ʼE Maʼuhiga Kiā Sehova Takotou Fakalogo
“Ke ke fakapotopoto toku foha pea mo ke fakafiafia toku loto.”—Tāʼaga Lea 27:11.
1. Koteā te manatu kua mafola ʼi te mālamanei iā ʼaho nei?
KUA mafola ʼi te mālamanei ia te loto faʼifaʼitaliha pea mo te talagataʼa. ʼI te tohi ʼa te ʼapositolo ko Paulo ki te kau Efesi, ʼe ina fakamahino fēnei age tona tupuʼaga: “Neʼe kotou haʼele ai ʼi te temi muʼa, ʼo mulimuli ki te tuʼu ʼo te ʼu faʼahiga meʼa ʼaenī, ʼo mulimuli ki te pule ʼo te mālohi ʼo te ʼaele, te laumālie ʼaē ʼe gāue ʼi te temi nei ki te ʼu foha ʼo te talagataʼa.” (Efesi 2:1, 2) ʼE feala hakotou ʼui, ko Satana ia te Tēvolo, “te pule ʼo te mālohi ʼo te ʼaele” ʼaē ʼe ina fakatupu ʼi te mālamanei kātoa ia te manatu talagataʼa. Neʼe ina fai fēia ʼi te ʼuluaki sēkulō, pea kua toe lēsili age tana fai ʼo te faʼahi ʼaia ʼi te temi nei talu tona kapu ifo mai te lagi ʼi te temi ʼaē neʼe hoko ai te ʼUluaki Tau Faka Mālamanei.—Fakahā 12:9.
2, 3. Ko te ʼu tupuʼaga fea ʼaē ʼe tonu ai ke tou fakalogo kiā Sehova?
2 Kae ʼi totatou ʼuhiga Kilisitiano, ʼe tou ʼiloʼi ko Sehova ʼAtua ʼe tuha mo ia ke tou fakalogo ki ai mo totatou loto kātoa heʼe ko ia totatou Tupuʼaga, totatou Maʼuliʼaga, totatou Tuʼi ʼAliki ʼOfa ʼo Te ʼAtulaulau, pea mo totatou Haofakiʼaga. (Pesalemo 148:5, 6; Gāue 4:24; Kolose 1:13; Fakahā 4:11) Neʼe mahino ki te kau Iselaele ʼo te temi ʼo Moisese, ko Sehova neʼe ko tonatou Maʼuliʼaga pea mo tonatou Haofakiʼaga. Koia, neʼe ʼui fēnei age e Moisese kiā nātou: “ ʼE tonu ke kotou tōkakaga ʼo mulimuli kiā meʼa fuli neʼe fakatotonu atu kiā koutou e Sehova tokotou ʼAtua.” (Teutalonome 5:32) ʼEī, neʼe tuha mo Sehova ke natou fakalogo kiā te ia. Kae neʼe mole tuai tanatou liliu ʼo talagataʼa ki tonatou Tuʼi ʼAliki.
3 ʼE feafeaʼi ia te maʼuhiga ʼo tatatou fakalogo ki te Tupuʼaga ʼo te ʼatulaulau? Neʼe ʼui e te ʼAtua ki te polofetā ko Samuele ke ina ʼui fēnei age ki te Hau ko Saulo: “Ko te talagafua ʼe lelei age ia ʼi he sākilifisio.” (1 Samuele 15:22, 23) He koʼē ʼe maʼuhiga age ia te fakalogo?
Ko Te Talagafua “ ʼe Lelei Age Ia ʼi He Sākilifisio”
4. ʼE feafeaʼi hatatou lava foaki he meʼa kiā Sehova?
4 Mai te ʼaluʼaga ʼaē ko Sehova ko te Tupuʼaga, pea kua ina maʼu fuli pē ia meʼa fuli ʼe tou lava maʼu. Kapau koia, ʼe mole ʼi ai koa he meʼa ʼe tou lava foaki age kiā te ia? ʼE ʼi ai te meʼa maʼuhiga ʼe tou lava foaki age kiā te ia. Koteā te meʼa ʼaia? Tou tokagaʼi ia te tali ʼaē ʼe tou maʼu mai te tokoni ʼaenī: “Ke ke fakapotopoto toku foha pea mo ke fakafiafia toku loto, ke feala haku tali kiā ia ʼaē ʼe manukinuki mai kiā te au.” (Tāʼaga Lea 27:11) ʼE tou lava foaki ki te ʼAtua ia tatatou fakalogo. Logolā te kehekehe ʼo totatou maʼuli pea mo totatou ʼu haʼuʼaga, kae kā tou fakalogo, ʼe tou lava tali fuli ki te fakafifihi ʼa Satana te Tēvolo ʼo ʼuhiga mo tana ʼui ʼaē ko te hahaʼi ʼe mole natou agatonu anai ki te ʼAtua mo kapau ʼe natou tau mo he fihifihia. ʼE ko he toe pilivilēsio ʼaia kiā tātou fuli!
5. Kā tou talagataʼa pea ʼe malave feafeaʼi ki totatou Tupuʼaga? Kotou fakamahino.
5 ʼE maʼuhiga ki te ʼAtua ia te ʼu tonu ʼaē ʼe tou fai. Kapau ʼe tou logogataʼa, pea ʼe malave kiā te ia. ʼO feafeaʼi? ʼE lotomamahi te ʼAtua mokā sio ifo ki he tahi ʼe mole fia fakalogo. (Pesalemo 78:40, 41) Ohagē lā, kā ko he tahi ʼe suka kae mole fakalogo ki te ʼu fakatotonu ʼa te tōketā ke fakaisiisi tana kai kae kai pē ia ki te ʼu meʼa ʼaē ʼe mole ʼaoga kiā te ia. Koteā anai te manatu ʼa tana tōketā? Koia, ʼe tou lava tui papau ko Sehova ʼe lotomamahi mokā talagataʼa he tahi kiā te ia, heʼe ina ʼiloʼi ia te ʼu fua kovi ʼo tata meʼa noaʼi tana ʼu pelesepeto ʼi tota maʼuli.
6. Koteā ʼaē kā tokoni mai anai ke tou fakalogo ki te ʼAtua?
6 Koteā ʼaē kā tokoni mai anai kiā tātou takitokotahi ke tou fakalogo? ʼE lelei kiā tātou takitokotahi ke tou kole ki te ʼAtua ia “he loto fakalogo,” ohagē ko tona kole e te Hau ko Salomone. Neʼe ina kole ke ina maʼu te taʼi fakalogo ʼaia ke feala hana “ ʼiloʼi ia te meʼa ʼe lelei pea mo te meʼa ʼaē ʼe kovi” mokā ina fakamāu ia tona ʼu tehina Iselaele. (1 Hau 3:9) ʼE ʼaoga kiā tātou “he loto fakalogo” mo kapau ʼe tou fia ʼiloʼi ia te meʼa ʼaē ʼe lelei pea mo te meʼa ʼaē ʼe kovi ʼi te mālama ʼaenī kua fonu ai ia te talagataʼa. ʼE foaki mai e te ʼAtua ia tana Folafola ia te Tohi-Tapu, mo te ʼu tohi faka Tohi-Tapu, mo te ʼu fono, pea mo te ʼu tagata ʼāfea ʼaē ʼe tōkakaga ki te kōkelekāsio, ke feala ai hatatou maʼu ia “he loto fakalogo.” ʼE tou fakaʼaogaʼi lelei koa te ʼu fakatuʼutuʼu ʼofa ʼaia?
7. He koʼē ʼe maʼuhiga age kiā Sehova ia te fakalogo ʼi te ʼu sākilifisio?
7 ʼO ʼuhiga mo te faʼahi ʼaia, tou manatuʼi ʼi te temi muʼa ia te meʼa ʼaē neʼe fakahā e Sehova ki tana ʼu kaugana, ko te fakalogo ʼe maʼuhiga age ʼi he fai ʼo he ʼu sākilifisio manu. (Tāʼaga Lea 21:3, 27; Osea 6:6; Mateo 12:7) He koʼē neʼe palalau fēia ia Sehova, kae neʼe ko ia ʼaē neʼe fakatotonu ki tana hahaʼi ke natou fai ia te ʼu sākilifisio ʼaia? Neʼe tonu ke feafeaʼi ia te loto ʼo he tahi mokā momoli hana sākilifisio? ʼE ina fai koa moʼo fakafiafia ia te loto ʼo te ʼAtua? Peʼe ina fai ʼuhi pē ko he agaʼi fenua ʼe tonu ke fakahoko? Kapau ko he kaugana ʼa te ʼAtua ʼe loto moʼoni ke ina fakafiafia ia te loto ʼo Sehova, pea ʼe tonu anai ke fakalogo kiā meʼa fuli ʼe fakatotonu age e te ʼAtua. ʼE mole ʼaoga ki te ʼAtua ia te ʼu sākilifisio manu, kae ko tatatou fakalogo ʼe ko he meʼa maʼuhiga ʼaupitō ʼe tou lava momoli age kiā te ia.
Ko He Fakatokaga Kiā Tātou
8. He koʼē neʼe situʼa ia te ʼAtua kiā Saulo ʼi tona ʼuhiga hau?
8 Ko te hisitolia faka Tohi-Tapu ʼo te Hau ko Saulo ʼe ina fakahā mai ia te maʼuhiga ʼaupitō ʼaē ke tou fakalogo. ʼI te kamata hau ʼa Saulo neʼe ko te tagata agavaivai pea mo pule fia mālōlō, pea ‘ki ʼona mata neʼe ko he tahi ʼe veliveli.’ Kae ʼaki te temi, neʼe liliu tona loto ʼo fialahi pea mo maʼu ia te ʼu manatu kovi ʼo ʼuhiga mo te ʼu tonu ʼaē neʼe ina fai moʼo takitaki te hahaʼi. (1 Samuele 10:21, 22; 15:17) ʼI te tahi ʼaluʼaga, neʼe tonu ke tau ia Saulo mo te kau Filisitini. Neʼe ʼui e Samuele ki te hau ke fakatalitali age ke hoki haʼu ʼo momoli te ʼu sākilifisio kiā Sehova pea mo foaki age kiā ia he tahi ʼu fakatotonu. Kae neʼe mole vave mai ia Samuele ohagē ko tana ʼamanaki ʼa Saulo, pea ko te hahaʼi neʼe kua natou kamata mavetevete. ʼI tana sio ʼaē ʼe tuai mai ia Samuele, neʼe ina “fai te sākilifisio.” Neʼe mole leleiʼia e Sehova tana aga ʼaia. ʼI te tau mai leva ʼa Samuele, neʼe faifakalelei age te hau ʼo ʼuhiga mo tana talagataʼa, ʼo ina ʼui age kiā Samuele, ʼuhi he neʼe tauhala mai, koia ʼaē neʼe ‘ina fakatotonu’ ai ke ina momoli ia te sākilifisio moʼo fakamalu ifo ia te loto ʼo Sehova. Maʼa te Hau ko Saulo, neʼe maʼuhiga tana momoli ʼo te sākilifisio ʼi hana fakalogo ki te fakatotonu age ʼaē ke fakatalitali ke hoki ʼalu age ia Samuele ʼo fai te sākilifisio ʼaia. Neʼe ʼui fēnei e Samuele kiā te ia: “Neʼe ke agavale. Pea neʼe mole ke taupau te fakatotonu ʼa Sehova tou ʼAtua ʼaē neʼe ina fakatotonu atu.” Ko te talagataʼa ʼa Saulo kiā Sehova neʼe tupu ai te toʼo ʼo te tuʼulaga hau ia te ia.—1 Samuele 10:8; 13:5-13.
9. Neʼe hā feafeaʼi ia te talagataʼa ʼa Saulo ki te ʼAtua?
9 Neʼe mahino koa ki te hau ia tana talagataʼa? Kailoa ia! Ki muli age, neʼe fakatotonu e Sehova kiā Saulo ke ʼalu ʼo fakaʼauha te puleʼaga kātoa ʼo Amaleke, ʼaē ki muʼa atu neʼe ina ʼohofi te kau Iselaele kae neʼe mole natou laga tau age kiā nātou. Neʼe mole ʼi ai he meʼa neʼe tonu ke haofaki e Saulo, māʼia mo te manu lalata. Neʼe fakalogo pē ia ki te “matehi ʼo Amaleke, mai Avila ʼo aʼu ki Sule.” ʼI te tau age ʼa Samuele ʼo fakafelāveʼi mo ia, neʼe fakafiafia age ia te hau ki tanatou mālo pea mo ʼui māʼana: “Ke tapuakina koe e Sehova. Neʼe au fakahoko ia te folafola ʼa Sehova.” Kae neʼe mole mulimuli kātoa ia ki te ʼu fakatotonu ʼaē neʼe foaki age kiā te ia, ko Saulo pea mo tana hahaʼi neʼe mole natou matehi ia te Hau ko Akake pea mo “te ʼu ovi lelei pea mo te ʼu pipi lelei . . . te ʼu matuaʼi ʼakeno pea mo . . . te ʼu meʼa lelei fuli.” Neʼe fia lakatonu ia te Hau ko Saulo ʼo ʼuhiga mo tana talagataʼa, ʼo ʼui māʼana: “Neʼe ʼofa te hahaʼi ki te ʼu ovi lelei pea mo te ʼu pipi lelei, ke natou ʼaumai moʼo sākilifisioʼi kiā Sehova tou ʼAtua.”—1 Samuele 15:1-15.
10. Koteā te ako neʼe mole tāʼofi e Saulo?
10 Ko te tupuʼaga ʼaia ʼo te ʼui fēnei ʼa Samuele kiā Saulo: “ ʼE lahi age koa lā te leleiʼia e Sehova ʼo te ʼu holokosetā pea mo te ʼu sākilifisio ʼi te talagafua ʼaē ki te leʼo ʼo Sehova? Fakalogo mai! Ko te talagafua ʼe lelei age ia ʼi he sākilifisio, ko te tokaga ʼe lelei age ia ʼi te gako ʼo te ʼu matuaʼi ʼakeno.” (1 Samuele 15:22) ʼUhi he neʼe fakatotonu e Sehova ke fakaʼauha ia te ʼu manu fuli ʼaia, koia neʼe mole feala ia ke momoli faka sākilifisio te ʼu manu ʼaia.
Tou Fakalogo Iā Meʼa Fuli
11, 12. (a) Koteā te manatu ʼa Sehova ʼo ʼuhiga mo tatatou ʼu faiga ʼaē ke tou fakafiafia ia ia ʼi tatatou tauhi? (b) ʼE feafeaʼi ʼapē ki he tahi hana kākāʼi pē ʼo ia totonu ʼaki hana manatu ʼe ina fai te finegalo ʼo Sehova kae ʼi tona fakahagatonu ʼe mole fakalogo ia ki te ʼAtua?
11 ʼE ko he meʼa fakafiafia kiā Sehova hana sio ki te agatonu ʼo tana ʼu kaugana logolā te ʼu fakataga, pea mo faka mafola ia te Puleʼaga logolā te mole fia logo ʼa te hahaʼi, pea mo kau ki te ʼu fono logolā te ʼu fihifihia ʼaē ʼe tau mo nātou ʼi tonatou maʼuli! Ko tatatou fakalogo ʼi te ʼu faʼahi maʼuhiga ʼaia ʼo totatou maʼuli fakalaumālie ʼe ina fakafiafia tona loto! ʼE maʼuhiga kiā Sehova mokā tou fai ʼaki ia te ʼofa tatatou tauhi ʼaē kiā te ia. Ko te hahaʼi lagi mole natou tokagaʼi tatatou gāue kinakina, kae ko te ʼAtua ia ʼe ina tokagaʼi tatatou ʼu sākilifisio ʼaē ʼe tou fai age ʼaki he loto kātoa pea mo ina manatuʼi.—Mateo 6:4.
12 Kae ke tou fakafiafiaʼi kātoa totatou ʼAtua, ʼe tonu ke tou fakalogo kiā te ia iā faʼahi fuli ʼi totatou maʼuli. ʼAua naʼa tou faihala, ʼo tou manatu ʼe feala hatatou mole fakalogo ʼi he tahi age ʼu faʼahi ʼo totatou maʼuli ki te ʼu lēkula ʼa te ʼAtua mai te ʼaluʼaga ʼaē ʼe tou tauhi age kiā te ia ʼi te tahi ʼu faʼahi ʼo totatou maʼuli. Ohagē lā, ko he tahi ʼe lagi ina kākāʼi pē anai ia ia totonu ʼaki tana manatu ʼaē, kapau ʼe ina fai fakalelei pē tona ʼu maʼua ʼaē ʼi tana tauhi ki te ʼAtua, ʼe feala anai hana fai he ʼu aga heʼeʼaoga peʼe ko he tahi age ʼu agahala mamafa. ʼE ko he toe faihala anai ia!—Kalate 6:7, 8.
13. Kā tou tō ʼāteaina, ʼe feafeaʼi he ʼahiʼahiʼi ʼo tatatou fakalogo ʼaē kiā Sehova?
13 Koia, ʼe tou lava fai ia te fehuʼi ʼaenī: ‘ ʼE au fakalogo koa kiā Sehova ʼi te ʼu potu fuli pē ʼo toku maʼuli ʼo te ʼaho fuli, ʼo fēia mo te ʼu faʼahi ʼo toku maʼuli ʼaē ʼe mole sio kiai he tahi?’ Neʼe ʼui fēnei e Sesu: “Ko ʼaē ʼe agatonu ʼi te ʼu meʼa liliki ʼe toe agatonu pē foki ʼi te ʼu meʼa lalahi, pea ko ʼaē ʼe heʼe faitotonu ʼi te ʼu meʼa liliki ʼe toe heʼe faitotonu pē ʼi te ʼu meʼa lalahi.” (Luka 16:10) ʼE tou ‘haʼele koa ʼi te agatonu ʼo totatou loto,’ ʼo hoko ai mo ‘totatou loto fale’ ʼaē ʼe mole sio mai kiai niʼihi? (Pesalemo 101:2) ʼEī, ʼi totatou loto fale, ʼe feala ai ki tatatou agatonu ke ʼahiʼahiʼi. ʼE lahi te ʼu fenua ʼe teitei pē ki te ʼu loto fale fuli ʼe ʼi ai te ʼu olotinatea, pea ʼe ʼasi ai te ʼu pāki fakalialia ʼe faigafua pē hatatou sio kiai. Kae ʼi te ʼu taʼu kua hili, mokā fia sio he tahi ki te ʼu taʼi pāki ʼaia pea ʼe tonu ke ʼalu ki te ʼu koga meʼa ʼaē ʼe fakahāhā ai pea mo fai ai te ʼu aga heʼeʼaoga. ʼE tou fakalogo anai koa ki te tokoni ʼaenī ʼa Sesu: “Ko ʼaē ʼe ina haga sioʼi he fafine ʼo tupu ai hana holi ki ai, ʼe kua tono ia mo ia ʼi tona loto”? ʼEī ʼe tou fakafisi anai koa māʼiapē lā mo te sioʼi ʼo te ʼu pāki fakalialia? (Mateo 5:28; Sopo 31:1, 9, 10; Pesalemo 119:37; Tāʼaga Lea 6:24, 25; Efesi 5:3-5) ʼE feafeaʼi ki te ʼu ʼata ʼo te televisio ʼaē ʼe fakahāhā ai ia te agamālohi? ʼE tou lagolago koa ki totatou ʼAtua, ʼaē ‘ ʼe fehiʼa moʼoni ki he tahi ʼe manako ki te agamālohi’? (Pesalemo 11:5) Kae feafeaʼi lā te fakaʼaogaʼi lahi ʼo te kava mokā kotou tō ʼāteaina pē ʼi tokotou loto fale? ʼE tauteaʼi ʼi te Tohi-Tapu ia te ʼinu kava lahi, kae ʼe ina toe fakatokaga ki te kau Kilisitiano ke ʼaua naʼa ‘lahi fau tanatou ʼinu te vino.’—Tito 2:3; Luka 21:34, 35; 1 Timoteo 3:3.
14. Ko te tahi ʼu ʼaluʼaga fea ʼaē ʼe hā lelei ai tatatou fakalogo ki te ʼAtua ʼo ʼuhiga mo te falā?
14 Ko te tahi faʼahi ʼo totatou maʼuli ʼe tonu ke tou tōkakaga kiai, ʼe ko te fakaʼaogaʼi ʼo te falā. Ohagē lā, ʼe tou kau koa ki he ʼu fakatuʼutuʼu faka kākā ke maʼu vave ai hatatou falā? ʼE tou faiga koa ke tou fufū he ʼu meʼa ke mole tou totogi ia te ʼu tukuhau? Peʼe tou fakalogo lelei ki te fakatotonu ʼaē ke tou “liufaki ki te hahaʼi fuli te ʼu meʼa ʼaē ʼe tonu ke [tou] foaki kiā nātou, kiā ia ʼaē ʼe ina fakamaʼua mai te tukuhau, te tukuhau”?—Loma 13:7.
Te Fakalogo ʼAē ʼe Fakatafito Ki Te ʼOfa
15. He koʼē ʼe kotou fakalogo ki te ʼu fakatotonu ʼa Sehova?
15 ʼE tou maʼu te ʼu tapuakina mokā ʼe tou fakalogo ki te ʼu pelesepeto fakaʼatua. Ohagē lā, kapau ʼe tou fakamamaʼo mai te fakaʼaogaʼi ʼo te pata, mo tou maʼuli maʼa, pea mo tou fakaʼapaʼapa ki te taputapu ʼo te toto, ʼe tou hao anai mai ʼihi mahaki. ʼO hilifaki mai kiai, kā tou maʼuliʼi te ʼu tokoni faka Tohi-Tapu ʼi ʼihi faʼahi ʼo totatou maʼuli, pea ʼe fua lelei anai kiā tātou ʼi te faʼahi faka ekonomika, mo tatatou felōgoi mo te hahaʼi, peʼe ʼi te loto fale. (Isaia 48:17) Ko te ʼu fua lelei fuli ʼaia ʼe ko te ʼu fakamoʼoni ʼo te ʼaoga ʼo te ʼu lao ʼa te ʼAtua ki totatou maʼuli. Pea ko te tupuʼaga tāfito ʼo tatatou fakalogo kiā Sehova heʼe tou ʼofa kiā te ia. ʼE mole tou tauhi ki te ʼAtua ʼuhi pē ke tou maʼu mai hatatou meʼa mai iā ia. (Sopo 1:9-11; 2:4, 5) Neʼe foaki mai e te ʼAtua ia te fealagia ʼaē ke tou filifili pe ko ai ʼaē ʼe tou fia fakalogo ki ai. Pea ʼe tou fili ke tou fakalogo kiā Sehova koteʼuhi ʼe tou fia fakafiafia tona loto pea ʼe tou fia fai ia te meʼa ʼaē ʼe lelei.—Loma 6:16, 17; 1 Soane 5:3.
16, 17. (a) Neʼe fakahā feafeaʼi e Sesu ia tana fakalogo ki te ʼAtua mo he ʼofa kātoa? (b) ʼE tou lava faʼifaʼitakiʼi feafeaʼi ia Sesu?
16 Neʼe tuku e Sesu ia te faʼifaʼitaki lelei ʼo ʼuhiga mo te fakalogo mo he ʼofa kātoa kiā Sehova. (Soane 8:28, 29) ʼI tana kei ʼi te kele, neʼe “[ako e Sesu ia] te fakalogo ʼaki te ʼu mamahi ʼaē neʼe ina ʼūtakiʼi.” (Hepeleo 5:8, 9) ʼO feafeaʼi? Ko Sesu “neʼe ina fakamālaloʼi ia ia totonu pea neʼe talagafua ʼo aʼu ki te mate, ʼio, ki te mate ʼi te pou fakamamahi.” (Filipe 2:7, 8) Neʼe kua fakalogo ia Sesu ʼi tana maʼuli ʼaē ʼi te lagi, kae neʼe toe ʼahiʼahiʼi tana fakalogo ʼi tana maʼuli ʼaē ʼi te kele. Koia ʼaē, ʼe tou tui papau ai ʼe tuha mo Sesu ʼi te ʼu potu fuli ke liliu ko te Pelepitelō Lahi maʼa tona ʼu tehina fakalaumālie, ʼo fēia mo ʼihi hahaʼi tui ʼo te mālamanei.—Hepeleo 4:15; 1 Soane 2:1, 2.
17 ʼE feafeaʼi kiā tātou? ʼE tou lava faʼifaʼitakiʼi ia Sesu ʼo tou fakamuʼamuʼa ia te fakalogo ki te finegalo ʼo te ʼAtua. (1 Petelo 2:21) ʼE tou lava maʼu ia te fiafia takitokotahi mokā uga kita e totatou ʼofa ki te ʼAtua ke tou fai ia te meʼa ʼaē ʼe ina fakatotonu mai, māʼiapē lā mo te ʼu temi ʼaē ʼe tou tau ai mo te ʼu fihifihia peʼe ʼahiʼahiʼi tātou. (Loma 7:18-20) Ko tona faka ʼuhiga, ke tou fakalogo fakalelei ki te ʼu fakatotonu mai iā nātou ʼaē ʼe natou takitaki ʼi te tauhi moʼoni, logolā tonatou ʼuhiga heʼe haohaoa. (Hepeleo 13:17) ʼE maʼuhiga kiā mata ʼo Sehova ia tatatou fakalogo ʼaē ki tana ʼu fakatotonu ʼi totatou loto fale.
18, 19. Koteā te ʼu fua ʼo tatatou fakalogo mo he loto kātoa ki te ʼAtua?
18 Iā ʼaho nei, ʼe tou fakahā ia tatatou fakalogo kiā Sehova mokā tou kātakiʼi te fakataga ke feala hatatou agatonu tuʼumaʼu. (Gāue 5:29) Koia, ko tatatou fakalogo ki te fakatotonu ʼa Sehova ke tou faka mafola pea mo akoʼi te hahaʼi, ʼe ina fakamaʼua ke tou ʼūtakiʼi ʼo aʼu ki te fakaʼosi ʼo te tuʼu ʼaenī. (Mateo 24:13, 14; 28:19, 20) ʼE tonu ke tou maʼu ia te faʼa kātaki moʼo hoko atu tatatou fakatahi mo ʼotatou tehina, logolā tatatou mafasia ʼi te ʼu fihifihia ʼo te mālamanei. ʼE ʼiloʼi lelei pē e totatou ʼAtua ʼofa tatatou ʼu faiga ʼaē ke tou fakalogo ʼi te ʼu faʼahi ʼaia. Kae ke tou fakalogo kātoa, ʼe tonu ke tou tauʼi totatou kakano agahala pea mo maliu kehe mai te kovi, ʼo tou fakatuputupu ia tatatou manako ki te meʼa ʼaē ʼe lelei.—Loma 12:9.
19 Kā tou tauhi kiā Sehova ʼaki te ʼofa pea mo tou loto fakafetaʼi, pea “ ʼe liliu ia ko ia ʼaē ʼe ina fakapale ia [tātou] ʼaē ʼe [tou] kumi moʼoni ia ia.” (Hepeleo 11:6) ʼE ʼaoga pea mo leleiʼia te ʼu sākilifisio lelei, kae ko te faʼahi ʼaē ʼe leleiʼia tāfito e Sehova ko tata fakalogo kātoa kiā te ia ʼaki he loto ʼofa.—Tāʼaga Lea 3:1, 2.
ʼE Kotou Tali Feafeaʼi Anai?
• He koʼē ʼe tou lava ʼui ʼe ʼi ai te meʼa ʼe tou lava foaki kiā Sehova?
• Koteā te ʼu agahala ʼaē neʼe fai e Saulo?
• ʼE tou lava fakahā feafeaʼi ʼe tou tui ko te fakalogo ʼe lelei age ʼi he ʼu sākilifisio?
• Koteā ʼaē ʼe ina uga koutou ke kotou fakalogo ai kiā Sehova?
[Paki ʼo te pasina 16]
Koteā anai te manatu ʼa he tōketā mokā mole fia fakaʼaogaʼi tana ʼu tokoni e he tahi ʼe mahaki?
[Paki ʼo te pasina 18]
Koteā te tupuʼaga ʼo te situʼa ʼa Sehova ki te Hau ko Saulo?
[Paki ʼo te pasina 20]
ʼE kotou fakalogo koa ki te ʼu fakatotonu ʼa te ʼAtua mokā kotou nonofo ʼi tokotou loto fale?