Te Fakalogo—ʼE Maʼuhiga Koa Ke Akoʼi Kia Nātou Liliki?

“ ʼE LOTO Te ʼu Mātuʼa Ki He ʼu Tamaliki ʼe Makehe, Kae Mole Nātou Loto Ki He ʼu Tamaliki ʼe Fakalogo.” Neʼe ko te kupu tāfito ʼaia ʼo te sulunale. Ko te ʼu palalau ʼaia neʼe fakatafito ki te ʼu sivi neʼe fai ʼi Niusila, ʼaē neʼe hā ai neʼe gata pe ki te hahaʼi ʼe “toko 22 ʼi te teau ʼaē neʼe nātou ʼui ʼe tonu ke akoʼi ki te fānau te fakalogo ʼi te loto fale.” Ko te sivi ʼaia neʼe ina toe fakahā ʼe manatu te ʼu mātuʼa ʼe maʼuhiga age ke akoʼi ki te fānau te tahi age ʼu meʼa, ohage ko te ʼu aga ʼaē ʼe lelei, te lava maʼuli tokotahi, pea mo te fakahoko ʼo tonatou ʼu maʼua.

ʼI te temi ʼaenī ʼaē ʼe manatu pe te hahaʼi kia nātou takitokotahi, ʼe mole tou punamaʼuli ki te loto mahalohalo ʼa te tokolahi ʼo ʼuhiga mo te fakalogo pea mo tona akoʼi ki te fānau. Kae ko te fakalogo talu mai te kei veliveli, ʼe tonu koa ke faka ʼuhiga ʼe ko he meʼa kua ʼāfea pea ʼe mole kei ʼaoga ki totatou temi? Peʼe kau koa te fakalogo ʼi te ʼu meʼa maʼuhiga ʼaē ʼe feala ke akoʼi ki te ʼu tamaliki pea mo ʼaoga kia nātou? ʼE toe maʼuhiga ʼaupito ke tou ʼiloʼi pe koteā te manatu ʼa Sehova ʼAtua, te Matapuna ʼo te fakatuʼutuʼu faka famili, ʼo ʼuhiga mo te fakalogo ki te ʼu mātuʼa, pea koteā ni ʼu fua lelei ʼe maʼu mai te fakalogo ʼaia.—Gaue 17:28; Efeso 3:14, 15.

“Ko Te Mea Aia e Tonu”

Ki te kokelekasio ʼo Efeso ʼi te ʼuluaki sēkulō, neʼe tohi fēnei e te ʼapositolo ko Paulo: “U fanau, koutou fakalogo ki autou matua i te Aliki, he ko te mea aia e tonu.” (Efeso 6:1) Koia ko te tupuʼaga tāfito ʼo te fakalogo, heʼe ʼalutahi mo te meʼa ʼaē ʼe ʼui e te ʼAtua ʼe tonu ke fai. Ohage ko tona ʼui e Paulo, “ko te mea aia e tonu.”

ʼO ʼuhiga mo te faʼahi ʼaia, ʼe tou fakatokagaʼi ʼe ʼui e te Folafola ʼa te ʼAtua ko te ako ʼaē ʼe fai mo te ʼofa e te ʼu mātuʼa ki tanatou fānau, ʼe ko he meʼa matalelei, “ko he pale taulekaleka ki tou ʼulu, pea mo he kahoa matalelei ki tou kia,” pea ʼe ko he meʼa “e lelei i te Aliki.” (Tāʼaga Lea 1:8, 9; Kolose 3:20) Kae ko te talagataʼa ki te ʼu mātuʼa ʼe mole leleiʼia e te ʼAtua.—Loma 1:30, 32.

“Ke Ke Mau Te Manuia”

Neʼe fakahā e Paulo te tahi tupuʼaga ʼo te maʼua ʼaē ke fakalogo te fānau, ʼi tana tohi fēnei: “Fakaapaapa ki tau tamai mo tau fae, ko te uluaki fekau aia fakatahi mo he fakapapau: ke ke mau te manuia mo te mauli loa i te kelekele.” (Efeso 6:2, 3; Ekesote 20:12) Koteā te ʼu faʼahi ʼe manuʼia ai he tahi mo kapau ʼe fakalogo ki tana ʼu mātuʼa?

ʼUluaki, ʼe mole moʼoni koa la ʼe lalahi age te ʼu mātuʼa pea kua nātou māhani ʼi te maʼuli? Logope la ʼe mole lagi lahi te ʼu meʼa ʼaē ʼe nātou ʼiloʼi ʼo ʼuhiga mo te ʼu olotinatea pea mo te tahi ʼu meʼa ʼe akoʼi ʼi te faleako, kae ʼe lahi age te ʼu meʼa ʼaē ʼe nātou ʼiloʼi ʼi te maʼuli pea mo te tauʼi ʼo te ʼu fihifihia ʼo te maʼuli. ʼI te tahi faʼahi, ko te kau tūpulaga ʼe mole nātou fakafuafua lelei tanatou fakakaukau ʼaē ʼe maʼu ʼaki te kua fakapotopoto. Koia ʼe nātou tautau fai fakavilivili he ʼu puleʼaki ʼo nātou mulimuli ʼi ʼihi temi ki te ʼu fakaneke ʼo te tahi kau tūpulaga, kae ʼe nātou tuʼutāmaki ai. ʼE ʼui moʼoni e te Tohi-Tapu: “ ʼE nonoʼo te agavale ʼi te loto ʼo te tama.” Koteā he puleʼaki kiai? “Ko te kauʼi ʼakau ʼo te akonaki ʼaē ka ina fakamamaʼo anai ia te ia.”—Tāʼaga Lea 22:15.

Ko te ʼu fua ʼo te fakalogo ʼe mole gata pe ʼi te ʼu felogoi ʼa te ʼu mātuʼa pea mo te fānau. Ke haʼele lelei pea mo fua lelei te sosiete fakatagata, ʼe tonu ke ʼi ai he felagolagoʼaki, pea ʼe maʼua ai ke fakalogo te hahaʼi. Ohage la, ʼi he nofo ʼohoana, ko he tahi ʼe mole faiga ke mālo, ʼe iku ki te tokalelei, mo te logo tahi pea mo te fiafia, kae mole feiā anai mo kapau ʼe lahi fau te ʼu meʼa ʼaē ʼe kita fakamaʼua pea mo kapau ʼe kita aga fefeka. ʼI te ʼaluʼaga ʼo te gāue, ʼe maʼua ke fakalogo te tagata gāue ʼi te gāue fuli pe peʼe kapau ʼe fia maʼu tuʼulaga. ʼO ʼuhiga mo te ʼu lao pea mo te ʼu lekula ʼo te puleʼaga, kapau ʼe fakalogo he tahi pea ʼe mole fakatūʼa anai pea ʼe ina maʼu anai he faʼahiga fīmālie pea mo he puipui.—Loma 13:1-7; Efeso 5:21-25; 6:5-8.

ʼI te agamāhani, ko te kau tūpulaga ʼaē ʼe nātou talagataʼa ki te pule ʼe līaki nātou e te sosiete. Kae ko te akoʼi ʼo te fakalogo ʼi takita kei veliveli, ʼe feala ke kita maʼu ai he ʼu tapuakina ʼi tokita maʼuli katoa. ʼI meʼa lelei hakita akoʼi te faʼahi ʼaia ʼi takita kei veliveli!

Te Tapuakina Lahi ʼo Te Fakalogo

ʼE maʼu ʼaki te fakalogo te ʼu felogoi fiafia ʼi te famili pea mo te tahi ʼu tapuakina ʼi te maʼuli, pea ʼe toe maʼu mo te tafitoʼaga ke laga ai te felogoi ʼaē ʼe maʼuhiga tāfito—te felogoi ʼa he tahi mo tona Tupuʼaga. ʼI tona ʼuhiga “Tupuʼaga Lahi” pea mo “matapuna ʼo te maʼuli,” ʼe tonu ke tou fakalogo katoa kia Sehova ʼAtua.—Tagata Tānaki 12:1; Pesalemo 36:9.

Ko te kupu “fakalogo” ʼe hā tuʼa 160 tupu ʼi te Tohi-Tapu. Tahi ʼaē meʼa, ʼe ʼi ai te ʼu lauʼi teau vaega ʼe talanoa ai ʼo ʼuhiga mo te ʼu lao ʼa te ʼAtua, tana ʼu fekau, tana ʼu fakatotonu, tana ʼu tonu fakamāu, pea mo tana ʼu lekula, ʼe nātou fakamaʼua mai te fakalogo. ʼE mahino ia, kia mata ʼo te ʼAtua, ʼe tonu ke kita fakalogo ke feala hakita maʼu tona ʼofa. Ei, ʼe maʼuhiga te fakalogo ke tou felogoi mo Sehova. (1 Samuele 15:22) Meʼa fakaʼofaʼofa foki, ko te meʼa ʼaē ʼe tau loto kiai te tagata, ʼe ko te talagataʼa kae mole ko te fakalogo. ʼE ʼui fēnei e te Tohi-Tapu: “Ko te holi ʼo te loto ʼo te tagata ʼe kovi ia talu mai tana kei veliveli.” (Senesi 8:21) Koia ko te akoʼi ʼo te fakalogo ʼe mole tonu pe ke fai ʼi te kei veliveli kae ʼi te maʼuli katoa. ʼE lahi te ʼu tapuakina ʼaē ʼe tou maʼu mo kapau ʼe tou fai te faʼahi ʼaia.

Koutou manatuʼi, ohage ko tona tohi e te ʼapositolo ko Paulo, ko te fakatotonu ʼaē ke fakalogo ki te ʼu mātuʼa ʼe maʼu ai te ʼu fakapapau e lua, ke “mau te manuia mo te mauli loa i te kelekele.” Ko te fakamoʼoni ki te fakapapau ʼaia ʼe tou maʼu ia Tāʼaga Lea 3:1, 2: “Ê toku foha, ʼaua naʼa galo kia te koe taku lao, pea ke taupau e tou loto taku ʼu fakatotonu, heʼe hilifaki atu anai kia te koe te loaloaga ʼo te ʼu ʼaho, pea mo te ʼu taʼu maʼuli pea mo te tokalelei.” Ko te tapuakina lahi kia nātou ʼaē ʼe fakalogo, ʼe ko tanatou maʼu he ʼu felogoi mo Sehova ʼi te temi nei pea mo te maʼuli heʼegata ʼi te mālama foʼou tokalelei.—Apokalipesi 21:3, 4.

[Paki ʼo te pasina 30, 31]

Kapau ʼe tou fakalogo pea ʼe tou maʼu ai he ʼu felogoi fiafia ʼi te famili, ʼi te fale gāue pea mo Sehova