‘Fiafia Te Tagata ʼAē ʼe Ina Haga Kātakiʼi Te Faigataʼaʼia’
1 ʼE hoko ki te kau Kilisitiano fuli te ʼu faigataʼaʼia. (2 Tim. 3:12) ʼE feala ke liliu te mahaki ko he meʼa faigataʼa, peʼe ko he ʼu fihifihia faka paʼaga, peʼe ko he ʼu fakahala, he fakataga peʼe ko he tahi age ʼu faʼahi. ʼE fakatupu e Satana te ʼu faigataʼaʼia moʼo fakavaivaiʼi ʼo tātou, peʼe ke mole tou toe fakamuʼamuʼa tatatou minisitelio faka Kilisitiano, peʼe mo fakagata tatatou tauhi ʼaē ki te ʼAtua. (Sopo 1:9-11) ʼE tou lava maʼu feafeaʼi te fiafia ʼi tatatou kātakiʼi te ʼu faigataʼaʼia?—2 Pet. 2:9.
2 Tou Teuteu Ki Te Hoko Mai ʼo He ʼu Faigataʼaʼia: Neʼe foaki mai e Sehova tana Folafola ʼo te moʼoni, ʼaē ʼe tou maʼu ai mo te fakamatala ʼo te maʼuli pea mo te ʼu akonaki ʼa Sesu. ʼI tatatou logo pea mo maʼuliʼi te ʼu folafola ʼa Sesu, ʼe tou fakatuʼu he tafitoʼaga mālohi pea mo tou teuteu ai ki te hoko mai ʼo he ʼu faigataʼaʼia. (Luka 6:47-49) ʼE tou toe maʼu te mālohi mai te tahi ʼu fakatuʼutuʼu—totatou ʼu tehina mo tuagaʼane, mo te ʼu fono ʼi te kōkelekāsio, pea mo te ʼu tohi faka Tohi-Tapu mai te kalasi ʼo te tagata kaugana agatonu mo poto. ʼE tou fakaʼaogaʼi faʼifaʼitaliha te meʼa ʼofa mai te ʼAtua, ʼaē ko te faikole.—Mat. 6:13.
3 Neʼe toe foaki mai e Sehova he ʼamanaki. Kā tou tui mālohi ki te ʼu fakapapau ʼa Sehova, pea ʼe liliu tatatou tui ohagē ko “he foʼi tau ki te maʼuli, ʼe moʼoni ia pea ʼe tukupau ia.” (Hep. 6:19) ʼI te temi ʼo te Tohi-Tapu, neʼe ʼi ai tuʼumaʼu pē ʼi te ʼu vaka, ia te foʼi tau ʼi tanatou mavae ʼi te uafu, tatau aipē pē neʼe lāulelei te temi. Kapau neʼe hoko fakapunamaʼuli he ʼafā, pea neʼe lī te foʼi tau ki te tai moʼo tāʼofi ai te vaka naʼa tuta ki he foʼi maka. ʼO toe fēia aipē, kapau ʼe tou tui ʼi temi nei ki te ʼu fakapapau ʼa te ʼAtua, pea ʼe tou tutuʼu mālohi anai mokā hoko mai he ʼu tuʼuga faigataʼaʼia. ʼE feala ke hoko fakafokifā pē he ʼu faigataʼaʼia. Logolā ʼi te kamata neʼe tali lelei te gāue fai faka mafola ʼa Paulo pea mo Palenapa ʼi Lisitala, kae neʼe fetogi vave te ʼaluʼaga ʼaia ʼi te temi ʼaē neʼe ʼomai ai te kau fakafeagai Sutea.—Gāue 14:8-19.
4 ʼE Tou Maʼu Te Fiafia Mokā Tou Faʼa Kātaki: ʼE tokalelei totatou ʼatamai mokā tou haga fai faka mafola logolā te fakafeagai. ʼE tou fiafia mokā tāu mo tātou totatou fakalainoaʼi ʼuhi ko Kilisito. (Gāue 5:40, 41) Ko te kātakiʼi ʼo te ʼu faigataʼaʼia ʼe tokoni mai ke kātoa age iā tātou te ʼu kalitātē ohagē ko te agavaivai, te fakalogo pea mo te faʼa kātaki. (Teu. 8:16; Hep. 5:8; Sake 1:2, 3) ʼE akoʼi ai tātou ke tou falala kiā Sehova, mo tui ki tana ʼu fakapapau, pea mo kumi haofaki kiā te ia.—Taag. 18:10.
5 E tou ʼiloʼi ʼe fakatemi pē te ʼu faigataʼaʼia. (2 Ko. 4:17, 18) ʼAki te ʼu faigataʼaʼia, ʼe feala ai ke tou fakahā te loloto ʼo totatou ʼofa kiā Sehova. Ko tatatou kātakiʼi te ʼu faigataʼaʼia ʼaia, ʼe foaki ai he tali ki te ʼu tukugākoviʼi ʼa Satana. Koia ʼaua naʼa tou fakaʼauʼauganoa! “Fiafia te tagata ʼaē ʼe ina haga kātakiʼi te ʼahiʼahi, koteʼuhi ʼi tana liliu ko he tagata kua leleiʼia, ʼe ina maʼu anai te kolona ʼo te maʼuli.”—Sake 1:12.