“Omai Kia Te Au, . . . Pea e Au Fakafimalieʼi Anai Koutou”
Te Kau Tūpulaga ʼAē ʼe Nātou Hage Ko He ʼu Mosiʼi Hahau Mokomoko
ʼE MAHINO papau ko Sesu Kilisito neʼe ina manatuʼi mo te kau tūpulaga, ʼi tana ʼui fēnei: “Omai kia te au, . . . pea e au fakafimalieʼi anai koutou.” (Mateo 11:28) ʼI te kamata ʼaumai e te hahaʼi tanatou ʼu tamaliki kia te ia, neʼe faiga e tana kau tisipulo ke nātou tāʼofi nātou. Kae neʼe ʼui fēnei e Sesu: “Koutou tuku te tamaliki ke omai kia te au, aua tautou taofi natou.” Pea ko Sesu neʼe ina “fua ake natou o umai, pea . . . mo tapuakiʼi natou.” (Maleko 10:14-16) ʼE mahino papau ia neʼe maʼuhiga ʼaupito te kau tūpulaga kia Sesu.
ʼE talanoa te Tohi-Tapu ki te ʼu tama pea mo te ʼu taʼahine, mo te ʼu kiʼi tamaliki neʼe nātou tuku he faʼifaʼitaki lelei ʼi te tauhi ki te ʼAtua. ʼE fakakikite ʼi te tohi ʼo Pesalemo ko te “kau tūpulaga” ʼe nātou hage ko he ʼu mosiʼi hahau mokomoko. ʼE toe talanoa ki he “kau tūpulaga” pea mo he “kau taupoʼou” ʼe nātou fakavikiviki ki te huafa ʼo Sehova.—Pesalemo 110:3; 148:12, 13.
Ko He Potu ʼe Tuputupu Ai Te Kau Tūpulaga
ʼE lelei te fakatatau ʼa te kau tūpulaga ki he ʼu mosiʼi hahau, koteʼuhi ko te hahau ʼe faka ʼuhiga ki te mahu pea mo te tapuakina. (Senesi 27:28) Ko he ʼu mosiʼi hahau ʼe logo lelei ki te sino pea mo mokomoko. ʼI te temi ʼaenī ʼaē ʼe ʼafio ai Kilisito, ʼe tokolahi te kau Kilisitiano tūpulaga ʼe nātou foaki tonatou maʼuli ʼaki he lotolelei. Ohage pe ko he ʼu mosiʼi hahau mokomoko, ko te ʼu tama pea mo te ʼu taʼahine ʼe nātou tauhi fakafiafia ki te ʼAtua pea mo nātou lagolago ki tonatou ʼu tēhina pea mo tuagaʼane.—Pesalemo 71:17.
ʼE mole fakafiafia pe e te kau Kilisitiano tūpulaga te hahaʼi, kae ʼe nātou toe fiafia mo nātou ʼi tanatou tauhi. Ko te kautahi ʼa te ʼAtua ʼe ko he potu ʼe feala ke nātou tuputupu ai. ʼI tanatou mulimuli ki te ʼu lekula māʼoluga ʼo ʼuhiga mo te aga ʼaē ʼe tonu ke fai, ko te kau tama pea mo te kau taʼahine ʼe nātou felogoi lelei mo te ʼAtua. (Pesalemo 119:9) ʼI te kokelekasio, ʼe nātou fai he ʼu gāue ʼe lelei pea mo nātou maʼu he ʼu kaumeʼa lelei—ʼe tokoni te ʼu faʼahi ʼaia ke nātou fiafia ʼi tonatou maʼuli.
‘Ko He Faitoʼo Pea Mo Fakamokomoko’
ʼE manatu koa e te kau tūpulaga Kilisitiano, ʼe nātou hage ko he ʼu “mosiʼi hahau”? Ko Tania, ko te taʼahine ʼe gāue lahi ʼi te kokelekasio pea mo fiafia ʼi tana fai ia hola e 70 ʼi te minisitelio ʼi te māhina fuli. Koteā tana manatu? ʼE ina ʼui fēnei: “ ʼE ʼau logo fīmālie pea mo mālohi. Ko taku maʼu ʼi toku maʼuli ia Sehova pea mo tana kautahi ʼaē ʼi te kele, neʼe ‘ko he faitoʼo pea mo he meʼa fakamokomoko’ kia ʼau.—Tāʼaga Lea 3:8.
Ko Ariel, ko te pionie katoa kei finemui, ʼe ina leleiʼia ʼaupito te meʼa kai fakalaumālie ʼaē ʼe foaki ʼi te kokelekasio. ʼE ina ʼui fēnei: “ ʼI taku ʼalu ki te ʼu fono, mo te ʼu fakatahi pea mo ʼau kai ʼi te laupapa fakalaumālie ʼo Sehova, ʼe fakamokomoko ʼaupito kia ʼau ʼi te faʼahi fakalaumālie. Pea ʼe ʼau lotomālohi ʼi taku ʼiloʼi ʼaē ʼe ʼi ai toku ʼu kaugā gāue ʼi te malamanei katoa.” ʼO ʼuhiga mo te matapuna ʼo te fakamokomoko ʼaia, ʼe ina ʼui fēnei: “ ʼE fakamokomoko ʼaupito tatatou fakakaumeʼa mo Sehova, tāfito la mokā ʼau logo peʼe ʼau sio ki te ʼu fua kovi ʼo te tuʼu ʼaenī ki te hahaʼi.”—Sakopo 2:23.
ʼI tona taʼu 20, ko Abishai ʼe pionie katoa pea mo tagata faifekau faka minisitelio ʼi te kokelekasio. ʼE ina ʼui fēnei: “ ʼE fakamokomoko kia ʼau taku ʼiloʼi ʼaē peʼe feafeaʼi taku tauʼi te ʼatu ʼu fihifihia ʼaē ʼe hoko ki te kau tūpulaga ia ʼaho nei. Ko te moʼoni ʼa te Tohi-Tapu ʼe tokoni mai ke ʼau tokaga tuʼumaʼu ki te meʼa ʼaē ʼe tonu ke ʼau fai, ke ʼau tauhi ai kia Sehova ʼaki toku loto katoa.”
Ko Antoine, neʼe ko he tūpulaga neʼe hoko ʼita. Neʼe ina tāʼi te tahi kaugā ako ʼaki te hekaʼaga, pea neʼe ina hukiʼi te tahi ʼaki te peni. Ko Antoine neʼe mole hage ko he mosiʼi hahau mokomoko. Kae ʼi tana ako te Tohi-Tapu neʼe fetogi ai tana aga. ʼI te temi nei, ʼi tona taʼu 19 ʼe ko he tagata faifekau faka minisitelio pea mo pionie katoa ʼi te kokelekasio, pea ʼe ina ʼui fēnei: “ ʼE ʼau fakamālo kia Sehova ʼi tana tuku mai te fealagia ke ʼau maʼu te ʼatamai mālama ʼo ʼuhiga mo ia, pea mo tokoni mai ke ʼau mahino ʼe tonu ke ʼau loto lolomi pea mo fetogi toku maʼuli. ʼAki te faʼahi ʼaia, kua ʼau tekeʼi te ʼu tuʼuga fihifihia.”
Ko te hahaʼi ʼe nātou tokagaʼi te agalelei ʼa te kau tūpulaga Kilisitiano. Ko Matteo ko te tēhina tūpulaga ʼi Italia. Neʼe fakatotonu e tona tagata faiako ko ia ʼaē ʼe tauvele ʼe tonu anai ke ina totogi he tūʼa. Hili te temi kiai, neʼe kole e te kau tamaliki ke molehi te fakatotonu ʼaia, he neʼe nātou ʼui “ ʼe faigataʼa hanatou mole tauvele.” Neʼe ʼui fēnei e Matteo: “Kae neʼe ʼui e te fafine faiako ʼe mole feala te faʼahi ʼaia, pea neʼe ina fakaʼaogaʼi ia ʼau ko he Fakamoʼoni ʼa Sehova ohage ko he faʼifaʼitaki, ʼo ina vikiʼi ʼau ia muʼa ʼo te kalasi heʼe mole ʼau tauvele.”
ʼI te kalasi ʼi Tailani ʼe ʼuigataʼa ai te tamaliki, neʼe pāui e te fafine faiako te kiʼi tūpulaga ʼe taʼu 11 ko Racha ke tuʼu ia muʼa ʼo te kalasi, pea neʼe ina vikiʼi ia ia ʼuhi ko tana aga, ʼo ina ʼui fēnei: “He koʼe koa ʼe mole koutou mulimuli fuli ki tona faʼifaʼitaki? ʼE faʼa gāue pea ʼe lelei mo tana aga.” Pea neʼe ina ʼui ki te kau tamaliki ako: “ ʼE ʼau mahalo ʼe tonu anai ke koutou liliu ko he kau Fakamoʼoni ʼa Sehova, ohage ko Racha, ke fetogi ai takotou aga.”
ʼE ko he meʼa fakafiafia te sio ki te ʼu lauʼi afe kau Kilisitiano tūpulaga ʼe nātou ʼiloʼi ia Sehova pea mo fai tona finegalo. ʼE maʼu e te kau tūpulaga ʼaia te poto ʼa te hahaʼi lalahi. ʼE feala ke tokoni te ʼAtua kia nātou ke fiafia tonatou maʼuli ʼi te temi nei pea mo ina foaki kia nātou he ka haʼu faka kolōlia ʼi te mālama foʼou ka haʼu. (1 Timoteo 4:8) ʼI te tuʼu ʼaenī ʼaē ʼe hoge ʼi te faʼahi fakalaumālie, pea mo fonu ai te kau tūpulaga ʼe lotomamahi pea mo lotohoha, ʼe foaki e te kau tūpulaga Kilisitiano he fakamokomoko makehe.