‘ ʼAtua, He Koʼe Koa Neʼe Ke Fakagafua Te Meʼa ʼAia?’

ʼE KEI manatuʼi e Ricardo tana nofo mo tona ʼohoana ko Maria ʼi te fale fakatalitali ʼo te tōketā.a Neʼe faigataʼa kia nāua taumatuʼa hanā avahi te ʼu pepa faitoʼo fakamuli ʼo Maria. Pea neʼe avahi leva e Ricardo te sila, pea neʼe nā lau fakavilivili te ʼu meʼa ʼaē neʼe tohi ai e te tōketā. Neʼe nā tokagaʼi te kupu “kosea,” pea nā kekē he neʼe mahino kia nāua te faka ʼuhiga ʼo te kupu ʼaia.

ʼE manatuʼi fēnei e Ricardo: “Neʼe agalelei ʼaupito te tōketā kae neʼe ina ʼiloʼi lelei te ʼaluʼaga faigataʼa ʼaia, koteʼuhi neʼe ina ʼui mai kia māua ʼe tonu ke ma falala ki te ʼAtua.”

ʼI muʼa ʼo te kamata ʼo te radiothérapie, neʼe fakatokagaʼi e te tōketā ko Maria neʼe mole kei feala hana matāʼofi te gaūgaūe ʼo tona vaʼe mataʼu. ʼAki te tahi ʼu sivi neʼe hā ai ko te kosea kua aʼu ki tona ʼuto. Neʼe hili pe te vāhaʼa ki te kamata fai ʼo te radiothérapie pea tuku. Neʼe tō ia Maria ki te koma pea mate ia māhina e lua ki muli age. ʼE fakamatala fēnei e Ricardo: “Neʼe ʼau fiafia ʼi te kua ʼosi ʼo tona ʼu mamahi, kae ʼe ʼau manatuʼi ʼaupito ia ia pea ʼe ʼau logoʼi ʼi toku loto ʼe ʼau fia mate mo ʼau. ʼI te temi fuli, neʼe ʼau kalaga fēnei ki te ʼAtua: ‘He koʼe koa neʼe ke fakagafua ke hoko te meʼa ʼaia?’ ”

Ka Hoko He ʼu Tuʼutāmaki ʼe Malaga Te ʼu Fehuʼi

ʼI te malamanei katoa, ko te hahaʼi e tokolahi ohage pe ko Ricardo neʼe nātou tau mo te ʼu mamahi faigataʼa. Tuʼumaʼu pe ʼe ko te hahaʼi ʼaē neʼe mole fai hanatou meʼa kovi ʼaē ʼe mamahi. Koutou fakatokagaʼi te ʼu mamahi ʼaupito ʼaē neʼe hoko ʼuhi ko te ʼu tau ʼaē ʼe fai hoholo ʼi te malamanei. Peʼe koutou fakatokagaʼi te lotomamahi ʼa te kau vikitima e tokolahi ʼaē neʼe fakaʼalikiʼi, te ʼu fānau ʼaē neʼe fai ki ai he ʼu aga heʼeʼaoga kae kei nātou liliki, te ʼu agamālohi ʼaē ʼe fai ʼi te ʼu loto fale, pea mo te tahi ʼu agakovi neʼe fai e te hahaʼi. ʼI te lolotoga ʼo te hisitolia neʼe hage ia ʼe mole he tuʼakoi ki te heʼe faitotonu pea mo te feagakoviʼaki ʼa te hahaʼi tagata pea mo te hahaʼi fafine. Pea ʼe ʼi ai mo te lotohoha ʼo te kau vikitima ʼo te ʼu tuʼutāmaki ʼo te kele, peʼe ko te ʼu hoha ʼo te loto, mo te fakakaukau, pea mo te mahaki fakasino. ʼE mole tou punamaʼuli ai ki te fai e te tokolahi ia te fehuʼi ʼaenī, “He koʼe koa ʼe fakagafua e te ʼAtua te ʼu mamahi ʼaia?”

Māʼiape la mo nātou ʼaē ʼe nātou tui mālohi ki te ʼu akonaki faka lotu, ʼe faigataʼa kia nātou te tauʼi ʼo te ʼu mamahi. Mo koutou foki, ʼe koutou feʼekeʼaki anai pe koʼe ʼe fakagafua e he ʼAtua ʼofa, mo māfimāfi ke maʼuli mamahi te malamanei. ʼE maʼuhiga ki te tokalelei ʼo tatatou fakakaukau pea mo tatatou felogoi mo te ʼAtua ke tou maʼu ia he tali totonu pea mo moʼoni ki te fehuʼi faigataʼa ʼaia. ʼE foaki e te Tohi-Tapu te taʼi tali ʼaia. Koutou vakaʼi te manatu ʼa te Tohi-Tapu ki te faʼahi ʼaia ʼi te alatike ka hoa mai.

[Kiʼi nota]

[Paki ʼo te pasina 3]

Neʼe ʼui mai e te tōketā kia māua ʼe tonu ke ma falala ki te ʼAtua