Te ʼu Fehuʼi ʼa Te Kau Lautohi

ʼE lelei anai koa ki he kilisitiano ke ina fai he gāue mo he tahi ʼe mole tui kia Sehova, koteʼuhi ʼe ʼui mai e te Tohi-Tapu kia tatou, ʼo fēnei: “ ʼAua naʼa koutou kaugā fatogia fakatahi mo te hahaʼi ʼaē ʼe mole tui?”

ʼE tou maʼu te tokoni ʼaenī ia 2 Kolonito 6:14-16: “ ʼAua naʼa koutou kaugā fatogia fakatahi mo te hahaʼi ʼaē ʼe mole tui. Koteʼuhi, ʼe fakatahi feafeaʼi te faitotonu pea mo te meʼa noaʼi ʼo te lao? Peʼe feafeaʼi te felogoi ʼa te mālama pea mo te fakapōʼuli? Pea, ʼe felogoi feafeaʼi ia Kilisito pea mo Peliale? Peʼe ko te vahe fea ʼaē ʼe fakatahi ai te tagata tui mo ʼaē ʼe mole tui? E feafeaʼi he felogoi ʼo te fale lotu ʼo te ʼAtua pea mo te ʼu tamapua?”

ʼAua naʼa tou manatu ko te ʼapositolo ko Paulo neʼe ina foaki te tokoni ʼaenī ʼaki te manatu ʼaē ke ina fakatuʼu he ʼu tapu, ohage la ki he kilisitiano ʼe fakakaugā ki he gāue mo he tahi ʼe mole tui kia Sehova. Kae, e lagi ko te tokoni ʼaia ʼe mahino pe ʼe faka ʼuhiga ki te faʼahi ʼaia, ohage pe ki ʼihi age ʼu ʼaluʼaga ʼo te maʼuli.

Neʼe tohi e Paulo te tokoni ʼaia ki te ʼu tēhina kilisitiano ʼo te Kolonito ʼāfea. ʼI tanatou maʼuʼuli ʼi te kolo neʼe māmio kovi ʼosi, neʼe nātou tauʼi pe ʼi te ʼaho fuli te ʼu tuʼutāmaki ʼo ʼuhiga mo te aga ʼaē ʼe tonu ke fai feiā aipe mo te aga fakalaumālie. Kapau neʼe mole nātou nonofo tokakaga, neʼe tau nātou mo te ʼu fakahala fakalialia ʼaē neʼe feala ke fakavaivai ai tanatou fakatuʼutuʼu ʼaē ke nātou liliu ko he hahaʼi kehe, “ko te hahaʼi kua fili, te kau pelepitelo faka hau, te puleʼaga maʼoniʼoni, te hahaʼi ʼe ʼamanaki ko hana meʼa makehe”. — 1 Petelo 2:9.

ʼI muʼa ʼo tana tohi te manatu ʼaē ia 2 Kolonito 6:14-16, neʼe felāveʼi ia Paulo mo te fihifihia fakamataku ʼi te lotolotoiga ʼo tona ʼu tēhina ʼaē ʼi Kolonito. Neʼe nātou fakagafua te toe agahala heʼeʼaoga ia nātou, koia ʼaē neʼe haga ai Paulo ʼo taki nātou ke nātou fakamavae te tagata agahala heʼe fakahemala (1 Kolonito 5:1). Ko te agakovi ʼa te tagata ʼaia neʼe hā ʼaki ai ko te fakakaugā kovi peʼe ko te mole nofo tokaga ʼo ʼuhiga mo te ʼu aga ʼo te malamanei, ʼe feala ke pikisia ai te kau kilisitiano.

Ko te kau kilisitiano ʼo Kolonito neʼe tonu ke nātou fakamamaʼo ʼi te fakakaugā mo te tagata ʼaē neʼe fakamavae, kae ʼe faka ʼuhiga koa ʼe tonu ke nātou fakamamaʼo ʼosi mai ia nātou ʼaē ʼe mole tui kia Sehova? ʼE tonu koa ke mole nātou toe felāveʼi peʼe mo felogoi mo niʼihi ʼe mole kilisitiano, ʼo nātou liliu ai ko he magaʼi lotu fakamonike, ohage ko te kau Sutea ʼaē neʼe ʼolo ki Qumrân e ōvi ki te tai Kula? Tou tuku ke tali e Paulo: “ ʼI taku tohi neʼe ʼau faitohi atu ke koutou fakagata takotou fakakaugā mo te hahaʼi folonikasio, ʼe mole faka ʼuhiga leva ki te hahaʼi folonikasio ʼo te malamanei (...). Heʼe kapau koia ʼe tonu anai ia ke koutou mavae ʼosi mai te malamanei.” — 1 Kolonito 5:9, 10.

Ko te maʼuliʼi ʼo te ʼu palalau ʼaenī ʼe mahino lelei pe. Neʼe ʼiloʼi lelei e Paulo ko te kau kilisitiano ʼe kei nātou nonofo ʼi te kele ʼaenī, ʼe nātou maʼuʼuli mo te kau hahaʼi heʼe tui ʼi te ʼaho fuli, pea ko tanatou ʼu aga ʼe mole faʼa lelei feiā aipe ki ʼanatou ʼu lekula, ʼaē ʼe kehekehe ʼosi mo ʼaē ʼa te kau kilisitiano. ʼUhi he mole feala ke tekeʼi te ʼu faʼahi ʼaia, ʼe tonu anai ki te kau kilisitiano ke nātou nonofo tokakaga ki te ʼu tuʼutāmaki ʼo te ʼu taʼi fakakaugā ʼaia.

Tou toe vakaʼi age nei te lua tohi ʼa Paulo ki te kau Kolonito. Neʼe ina fakahā lelei ki te kau kilisitiano fakanofo ʼaia, ʼe tonu ke nātou maʼu te ʼu kalitate maʼuhiga ʼaē ʼe tau mo te kau minisi ʼa te ʼAtua, ko he kau fakafofoga ʼo Kilisito. Neʼe ina ʼui age kia nātou ke nātou tokakaga ki te ʼu faʼahiga meʼa faka tūkia ʼe feala ke taki tanatou minisitelio ki he mālama kovi (2 Kolonito 4:1–6:3). Neʼe fakaloto mālohiʼi fakahagatonu e Paulo tona ʼu tēhina Kolonito, ʼaē neʼe hage ko hana ʼu fānau fakalaumālie, ke nātou faka fālahi tanatou ʼu fakahāhā ʼofa (2 Kolonito 6:13). Hili ʼaia pea ina fakaloto mālohiʼi nātou, ʼo ʼui maʼana: “ ʼAua naʼa koutou kaugā fatogia fakatahi mo te hahaʼi ʼaē ʼe mole tui.” Neʼe ina fakaʼaogaʼi te ʼu faʼahiga meʼa fakafeagai lahi moʼo fakaʼiloga te puani ʼaia.

Ko te talanoa katoa ʼaia ʼe ina fakahā ko Paulo neʼe mole tukupau tana fakakaukau ki he ʼu faʼahi tāfito ʼo te maʼuli, ohage la ko te matani gāue peʼe ko te gāue, pea neʼe mole ina fai he fakatuʼutuʼu ke fakamālohiʼi ki te faʼahi ʼaia. Kailoa, neʼe ina foaki te tokoni ki te faʼahi fuli ʼo te maʼuli, te tokoni loloto, te tokoni ʼaoga ki te ʼu tēhina ʼaē neʼe ʼoʼofa mamahi ki ai.

ʼE ʼaoga anai koa te tokoni ʼaenī ki he kilisitiano ʼe fia ʼohoana? Ei. ʼI tana ʼuluaki tohi, neʼe tokoni e te ʼapositolo te kau Kolonito ʼaē neʼe fia ʼohoana ke nātou ʼohoana “ ʼi te ʼAliki pe”. (1 Kolonito 7:39.) Neʼe ina fakaʼiloga te fakapotopoto ʼo te ʼu palalau ʼaia, ʼaki te manatu ʼaē neʼe ina tohi ki muli age ia 2 Kolonito 6:14-18. Kapau ko he kilisitiano neʼe fia ʼohoana mo he tahi ʼe mole kaugana kia Sehova pea ʼe mole ko he tisipulo ia ʼa Kilisito, ʼe faka ʼuhiga tana aga ʼaia ko hana fakatahi mo he tahi ʼe mole tui (vakaʼi ia Levitike 19:19; Teutalonome 22:10). ʼE mahino ia, ko te mole felogoi ʼe ina fakatupu anai he ʼu fihifihia, ko he ʼu fihifihia fakalaumālie. Ohage la, ko ʼaē ʼe mole tui kia Sehova, ʼe feala ʼi te temi nei peʼe ki ʼamuli ke tauhi ia ki he ʼatua hāla. Neʼe palalau fakapotopoto ia Paulo, ʼo fēnei: “ ʼE felogoi feafeaʼi ia Kilisito pea mo Peliale?”

Kae e feafeaʼi ki te tahi ʼaluʼaga ʼi te maʼuli — ko te fakatuʼutuʼu ʼo he meʼa mo he tahi ʼe mole tui? ʼI ʼihi ʼu ʼaluʼaga ʼe feala ke hage ki te kilisitiano ko te ʼu meʼa fakasino pea mo te tokaga ʼaē ʼe ʼaoga ki tona famili, ʼe fakamaʼua ke ina fai he meʼa mo he tahi ʼe mole ko hona kaugā fagona kilisitiano (1 Timoteo 5:8). Koutou fakatokagaʼi te ʼu faʼifaʼitaki ʼaenī:

Ko he kilisitiano ʼe feala anai ke ina fia fai he gāue ʼe fakatau koloā, pea ke hoko te faʼahi ʼaia, ʼe tonu pe anai ke kaugā gāue ia mo he tagata ʼe ina mafai he ʼu meʼa peʼe ko te falā ʼaē ʼe ʼaoga ki te faʼahi ʼaia. Ko he tahi kilisitiano, ʼe fia fai ki he gāue kele (peʼe ko te taupau ʼo he ʼu manu), kae ʼe mole ina maʼu he kele, pea ʼe hoko anai pe te faʼahi ʼaia mokā e fakakaugā ki he tahi ʼe ina tuku fakalelei age kia ia he koga ʼo tona kele, ke toe feala pe mo ia ʼaia ke ina maʼu te fua ʼo te gāue ʼa te kilisitiano. Lagi ki he tahi kilisitiano ʼe mole feala hana kau ki te gāue fai tuio, koteʼuhi ko te lao ʼa Sesale ʼe ina fakagafua pe te ʼu fealagia ʼe siʼisiʼi, pea kua ʼosi te ʼu fealagia ʼaia; ko te puleʼaki pe anai, ke ʼalu ia ki hona kāiga ʼe ina maʼu tana fealagia kae ʼe mole tui. — Maleko 12:17.

ʼE ko he ʼu faʼifaʼitaki pe ʼaenī. ʼE mole mātou lolotoga faiga ke mātou tuku kehe te ʼu fealagia, peʼe ko he palalau moʼo fakamoʼoni peʼe kailoa. ʼAki te ʼu faʼifaʼitaki ʼaia ʼi totatou ʼatamai, ʼe mole tou sio koa ki te tupuʼaga ʼaē ʼe mole tonu anai ke tou lotonoa ʼo ʼuhiga mo te tokoni ʼaē ia 2 Kolonito 6:14-18?

Ko he kilisitiano neʼe ina fai he gāue mo he tahi ʼe mole tui kia Sehova, peʼe ko hona kāiga peʼe kailoa, ʼe feala pe ke felāveʼi mo he ʼu fihifihia ʼe mole ʼamanaki kiai feiā aipe mo he ʼu fakahala. Lagi ko te kaugā gāue ʼe ina ʼui ko te ala ʼaē ke fua lelei kia nāua ko te mole tohi ʼo te ʼu hola gāue ʼa te kau gāue feiā aipe mo tonatou ʼu totogi, tatau aipe mo kapau ʼe mole ʼalutahi mo te ʼu fakatuʼutuʼu ʼa te puleʼaga. ʼE feala ke ina totogi fakafūfū he tahi ʼe ʼaumai hana meʼa ʼo ʼuhiga mo he ʼu meʼa ʼe mole tohi ki he ʼu pepa fakamoʼoni. ʼE ʼi ai anai koa he pikipikiga ʼa he kilisitiano ki te faʼahi ʼaia peʼe ki he agakākā feiā? Pea koteā te meʼa ʼe fai anai e te kilisitiano mokā ʼe aʼu mai te temi kia nāua ke nā fakahā te ʼu pepa ʼaē ʼo te tukuhau peʼe ko ʼihi ʼu pepa ʼe fakamaʼua e te puleʼaga ʼo ʼuhiga mo tanā faʼahiga fai ʼaē ʼo te gāue? — Ekesote 23:1; Loma 13:1, 7.

Peʼe ko te kaugā gāue ʼaē ʼe mole tui ʼe feala ke ina fia maʼu te ʼu meʼa ʼo ʼuhiga mo te ʼu lafeti faka pagani, pea mo momoli te ʼu kate lafeti ki te higoa ʼo te sosiete, pea mo teuteuʼi te gāue ki he ʼu ʼaho lalahi faka lotu. Neʼe fehuʼi e Paulo, ʼo fēnei: “E feafeaʼi he felogoi ʼo te fale lotu ʼo te ʼAtua pea mo te ʼu tamapua? Heʼe ko tatou ko te fale lotu ʼo te ʼAtua maʼuli.” ʼE ko he talanoa matatonu: “Koia ke koutou mavae mai ʼi te lotolotoiga ʼo nātou, pea ke koutou mavete, ko te ʼui ʼaia ʼa Sehova, pea ʼaua naʼa koutou fāfā ki he meʼa ʼe mole maʼa.” (2 Kolonito 6:16, 17). Neʼe fili e te kau kilisitiano tokolahi te ʼu faʼahiga gāue fakamālama ʼe mole faʼa fakatupu tuʼutāmaki kia nātou ʼuhi ko tanatou muliʼi te tokoni ʼaenī. — Hepeleo 13:5, 6, 18.

Neʼe mole fakanofo te kokelekasio ke ina leʼoleʼo peʼe ina kumi te ʼu meʼa fuli ʼaē ʼe fai e te kau kilisitiano ʼi tanatou gāue fakamālama, ʼi tonatou ʼuhiga gāue ki he patolo peʼe nātou patolo ki he gāue. ʼIo, kapau ʼe ʼiloa ko he kilisitiano ʼe pipiki ki te agakovi, ohage la ko te lagolago ʼo te tauhi hāla peʼe ko he ʼu faʼahiga loi peʼe mo he ʼu aga kaihaʼa, ko te kokelekasio ʼe ina fai anai te ʼu fakatuʼutuʼu ki te faʼahi ʼaia moʼo taupau te ʼu lekula ʼa Sehova.

Kae, ko te meʼa maʼuhiga tāfito ko te tokoni ʼaenī ʼa Paulo mai te ʼAtua: “ ʼAua naʼa koutou kaugā fatogia fakatahi mo te hahaʼi ʼaē ʼe mole tui”, ʼe feala ke tokoni ki te kau kilisitiano ke nātou tekeʼi he ʼu fihifihia pea mo he faʼahiga fakamāu ke fai e te ʼu tagata ʼāfea. Ko te kau kilisitiano popoto ʼe nātou tokagaʼi fakamalotoloto anai te tokoni ʼaia pea ʼe mole nātou fai anai he meʼa ke nātou fakafeagai mo te ʼu fakatuʼutuʼu ʼa te Tohi-Tapu. Kapau ʼe hage ki he tahi ʼe tonu ke ina fai he gāue mo he tahi ʼe mole tui kia Sehova, ʼaua naʼa haga niʼihi ʼo fakamāu fakavilivili peʼe mo fatufatuʼi ia ia, ke mahino kia nātou ko ia pe ʼaē ka ina ʼamo anai te ikuʼaga ʼo tana aga ʼaia. Tāfito la, neʼe mole haga ia Paulo ʼo fakatuʼu he lekula moʼo tapuʼi ia te fai ʼo he meʼa mo he tahi ʼe mole tui. ʼE tonu anai pe ke ʼaua naʼa lotonoa ki tana tokoni. Ko te tokoni ʼaia ʼe haʼu mai te ʼAtua pea neʼe tohi ʼi te Tohi-Tapu ke fua lelei kia tatou. ʼE tou popoto ʼi tona muliʼi.