Tou Maʼu He Manatu Fakapotopoto ʼo ʼUhiga Mo Te Gāue
ʼI TE temi nei ʼaē ʼe lahi ai te kole ʼi te faifakatau faka malamanei, mo te fai fakataupiepie mālohi, pea mo te ʼu tuʼuga meʼa ʼaē ʼe tonu ke faʼu, tokolahi te hahaʼi ʼe mole kei nātou fiafia ʼi te ʼolo ʼo gāue ʼi te ʼaho fuli. Kae ʼe tonu ke tou fiafia ʼi tatatou gāue. Koteā tona tupuʼaga? Koteʼuhi neʼe faʼu tatou ki te paki ʼo te ʼAtua—pea neʼe fiafia te ʼAtua ʼi tana gāue. Ohage la, ʼi tana vakaʼi te ʼu meʼa ʼaē neʼe ina faʼu ʼi te fakaʼosi ʼo te ʼu “ ʼaho” fakatupu ʼaē e fitu, peʼe ko te ʼu temi loaloaga, ʼe ʼui ia Senesi 1:31: “Neʼe sio ai te ʼAtua kia meʼa fuli neʼe ina fai pea koʼeni ko te meʼa ʼaia neʼe lelei ʼaupito.”
ʼE mahino ia ko te ʼofa ʼo Sehova ki tana gāue neʼe ko te tahi tupuʼaga ʼaia ʼo tona fakahigoa ko “te ʼAtua fiafia.” (1 Timoteo 1:11, MN ) Koia ʼe mole tonu koa la ke tou liliu ʼo fiafia lahi mo kapau ʼe tou faʼifaʼitaki kia te ia? ʼO ʼuhiga mo te faʼahi ʼaia, ko te Hau ko Salomone ʼo te Iselaele ʼāfea, ʼaē neʼe poto ʼi te laga fale pea mo te fakatuʼutuʼu gāue, neʼe ina tohi fēnei: “Ke kai foki te tagata fuli pe, ʼio ke ʼinu, pea mo mamata ki te lelei ʼo tana gāue kinakina katoa. ʼE ko te meʼa ʼofa ia ʼo te ʼAtua.”—Tagata Tānaki 3:13.
ʼE feala ke faigataʼa te maʼu ʼo he manatu ʼe fakapotopoto pea mo lelei ʼo ʼuhiga mo te gāue, ʼuhi ko te fetogi fakavilivili ʼo te ʼaluʼaga ʼo te gāue. Kae ʼe tapuakina e Sehova ʼAtua ia nātou ʼaē ʼe nātou mulimuli ki tana takitaki ʼofa. (Pesalemo 119:99, 100) ʼE liliu te faʼahiga hahaʼi ʼaia ʼo maʼuhiga pea mo falala kiai tonatou ʼu patolo pea ʼe feala ke nātou taupau fualoa tanatou gāue. ʼE nātou toe ako foki ke nātou maʼu he fakasiosio fakalaumālie ki tonatou maʼuli pea mo tanatou gāue, kae mole nātou tokagaʼi pe te faʼahi ʼo te falā. ʼE feala ai ke nātou fai he ʼu puleʼaki maʼuhiga ʼi tonatou maʼuli pea mo mahino kia nātou ko te fiafia pea mo te fīmālie ʼe mole fakalogo pe ki tanatou gāue peʼe ki te lahi ʼo te gāue ʼaē ʼe foaki. (Mateo 6:31-33; 1 Kolonito 2:14, 15) ʼE tokoni kia nātou ke nātou maʼu he aga ʼe fakapotopoto ʼo ʼuhiga mo te gāue.
Tou Maʼu Te Manatu ʼa Te ʼAtua ʼo ʼUhiga Mo Te Gāue
Ko ʼihi hahaʼi ʼe nātou manatu pe ki te gāue, ʼo nātou fakamuʼamuʼa tāfito tanatou gāue. Ko ʼihi ʼe nātou atalitali ki te fakaʼosi ʼo tonatou ʼaho gāue, ke feala ai hanatou mavae pea mo ʼolo ki tonatou ʼu ʼapi. Koteā te manatu ʼaē ʼe fakapotopoto? ʼE tali fēnei e te Tohi-Tapu: “ ʼE lelei age he felūkuga mālōlō e tahi ʼi he ʼu felūkuga gāue e lua pea mo te tuli ʼo te matagi.” (Tagata Tānaki 4:6) Ko te gāue kinakina fau peʼe fualoa fau, ʼe fakatupu ai he ʼu fihifihia—ʼe ko he “tuli [ʼaia] ʼo te matagi,” pea ʼe mole hona ʼaoga. Koteā tona tupuʼaga? Koteʼuhi ʼe fakatupu kovi ki te ʼu meʼa ʼaē ʼe tou maʼu ai te fiafia lahi, ʼaē ko tatatou ʼu felogoi mo totatou famili pea mo totatou ʼu kaumeʼa, mo totatou ʼaluʼaga fakalaumālie, mo totatou maʼuli mālōlō, pea ʼe feala ke fakanounou ai totatou maʼuli. (1 Timoteo 6:9, 10) Ko te manatu fakapotopoto ʼe ko te faka feʼauga mo te totogi pea mo te tokalelei ʼaē ʼe tou maʼu, kae mole ko he tuʼuga gāue ʼe fakatupu kinakina pea mole maʼu ai te fiafia.
Logola ʼe fakaloto mālohiʼi e te Tohi-Tapu ia te manatu fakapotopoto ʼaia, kae ʼe mole ina tali te piko. (Tāʼaga Lea 20:4) Ko he tahi ʼe piko ʼe mole kei ʼi ai hona matagafua, ʼo mole kei fakaʼapaʼapa te hahaʼi kia ia. Ko te ʼaluʼaga ʼaē ʼe kovi age ʼe ko te puli ʼo tatatou ʼu felogoi mo te ʼAtua. ʼE fakahā fakahagatonu e te Tohi-Tapu ko ia ʼaē ʼe mole fia gāue ʼe mole tonu ke ina kai te meʼa ʼaē neʼe totogi e ʼihi. (2 Tesalonika 3:10) ʼE tonu ke ina fetogi tana aga pea ke gāue kinakina, ke feala hana foaki te ʼu meʼa ʼaē ʼe ʼaoga maʼa ia pea mo tona famili. ʼAki tana gāue kinakina ʼaia ʼe lagi toe feala ke tokoni kia nātou ʼaē ʼe nonofo moʼoni ʼi te faigataʼaʼia—ʼe ko he aga ia ʼe fakaloto mālohiʼi e te Folafola ʼa te ʼAtua.—Tāʼaga Lea 21:25, 26; Efeso 4:28.
Ke Akoʼi Nātou Talu Mai Tanatou Kei Liliki Ke Nātou Leleiʼia Te Gāue
ʼE mole maʼu feiā pe he ʼu agamāhani lelei ʼo ʼuhiga mo te gāue; ʼe tonu ke akoʼi te faʼahi ʼaia talu mai te kei liliki. Koia ʼe fakaloto mālohiʼi ai e te Tohi-Tapu ia te ʼu mātuʼa, ʼo ina ʼui fēnei: “Akoʼi te tama [peʼe ko te taʼahine] ʼo mulimuli ki te ala ʼaē ʼe tonu ke alu ai; koteʼuhi ka matuʼa anai, pea ʼe mole toe maliu anai ia mai ai.” (Tāʼaga Lea 22:6) ʼO hilifaki ki tanatou tuku ia he faʼifaʼitaki lelei ʼi tanatou gāue, ko te ʼu mātuʼa popoto ʼe nātou kamata akoʼi tanatou fānau ʼi tanatou kei liliki, ʼo foaki kia nātou he gāue ʼe feala ke nātou fai ʼi te loto fale. Tatau aipe peʼe lagi ʼiʼita te fānau ʼi te ʼu gāue ʼaia, kae ʼe nātou manatu anai ʼe nātou maʼuhiga ʼi te loto fale—tāfito la mokā vikiʼi nātou e tanatou ʼu mātuʼa ʼo ʼuhiga mo he gāue lelei neʼe nātou fai. Meʼa kovi foki, heʼe ko ʼihi ʼu mātuʼa ʼe nātou teitei fai ia meʼa fuli maʼa tanatou fānau, kae ʼe ko te fakapelepeleʼi fau ʼaia. ʼE lelei ke fakakaukau te ʼu mātuʼa ʼaia kia Tāʼaga Lea 29:21, ʼaē ʼe ʼui fēnei ai: “Kapau ʼe kita fakapelepeleʼi takita tagata faifekau [peʼe ko takita fānau] ʼi tana kei veliveli, pea ʼe liliu anai ʼi tona maʼuli ki ʼamuli, ko he tagata ʼe maʼuli galo.”
Ko he ʼu mātuʼa ʼe nā fakahoko tonā ʼu maʼua ʼe nā toe tokakaga ki te ʼu gāue ʼa tanā fānau ʼi te faleako, ʼo nā fakaloto mālohiʼi nātou ke nātou ako pea mo gāue lahi ʼi te faleako. ʼE feala ke fua lelei te faʼahi ʼaia ki te tūpulaga ki ʼamuli mokā tonu ke gāue.
Koutou Fakapotopoto ʼi Takotou Fili Takotou Gāue
Logola tona mole ʼui mai peʼe ko te faʼahiga gāue feafeaʼi ʼaē ʼe tonu ke tou fai, kae ʼe foaki e te Tohi-Tapu kia tatou he ʼu tokoni lelei ke mole tou tau ai mo he ʼu fihifihia ʼi tatatou tuputupu fakalaumālie, mo tatatou tauhi ki te ʼAtua, pea mo totatou tahi ʼu maʼua maʼuhiga. Ohage la, neʼe tohi fēnei e te ʼapositolo ko Paulo: “Kua nounou te temi. Koia ko nātou fuli . . . ʼaē ʼe nātou fakaʼaogaʼi te mālama, ke nātou hage ko nātou ʼaē ʼe mole nātou fakaʼaogaʼi katoa; koteʼuhi ko te ʼaluʼaga ʼo te mālama ʼaenī ʼe fetogi.” (1 Kolonito 7:29-31, MN ) ʼE mole he meʼa ʼi te mālama ʼaenī ʼe tuʼu fualoa anai peʼe tologa. Kapau ʼe tou foaki totatou temi pea mo totatou mālohi katoa kiai, pea ʼe hage pe ko hatatou foaki te paʼaga fuli ʼaē neʼe tou tānaki ʼi totatou maʼuli katoa moʼo laga he ʼapi ʼi he koga meʼa ʼe lōfia tuʼumaʼu. ʼE mole ko he manatu fakapotopoto ʼaia!
Ko ʼihi Tohi-Tapu ʼe nātou fakaliliu te kupu “ ʼe mole nātou fakaʼaogaʼi katoa,” ʼaki te kupu ʼaē “ke mole liliu ʼo tokakaga fau kiai” pea “ke mole maʼumaʼua fau ʼi te ʼu meʼa ʼaia.” (The Jerusalem Bible; Today’s English Version) Ko te hahaʼi popoto ʼe mole galo kia nātou “kua nounou” te temi ʼo te mālama ʼaenī pea kapau ʼe tou “tokakaga fau” peʼe tou “maʼumaʼua fau” ʼi ai, pea ʼe ina taki moʼoni anai tatou ki te lotovaivai pea mo te fakahemala.—1 Soane 2:15-17.
‘Ko Te ʼAtua ʼe Mole Ina Līaki Anai Koutou’
ʼE ʼiloʼi lelei age e Sehova te ʼu meʼa ʼaē ʼe ʼaoga kia tatou. ʼE ina toe ʼiloʼi peʼe tou ʼifea ʼo ʼuhiga mo te fakahoko ʼo tana fakatuʼutuʼu. Koia, ʼe ina toe fakamanatuʼi mai kia tatou: “Ke puli ʼi tokotou faʼahiga maʼuli te manako ʼaē ki te paʼaga, koutou fakafeauga pe ki te meʼa ʼaē ʼe maʼu, heʼe neʼe ina ʼui: ‘Kailoa ʼe mole ʼau tuku anai koe, kailoa ʼe mole ʼau līaki anai koe!’ ” (Hepeleo 13:5, MN ) ʼE fakaloto fīmālie te ʼu palalau ʼaia! ʼI tana faʼifaʼitakiʼi te ʼofa ʼo te ʼAtua ki tana hahaʼi, neʼe lahi te temi neʼe fakaʼaogaʼi ai e Sesu ʼi tana Akonaki maʼuhiga ʼi te Moʼuga, moʼo akoʼi ki tana ʼu tisipulo te manatu lelei ʼo ʼuhiga mo te gāue pea mo te ʼu koloā.—Mateo 6:19-33.
ʼE faiga e te kau Fakamoʼoni ʼa Sehova ke nātou tokagaʼi te ʼu akonaki ʼaia. Ohage la, ʼi te fakaafe ʼa te patolo ia te Fakamoʼoni neʼe gāue hila, ke ina fai tuʼumaʼu he ʼu hola fakalaka, neʼe fakafisi te tēhina kiai. Koteā tona tupuʼaga? He neʼe mole ina loto ke toʼo e tana gāue te temi ʼaē neʼe ina fakaʼaogaʼi maʼa tona famili pea mo te ʼu gāue fakalaumālie. ʼUhi ʼaē he neʼe ko he tagata gāue lelei pea neʼe falala kia ia, neʼe fakaʼapaʼapa te patolo ki tona loto. ʼE mahino ia, ʼe mole iku tuʼumaʼu feiā, pea ʼe lagi feala ki he tahi ke ina kumi he tahi gāue ke feala hana taupau he maʼuli ʼe fakapotopoto. Kae ko nātou ʼaē ʼe falala katoa kia Sehova, ʼi te agamāhani ʼe nātou tokagaʼi ko te lelei ʼo tanatou aga pea mo tanatou gāue ʼe tupu ai tonatou fakaʼapaʼapaʼi e tanatou patolo.—Tāʼaga Lea 3:5, 6.
Te Temi ʼAē Ka Tou Maʼu Ai He Fiafia ʼi Te Gāue Fuli Pe
ʼI te mālama agahala ʼaenī, ko te gāue pea mo te ʼu fakatuʼutuʼu gāue ʼe mole pulihi ai anai te ʼu fihifihia pea mo te ʼu manatu lotolotolua. ʼI tona fakahagatonu, ʼe toe ʼāsili kovi anai te ʼu meʼa heʼe liliu anai te mālama ʼo maveuveu pea mo hifohifo ʼi te faʼahi faka ekonomika. Kae ʼe faka temi te ʼaluʼaga ʼaia. Mole kei tuai, pea ʼe maʼu gāue fuli anai te hahaʼi. Tahi ʼaē meʼa, ʼe ko te ʼu gāue fuli pe ʼaia ʼaē ka tou leleiʼia anai pea mo tou fiafia ai. ʼE lava feafeaʼi te faʼahi ʼaia? Koteā ʼaē ka hoko anai ʼaki te fetogi ʼaia?
ʼAki tana polofeta ko Isaia, neʼe fakahā fakatomuʼa e Sehova te temi ʼaia. Neʼe ina ʼui fēnei: “ ʼE ʼau fakatupu te ʼu lagi foʼou pea mo te kele foʼou; pea ʼe mole tou toe manatuʼi anai te ʼu meʼa ʼāfea, pea ko te ʼu meʼa ʼaia ʼe mole toe hake anai ki te loto.” (Isaia 65:17) ʼE talanoa ai ʼo ʼuhiga mo te puleʼaga foʼou, ʼe liliu anai ko he meʼa ʼe moʼoni maʼa te sosiete faka tagata foʼou katoa.—Taniela 2:44.
ʼO ʼuhiga mo te maʼuli pea mo te gāue ʼa te hahaʼi ʼi te temi ʼaia, ʼe hoko atu fēnei e te lea faka polofeta: “ ʼE mahino papau ia, ʼe nātou laga anai ni ʼu fale pea ʼe nātou nofoʼi anai; pea ʼe mahino papau ia ʼe nātou to anai he ʼu fuʼu vite pea mo nātou kai anai tonatou ʼu fua. ʼE mole nātou laga anai ke nofoʼi e he tahi kehe; pea ʼe mole nātou to anai ke kai e he tahi kehe. Heʼe hage anai te ʼu ʼaho ʼo taku hahaʼi ko te ʼu ʼaho ʼo he fuʼu ʼakau; pea ko taku hahaʼi ʼaē neʼe ʼau fili, ʼe nātou fakaʼaogaʼi katoa anai te gāue ʼo tonatou ʼu nima. ʼE mole nātou kinakina noa anai, pea ʼe mole nātou fānau anai moʼo maveuveu; koteʼuhi ko nātou ko te hāko ʼaē ʼe fio ʼaki te kau tapuakina ʼa Sehova, pea mo tanatou ʼu fānau ʼo fakatahi mo nātou.”—Isaia 65:21-23.
ʼE ko he toe fetogi lahi ʼaē ka hoko anai ʼi te mālama foʼou ʼa te ʼAtua! ʼE mole koutou fia maʼuʼuli koa la ʼi he mālama feiā, ko he maʼuli ʼe mole koutou “kinakina noa anai” kae ʼe koutou fiafia anai ʼi te “fua” ʼo takotou gāue? Kae koutou fakatokagaʼi peʼe ko ai anai ʼaē ka nātou maʼu te ʼu tapuakina ʼaia: “Ko nātou ko te hāko ʼaē ʼe fio ʼaki te kau tapuakina ʼa Sehova.” ʼE feala ke koutou kau ki “te kau tapuakina” ʼaia mo kapau ʼe koutou ako peʼe ko ai ia Sehova pea mo mulimuli ki tana ʼu fakamaʼua. Neʼe ʼui fēnei e Sesu: “Ko te faka ʼuhiga ʼaenī ʼo te maʼuli heʼegata, ke nātou ako te ʼiloʼi ʼo koe, te ʼAtua moʼoni pe ʼaē e tokotahi, pea mo ia ʼaē neʼe ke fekauʼi mai, ia Sesu Kilisito.” (Soane 17:3, MN ) ʼE fiafia anai te kau Fakamoʼoni ʼa Sehova ʼi hanatou tokoni atu ke koutou maʼu te ʼatamai mālama ʼaē ʼe ina foaki te maʼuli ʼaki hakotou ako te Folafola ʼa te ʼAtua, te Tohi-Tapu.
[Talanoa ʼo te pasina 6]
“ ʼE KOLE TUʼUMAʼU NĀTOU”
ʼE ʼui fēnei e te Tohi-Tapu: “Ko he mea’pe e koutou fai, koutou fai mo te lotolelei, o hage e koutou gaue ki te Aliki, kae e mole koutou gaue ki te tagata.” (Kolose 3:23) ʼE mahino ia, ko he tahi ʼe gāue ʼo mulimuli ki te pelesepeto lelei ʼaia ʼe liliu anai ko he tahi ʼe leleiʼia e te patolo. Koia, ko te tagata ko J. J. Luna, ʼi tana tohi How to Be Invisible, ʼe tokoni ki te kau patolo ʼaē ʼe nātou kumi he ʼu hahaʼi gāue ke nātou haga kumi ʼi he faʼahiga kūtuga lotu, kae ʼe ina toe ʼui fēnei: “ ʼI tona fakahagatonu, ʼe tou fili māhani te kau Fakamoʼoni [ʼa Sehova].” ʼE ina fakahā, ʼi te ʼu tupuʼaga ʼaē ʼe ʼiloʼi lelei ai nātou, ʼe kau kiai tanatou gāue fakahagatonu, koia “ ʼe kole tuʼumaʼu nātou” ki he ʼu gāue kehekehe.
[Paki ʼo te pasina 5]
Ko he gāue ʼe fakafuafua lelei ai te ʼu gāue fakalaumālie pea mo te temi mālōlō ʼe maʼu ai te fiafia