Tou Gāueʼi Te Fakalogo Heʼe Kua Ōvi Mai Te Fakaʼosi

“ ʼE ina maʼu anai [e Silo] te fakalogo ʼa te hahaʼi.”—Senesi 49:10.

1. (a) ʼI te temi muʼa, neʼe tau faka ʼuhiga kiteā te fakalogo kia Sehova? (b) Koteā ʼaē neʼe fakakikite e Sakopo ʼo ʼuhiga mo te fakalogo?

KO TE fakalogo kia Sehova, neʼe tau faka ʼuhiga ki te fakalogo ʼa tana hahaʼi ki tana kau fakafofoga. Neʼe kau ia nātou ʼaia te kau ʼaselo, te kau pateliaka, te ʼu tuʼi fakamāu, te kau pelepitelo, te kau polofeta pea mo te ʼu hau. Ko te hekaʼaga ʼo te ʼu hau ʼo Iselaele neʼe toe fakahigoaʼi ko te hekaʼaga hau ʼo Sehova. (1 Fakamatala 29:23) Kae meʼa fakaʼofaʼofa heʼe tokolahi ʼi te kau takitaki Iselaele neʼe nātou talagataʼa ki te ʼAtua, ʼo fakamalaʼia ai kia nātou pea mo te hahaʼi ʼaē neʼe fakalogo kia nātou. Kae neʼe foaki e Sehova te ʼamanaki ki tana hahaʼi agatonu, ʼo ina fakapapau age ʼe ina fakanofo anai he Hau ʼe agatonu, pea ʼe fiafia anai te tagata agatonu ʼi tana fakalogo kia te ia. (Isaia 9:6, 7) ʼI muʼa ʼo tona mate, neʼe fakakikite e te pateliaka ko Sakopo ʼo ʼuhiga mo te pule ʼaia ka haʼu, ʼo ina ʼui fēnei: “Ko te tokotoko faka hau ʼe mole maliu kehe anai mai ia Suta, pea ko te tokotoko faka lagiaki ʼe mole maliu kehe anai mai te vaha ʼo tona ʼu vaʼe, ʼo kaku ki te haʼu ʼa Silo; pea ʼe ina maʼu anai te fakalogo ʼa te hahaʼi fuli pe.”—Senesi 49:10.

2. Koteā te faka ʼuhiga ʼo te kupu “Silo,” pea ʼe pule anai kia ai?

² Ko te kupu faka Hepeleo “Silo” ko tona faka ʼuhiga “ ʼE Ko Ia ʼAē ʼe Ina Maʼu.” Ei, ʼe maʼu anai e Silo te pule takitaki, ʼaē ʼe fakatātā e te tokotoko ʼo te hau, pea mo te mālohi moʼo takitaki, ʼaē ʼe fakatātā e te tokotoko faka lagiaki. Tahi ʼaē meʼa, ʼe mole pule pe anai ki te hākoga ʼo Sakopo, kae ki te “hahaʼi” fuli pe. ʼE ʼalutahi te faʼahi ʼaia mo te fakapapau ʼaē neʼe fai e Sehova kia Apalahamo: “ ʼE maʼu anai e tou hāko te matapā ʼo tona ʼu fili. ʼAki tou hāko ʼe tapuakina moʼoni ai anai te ʼatu puleʼaga fuli pe ʼo te kele.” (Senesi 22:17, 18) Neʼe fakahā lelei e Sehova pe ko ai te “hāko” ʼaia, ʼi te taʼu 29 ʼo totatou temi, ʼi tana fakanofo ia Sesu ʼo Nasaleti ʼaki te laumālie maʼoniʼoni.—Luka 3:21-23, 34; Kalate 3:16.

Te ʼUluaki Puleʼaga ʼo Sesu

3. Ko te pule fea ʼaē neʼe tonu ke maʼu e Sesu ʼi tana hake ki selo?

³ ʼI te hake ʼa Sesu ki selo, neʼe mole ina kamata atu aipe tana pule ki te hahaʼi ʼo te malamanei. (Pesalemo 110:1) Kae neʼe tonu ke ina maʼu te “puleʼaga” pea mo te hahaʼi ka fakalogo kia te ia. Neʼe fakahā e te ʼapositolo ko Paulo pe koteā te puleʼaga ʼaia ʼi tana tohi fēnei: “[Ko te ʼAtua] nee ina haofaki tatou [te kau Kilisitiano ʼaē neʼe fakanofo ʼaki te laumālie] mai te pule o te fakapouli pea nee ina fakanofo tatou ki te Puleaga o tona Alo o tona ofa.” (Kolose 1:13) Neʼe kamata te faka ʼāteaina ʼaia ʼi te Penikosite ʼo te taʼu 33 ʼo totatou temi, ʼi te folahi ʼo te laumālie maʼoniʼoni ki te kau tisipulo agatonu ʼa Sesu.—Gaue 2:1-4; 1 Petelo 2:9.

4. Neʼe fakahā feafeaʼi e te ʼu ʼuluaki tisipulo ʼa Sesu tanatou fakalogo, pea neʼe ʼui e Sesu ko ai te kūtuga ʼaia?

⁴ ʼI tonatou ʼuhiga kau “fakafofoga o Kilisito,” ko te kau tisipulo fakanofo neʼe nātou fakalogo, ʼo nātou kamata te tānaki mai ʼo te tahi ʼu hahaʼi ʼe nātou liliu anai ko he ʼu “hahaʼi” ʼo te puleʼaga fakalaumālie ʼaia. (2 Kolonito 5:20; Efeso 2:19, MN; Gaue 1:8) Tahi ʼaē meʼa, neʼe tonu ki te kau fakanofo ʼaia ke nātou “logo tahi fakalelei ʼi he laumālie pe e tahi pea mo he manatu pe e tahi,” ke nātou maʼu te ʼofa ʼo tonatou Hau ko Sesu Kilisito. (1 Kolonito 1:10, MN ) Ko te kūtuga ʼaia ʼe ko te “kaugana agatonu mo fakapotopoto,” peʼe ko te kalasi ʼo te tagata faifekau agatonu.—Mateo 24:45; Luka 12:42.

Te ʼu Tapuakina ʼo Te Tagata “Faifekau” Pea Mo Fakalogo ʼa Te ʼAtua

5. Talu mai fualoa, neʼe feafeaʼi te akoʼi e Sehova tana hahaʼi?

⁵ Neʼe foaki tuʼumaʼu pe e Sehova te kau faiako ki tana hahaʼi. Ohage la, ʼi te mavae ʼa te kau Sutea mai Papiloni, ko Esitalasi pea mo te tahi ʼu tagata popoto, neʼe mole nātou lau pe te Lao ki te hahaʼi, kae neʼe nātou ‘fakamatalatala’ te lao ʼaia, ‘mo fakahā tona ʼuhiga pea mo fakamahinohino’ te Folafola ʼa te ʼAtua.—Nehemia 8:8.

6, 7. Neʼe fakaʼaogaʼi feafeaʼi e te kalasi ʼo te kaugana ia te Kolesi Pule moʼo foaki mai te meʼa kai fakalaumālie ʼi tona temi totonu, pea he koʼe ʼe lelei ke tou fakalogo ki te kalasi ʼo te kaugana ʼaia?

⁶ ʼI te ʼuluaki sēkulō, ʼi te lagaʼi ake ʼo te fehuʼi ʼo ʼuhiga mo te silikosisio ʼi te taʼu 49 ʼo totatou temi, ko te kolesi pule ʼo te ʼuluaki kalasi ʼaia ʼo te kaugana, neʼe ina vakavakaʼi ʼi te faikole te faʼahi ʼaia, pea nātou fai ai he tonu neʼe fakatafito ki te Tohi-Tapu. ʼI tanatou faitohi ki te ʼu kokelekasio moʼo fakahā te tonu ʼaia, neʼe fakalogo te ʼu kokelekasio ki te takitaki ʼaia pea neʼe tapuakina lahi nātou e te ʼAtua. (Gaue 15:6-15, 22-29; 16:4, 5) ʼE toe feiā ʼi totatou temi, ʼe fakaʼaogaʼi e te kaugana agatonu te Kolesi Pule moʼo fakamahino lelei te ʼu fehuʼi maʼuhiga, ohage la ko te mole kau ʼa te kau Kilisitiano ki te tau, te ʼuhiga taputapu ʼo te toto, pea mo te fakaʼaogaʼi ʼo te ʼu toloke pea mo te pata. (Isaia 2:4; Gaue 21:25; 2 Kolonito 7:1) Neʼe tapuakina e Sehova tana hahaʼi ʼi tanatou fakalogo ki tana Folafola pea mo te tagata kaugana agatonu.

⁷ ʼI tanatou fakalogo ki te kalasi ʼo te kaugana, ʼe toe fakahā e te hahaʼi ʼa te ʼAtua tanatou fakalogo ki te Pule, ia Sesu Kilisito. ʼE toe maʼuhiga age te fakalogo ʼaia ʼi totatou temi, koteʼuhi kua fakalahi te pule ʼa Sesu, ohage ko tona fakakikite e Sakopo ʼi muʼa ʼo tona mate.

ʼE Liliu Ia Silo Ko Te Pule Faitotonu ʼo Te Kele

8. Neʼe fakalahi feafeaʼi te pule ʼa Kilisito pea neʼe hoko ʼanafea?

⁸ Neʼe fakakikite e Sakopo ko Silo ʼe ina puleʼi anai “te fakalogo ʼa te hahaʼi fuli pe.” ʼE hā lelei mai, ʼe mole pule pe anai Kilisito ki te Iselaele fakalaumālie. ʼE toe pule anai kia ai? ʼE tali fēnei ia Apokalipesi 11:15, MN: “Ko te puleʼaga ʼo te malamanei kua liliu ia ko te puleʼaga ʼo totatou ʼAliki pea mo tana Kilisito, pea ʼe hau anai ia ʼo heʼegata.” ʼE fakahā e te Tohi-Tapu neʼe foaki te pule ʼaia kia Sesu ʼi te fakaʼosi ʼo te ʼu “temi [fakatātā] e fitu”—“te ʼu temi ʼaē kua fakakatofa ki te ʼu puleʼaga”—ʼi te 1914.a (Taniela 4:16, 17; Luka 21:24, MN ) ʼI te taʼu ʼaia, neʼe kamata ai te “ ʼi henī” fakapulipuli ʼa Kilisito ʼi tona ʼuhiga Hau Faka Mesianike, tona temi ke “ ʼalu ʼo pule ʼi te lotolotoiga ʼo [tona] ʼu fili.”—Mateo 24:3, MN; Pesalemo 110:2.

9. Koteā ʼaē neʼe fai e Sesu ʼi tana ʼosi maʼu tona Puleʼaga, pea koteā ʼaē neʼe hoko ai ki te malamanei, tāfito ki tana ʼu tisipulo?

⁹ Ko te ʼuluaki gāue ʼaē neʼe fai e Sesu ʼi tana ʼosi maʼu te pule, neʼe ko te kapu ifo “ki te kele” ia ia ʼaē neʼe mole fakalogo, ia Satana pea mo tana kau temonio. Talu mai ai, neʼe fakahoko e te ʼu laumālie agakovi ʼaia te ʼu malaʼia ki te malamanei, pea neʼe liliu ʼo faigataʼa ʼaupito te fakalogo kia Sehova. (Apokalipesi 12:7-12; 2 Timoteo 3:1-5) ʼI tona fakahagatonu, ʼe tauʼi tāfito e Satana te kau fakanofo ʼa Sehova, “ia natou e natou taupau te u fekau a te Atua pea mo taupau te fakamooni a Sesu,” pea mo tonatou ʼu kaumeʼa te “tahi ʼu ōvi.”—Apokalipesi 12:17; Soane 10:16, MN.

10. Ko te fakahoko ʼo te ʼu lea faka polofeta fea ʼe fakamoʼoni ai ʼe mole iku anai te tauʼi e Satana te kau Kilisitiano moʼoni?

¹⁰ Kae ʼe mole iku anai te ʼu faiga ʼa Satana, koteʼuhi ʼe ko “te aho [ʼaenī] o te Aliki,” pea ʼe mole he meʼa ʼe ina tāʼofi anai ia Sesu ke ina ‘fakaʼosi tana mālo.’ (Apokalipesi 1:10; 6:2) Ohage la, ʼe ina fakaʼosi anai te fakaʼiloga ʼo te toko 144 000 kau Iselaele fakalaumālie. ʼE ina toe puipui anai mo te “hahai kaugamalie, nee mole he tahi nee ina malau, mai te atu puleaga, mo te u hako, mo te u lanu, pea mo te u lea fuape.” (Apokalipesi 7:1-4, 9, 14-16) Kae ʼe mole nātou hage anai ko te kau fakanofo, heʼe nātou liliu anai ko te hahaʼi ʼaē ka fakalogo ʼi te kele ki te pule ʼa Sesu. (Taniela 7:13, 14) Ko tanatou aga ʼi te mālama ʼaenī ʼe fakahā lelei ai ko Silo kua Hau ki “te puleʼaga ʼo te malamanei.”—Apokalipesi 11:15, MN.

Ko Te Temi ʼAenī Ke Tou ‘Fakalogo Ki Te Logo Lelei’

11, 12. (a) Ko ai ʼaē ka hāo anai ʼi te fakaʼosi ʼo te tuʼu ʼaenī? (b) Koteā te aga ʼa nātou ʼaē ʼe nātou maʼu “te laumalie o te malama-nei”?

¹¹ Ko nātou fuli ʼaē ʼe fia maʼuʼuli ʼo heʼegata ʼe tonu ke nātou fakalogo, heʼe ʼui fakalelei e te Tohi-Tapu, ko “natou e mole natou iloi te Atua, pea mo natou e mole fakalogo ki te Evaselio o totatou Aliki ko Sesu” ʼe mole nātou hāo anai ʼi te ʼaho ʼo te lagavaka ʼa te ʼAtua. (2 Tesalonika 1:8) Kae ʼuhi ko te mālama agakovi ʼaenī pea mo tana agatuʼu ki te ʼu lao pea mo te ʼu pelesepeto ʼa te Tohi-Tapu, ʼe faigataʼa ai te fakalogo ki te logo lelei.

¹² ʼE ʼui e te Tohi-Tapu ko te agatuʼu ʼaia ki te ʼAtua, ʼe ko “te laumalie o te malama-nei.” (1 Kolonito 2:12) ʼI tana fakamahino te aga ʼa te hahaʼi ʼaē ʼe nātou maʼu te laumālie ʼaia, neʼe tohi e te ʼapositolo ko Paulo ki te kau Kilisitiano ʼo Efeso ʼo te ʼuluaki sēkulō, ʼo ina ʼui fēnei: “Neʼe koutou haʼele ai ʼi te temi muʼa, ʼo mulimuli ki te tuʼu ʼo te ʼu faʼahiga meʼa ʼaenī, ʼo mulimuli ki te pule ʼo te mālohi ʼo te ʼaele, te laumālie ʼaē ʼe gāue ʼi te temi nei ʼi te ʼu foha ʼo te talagataʼa. Ei, ia nātou ʼaia neʼe tou mulimuli fuli ki te ʼu holi ʼo totatou kakano, ʼo tou fai te ʼu meʼa ʼaē neʼe loto kiai te kakano pea mo te ʼu manatu, pea neʼe ko tatou te ʼu fānau ʼo te hāūhāū, ohage ko te tagata fuli pe.”—Efeso 2:2, 3, MN.

13. ʼE lava tauʼi feafeaʼi e te kau Kilisitiano te laumālie ʼo te malamanei, pea koteā te ʼu fua lelei ka nātou maʼu?

¹³ Meʼa lelei foki, he neʼe mole nofo kaugana te kau Kilisitiano ʼo Efeso ki te laumālie ʼaia ʼo te talagataʼa. Neʼe nātou liliu ko he ʼu fānau fakalogo ki te ʼAtua, ʼo nātou mulimuli ki tona laumālie pea mo nātou maʼu tona ʼu fua lelei lahi. (Kalate 5:22, 23) ʼO toe feiā ia ʼaho nei, ko te laumālie ʼo te ʼAtua—te mālohi lahi ʼi te ʼatulaulau— ʼe tokoni ki te ʼu lauʼi miliona hahaʼi ke nātou fakalogo kia Sehova, pea ʼe feala ai ke nātou maʼu “te tui papau katoa ʼo te ʼamanaki ʼo aʼu ki te fakaʼosi.”—Hepeleo 6:11, MN; Sakalia 4:6.

14. Neʼe fakatokagaʼi feafeaʼi e Sesu te kau Kilisitiano ʼaē ʼe maʼuʼuli ʼi te ʼu ʼaho fakamuli, ki te ʼu faʼahi ʼaē ka ʼahiʼahiʼi ai tanatou fakalogo?

¹⁴ Pea koutou manatuʼi, ʼe lagolago mai te mālohi ʼo Silo, pea ko Ia pea mo tana Tāmai ʼe mole nā tuku anai ki te ʼu fili—te kau temonio peʼe ko te tagata—ke nātou ʼahiʼahiʼi tatou ʼo laka age ʼi te meʼa ʼe feala ke tou kātakiʼi. (1 Kolonito 10:13) Koia moʼo tokoni mai ki tatatou tau fakalaumālie, neʼe fakahā e Sesu te ʼu fihifihia ʼe hoko mai anai kia tatou ʼi te ʼu ʼaho fakamuli ʼaenī. Neʼe ina fakahā te faʼahi ʼaia ʼi te ʼu tohi e fitu, ʼaē neʼe hā ki te ʼapositolo ko Soane. (Apokalipesi 1:10, 11) ʼE mahino ia neʼe ko he ʼu tokoni maʼuhiga ki te kau Kilisitiano ʼi te temi ʼaia, kae ʼe faka ʼuhiga tāfito ki “te aho o te Aliki,” talu mai te 1914. Koia ʼe lelei ke tou vakavakaʼi te ʼu logo ʼaia!b

Tou Tekeʼi Te Lotonoa, Mo Te Aga Heʼeʼaoga, Mo Te Kumi ʼo Te ʼu Koloā

15. He koʼe ʼe tonu ke tou tokakaga ʼo ʼuhiga mo te fihifihia neʼe hoko ki te kokelekasio ʼo Efeso, pea e feafeaʼi hatatou fai te faʼahi ʼaia? (2 Petelo 1:5-8)

¹⁵ Neʼe ʼuluaki faitohi ia Sesu ki te kokelekasio ʼo Efeso. Hili tana vikiʼi te kokelekasio ʼuhi ko tana faʼa kātaki, neʼe ʼui fēnei e Sesu: “Kae, koʼeni te meʼa ʼaē ʼe ʼau koviʼia ai ia koe, heʼe kua ke līaki te ʼofa ʼaē neʼe ke maʼu ʼi te kamata.” (Apokalipesi 2:1-4, MN ) Ia ʼaho nei, ko ʼihi kau Kilisitiano neʼe gāue mālohi ʼi muʼa atu kae kua puli tonatou ʼofa lahi ki te ʼAtua. Ka puli tatatou ʼofa ʼaia, pea ʼe fakahaʼuhaʼu ʼo vaivai tatatou ʼu felogoi mo te ʼAtua pea ʼe tonu ke tou foimo fakatonutonuʼi te faʼahi ʼaia. ʼE lava feafeaʼi ke toe mālohi te ʼofa ʼaia? ʼAki te ako tuʼumaʼu ʼo te Tohi-Tapu, mo tatatou kau ki te ʼu fono, mo te faikole, pea mo te metitasio. (1 Soane 5:3) ʼE moʼoni, ʼe tonu anai ke tou “faiga mālohi” kiai, kae ʼe fua lelei anai. (1 Petelo 1:5-8, MN ) Kapau ʼi takotou sivi fakahagatonu ia koutou, ʼe koutou tokagaʼi ai kua vaivai tokotou ʼofa, koutou foimo fai he ʼu fetogi, moʼo fakalogo ki te tokoni fēnei ʼa Sesu: “Ke ke manatuʼi te faʼahi ʼaē kua ke tō mai ai, pea ke fakahemala, pea mo fai tau ʼu ʼuluaki gāue.”—Apokalipesi 2:5, MN.

16. Koteā te mālohi kovi ʼi te faʼahi fakalaumālie neʼe maʼu ʼi te ʼu kokelekasio ʼo Pelekame pea mo Tiatile, pea he koe ʼe ʼaoga ʼi totatou temi te ʼu palalau neʼe fai e Sesu kia nātou?

¹⁶ Neʼe vikiʼi te kau Kilisitiano ʼo Pelekame pea mo Tiatile ʼuhi ko tanatou nonofo agatonu, mo tanatou faʼa kātaki, pea mo tanatou faʼafai. (Apokalipesi 2:12, 13, 18, 19) Kae neʼe fakahalaʼi nātou e ʼihi ʼi te kokelekasio neʼe nātou maʼu te manatu kovi ʼa Palaame pea mo Sesapele, ʼaē neʼe nā fakaʼaogaʼi te ʼu aga heʼeʼaoga pea mo te tauhi kia Paale moʼo ʼulihi ia Iselaele. (Faka au 31:16; 1 Hau 16:30, 31; Apokalipesi 2:14, 16, 20-23) Kae e feafeaʼi ʼi totatou temi—“te aho o te Aliki”? ʼE tou toe maʼu koa te ʼu aga ʼaia ʼe kovi? Ei, heʼe ko te ʼu aga heʼeʼaoga ʼe ko te tupuʼaga tāfito ʼaia ʼo te fakamavae ʼo ʼihi ʼi te hahaʼi ʼa te ʼAtua. Koia ʼe maʼuhiga ʼaupito ke mole tou fakatahi mo te hahaʼi ʼaē ʼe fua kovi tanatou aga kia tatou, ʼi te kokelekasio peʼe ʼi tuʼa atu. (1 Kolonito 5:9-11; 15:33) Ko nātou ʼaē ʼe nātou fia fakalogo ki te pule ʼo Silo, ʼe nātou toe tekeʼi mo te ʼu fakafiafia heʼeʼaoga pea mo te ʼu paki ʼo he ʼu aga heʼeʼaoga ʼi te ʼu tohi peʼe ʼi te Internet.—Amosi 5:15; Mateo 5:28, 29.

17. Neʼe kehekehe feafeaʼi te manatu pea mo te aga ʼo nātou ʼo Salatesi pea mo Laotisea, pea mo te manatu ʼa Sesu ʼo ʼuhiga mo tonatou ʼaluʼaga fakalaumālie?

¹⁷ Neʼe ko te tokosiʼi pe ʼaē neʼe vikiʼi ʼi te kokelekasio ʼo Salatesi. Neʼe ina maʼu “te higoa,” pea neʼe hage neʼe maʼuli, kae neʼe lahi ʼaupito tona lotonoa ʼi te faʼahi fakalaumālie, koia kia Sesu neʼe kua “mate” ia! Neʼe mole kei nātou fiafia ʼi tanatou fakalogo ki te logo lelei. Neʼe ko he talaʼakiʼi mamafa ʼaia! (Apokalipesi 3:1-3) Neʼe toe feiā mo te kokelekasio ʼo Laotisea. Neʼe laupisi ʼi tana maʼu koloā, ʼo ina ʼui “e au maukoloa,” kae kia mata ʼa Kilisito neʼe “fakaofaofa, mo siakina, mo masiva, mo kivi pea mo telefua.”—Apokalipesi 3:14-17.

18. Koteā ʼaē ʼe feala ke fai e he tahi ke mole vaivai fakalaumālie kia mata ʼo te ʼAtua?

¹⁸ Ia ʼaho nei, ko ʼihi Kilisitiano neʼe nātou agatonu ʼi te temi muʼa, kae kua nātou tō ki te faʼahiga talagataʼa ʼaia. Neʼe lagi nātou tali te laumālie ʼo te malamanei ʼo mole kei nātou tokagaʼi te ʼu temi maʼuhiga ʼaē ʼe tou maʼuʼuli ai, pea ʼe nātou vaivai ʼi te faʼahi fakalaumālie heʼe mole kei nātou ako te Tohi-Tapu, ʼe mole kei nātou faikole, mo kau ki te ʼu fono pea mo te minisitelio. (2 Petelo 3:3, 4, 11, 12) ʼE maʼuhiga kia nātou ʼaia ke nātou fakalogo ki te tokoni ʼa Kilisito, ke nātou maʼu he ʼu koloā fakalaumālie—ei, ke nātou “fakatau maia [Kilisito] te aulo nee fakamaʼa i te afi”! (Apokalipesi 3:18) Ko tona faka ʼuhiga ke tou ‘koloaʼia ʼi te ʼu gāue lelei, mo tou fia foaki lahi, pea mo tou vaevae.’ Kapau ʼe tou maʼu te ʼu koloā maʼuhiga moʼoni ʼaia, pea ʼe tou ‘tānaki ai maʼa tatou, ohage ko he koloā moʼoni, he fakatafito taulekaleka ki te temi ka haʼu, ke feala ke tou puke maʼu te maʼuli moʼoni.’—1 Timoteo 6:17-19.

Neʼe Vikiʼi Nātou ʼUhi Ko Tanatou Fakalogo

19. Koteā te ʼu fakavikiviki pea mo te ʼu fakaloto mālohi neʼe foaki e Sesu ki te kau Kilisitiano ʼi Simina pea mo Filatelefia?

¹⁹ Ko te ʼu kokelekasio ʼo Simina pea mo Filatelefia neʼe ko he ʼu faʼifaʼitaki lahi ʼo ʼuhiga mo te fakalogo, he neʼe mole he fakatonutonu ʼi te faitohi ʼa Sesu kia nātou. Neʼe ina ʼui fēnei ki te kokelekasio ʼo Simina: “E au iloi tou mamahi mo tou masiva, kae e ke koloaʼia.” (Apokalipesi 2:9) Neʼe nātou kehekehe mo nātou ʼaē ʼi Laotisea ʼaē neʼe laupisi ʼi tanatou maʼu koloā kae ʼi tona ʼuhiga moʼoni neʼe nātou māsisiva! ʼE mahino ia, neʼe mole fiafia te Tevolo ʼi tana sio ki he tahi ʼe agatonu pea mo fakalogo kia Kilisito. Koia neʼe fakatokaga fēnei ai e Sesu: “ ʼAua naʼa ke mataku ki te ʼu mamahi ʼaē ka ʼamanaki hoko atu kia te koe. Koʼeni! ʼE haga laku anai e te Tevolo niʼihi ia koutou ki te fale pilisoni, ke katoa tokotou ʼahiʼahiʼi, pea ke koutou maʼu he mamahi ia ʼaho e hogofulu. Nofo agatonu ʼo aʼu ki te mate, pea ʼe ʼau foaki atu anai te kolona ʼo te maʼuli.” (Apokalipesi 2:10, MN ) ʼO toe feiā pe, neʼe vikiʼi e Sesu ia nātou ʼi Filatelefia, ʼo ʼui maʼana: “Nee ke taupau taku folafola [pe neʼe ke fakalogo kia te ʼau] pea nee mole ke fakafisi ki toku huafa. E au alu vave atu, taofi malohi te mea e ke mau, ke aua naa too e he tahi tou kolona.”—Apokalipesi 3:8, 11.

20. ʼE taupau feafeaʼi e te ʼu lauʼi miliona ia ʼaho nei te folafola ʼa Sesu, logope la te ʼu ʼaluʼaga fea?

²⁰ ʼI “te aho o te Aliki,” ʼaē neʼe kamata ʼi te taʼu 1914, ko te toe ʼo te kau fakanofo agatonu pea mo tonatou ʼu kaumeʼa ʼo te tahi ʼu ōvi, ʼaē kua nātou lauʼi miliona, neʼe nātou toe taupau mo nātou te ʼu folafola ʼa Sesu ʼi tanatou kau mālohi ʼi te minisitelio pea mo taupau maʼu tanatou agatonu. Ohage ko tonatou ʼu tēhina ʼo te ʼuluaki sēkulō, ko ʼihi neʼe mamahi ʼi tanatou fakalogo kia Kilisito, pea neʼe ʼave nātou ki te ʼu fale pilisoni pea mo te ʼu lotoʼā fakamamahi. Ko ʼihi neʼe nātou mulimuli ki te ʼu folafola ʼa Sesu ʼo nātou taupau he ‘mata ʼe lelei,’ logola te lahi ʼo te fia maʼu koloā pea mo te fialahi. (Mateo 6:22, 23) Ei, ʼi te ʼu potu fuli pe pea ʼi te ʼu ʼaluʼaga fuli pe, ko te kau Kilisitiano moʼoni ʼe nātou hoko atu tanatou fakalogo, moʼo fakafiafia te loto ʼo Sehova.—Tāʼaga Lea 27:11.

21. (a) Koteā te maʼua fakalaumālie ʼe haga fai e te kalasi ʼo te kaugana? (b) ʼE tou lava fakahā feafeaʼi ʼe tou fia fakalogo moʼoni kia Silo?

²¹ ʼI tatatou fakaōvi ki te mamahi lahi, ʼe taupau mālohi e “te kaugana agatonu mo fakapotopoto” tana fakatotonu ʼaē ke fakalogo tuʼumaʼu ki te Pule, ia Kilisito. ʼE kau ki te faʼahi ʼaia te teuteu ʼi tona temi totonu te meʼa kai fakalaumālie maʼa te loto fale ʼo te ʼAtua. Koia tou loto fakafetaʼi tuʼumaʼu ki te kautahi faka teokalatike fakaofoofo ʼa Sehova pea mo te ʼu meʼa ʼaē ʼe ina foaki mai. Kapau ʼe tou fai feiā, pea ʼe tou fakahā ai tatatou fakalogo kia Silo, ʼaē ka ina fakapale anai tana hahaʼi fakalogo fuli ʼaki te maʼuli heʼegata.—Mateo 24:45-47; 25:40; Soane 5:22-24.

[Kiʼi nota]

ʼE Kei Koutou Manatuʼi Koa?

• Koteā te tuʼulaga ʼo Sesu ʼi te fakakikite ʼaē neʼe fai e Sakopo ʼi muʼa ʼo tona mate?

• ʼE tou fakamoʼoni feafeaʼi ko Sesu ko Silo, pea koteā te manatu ʼe tonu ke tou tekeʼi?

• Koteā te ʼu tokoni ʼaoga ki totatou temi ʼe tou maʼu ʼi te ʼu tohi ʼaē neʼe fai ki te ʼu kokelekasio e fitu ʼo te Apokalipesi?

• ʼE lava feafeaʼi hatatou faʼifaʼitakiʼi ia nātou ʼo te ʼu kokelekasio ʼo Simina pea mo Filatelefia?

[Paki ʼo te pasina 18]

ʼE tapuakina e Sehova tana hahaʼi ʼi tanatou fakalogo ki te tagata “faifekau” agatonu

[Paki ʼo te pasina 19]

ʼUhi ko te mālohi ʼo Satana, ʼe faigataʼa te fakalogo ki te ʼAtua

[Paki ʼo te pasina 21]

Ko he felogoi lelei mo Sehova ʼe tokoni mai ke tou fakalogo kia te ia