ʼE Fakapale Te Faʼa Kātaki
1 “ ʼAki takotou faʼa kātaki, ʼe koutou maʼu ai anai tokotou ʼu nefesi.” (Luka 21:19, MN ) Ko te ʼu palalau ʼaia ʼe kau ki te lea faka polofeta ʼa Sesu ʼo ʼuhiga mo “te fakaʼosi ʼo te tuʼu ʼaenī,” ʼe fakahā lelei mai, kapau ʼe tou taupau tatatou agatonu, pea ʼe tou tau anai mo he ʼu tuʼuga faigataʼaʼia. Kae ʼaki te mālohi ʼo Sehova, ʼe feala kia tatou takitokotahi ke tou ‘faʼa kātaki ʼo aʼu ki te fakaʼosi’ pea ʼe “tou maʼuli anai.”—Mat. 24:3, 13, MN; Filp. 4:13.
2 Ko te ʼu fakataga, mo te mahaki, mo te ʼu faigataʼaʼia faka paʼaga, pea mo te lotomamahi ʼe feala ke liliu ʼo faigataʼa ʼaupito. Kae ʼaua naʼa galo kia tatou ʼe faiga e Satana ke ina maumauʼi tatatou nofo agatonu kia Sehova. Ko te ʼaho fuli pe ʼaē ʼe tou nofo agatonu ai ki tatatou Tāmai, ʼe tou fakafeagai ai kia Ia ʼaē ʼe ina fakahalaʼi tatou. ʼI meʼa fakafiafia hatatou ʼiloʼi ʼe mole galoʼi totatou ʼu “loʼimata” ʼaē neʼe hali ʼi te ʼu temi faigataʼa. ʼE maʼuhiga kia Sehova te faʼahi ʼaia, pea ʼe fiafia ʼi tatatou nonofo agatonu!—Pes. 56:8; Taag. 27:11.
3 ʼE Tou Liliu ʼo Katoa ʼAki Te ʼu ʼAhiʼahi: Ko te lotomamahi ʼe feala ke ina fakahā he vaivaiʼaga ʼo tatatou tui peʼe ko he faʼahi ʼe mole lelei ʼi totatou ʼulugaaga, ohage ko te fialahi peʼe ko te mole lava atalitali. ʼE mole tou faiga anai ke tou hola peʼe tou fakagata te ʼu fihifihia ʼaki he ʼu aga ʼe mole ʼalutahi mo te Tohi-Tapu, kae ʼe tou manatuʼi anai te tokoni ʼa te Folafola ʼa te ʼAtua, “ke fai ke katoa te gāue ʼa te faʼa kātaki.” Koteā tona tupuʼaga? Koteʼuhi ko tatatou faʼa kātaki agatonu ia te ʼu faigataʼaʼia ʼe tokoni mai ke tou liliu ʼo “katoa pea mo haohaoa ia faʼahi fuli.” (Skp. 1:2-4, MN ) Ko te faʼa kātaki ʼe tokoni mai ke tou maʼu te ʼu kalitate maʼuhiga, ohage ko te fakapotopoto, mo te lotomahino, pea mo te manavaʼofa.—Loma 12:15.
4 Ko He Tui Kua ʼAhiʼahiʼi: Ka tou kātakiʼi te ʼu faigataʼaʼia, ʼe tou maʼu ai he tui kua ʼahiʼahiʼi ʼe maʼuhiga kia mata ʼo te ʼAtua. (1 Pet. 1:6, 7) ʼE tokoni mai te tui ke tou tutuʼu mālohi mokā hoko mai anai he ʼu faigataʼaʼia. Tahi ʼaē meʼa, ʼe tou ʼiloʼi ʼe ʼofa te ʼAtua kia tatou, pea ʼe fakamālohi ai tatatou ʼamanaki, ke tou tui moʼoni kiai.—Loma 5:3-5.
5 Ko te fakapale ʼo tatatou faʼa kātaki ʼe fakahā lelei ia Sakopo 1:12, ʼaē ʼe ʼui fēnei ai: “Manuia te tagata e ina katakiʼi te ahiahi! Koteuhi, i te hili o tona ahiahiʼi, e ina tali anai te kolona o te mauli.” Koia, tou tutuʼu mālohi ʼi tatatou tauhi kia Sehova, ʼo tou falala ʼe ina fakapale lahi anai ia “natou e oʼofa ia te ia.”