Ko He Gāue ʼe Kita Fīmālie Ai Pea Mo Fiafia Ai ʼe Faka Haʼu Ke Puli
“KO TE maʼua ʼaē ke gāue” ʼe ko he faʼahi maʼuhiga ki te hahaʼi fuli, ohage ko tona ʼui e te Déclaration universelle des droits de l’homme, ʼaē neʼe tā ʼi Amelika. Kae ʼe mole ko te meʼa ʼaia ʼaē ʼe hoko tuʼumaʼu. ʼE lahi te ʼu faʼahi ʼe feala ke mole maʼu ai he gāue—te faʼahi faka ekonomika ʼo te fenua peʼe ko te ʼaluʼaga ʼo te gāue ʼi te malamanei katoa. Kae ka puli he gāue peʼe tuʼutāmakiʼia, pea ʼi te agamāhani ʼe ʼolo te hahaʼi ʼo fakahā tonatou ʼita ʼaia ʼi te ala, mo fakatupu maveuveu, pea mo nātou tāʼofi te gāue. ʼE tokolahi te ʼu fenua ʼe hoko ai te ʼu meʼa ʼaia. Ohage ko tona ʼui e te tagata faitohi, māʼia mo te kupu “gāue” ʼe malave ki te loto ʼo te hahaʼi.
ʼE lahi te ʼu tupuʼaga ʼo te maʼuhiga ʼaē kia tatou te gāue. ʼE tou maʼu ai hotatou totogi, pea ʼe toe tokoni mai ke lelei tatatou fakakaukau pea mo totatou loto. Ko te gāue ʼe ina fakafimālie te holi ʼa te tagata ʼaē ke ʼaoga ki te sosiete, pea ʼe ina maʼu ai he fakatuʼutuʼu ʼi tona maʼuli. ʼE toe maʼuhiga ai ki totatou matagafua. Koia māʼia mo nātou ʼaē kua feʼauga te falā ʼaē neʼe nātou tānaki moʼo tali ki te ʼu meʼa ʼe ʼaoga kia nātou, peʼe ko nātou ʼaē kua feala ke letelete, ʼe nātou fia hoko atu pe nātou tanatou gāue. Ei, ʼe maʼuhiga ʼaupito te gāue, heʼe kapau ʼe mole feʼauga te gāue pea ʼe hoko ai te ʼu fihifihia maʼuhiga ʼi te fenua.
ʼI te tahi faʼahi, ʼe ʼi ai te ʼu hahaʼi ʼe nātou gāue, kae ʼe mole kei nātou fiafia ʼuhi ko te ʼu faigataʼaʼia ʼo te gāue. Ohage la, ʼuhi ko te fakataupiepie ʼaē ʼe hoko ʼi te faifakatau, ʼe tokolahi te ʼu matani gāue neʼe nātou fakamavae tanatou ʼu hahaʼi gāue ke mole lahi ai te falā ʼaē ʼe puli. ʼE lagi lahi anai te gāue ʼaē ʼe tonu ke fai e nātou ʼaē ʼe kei gāue, pea ʼe lagi tonu ai ke loaloaga age te temi ʼaē ʼe nātou gāue ai.
Ko te haʼele ki muʼa ʼo te ʼu meʼa gāue, ʼaē neʼe ʼui ʼe ina faka faigafua te maʼuli ʼo te tagata pea mo ʼāsili gāue lelei age ai, neʼe lagi ina fakatupu te tahi ʼu faigataʼaʼia ʼi te fale gāue. Ohage la, ko te ʼu olotinatea, mo te ʼu fax, pea mo te Internet ʼe feala ai ki te hahaʼi ke nātou fakaʼosi tanatou gāue ʼi tonatou loto fale, ʼo mole kei ʼi ai he kehekehe ʼo te loto fale pea mo te fale gāue. Ki he tahi ʼe gāue ʼe feala ke ina manatu ko te bip peʼe ko te telefoni feʼāveʼaki ʼe ina haʼisia ia ia ki tona patolo.
ʼUhi ko te ʼu fetogi fakavilivili ʼi te faʼahi faka ekonomika pea mo te gāue, ʼe tuputupu te tuʼania ʼa te hahaʼi matutuʼa tokolahi, naʼa fakamavae nātou ʼi muʼa ʼo tonatou temi letelete. ʼO ʼuhiga mo te faʼahi ʼaia, neʼe ʼui fēnei e Chris Sidoti, neʼe ina fakafofoga ʼi te temi muʼa te ʼu Droits de l’homme : “ ʼE hage ia kua fakatuʼutuʼu he faʼahiga hahaʼi gāue, kapau ʼe koutou fakalaka ʼi te taʼu 40 pea ʼe mole kei feala anai hakotou gāue mo te ʼu olotinatea pea mo te ʼu meʼa gāue foʼou.” Koia e tokolahi te ʼu hahaʼi gāue lelei neʼe feala ʼi te temi muʼa ke ʼui ko he ʼu hahaʼi gāue lahi, kae ʼi te temi nei kua faka ʼuhiga ia nātou ko he ʼu hahaʼi kua matutuʼa pea ʼe mole kei ʼi ai honatou ʼaoga. ʼI meʼa fakaʼofaʼofa leva!
ʼE tou mahino ai pe koʼe kua fakahaʼuhaʼu ʼo puli te tui ʼaē ki te maʼuhiga ʼo te gāue kinakina pea mo te agatonu ki te fale gāue. ʼE ʼui fēnei e te nusipepa Fakafalani Libération : “Ka fakamavae e he ʼu fale gāue te ʼu hahaʼi ʼi te temi pe ʼaē ʼe hage ai ʼe ʼai he kiʼi hifo ʼi te faifakatau faka malamanei, pea ʼe mole kei agatonu te fale gāue ki tana kau gāue. ʼE mahino ia, ʼe tonu ke koutou gāue kae koutou gāue ke koutou fīmālie ai, kae mole ki te matagi gāue.”
Logola te ʼu fihifihia ʼaia ʼe tuputupu, kae ʼe kei ʼaoga ke gāue te tagata. Koia ʼi totatou temi ʼaē ʼe fetogi fakavilivili, ʼe lava maʼu feafeaʼi e he tahi he manatu fakapotopoto ʼo ʼuhiga mo te gāue pea mo ina maʼu he gāue ʼe fīmālie pea mo fiafia ai?
[Paki ʼo te pasina 3]
Ko te haʼele ki muʼa ʼo te ʼu meʼa gāue neʼe feala ke ina hilifaki te tahi ʼu faigataʼaʼia ʼi te fale gāue