ʼE Tou Maʼu Feafeaʼi Ia Te Fiafia Moka Tou Gaue Kinakina

TOU TAUPAU HE MANATU ʼE LELEI ʼO ʼUHIGA MO TE GAUE

Tatau aipe pe ʼe kotou gaue pilo pe ʼe kotou gaue kinakina kaʼe “ko te ʼu gaue kinakina fuli ʼe ʼi ai tona ʼaoga” peʼe ko he ʼu lelei. (Taaga Lea 14:23, MN) Kotea ia te ʼu lelei ʼaia? ʼUluaki, kapau ʼe tou gaue kinakina ʼe feala ai ke tou taupau totatou maʼuli. ʼE moʼoni, neʼe fakapapauʼi mai e te ʼAtua ʼe ina foaki anai ia te ʼu meʼa ʼae ʼe ʼaoga kia ia ʼae ʼe tauhi fakamalotoloto age kia te ia. (Mateo 6:31, 32) Kaʼe ʼe tou loto pe foki ke tou toe gaue kinakina ke tou maʼu ia te ʼu meʼa fuli ʼae ʼe ʼaoga ki totatou maʼuli.—2 Tesalonika 3:10.

Koia ʼe tonu ke tou fakaʼuhiga tatatou gaue ko he aluʼaga ʼe feala ai ke tou maʼu ia te ʼu meʼa ʼae ʼe ʼaoga ki totatou maʼuli. ʼAki tatatou gaue ʼe feala ai ke tou fakahoko ʼotatou maʼua. ʼE ui fenei e Joshua, ko he tupulaga ʼe kei taʼu 25: “ ʼE ko he meʼa lelei mo kapau ʼe tou lava taupau totatou maʼuli. Kapau ʼe kotou fia totogi te ʼu meʼa ʼae ʼe ʼaoga ki tokotou maʼuli pea ʼe tonu ke kotou gaue.”

Pea tahi, ʼe tou fiafia moka tou gaue kinakina. ʼE moʼoni ʼe kinakina ia te gaue, kaʼe kapau ʼe tou faiga malohi ke tou fakahoko lelei tatatou gaue, tatau aipe pe ʼe kinakina, kaʼe ʼe tou fiafia koteʼuhi neʼe tou lavaʼi te gaue. Pea ʼe tou fakaha ai ʼe mole tou fakaʼaoʼaoganoa. (Taaga Lea 26:14) Kapau ʼe tou fai ia te faʼahi ʼaia pea ʼe tou fiafia ʼi tatatou gaue. ʼE ui fenei e Aaron: “ ʼE au logoʼi te fiafia moka ʼosi taku gaue ʼi te foʼi ʼaho katoa. ʼE au logoʼi toku gaʼegaʼe pea ʼe mole he tahi neʼe ina tokagaʼi taku gaue, kaʼe ʼe au iloʼi neʼe au fai ia he gaue.”

FAKAHOKO LELEI TAKOTOU GAUE

ʼE palalau ʼi te Tohi-Tapu ʼo ʼuhiga mo he tagata ʼe “faiva ʼi tana gaue” pea mo he fafine ʼe “gaue ia i he nima fiafia.” (Taaga Lea 22:29, MN; 31:13) ʼE moʼoni, ʼe mole feala ki he tahi ke liliu atu aipe ʼo faiva ʼi he gaue. Pea ʼe tahitahiga ia natou ʼe fiafia ʼi te fai ʼo he gaue ʼe mole natou fia fai ai. ʼE lagi ko te tupuʼaga la ʼaia ʼo te mole fiafia ʼa te tokolahi ʼi tanatou gaue. ʼE mole pe natou faiga ke natou liliu ʼo faiva ʼi tanatou gaue.

ʼI tona fakahagatonu, ʼe feala pe ki he tahi ke fiafia ʼi he faʼahiga gaue pe, mo kapau ʼe ina maʼu ia he manatu ʼe lelei ʼo ʼuhiga mo te gaue ʼaia. Pea ʼe faiga malohi ke ina akoako ke ina fakahoko lelei ia tana gaue. ʼE ui fenei e William, ʼe kei taʼu 24: “Kapau ʼe kotou faiga malohi ke kotou fakahoko lelei ia he gaue pea mo kotou sisio ki ʼona fua lelei, ʼe kotou fiafia ʼaupito. ʼE mole hage kia tatou neʼe tou fakaʼaoʼaoganoa.”

SIO TAFITŌ KI TE ʼU FUA LELEI ʼO TAKOTOU GAUE ʼAE KI ʼIHI

ʼAua naʼa kotou tokagaʼi pe ia te totogi ʼae ʼe kotou maʼu. Kaʼe kotou fai ia te ʼu fehuʼi ʼaeni: “He koʼe ʼe maʼuhiga ke au gaue? Kotea ʼae ka hoko anai mo kapau ʼe mole au fai peʼe mole au fakahoko lelei ia te gaue? ʼE ʼaoga feafeaʼi taku gaue ki ʼihi?”

ʼE lelei ke tou fakakaukauʼi ia te fehuʼi fakamuli. Koteʼuhi ʼe tou fiafia mo kapau ʼe tou iloʼi ʼe fua lelei ki ʼihi ia tatatou gaue. Neʼe ui fenei e Sesu: “E lahi age te manuia i te foaki i te tali.” (Gaue 20:35) ʼE mole gata pe ki totatou patolo peʼe ki te ʼu hahaʼi ʼae ʼe tou gaue maʼa natou, ʼe natou maʼu ia te ʼu lelei ʼo tatatou gaue. Kaʼe ʼe toe fua lelei ki totatou kiʼi famili pea mo natou ʼae ʼe maʼuli fakaʼofaʼofa.

Ia natou ʼae ʼo totatou loto fale. Moka gaue kinakina he pule famili moʼo taupau tona kiʼi famili, ʼe ʼi ai ʼona fua lelei ʼe lua. ʼUluaki, ʼe feala ke ina foaki ki tona kiʼi famili ia te ʼu meʼa ʼae ʼe ʼaoga kia natou ʼi te faʼahi fakasino, ohage la ko te meʼa kai, mo te ʼu mutuʼi meʼa, pea mo tonatou nofoʼaga. ʼE feala ai ke ina fakahoko ʼona maʼua fakafamili. (1 Timoteo 5:8) Lua, ʼaki tana gaue kinakina ʼaia, ʼe ina akoʼi age ki ʼana fanau ia te maʼuhiga ʼae ke gaue kinakina. ʼE ui fenei e Shane: “Neʼe tuku mai e taku tamai ia he faʼifaʼitaki ʼe lelei ʼo ʼuhiga mo te gaue kinakina. Neʼe ko te tufuga ʼakau agafakahagatonu, pea neʼe gaue kinakina lolotoga tona maʼuli katoa. ʼAki tana faʼifaʼitaki ʼaia, neʼe au mahino ai ki te maʼuhiga ʼae ʼo te fai ʼo he gaue ʼaki ʼotatou nima pea mo te faʼu ʼo he ʼu meʼa ʼe ʼaoga anai ki ʼihi atu.”

Ia natou ʼae ʼe ʼaoga ki ai he tokoni. Neʼe tokoniʼi e te apositolo ko Paulo ia te kau Kilisitiano ke natou “gaue kinakina . . . ke maʼu [hanatou] meʼa ke [natou] foaki ki ʼae ʼe nofo ʼi te faigataʼaia.” (Efeso 4:28, MN) ʼE moʼoni, kapau ʼe tou gaue kinakina ke tou taupau totatou famili pea ʼe feala pe ke tou tokoni kia natou ʼae ʼe ʼaoga ki ai he tokoni. (Taaga Lea 3:27) Koia, kapau ʼe tou gaue kinakina ʼe feala ke tou iloʼi ai ia te fiafia ʼae ke tou foaki.

KE LAKA AGE TE ʼU GAUE

Neʼe ui fenei e Sesu ʼi tana Akonaki ʼi te Moʼuga: “Kapau e fakamalohi atu he tahi kia koe ke kolua fai he kilometa e tahi, fai ni kilometa e lua mo ia.” (Mateo 5:41) ʼE tou lava maʼuliʼi feafeaʼi ia te pelesepeto ʼaia ʼi tatatou gaue? ʼE mole tonu pe ke tou fai ia te gaue ʼae neʼe fakatotonu mai, kaʼe ʼe tonu ke tou faigaʼi ke tou fai he tahi ʼu gaue fakalaka. Kotou fai he ʼu fakatuʼutuʼu, ohage la ke kotou fai ke lelei age takotou gaue peʼe ke ʼosi vave ia te gaue ʼae neʼe tonu ke kotou fai. Kotou fiafia ʼi te ʼu gaue ʼae ʼe kotou fai, maʼia mo te ʼu kiʼi gaue ʼae ʼe mole faʼa maʼuhiga.

Moka kotou fai ia he ʼu gaue fakalaka, ʼe kotou fiafia ʼi takotou gaue. Kotea tona tupuʼaga? Koteʼuhi ʼe kotou puleʼi ʼakotou gaue. Pea ʼe kotou foaki lahi koteʼuhi ʼe kotou loto ki ai pea neʼe mole he tahi neʼe ina fakamalohiʼi koutou. (Filemo 14) Koia, ʼe feala ai ke tou fakamanatuʼi ia te pelesepeto ʼae ʼe tuʼu ia Taaga Lea 12:24: “E pule anai te nima faa, kae e popula anai te nima pikoelo.” ʼE moʼoni ʼe ʼi ai ʼihi ʼe natou gaue popula. Kaʼe ko he tahi ʼe ina fai pe ia te meʼa ʼae neʼe fakatotonu age, ʼe feala ke manatu ʼe gaue popula ia, ʼe puleʼi tuʼumaʼu ia ia e ʼihi. Kaʼe kia ia ʼae ʼe ina fai he ʼu gaue fakalaka, ʼe ina fai ia te faʼahi ʼaia koteʼuhi ʼe ina puleʼi tona maʼuli pea mo ʼana gaue.

KOTOU FAKAPOTOPOTO ʼI TAKOTOU GAUE

ʼE lelei ke tou gaue kinakina. Kaʼe ʼe tonu ke tou manatuʼi ʼe ʼi ai te faʼahi ʼi totatou maʼuli ʼe maʼuhiga age ʼi te gaue. ʼE moʼoni, ʼe fakalotomalohiʼi tatou ʼi te Tohi-Tapu ke tou faʼa gaue. (Taaga Lea 13:4) Kaʼe ʼe mole ina ui mai ke tou gaue kinakina ʼi te temi fuli pe. ʼE ui fenei ia Ekelesiasi 4:6: “E lelei age te fonu o te nima e tahi mo te malolo, i te fonu o te u nima lua mo te gaue pea mo te tuli o te matagi.” Kotea ia te ako maʼa tatou? Ko he tahi ʼe faʼa gaue tuʼumaʼu ʼe mole feala ke fiafia ʼi te ʼu fua ʼo tana gaue mo kapau ʼe puli fuli tona temi pea mo tona malohi ki te gaue. ʼE mahino ia, ʼe hage leva ia ko tana “tuli ʼo te matagi.”

ʼE tokoni mai ia te Tohi-Tapu ke tou fakapotopoto ʼi tatatou gaue. ʼE moʼoni ʼe ui mai ʼi te Tohi-Tapu ke tou fakahoko lelei tatatou gaue, kaʼe ʼe toe tokoni mai ke tou “filifili te u mea e lelei tukupau.” (Filipe 1:10) Kotea ia te ʼu meʼa ʼae ʼe lelei tukupau peʼe maʼuhiga age? ʼE ko te temi ʼae ʼe tou fakaʼaogaʼi maʼa totatou kiʼi famili pea mo ʼotatou kaumeʼa. Kaʼe ʼe toe maʼuhiga age ʼatatou gaue fakalaumalie, ohage la ko te lau pea mo te metitasioʼi ʼo te Folafola ʼa te ʼAtua.

Ko natou ʼae ʼe fakapotopoto ʼe natou maʼu te ʼu fua lelei ʼo tanatou gaue. ʼE ui fenei e William: “Neʼe tuku mai e toku ʼuluaki patolo ia he faʼifaʼitaki lelei ʼo ʼuhiga mo te aga fakapotopoto ʼi te gaue. ʼE faʼa gaue pea ʼe felogoʼi lelei mo te hahaʼi ʼuhi ko te lelei ʼo tana faʼahiga gaue. Kaʼe ka ʼosi tana gaue ʼi te afiafi, ʼe ina tuku tana gaue kaʼe tokaga tafitō leva ki tona kiʼi famili pea mo tana tauhi ʼae ki te ʼAtua. Pea ʼe kau ia te tagata ʼaia ki te ʼu hahaʼi ʼe fiafia lahi ʼae ʼe au iloʼi.”