Te ʼu Fehuʼi ʼa Te Kau Lautohi

ʼE ko he fefioʼaki koa ʼo te ʼu lotu mo kapau ʼe tou totogi he fale ʼa he tahi lotu ʼo fakaliliu ko he Fale ʼo Te Puleʼaga?

ʼI te agamāhani, ʼe faigaʼi e te kau Fakamoʼoni ʼa Sehova ke mole hoko hanatou ʼu felogoi feiā mo te tahi ʼu lotu. Kae kapau ʼe ʼi ai he ʼu faʼahi feiā, ʼe mole faka ʼuhiga ia ʼe ko he fefioʼaki ʼo te ʼu lotu. ʼE feala ke faka ʼuhiga ko he felogoi pe ki he fakatuʼutuʼu gāue. ʼE mole gāue fakatahi te kokelekasio ʼa te kau Fakamoʼoni ʼa Sehova mo he tahi lotu moʼo laga he fale ʼe nātou fakaʼaogaʼi tatau anai ki tanatou tauhi.

Koteā ʼaē ʼe faka ʼuhiga e Sehova ʼe ko he fefioʼaki ʼo te ʼu lotu? Koutou fakatokagaʼi te tokoni ʼa te ʼapositolo ko Paulo: “ ʼAua naʼa koutou kaugā ʼamo fakatahi mo te hahaʼi ʼaē ʼe mole tui. Koteʼuhi, ʼe fakatahi feafeaʼi te faitotonu pea mo te meʼa noaʼi ʼo te lao? Peʼe feafeaʼi te felogoi ʼa te mālama pea mo te fakapōʼuli? Pea tahi ʼaē meʼa, ʼe felogoi feafeaʼi ia Kilisito pea mo Peliale? Peʼe ko te vahe fea ʼaē ʼe fakatahi ai te tagata tui mo ʼaē ʼe mole tui? E feafeaʼi he felogoi ʼo te fale lotu ʼo te ʼAtua pea mo te ʼu tamapua? . . . ‘Koia ke koutou mavae mai te lotolotoiga ʼo nātou, pea ke koutou mavae kehe mai ai,’ ko te ʼui ʼaia ʼa Sehova, ‘pea ʼaua naʼa koutou fāfā ki te meʼa ʼaē ʼe heʼemaʼa’; ‘pea ʼe ʼau tali anai koutou.’ ” (2 Kolonito 6:14-17, MN ) Koteā ʼaē neʼe fia palalau kiai ia Paulo ʼaki tana fakaʼaogaʼi ia te ʼu kupu “fakatahi” pea mo te “felogoi”?

Ko te fakatahi ʼaē ʼe palalau kiai ia Paulo ʼe faka ʼuhiga tāfito ki te tauhi pea mo te ʼu felogoi fakalaumālie mo he kau tauhi tamapua pea mo he ʼu hahaʼi ʼe mole tui. Koia neʼe ina fakatokaga age ki te kau Kolonito ke ʼaua naʼa nātou “vahevahe . . . mo te laupapa o te u temonio.” (1 Kolonito 10:20, 21) Koia ko te fefioʼaki ʼo te ʼu tauhi ko tona fakaliliu ko he kau ki he faifaitahi fakalaumālie mo he tahi ʼu lotu. (Ekesote 20:5; 23:13; 34:12) Ka totogi he fale neʼe fakaʼaogaʼi e he kautahi faka lotu, ko te totogi pe ia ʼo te fale moʼo fakaliliu ko he Fale ʼo Te Puleʼaga. ʼI muʼa ʼo tona fakaliliu ko he Fale ʼo Te Puleʼaga, ʼe toʼo anai te ʼu meʼa fuli ʼe ʼi ai tona pikipikiga mo te tauhi hala. ʼI tona ʼosi fakamaʼa, pea hoki foaki ai leva kia Sehova ʼo ʼaoga ʼāteaina pe ki tana tauhi. ʼE mole hoko ai anai he faifaitahi ʼo te tauhi moʼoni pea mo te tauhi hala.

Ka hoko he talaga ki te totogi ʼo te fale, ʼe tonu anai ke faka tuʼakoi pe te ʼu felogoi ki te fakatau ʼo te fale. ʼE lelei ke manatuʼi e nātou ʼaē ʼe kau ki te kokelekasio faka Kilisitiano, ia te fakatokaga ʼa Paulo ke ʼaua naʼa nātou “kaugā ʼamo fakatahi mo te hahaʼi ʼaē ʼe mole tui.” Logope ʼe mole tou māʼoluga age ʼi te hahaʼi ʼaē ʼe mole tou lotu tahi, kae ʼe mole tou faigaʼi ke tou faifaitahi mo nātou peʼe tou fia mulimuli ki tanatou tauhi.a

Koteā te pelesepeto faka Tohi-Tapu ʼe tonu ke tokagaʼi e he kokelekasio ʼe ina lue he fale ʼa he kautahi faka lotu? ʼI te agamāhani, ko te lue ʼe faka ʼuhiga ko he felogoi putuputu mo te hahaʼi ʼo te kautahi faka lotu ʼaia, pea ʼe mole tonu ke fai te faʼahi ʼaia. Māʼia pe la mo te lue ʼo te taʼi fale ʼaia ki he lakaga pe e tahi, ʼe tonu ki te kau tagata ʼāfea ke nātou fakatokagaʼi te ʼu faʼahi ʼaenī: ʼI te fale ʼaia, ʼe ʼi ai anai koa he ʼu fakatātā peʼe ko he ʼu paki faka lotu ʼi loto pea mo tuʼa? Koteā anai te manatu ʼa te hahaʼi ʼo te kolo ʼo ʼuhiga mo tatatou fakaʼaogaʼi ia te fale? ʼE mole tūkia anai koa he tahi ʼi te kokelekasio ʼi te fakaʼaogaʼi ʼo te fale ʼaia? (Mateo 18:6; 1 Kolonito 8:7-13) ʼE fakafuafua anai e te ʼu tagata ʼāfea ia te ʼu faʼahi ʼaia pea mo fai he tonu ke ʼalutahi mo ia. ʼE tonu ke tokagaʼi tonatou leʼo ʼo loto ʼo feiā mo te kokelekasio, mokā nātou fakatuʼutuʼu ke nātou totogi pea ke nātou fakaliliu te taʼi fale ʼaia ko he Fale ʼo Te Puleʼaga.

[Kiʼi nota]

[Paki ʼo te pasina 27]

Ko te fale ʼaenī, ʼaē neʼe ko te sinakoka ʼi muʼa atu, neʼe totogi pea neʼe fakaliliu ko he Fale ʼo Te Puleʼaga