼu ako fakatupu mamahi neʼe tonu ke nātou mahino kiai. Ko te taʼiake ʼaia neʼe agatonu age nātou ʼi tanatou ʼu kui, ʼaē neʼe mavae mai Esipito pea neʼe mamate ʼi te toafa. Koia neʼe tokoni ai ia Sehova ki te kau agatonu ʼaia, pea ʼo ʼuhiga mo tonatou maʼuli ʼi te mate ʼo Sosue, ʼe fakamatala fēnei e te Tohi-Tapu: “Neʼe tuku age e Sehova kia nātou he mālōlō ʼi te ʼu faʼahi fuli, ʼo mulimuli pe ki te ʼu faʼahi fuli neʼe ina fakapapau age ki tanatou ʼu kui . . . Neʼe mole he fakapapau neʼe mole hoko ʼi te ʼu fakapapau lelei fuli ʼaē neʼe fai e Sehova ki te ʼapi ʼo Iselaele; neʼe hoko fuli.” (Sosue 21:44, 45) ʼE feala pe ke hoko te faʼahi ʼaia kia tatou mo kapau ʼe tou falala katoa kia Sehova ʼi te ʼahiʼahi pea mo te ʼu temi fuli.

Koteā ʼaē ʼe feala ke ina fakavaivaiʼi tatatou falala kia Sehova? Neʼe ʼi ai te faʼahi neʼe talanoa kia ia Sesu ʼo ina ʼui fēnei: “Mole he tahi e feala ke kaugana kia aliki e lua . . . E mole feala ke koutou kaugana ki te Atua pea mo te Paaga.” (Mateo 6:24) Kapau ʼe tou falala kia Sehova, ʼe mole tou fai anai ohage ko te tokolahi ʼo te mālama, ʼaē ʼe nātou kumi te fīmālie ʼi te ʼu koloā. Neʼe tokoniʼi fēnei e Sesu tana kau tisipulo: “Ke koutou haga kumi muʼa te puleʼaga pea mo tona faitotonu, pea ʼe toe foaki atu anai mo te ʼu meʼa fuli ʼaia [ia te ʼu koloā tāfito] kia koutou.” (Mateo 6:33, MN ) Ko te Kilisitiano ʼaē ʼe ina maʼu he fakafuafua lelei ki te ʼu koloā fakasino pea mo ina fakamuʼamuʼa te Puleʼaga ʼo te ʼAtua ʼi tona maʼuli ʼe ina fai he filifili ʼe lelei. (Tagata Tānaki 7:12) Kae ʼe mahino ia ʼe ʼi ai te meʼa ʼe tonu ke ina totogi. ʼE lagi ko he ʼu sakilifisio ʼi te faʼahi faka koloā. Kae ʼe lahi anai te ʼu fakapale ka ina maʼu. Pea ʼe lagolago anai ia Sehova kia ia.—Isaia 48:17, 18.

Te Ako ʼe Tou Maʼu Mai Te ʼu ʼAhiʼahi

ʼE mahino ia ko te filifili ʼaē ke tou ‘ ʼahiʼahi pea mo vakaʼi ko Sehova ʼe lelei’ ʼe mole faka ʼuhiga leva, ʼe ina puipui tatou mai te ʼu meʼa fakafokifā ʼaē ʼe hoko ki totatou maʼuli; peʼe ina puipui katoa tatou mai te tauʼi ʼo tatou e Satana pea mo tana ʼu hahaʼi. (Tagata Tānaki 9:11) Koia ʼe hoko ʼe ʼahiʼahiʼi ai te fakamalotoloto pea mo te lotomālohi ʼa te Kilisitiano. He koʼe ʼe tuku e Sehova ke ʼahiʼahi feiā tana kau atolasio? Neʼe fakahā e te ʼapositolo ko Petelo tona tupuʼaga ʼi tana tohi fēnei: “Logola ʼi he kiʼi temi nounou ʼi te temi ʼaenī, kapau ʼe tonu ke hoko, ʼe koutou lotomamahi ʼuhi ko te ʼu ʼahiʼahi kehekehe, ke feala ki te maʼuhiga ʼo takotou tui ʼaē kua ʼahiʼahiʼi, ʼaē ʼe maʼuhiga age ʼi te aulo ʼaē ʼe feala ke ʼauha logope tona kua ʼahiʼahiʼi ʼi te afi, ke liliu ko he meʼa ke vikiʼi, mo faka kolōliaʼi pea mo faka maʼuhigaʼi ʼi te temi ʼo te fakahā ʼo Sesu Kilisito.” (1 Petelo 1:6, 7, MN ) Ei, ko te ʼu ʼahiʼahi ʼe nātou faka fealagia mai kia tatou ke tou ʼiloʼi peʼe lelei tatatou faʼahiga tui pea mo totatou faʼahiga ʼofa kia Sehova. Pea ʼe nātou faka fealagia mai ke tou tali ki te ʼu manukinuki pea mo te ʼu tukugakovi ʼaē ʼe fai e Satana te Tevolo.—Tāʼaga Lea 27:11; Apokalipesi 12:10.

Ko te ʼu ʼahiʼahi ʼe toe tokoni foki kia tatou ke tou fakatuputupu he tahi ʼu kalitate faka Kilisitiano. Ohage la, tou tokagaʼi age muʼa te ʼu palalau ʼa te tagata fai pesalemo: “ ʼE sio [ia Sehova] kia ia ʼaē ʼe agavaivai; kae ko ia ʼaē ʼe fialahi, ʼe mamaʼo ia te ia.” (Pesalemo 138:6) Tokolahi ia tatou ʼe mole tou agavaivai, kae ʼe lava tokoni mai te ʼu ʼahiʼahi ke tou fakatuputupu te kalitate maʼuhiga ʼaia. Koutou manatuʼi te temi ʼo Moisese, te temi ʼaē neʼe kua fiu ai ʼihi Iselaele ʼi te kai ki te mane ʼi te vāhaʼa fuli, mo te māhina fuli. ʼE ʼiloga ia neʼe ko he ʼahiʼahi kia nātou, logola ko te mane neʼe ko he meʼa kai neʼe foaki faka milakulo age kia nātou. Neʼe koteā te tupuʼaga ʼo te ʼahiʼahi ʼaia? Neʼe ʼui fēnei e Moisese kia nātou: “[Ko Sehova] neʼe ina fāgai ia koe ʼi te toafa ʼaki te mane . . . moʼo fakatō laloʼi koe pea mo ʼahiʼahiʼi koe.”—Teutalonome 8:16.

ʼE feala ke feiā te ʼahiʼahiʼi ʼo takotou agavaivai. ʼO feafeaʼi? ʼE tou tali feafeaʼi mokā hoko he ʼu fakafoʼou ʼi te kautahi? (Isaia 60:17) ʼE tou lagolago koa mo totatou loto katoa ki te gāue fai faka mafola pea mo te gāue fai ako? (Mateo 24:14; 28:19, 20) ʼE tou tali leleiʼi koa te ʼu fakamahino faka Tohi-Tapu ʼe tuku mai e “te kaugana agatonu mo fakapotopoto”? (Mateo 24:45-47; Tāʼaga Lea 4:18) ʼE tou lava tekeʼi koa te holi ke kita maʼu te ʼu meʼa foʼou ʼaē neʼe hoki faʼu pe, te mulimuli ki he faʼahiga lamote foʼou, peʼe ko te fia toʼo ʼa he faʼahiga motokā foʼou? Ko te tagata agavaivai ʼe feala ke ʼio ki te ʼu fehuʼi ʼaia.—1 Petelo 1:14-16; 2 Petelo 3:11.

ʼE feala ke tokoni mai te ʼahiʼahi ke tou fakatuputupu he tahi kalitate maʼuhiga—ia te faʼa kātaki. Neʼe ʼui fēnei e te tisipulo ko Sakopo: “Koutou faka ʼuhigaʼi te faʼahi ʼaia ohage ko he fiafia katoa, ʼoku tēhina, mokā koutou felāveʼi mo he ʼu faʼahiga ʼahiʼahi kehekehe, ʼi takotou ʼiloʼi ʼaē ko te maʼuhiga ʼo takotou tui ʼaē kua ʼahiʼahiʼi ʼe ina fakatupu te faʼa kātaki.” (Sakopo 1:2, 3, MN ) Ko te lavaʼi ʼo he ʼu tuʼuga ʼahiʼahi ʼaki te falala katoa kia Sehova, ʼe ina fakatuputupu ai he pipiki maʼu, mo he fai hoholo pea mo te agatonu. ʼE ina fakamālohiʼi tatou ke tou lava tekeʼi he tahi ʼu ʼohofi ʼa Satana, te ʼatua ʼitaʼita ʼo te mālama ʼaenī.—1 Petelo 5:8-10; 1 Soane 5:19; Apokalipesi 12:12.

Tou Maʼu He Manatu Fakapotopoto ʼo ʼUhiga Mo Te ʼu ʼAhiʼahi

Ko te ʼAlo haohaoa ʼo te ʼAtua, ia Sesu Kilisito, neʼe tau mo te ʼu tuʼuga ʼahiʼahi ʼi te temi ʼaē neʼe nofo ai ʼi te kele, pea neʼe lahi te ʼu fakapale neʼe ina maʼu ʼi tana kātakiʼi te ʼu faʼahi ʼaia. Neʼe tohi e Paulo ko Sesu “nee ina ako te fakalogo i te u mamahi nee ina tali.” (Hepeleo 5:8) Ko tana agatonu ʼo hoko ai mo tana mate, neʼe fakatupu ai he fakavikiviki ki te huafa ʼo Sehova pea mo faka fealagia ai kia Sesu ke ina totogi te malamanei ʼaki tona maʼuli fakatagata haohaoa. Ko te faʼahi ʼaia neʼe ina faka fealagia ai kia nātou ʼaē ʼe tui kia Sesu ke nātou maʼu te ʼamanaki ʼo te maʼuli heʼegata. (Soane 3:16) ʼI te nofo agatonu ʼa Sesu ʼi te temi ʼo te ʼahiʼahi, kua liliu ʼi te temi nei ko tatatou Pelepitelo Lahi pea kua fakanofo Hau.—Hepeleo 7:26-28; 12:2.

Kae e feafeaʼi kia tatou? ʼO toe feiā pe, ʼe tou maʼu anai he ʼu tapuakina lahi mo kapau ʼe tou nofo agatonu lolotoga he ʼu ʼahiʼahi. ʼO ʼuhiga mo nātou ʼaē ʼe ʼamanaki ke nātou maʼuʼuli ʼi selo, ʼe ʼui fēnei e te Tohi-Tapu: “Manuʼia te tagata ʼaē ʼe ina faʼa kātakiʼi te ʼahiʼahi, koteʼuhi ʼi tana liliu ko he tagata kua fakamoʼoni, ʼe ina maʼu anai te kolona ʼo te maʼuli ʼaē neʼe fakapapau e Sehova kia nātou ʼe haga ʼofa kia te ia.” (Sakopo 1:12, MN ) Ko nātou ʼaē ʼe ʼamanaki ki he maʼuli ʼi te kele ʼe nātou lava tui papau, kapau ʼe nātou kātaki ʼo nātou nonofo agatonu, ʼe nātou maʼu anai te maʼuli heʼegata ʼi te palatiso kelekele. (Apokalipesi 21:3-6) Pea ko te meʼa ʼaē ʼe maʼuhiga ʼaupito, ko tanatou agatonu ʼe ina fakatupu ai he fakavikiviki ki te huafa ʼo Sehova.

Kapau ʼe tou muliʼi te ʼu tafuga vaʼe ʼa Sesu, ʼe feala ke tou falala ko te ʼu ʼahiʼahi fuli ʼaē ʼe tau mo tatou ʼi te tuʼu ʼo te ʼu faʼahiga meʼa ʼaenī ʼe feala ke pulihi katoa. (1 Kolonito 10:13; 1 Petelo 2:21) ʼO feafeaʼi? ʼAki tatatou falala kia Sehova, ʼaē ʼe ina foaki ia “te mālohi ʼaē ʼe laka age ʼi te mālohi māhani” kia nātou ʼaē ʼe falala kia te ia. (2 Kolonito 4:7, MN ) ʼOfa pe ke tou hage ko Sopo ʼaē ʼi tana lolotoga kātakiʼi te ʼahiʼahi faigataʼa neʼe ina tala fēnei ʼaki he loto falala: “ ʼI te hili anai ʼo tana ʼahiʼahiʼi ia ʼau, ʼe ʼau mavae mai anai kua ʼau hage ko te aulo.”—Sopo 23:10.

[Paki ʼo te pasina 31]

Ko te nofo agatonu ʼa Sesu ʼi te ʼu ʼahiʼahi, neʼe tupu ai te fakavikiviki ʼo te huafa ʼo Sehova. ʼE tou lava fai feiā mo tatou