11 Te Faʼa Gaue

TONA FAKAʼUHIGA

Ko he tahi ʼe faʼa gaue ʼe fia gaue tuʼumaʼu pe. ʼE ina leleiʼia ke gaue kinakina, ke ina maʼu ai te ʼu meʼa ʼae ʼe ʼaoga ki tona maʼuli pea mo tokoni ai ki ʼihi. Tatau aipe pe ko he gaue ʼe mole faʼa maʼuhiga.

TONA MAʼUHIGA

Ko te maʼuli ʼe lahi ʼona fakamaʼua. ʼI te malama ʼaeni ʼe tou maʼuʼuli ai, ko te tokolahi ʼe mole natou fia gaue kinakina. Kae ko ia ʼae ʼe faʼa gaue, ʼe ina maʼu anai hona ʼu fua lelei.—Ekelesiasi 3:13

ʼE ui fenei ʼe Reyon ʼe taʼu 25: “Neʼe au mahino ko te faʼa gaue ʼe kita logoʼi ai he faʼahiga ʼalikisia mo he fiafia ʼi te loto. Pea ʼe ʼekenaki ai au ke au leleiʼia te gaue. Pea tahi, ʼe ko he tahi pe ʼaia ʼu logo lelei ʼo kita.”

PELESEPETO FAKATOHI-TAPU: “Ko te ’u gaue kinakina fuli ’e ’i ai tona ʼaoga.”—Taaga Lea 14:23, MN.

TE MEʼA ʼAE ʼE FEALA KE KE FAI

Taupau maʼu he manatu ʼe lelei ʼo ʼuhiga mo te gaue ʼaki hau mulimuli ki te ʼu puani ʼaeni.

Ke ke fiafia ʼi tau fakahoko lelei te ʼu gaue. Ka ke fai he gaue ʼo te loto fale peʼe ko tau ʼu meʼa ako peʼe ko he gaue pe, fai ʼaki tou loto katoa. Pea ka neʼe ke fakahoko lelei he gaue, kumi kumi age leva he faʼahiga fai ʼe lelei age, ohage la ke vave age peʼe ke toe ʼasili lelei age. Pea ka tuputupu anai tou faiva pea ʼe toe lahi age anai tau manako ki te gaue.”

PELESEPETO FAKATOHI-TAPU: “Kua ke sio ki he tagata faiva ʼi tana gaue? ʼE tuʼu anai ia muʼa ʼo te ʼu hau; ʼe mole tuʼu anai ia muʼa ʼo he ʼu tagata noa.”—Taaga Lea 22:29, MN.

Manatuʼi ʼihi. Kapau ʼe ke fakahoko lelei ʼou maʼua, ʼe fua lelei anai ki ʼihi. Ohage la, kapau ʼe ke fai he gaue ʼo te loto fale, ʼe ke fakamaʼamaʼa ai te gaue ʼa natou ʼae ʼo tou famili.

PELESEPETO FAKATOHI-TAPU: “ ʼE lahi age te fiafia moka kita foaki, ʼi takita tali.”—Gaue 20:35.

Faigaʼi ke toe lahi age tau gaue. ʼAua naʼa fakagata pe tau gaue ʼi te meʼa ʼae neʼe tonu ke ke fai, kae ke ke fai ke lahi atu. ʼE ha ai ko koe pe ʼae ʼe pule ki tou maʼuli. Ko tona fakaʼuhiga, ʼe mole fakakinauʼi koe ke ke gaue kinakina kae neʼe ko tou loto tokotahi pe.—Mateo 5:41.

PELESEPETO FAKATOHI-TAPU: “ ʼE mole tonu ke hage tou ʼofa ko he fakamaʼua, kaʼe ʼe tonu ke ke fai ʼaki he lotolelei.”—Filemone 14.

Ke ke aga fakapotopoto. Ko he tahi ʼe faʼa gaue ʼe mole piko pea ʼe mole gaue ke kinakina feafeaʼi. Kae ʼe gaue fakapotopoto pea mo fiafia ʼi hana malolo.

PELESEPETO FAKATOHI-TAPU: “E lelei age te fonu o te nima e tahi mo te malolo, i te fonu o te u nima lua mo te gaue pea mo te tuli o te matagi.”—Ekelesiasi 4:6.