Tou Tokoni Ki Te Kau Ako Ke Nātou ‘Fakalogo ʼAki Tonatou Loto’
1. Koteā ʼaē ʼe fakamaʼua e Sehova ki te hahaʼi ʼaē ʼe tauhi kiā te ia?
1 Ko te tauhi ʼaē ʼe tali e Sehova, ʼe fakamaʼua kiai te fakalogo. (Teu. 12:28; 1 Pet. 1:14-16) Kua vave hoko mai te ʼaho ʼaē ka fakahoko ai e te ʼAtua te tautea ʼo “nātou ʼaē ʼe mole nātou ʼiloʼi te ʼAtua pea mo nātou ʼaē ʼe mole fakalogo ki te logo lelei.” (2 Tes. 1:8, MN ) ʼE tou lava tokoni feafeaʼi ki te kau ako ke nātou ‘fakalogo ʼaki tonatou loto’ ki te ʼu akonaki ʼa te Folafola ʼa te ʼAtua?—Loma 6:17.
2. He koʼe ʼe maʼuhiga ke tou tokoni ki te hahaʼi ke nātou maʼu ia he tui mālohi?
2 Tou Tokoni Ke Nātou Maʼu Ia Te Tui Pea Mo Te ʼOfa: ʼI te Tohi-Tapu, ko te fakalogo ʼe pipiki tahi mo te tui. Neʼe talanoa ia te ʼapositolo ko Paulo ʼo ʼuhiga mo “te fakatotonu ʼa te ʼAtua heʼegata moʼo fakatuputupu te fakalogo ʼa te tui.” (Loma 16:26, MN ) ʼI te koga tohi ʼo Hepeleo kapite 11, ʼe talanoa ai ki te ʼu tuʼuga faʼifaʼitaki ʼo te hahaʼi tui, pea tokolahi iā nātou neʼe nātou gāue ʼo mulimuli ki te finegalo ʼo te ʼAtua. (Hep. 11:7, 8, 17) ʼI te tahi faʼahi, ko te talagataʼa ʼe pipiki tahi mo te mole tui. (Soa. 3:36; Hep. 3:18, 19) ʼE tonu ke tou gāue ke tou faiva ʼi te fakaʼaogaʼi ʼo te Folafola ʼa te ʼAtua, ke feala hatatou tokoni ki te hahaʼi ke nātou maʼu ia te faʼahiga tui ʼaē ka ina fakatupu te fakalogo.—2 Tim. 2:15; Skp. 2:14, 17.
3. (a) He koʼe ʼe pipiki tahi te fakalogo mo te ʼofa? (b) ʼE tou lava tokoni feafeaʼi ki te kau ako Tohi-Tapu ke nātou fakatupu iā nātou te ʼofa ʼaē kiā Sehova?
3 Ko te fakalogo ʼe toe pipiki tahi foki mo te ʼofa ki te ʼAtua. (Teu. 5:10; 11:1, 22; 30:16) ʼE ʼui fēnei iā 1 Soane 5:3, MN: “Koʼeni te faka ʼuhiga ʼo te ʼofa ʼaē ki te ʼAtua: ke tou maʼuliʼi tana ʼu fakatotonu; pea ko tana ʼu fakatotonu ʼe mole mamafa ia.” ʼE tou lava tokoni feafeaʼi ki te kau ako Tohi-Tapu ke ʼoʼofa kiā Sehova? Tou kumi he ʼu faigamālie lolotoga te ako moʼo fakatuputupu tanatou loto fakafetaʼi ki te ʼu kalitātē ʼa Sehova. Tou talanoa age kiā nātou ʼo ʼuhiga mo tatatou loto fakafetaʼi ʼaupito ki te ʼAtua. Tou tokoni ki te ako ke ina fakakaukauʼi peʼe feafeaʼi hana fakatuputupu hana ʼu felogoi mo Sehova. Ko te ʼofa ʼaē ka ina uga tāfito anai te kau ako pea mo tatou, ke tou fakalogo kiā te ia ʼaki totatou loto.—Mat. 22:37.
4. (a) He koʼe ʼe maʼuhiga tatatou faʼifaʼitaki? (b) Koteā ʼaē ʼe tonu ke tou fai moʼo fakatuputupu “he loto ʼe fia fakalogo”?
4 Tou Tuku He Faʼifaʼitaki: Ko tatatou faʼifaʼitaki, ʼe ko he puleʼaki mālohi ʼaia moʼo fakaloto mālohiʼi te kau ako ke nātou fakalogo ki te logo lelei. Kae ʼe fakamaʼua ki te faʼahi ʼaia, hakotou faiga tuʼumaʼu moʼo fakatuputupu “he loto ʼe fia fakalogo.” (1 Hau 3:9; Taag. 4:23) Koteā ʼaē ʼe tonu ke koutou fai? Koutou fafaga tokotou loto, ʼo koutou ako tuʼumaʼu ia te Tohi-Tapu, pea mo tatuʼu ki te ʼu fono. (Pes. 1:1, 2; Hep. 10:24, 25) Koutou fakakaugā mo nātou ʼaē ʼe pipiki tahi ʼonatou loto ki te tauhi moʼoni. (Taag. 13:20) Koutou ʼolo tuʼumaʼu ʼo fai faka mafola, ʼaki hakotou fia tokoni moʼoni ki te hahaʼi ʼo tokotou telituale. Koutou faikole kiā Sehova ke ina takitaki koutou ke koutou maʼu he loto ʼe lelei. (Pes. 86:11) Koutou lītuʼa ki te ʼu meʼa ʼaē ʼe feala ke nātou ʼulihi tokotou loto, ohage ko te ʼu ʼata ʼe fakahāhā ai te ʼu felāveʼi fakasino pea mo te agamālohi. Koutou haga kumi te ʼu meʼa ʼaē ʼe nātou fakaōvi ia koutou ki te ʼAtua, pea mo fakamālohiʼi takotou ʼu felogoi mo ia.—Skp. 4:7, 8.
5. ʼE feafeaʼi te tapuakinaʼi e Sehova ia te hahaʼi ʼaē ʼe fakalogo?
5 Neʼe fakapapau e Sehova ki te kau Iselaele ʼo te temi muʼa, ʼe nātou maʼu anai he ʼu tapuakina mo kapau ʼe nātou fakalogo kiā te ia. (Teu. 28:1, 2) ʼO toe feiā pe ia ʼaho nei, ʼe lahi te ʼu tapuakina ʼaē ʼe foaki e Sehova “kiā nātou ʼaē ʼe fakalogo kiā te ia ohage ko honatou pule.” (Gaue 5:32, MN ) Koia, ʼofa pe ʼaki tatatou faiako pea mo tatatou faʼifaʼitaki, ke tou tokoni ki te kau ako ke nātou fai he fakalogo ʼe haʼu mai tonatou loto.