ʼE Nātou Tauhi Tonatou ʼu Tēhina ʼi Te Malamanei Katoa
KUA koutou logo koa ki te kupu “te kau gāue faka malamanei”? Ko te kau Fakamoʼoni ʼa Sehova ʼaē ʼe kau ki te ʼu kūtuga ʼaia ʼe nātou foaki ʼaki honatou lotolelei, tonatou temi pea mo tonatou ʼu poto gāue moʼo tokoni ki te laga ʼo te ʼu fale tā tohi ʼaē ʼe tokoni ki te tufa ʼo te logo ʼo ʼuhiga mo te Puleʼaga ʼaē ʼe tuʼu ʼi te Tohi-Tapu. ʼE toe tokoni pe foki te kau gāue ʼaia ki te laga ʼo te ʼu Fale ʼo Te ʼu Fakatahi pea mo te ʼu Fale ʼo Te Puleʼaga, ʼaē ko te ʼu fale ʼe akoʼi ai te Tohi-Tapu. ʼI te temi nei, ko te kau gāue ʼaia ʼe tokoni ki te ʼu laga fale ʼi te ʼu fenua kehekehe e 34, tāfito ʼi te ʼu fenua masiva. Koteā te ʼu faʼahiga faigataʼaʼia pea mo fiafia ʼaē ʼe logoʼi e te kau gāue lotolelei ʼaia ʼi tanatou tauhi ki tonatou ʼu tēhina ʼi te tahi ʼu fenua? Koteā te meʼa ʼe nātou logoʼi ki te “tauhi fakataputapu” ʼe nātou fakahoko? (Apokalipesi 7:9, 15, MN) Ke tou ʼiloʼi te ʼu faʼahi ʼaia, tou fai palalau muʼa mo he kau gāue neʼe gāue ʼi Mekesike.
Ko te kau gāue mai te ʼu fenua tai neʼe nātou kamata ʼōmai ki Mekesike ʼi te māhina ʼo Maio ʼo te taʼu 1992. Mole fualoa, pea neʼe nātou takitaki te fakalahi ʼo te filiale, ʼaē ʼe ina fakaʼaluʼalu te gāue ʼa te kau Fakamoʼoni ʼa Sehova ʼi Mekesike. Moʼo fakalahi ʼo te filiale, neʼe laga ia fale foʼou e 14, ʼe kau ai mo te ʼu nofoʼaga ʼo te kau gāue ʼi te filiale, mo te fale tā tohi, pea mo te ʼu pilō.
Moʼo tokoni ki te laga fale ʼaia, ko te toko 730 tupu kau gāue lotolelei mai Kanata, mo Pilitania, mo Amelika, pea mo te tahi ʼu fenua neʼe nātou gāue fakatahi mo te ʼu toko lauʼi teau kau gāue neʼe ʼōmai mai te ʼu potu fuli ʼo Mekesike. Pea tahi ʼaē meʼa, ko te toko 28000 tupu kau Fakamoʼoni ʼaē neʼe nātou fakatahi mo te ʼu kokelekasio e 1600 ʼaē neʼe tuʼu ōvi mai ki te filiale, neʼe nātou tokoni ki te ʼu laga fale ʼaia ʼi te fakaʼosi vāhaʼa. Neʼe nātou gāue fuli ʼaki tonatou lotolelei pea mo nātou foaki noa tonatou ʼu poto gāue. Neʼe nātou faka ʼuhiga te faʼahi ʼaia ohage ko honatou pilivilesio te tauhi feiā kia Sehova. Lolotoga te temi fuli pe neʼe hoko ai te laga fale, neʼe nātou manatuʼi tuʼumaʼu te ʼu palalau ʼa te ʼAtua ʼaē ʼe tuʼu ia Pesalemo 127:1: “Kapau ʼe mole laga e Sehova totonu ia te fale, pea ʼe mole pe he ʼaoga ʼo te gāue kinakina ʼaē ʼe fai ai e tona ʼu tufuga.”
Te ʼu Faigataʼaʼia Neʼe Tau Mo Nātou
Koteā te ʼu faigataʼaʼia neʼe tau mo nātou ʼi te temi ʼaē ʼe nātou gāue ai ʼi te tahi ʼu fenua? Koʼeni te ʼu meʼa neʼe nātou fakamatala. Ko Curtis mo Sally, ko he taumatuʼa mai Amelika, neʼe nā kau ki te ʼu laga fale ʼi Initia, mo Lomania, mo Lusia, mo Mekesike, mo Palakuai, mo Samipea, mo Senekale, pea mo Siamani. ʼE fakamatala fēnei e Curtis: “Ko tomā ʼuluaki faigataʼaʼia, neʼe ko tamā mavae kae tuku tamā taʼahine, ʼaē neʼe gāue pionie, pea mo te kokelekasio ʼaē neʼe ma kau ai ʼi Minnesota. Ko ʼau mo toku ʼohoana neʼe ma kau ʼi te kokelekasio ia taʼu e 24, pea neʼe ma fīmālie ai.”
ʼE ʼui fēnei e Sally: “ʼE ko he meʼa faigataʼa hakita maʼuli ʼi he ʼu ʼaluʼaga ʼe mole kita māhani ai, ʼe lagi faigafua age ki he tagata ʼi he fafine, kae neʼe ʼau ako ʼe feala pe hakita fakatonutonu. Neʼe ʼau ako ai foki mo te maʼuli tahi mo te ʼu kiʼi manu!” ʼE ina toe ʼui fēnei: “ʼI te tahi fenua, neʼe mātou toko hogofulu ʼi te kogafale neʼe mole ʼi ai hona fale kuka, pea neʼe ko fale maʼanu pe e lua. Neʼe ʼau ako ai te faʼa kātaki.”
Ko te tahi faigataʼaʼia, ʼe ko te ako ʼo he lea foʼou, pea ki te faʼahi ʼaia, ʼe tonu ke kita faiga pea mo agavaivai. ʼE ʼui fēnei e Sharon, ʼaē neʼe gāue mo tona ʼohoana ʼi te ʼu laga fale ʼi te ʼu fenua kehekehe: “ʼE faigataʼa takita mole ʼiloʼi te lea ʼo te fenua ʼaē ʼe kita gāue ai. ʼI te kamata, ʼe faigataʼa takita fakaōvi ki tokita ʼu tēhina mo tuagaʼane mokā mole kita lava fakahā te ʼu meʼa ʼi tokita loto. Ko he meʼa ʼe kita lotovaivai ai. Kae ko te ʼu tēhina ʼi te ʼu fenua ʼaē neʼe hinoʼi māua ke ma ʼolo ʼo gāue ai neʼe nātou faʼa kātaki kia māua pea mo nātou tokakaga lelei kia māua. Mole fualoa, pea neʼe ma lava kamata felogoi mo nātou logola te ʼu lea kehekehe.”
ʼE Tonu Ke Kita Lototoʼa ʼi Te Gāue Fai Faka Mafola
Logope ʼe lahi he lagolago ʼo te kau gāue ʼaia ʼaki tonatou loto faka sakilifisio ki te haʼele lelei ʼo te gāue laga fale, kae ʼe nātou mahino ki tonatou maʼua ʼaē ʼe maʼuhiga tāfito, ʼaē ko nātou ko te kau fai faka mafola ʼo te logo lelei ʼo te Puleʼaga ʼo te ʼAtua. Koia, ʼe nātou lagolago katoa ai ki te gāue fai faka mafola ʼaē ʼe fakahoko e te ʼu kokelekasio ʼaē ʼe nātou fakatahi kiai. ʼE fakamoʼoni e Åke mo Ing-Mari, ko he taumatuʼa neʼe lagolago ki te ʼu laga fale ʼi Kuatelupe, Malavi, Mekesike, mo Niselia, ko te palalau ki te tahi lea ʼi te gāue fai faka mafola ʼi he tahi fenua ʼe fakamaʼua kiai he lotomālohi.
ʼE fakamatala fēnei e Ing-Mari: “ʼI te kamata, neʼe mole lahi hamā kau ki te ʼu fai palalau ʼi te fai faka mafola, koteʼuhi neʼe ma muliʼi tuʼumaʼu te kau Fakamoʼoni ʼo te fenua, pea ʼi tamā ufiufi, neʼe ma tau tuku ia nātou ke nātou palalau. Kae ʼi te tahi uhu neʼe ma fakatotonu ke ma ʼolo toko lua pe ʼo fai faka mafola. Logope tamā tuʼania, kae neʼe ma ʼolo ʼo fai faka mafola. Neʼe ma felāveʼi mo te finemui neʼe ina fakalogologo ki taku palalau age. Neʼe ʼau lau te vaega faka Tohi-Tapu pea neʼe ʼau tuku age ki ai te tohi. Pea neʼe ʼui fēnei mai e te fafine: ‘Fakalelei age, kae ke ke tali mai muʼa ki taku fehuʼi. ʼE ʼi ai toku kāiga ʼe ina ako te Tohi-Tapu mo te kau Fakamoʼoni ʼa Sehova. E feafeaʼi haku lava ako mo ʼau?’ Neʼe ʼau punamaʼuli pea neʼe mole kei ʼau faʼa palalau. Pea neʼe ʼau fakamalū ifo taku tuʼania, pea neʼe ʼau ʼui age ke ʼau fai tana ako Tohi-Tapu.”
ʼE ʼui fēnei e Ing-Mari: “Koutou fakafuafua age muʼa toku fiafia mo toku loto fakafetaʼi kia Sehova ʼi tana tapuakina tamā faiga mo tamā holi ʼaē ke ma vaevae te moʼoni.” Neʼe tuputupu te fafine ʼaia pea neʼe papitema ʼi te fakatahi faka tisitilike ʼi Mekesike. ʼE fakanounou fēnei e Åke mo Ing-Mari tonā minisitelio: “ʼE ma faka maʼuhigaʼi ʼaupito tomā hinoʼi ki te ʼu laga fale kehekehe, kae ʼe laka age pe te fiafia pea mo te fīmālie ʼe kita logoʼi mokā kita tokoni ki he tahi ke ina tali te moʼoni.”
Ko He Maʼuli Faka Sakilifisio
ʼE moʼoni ko te kau gāue ʼaia ʼaē ʼe nātou mavae mai tonatou famili mo tonatou ʼu kaumeʼa ʼe nātou fai te ʼu sakilifisio ke nātou tauhi ki ʼonatou tēhina ʼi te tahi ʼu fenua, kae ʼe lahi ʼaupito tonatou fiafia ʼi te ʼu meʼa ʼaē ʼe hoko kia nātou. Koteā ʼapē te ʼu fiafia ʼe nātou logoʼi?
ʼE fakamahino fēnei e Howard, ʼaē neʼe gāue mo tona ʼohoana ko Pamela ʼi Akola, Ekuatole, Ele Salavatole, Kolopi, Kuiana, Mekesike, pea mo Puetoliko: “ʼE ko he pilivilesio te felāveʼi mo te ʼu tēhina mo tuagaʼane ʼi te ʼu fenua kehekehe, pea mo logoʼi tāfito te noʼo ʼo te ʼofa ʼaē ʼe maʼu ʼi te fale tautēhina faka malamanei. ʼE kita tautau lau te ʼu meʼa ʼe palalau ki te faʼahi ʼaia, kae ka kita maʼuli pea mo gāue fakatahi mo ʼihi ʼe mole tatau tatatou agaʼi fenua, ʼe lēsili age takita faka maʼuhigaʼi totatou fale tautēhina.”
ʼE logoʼi e Gary, ʼaē neʼe tokoni ki te ʼu laga fale ʼi Kolopi, Costa Rica, Ekuatole, Mekesike, pea mo Zambie, ko te polokalama ʼaia neʼe ʼaoga lahi kia ia. ʼE ina fakamatala fēnei: “Ko te ako neʼe ʼau maʼu lolotoga te ʼu taʼu ʼi taku fakatahi mo te ʼu tēhina fakapotopoto ʼe gāue ʼi te ʼu filiale ʼi te ʼu fenua ʼaē neʼe hinoʼi ʼau ke ʼau gāue ai, neʼe tokoni mai kia ʼau ke ʼau poto ʼi te tauʼi ʼo te ʼu faigataʼa ʼaē ʼe tau mo ʼau ʼi te ʼu koga meʼa ʼe hinoʼi mai ke ʼau ʼalu kiai. Neʼe ko he meʼa neʼe ina lagalagaʼi taku tui, koteʼuhi neʼe ʼau maʼu ai te faigamālie ke ʼau sio ki te logo tahi ʼe faka ʼiloga keheʼi ai te kautahi faka malamanei ʼa Sehova—ko he logo tahi ʼe mole ina lauʼia te kehekehe ʼo te lea, ʼo te lanu peʼe ko te ʼu agaʼi fenua.”
Neʼe fakaʼosiʼosi te gāue laga fale ʼi Mekesike, pea neʼe avahi te ʼu fale ʼo te filiale ʼi te taʼu pe ʼaia. ʼUhi ko tonatou ʼofa ki te ʼAtua, koia neʼe fiafia ʼaupito te kau gāue faka malamanei ʼaē ʼe gāue mo tonatou lotolelei, ʼi te tokoni ki te faka mafola ʼo te tauhi moʼoni ʼi Mekesike pea mo te tahi ʼu koga meʼa. Ko tonatou lotolelei pea mo tonatou maʼuli faka sakilifisio ke nātou tauhi ki ʼonatou tēhina ʼi te malamanei katoa ʼe leleiʼia ʼaupito e te kau Fakamoʼoni ʼa Sehova ʼi te malamanei katoa.
[Paki ʼo te pasina 25]
Ekuatole
[Paki ʼo te pasina 25]
Kolopi
[Paki ʼo te pasina 25]
Akola
[Paki ʼo te pasina 26]
Te ʼōloto ʼo te filiale
[Paki ʼo te pasina 26]
ʼE kamata te gāue ʼi te ʼu fale foʼou ʼo te filiale ʼo Mekesike
[Paki ʼo te pasina 26]
ʼI lalo: ʼI te ʼu muʼa fale foʼou, ʼe tutuʼu ai ʼihi ʼe kau ki te Pilō Ki Te Laga Fale
[Paki ʼo te pasina 27]
ʼE fiafia te kau gāue laga fale ʼi te tokoni ki te gāue fai faka mafola ʼi te ʼu kokelekasio ʼo te ʼu koga meʼa ʼe nātou gāue ai