He Koʼe ʼe Mole Feala Ke Tou Nofo Tokotahi
“ ʼE lelei age he toko lua ʼi he tokotahi . . . Kapau ʼe tō he tahi ia nāua, ʼe feala ki ʼaē ke ina faka tuʼuake tona hoa.”—Te Hau ko Salomone
NEʼE tala fēnei e Salomone, te Hau ʼo te Iselaele ʼāfea: “ ʼE lelei age he toko lua ʼi he tokotahi, heʼe lelei tonā totogi ʼi tanā gāue kinakina. Heʼe kapau ʼe tō he tahi ia nāua, ʼe feala ki ʼaē ke ina faka tuʼuake tona hoa. Kae ʼe feafeaʼi anai kia ia ʼaē e tokotahi mokā ʼe tō, ka mole he tahi moʼona faka tuʼuake?” (Tagata Tānaki 4:9, 10) ʼE faka maʼuhigaʼi e te tagata poto ʼaia ʼaē neʼe ina sivisivi te agaaga ʼo te tagata, ia te ʼaoga ʼaē ke tou fakatahi mo te hahaʼi pea mo te maʼuhiga ʼaē ke ʼaua naʼa tou nofo tokotahi. Kae ʼe mole ko he manatu fakatagata ʼaia. Ko te talanoa ʼa Salomone neʼe haʼu mai te poto fakaʼatua pea neʼe haʼu mai te ʼAtua.
ʼE mole ko he aga fakapotopoto hatatou nonofo tokotahi. Ko te hahaʼi ʼe nātou feʼaogaʼaki. ʼE ʼaoga kia tatou fuli ia te mālohi pea mo te tokoni ʼe tou lava maʼu mai ʼihi tagata. “Ko ʼaē ʼe fia nofo tokotahi ʼe ina kumi anai tona holi ʼo ia tokotahi,” ko te ʼui ʼaia ʼa te tāʼaga lea faka Tohi-Tapu. “Ki te poto fuli pe ʼe ʼaoga, ʼe fakafeagai anai kiai.” (Tāʼaga Lea 18:1) Koia ko te kau popoto ʼaē ʼe nātou sivi te agaaga ʼa te tagata, ʼe nātou fakaloto mālohiʼi ke kau te hahaʼi ki he kūtuga pea ke nātou tokakaga ki ʼihi.
ʼI te ʼu tokoni ʼaē moʼo fakatuputupu te maʼuli fakatahi mo te hahaʼi, ʼe palalau te polofesea ko Robert Putnam “ki te lagalagaʼi ʼo te mālohi ʼo te tui ki te ʼAtua.” ʼE makehe te kau Fakamoʼoni ʼa Sehova ʼi te faʼahi ʼaia, koteʼuhi ʼe puipui ia nātou e te ʼu kokelekasio ʼe hage ko he ʼu famili ʼi te kele katoa. ʼO mulimuli ki te ʼu palalau ʼa te ʼapositolo ko Petelo, ʼe nātou “ ʼoʼofa ki te famili katoa ʼo te ʼu tēhina,” pea ʼaki he fakaʼapaʼapa ʼe nātou “manavasiʼi ki te ʼAtua.” (1 Petelo 2:17, MN ) ʼE toe faigaʼi foki e te kau Fakamoʼoni ke ʼaua naʼa nātou nonofo taki tokotahi pea ʼe mole nātou fia maʼu te ʼu fua fakatupu tuʼutāmaki ʼo te taʼi nofo ʼaia, koteʼuhi ko te ʼu tuʼuga gāue lelei ʼaē ʼe fakapipiki ki te tauhi moʼoni ʼe nātou taki ai ia nātou ke nātou tokoni ki tonatou ʼu kāiga ki te ako ʼo te moʼoni ʼaē ʼe maʼu ʼi te Folafola ʼa te ʼAtua, ia te Tohi-Tapu.—2 Timoteo 2:15.
Ko Te ʼOfa Mo Te Fakakaugā Neʼe Fetogi Ai Tonatou Maʼuli
ʼE faʼufaʼu e te kau Fakamoʼoni ʼa Sehova ia he kautahi ʼe logo tahi ai te hahaʼi fuli pea ʼe ʼi ai tonatou ʼaoga. Ohage foki la, tou tokagaʼi age muʼa te meʼa ʼaē neʼe hoko kia Miguel, mo Froylán, pea mo Alma Ruth, ʼe nātou haʼu mai te famili e tahi mai te potu saute ʼo Amelika. Neʼe nātou tutupu ake mo te mahaki ʼo te ʼu hui ʼe tupu ai tanatou nonofo leka. ʼE nātou nonofo fuli ʼi te ʼu hekaʼaga toho. Neʼe feafeaʼi tonatou maʼuli ʼi tanatou fakatahi mo te kau Fakamoʼoni?
ʼE fakamatala fēnei e Miguel: “Neʼe lahi te ʼu temi ʼaē neʼe ʼau lotomamahi ʼaupito ai, kae ʼi taku kamata fakatahi mo te hahaʼi ʼa Sehova, neʼe fetogi ai toku maʼuli. Ko takita nofo tokotahi ʼe ko he meʼa fakatupu tuʼutāmaki ʼaupito. Ko taku fakatahi mo te ʼu tēhina ʼi te ʼu fono faka Kilisitiano, ʼi te vāhaʼa fuli, neʼe tokoni lahi mai ke ʼau maʼu te fīmālie.”
ʼE toe ʼui fēnei e Alma Ruth: “Neʼe ʼau tautau lotomamahi ʼaupito. Kae ʼi taku ako ʼo ʼau ʼiloʼi ai ia Sehova, neʼe ʼau logoʼi ai neʼe feala haku felogoi lelei mo ia. Neʼe ko te meʼa ʼaia neʼe maʼuhiga ʼaupito ʼi toku maʼuli. Neʼe lagolago lelei toku famili, pea koia ʼaē ʼe faifaitahi lelei ai.”
Ko te tāmai ʼa Miguel neʼe ina akoʼi age ki ai ia te lautohi pea mo te faitohi. ʼAki te temi neʼe tokoni leva ia Miguel kia Froylán pea mo Alma Ruth ki te lautohi pea mo te faitohi. Neʼe ko he faʼahi maʼuhiga ki tonatou maʼuli fakalaumālie. ʼE ʼui fēnei e Alma Ruth: “Ko te poto lautohi neʼe ʼaoga lahi kia mātou, koteʼuhi neʼe mātou lava fafaga ia mātou ʼi te faʼahi fakalaumālie ʼaki te lau ʼo te Tohi-Tapu pea mo te ʼu tohi faka Tohi-Tapu.”
ʼI te temi nei, ko Miguel ko te tagata ʼāfea. Ko Froylán kua ina lau tuʼa hiva te Tohi-Tapu katoa. Ko Alma Ruth kua ina fakalahilahi tana gāue kia Sehova ʼo gāue pionie talu mai te taʼu 1996. ʼE fakamatala fēnei e Alma: “ ʼAki te tapuakina ʼa Sehova, ʼe ʼau lava fakahoko te fakatuʼutuʼu ʼaia, pea ʼe lagolago mai toku ʼu tēhina Fakamoʼoni, mole gata pe ʼi te fai faka mafola kae ʼe nātou toe tokoni mai ki te ʼu ako Tohi-Tapu e 11, ʼaē neʼe ʼau kamata fai tanatou ako.”
Ko te tahi faʼifaʼitaki lelei, ʼe ko ia ʼa Emelia, ʼaē neʼe fakaʼī pea neʼe tonu ai ke feʼaluʼaki ʼi te hekaʼaga toho ʼuhi ko te ʼu lavea ʼi tona ʼu vaʼe pea mo tona hui tuʼa tofu. Ko te kau Fakamoʼoni ʼa Sehova ʼi te kolo ko Mekesike neʼe nātou ako te Tohi-Tapu mo ia, pea neʼe papitema ʼi te taʼu 1996. ʼE ʼui fēnei e Emelia: “ ʼI muʼa ʼo taku ʼiloʼi te moʼoni, neʼe ʼau fia fakamate; neʼe mole kei ʼau fia maʼuli. ʼI taku manatu neʼe mole kei ʼi ai hoku ʼuhiga, pea neʼe ʼau tagi ʼi te ʼaho mo te po. Kae ʼi taku fakatahi mo te hahaʼi ʼa Sehova, neʼe ʼau logoʼi te ʼofa ʼo te ʼu tēhina. Neʼe ko he fakaloto mālohi kia ʼau tanatou tokakaga lelei mai kia ʼau. Ko te tahi tagata ʼāfea ʼe hage kia ʼau ko hoku tuagaʼane peʼe ko haku tāmai. Ko ia mo te ʼu tagata faifekau faka minisitelio ʼe nātou feʼāveʼaki ʼau ki te ʼu fono pea mo te gāue fai faka mafola ʼi toku hekaʼaga toho.”
Ko José, ʼaē neʼe papitema ʼi te taʼu 1992 ʼo liliu ai ko he Fakamoʼoni ʼa Sehova, ʼe nofo tokotahi. Kua taʼu 70, pea kua letelete talu mai te taʼu 1990. ʼI muʼa atu neʼe tautau lotomamahi, kae ʼi te ʼosi fagonogono age ʼa te Fakamoʼoni, neʼe kamata kau atu aipe ki te ʼu fono faka Kilisitiano. Neʼe ina leleiʼia te meʼa ʼaē neʼe logo kiai pea mo sio kiai. Ohage la, neʼe ina tokagaʼi te aga fakakaumeʼa ʼo te ʼu tēhina, pea mo ina logoʼi tanatou tokakaga fakalelei kia ia. ʼI te temi nei, ko te ʼu tagata ʼāfea pea mo te ʼu tagata faifekau faka minisitelio ʼe nātou tokakaga kia ia. (Filipe 1:1; 1 Petelo 5:2) Ko te ʼu tēhina ʼaia ʼe “ko he tokoni fakaloto mālohi” kia ia. (Kolose 4:11, MN ) ʼE nātou ʼave ia ia ki te tōketā, mo nātou ʼaʼahi ia ia ʼi tona ʼapi, pea mo lagolago kia ia lolotoga tona ʼu tafa e fā. ʼE ina ʼui fēnei: “ ʼE nātou tokakaga kia ʼau. Ko nātou ʼe ko toku famili. Pea ʼe ʼau fiafia ʼi te fakatahi mo nātou.”
ʼE Maʼu Te Fiafia Moʼoni ʼi Takita Foaki
ʼI te ʼui e te Hau ko Salomone “ ʼe lelei age he toko lua ʼi he tokotahi,” neʼe hoki ʼosi atu pe tana palalau ki te vaʼiganoa ʼo takita faiga mālohi ki te ʼu koloā. (Tagata Tānaki 4:7-9) Ko te meʼa ʼaia ʼe faiga mālohi kiai te hahaʼi tokolahi ʼi te temi nei, ʼo fua kovi ai ki tanatou ʼu felogoi mo te hahaʼi ʼo tuʼa pea mo tonatou loto fale.
Ko te mānumānu pea mo te tahi manatu pe kia kita, neʼe ina taki ai te tokolahi ke nātou nofo taki tokotahi. ʼE mole nātou maʼuli fiafia, koteʼuhi ko te faʼahiga hahaʼi ʼaia ʼe nātou loto fītaʼa pea mo heʼe ʼamanaki. Kae ʼe fakahā e te ʼu fakamatala ʼi muʼa atu ia te ʼu fua lelei ʼo te fakatahi mo nātou ʼaē ʼe nātou tauhi kia Sehova pea mo uga nātou e tonatou ʼofa kia te ia pea mo tonatou kāiga. Ko te kau tuʼumaʼu ki te ʼu fono faka Kilisitiano, mo te lagolago ʼa te ʼu tēhina Kilisitiano, pea mo te gāue faʼafai ʼi te minisitelio neʼe ko he faʼahi maʼuhiga ʼaia kia nātou ke nātou tauʼi te ʼu manatu kovi ʼaē ʼe ʼalutahi mo te nofo tokotahi.—Tāʼaga Lea 17:17; Hepeleo 10:24, 25.
Mai te ʼaluʼaga ʼaē ʼe tou feʼaogaʼaki, koia mokā tou fai he ʼu meʼa maʼa niʼihi pea ʼe tou fiafia ai. Neʼe ʼui fēnei e Albert Einstein, ʼaē neʼe ina fai te gāue ʼo fua lelei ki ʼihi hahaʼi: “Ko te maʼuhiga ʼo he tagata . . . ʼe tonu ke ʼiloga ʼi te meʼa ʼaē ʼe ina foaki, kae ʼe mole tonu ke fakalogo ki te meʼa ʼaē ʼe foaki age.” ʼE ʼalutahi te ʼu palalau ʼaia mo te ʼu palalau ʼaenī ʼo totatou ʼAliki ko Sesu Kilisito: “ ʼE lahi age te fiafia ʼi takita foaki, ʼi takita tali.” (Gaue 20:35, MN ) Koia logope ʼe lelei takita tali te ʼofa, kae ʼe lahi age te lelei ki te maʼuli fakasino ia te ʼofa ki ʼihi.
ʼE fakahā fēnei e te tagata taupau feʼaluʼaki kua lauʼi taʼu tana ʼaʼahi te ʼu kokelekasio moʼo tokoni age kia nātou ʼi te faʼahi fakalaumālie pea mo tokoni ki te laga ʼo te fale fono maʼa te kau Kilisitiano ʼaē ʼe māsisiva: “Ko taku tauhi fakafiafia mo ʼoku tēhina pea mo taku sio ʼi ʼonatou fofoga tonatou loto fakafetaʼi, ʼe ʼeke ai ʼau ke ʼau haga kumi he ʼu faigamālie ke ʼau tokoni. Ko te ʼu meʼa ʼaē neʼe hoko kia ʼau ʼi toku maʼuli, ʼe nātou fakamoʼoni mai ko te tokaga fakamalotoloto ki ʼihi ʼe ko te kalavi ʼaia ʼo te fiafia. Pea ʼe ʼau ʼiloʼi ʼi tomatou ʼuhiga tagata ʼāfea, ʼe tonu ke mātou ‘hage ko he nonoʼaga mokā matagi . . . , ohage ko he ʼu kiʼi vaitafe ʼi he potu moamoa, ohage ko he malumalu ʼi he mata maka ʼi he kele kakā.’ ”—Isaia 32:2.
ʼE Ko He Meʼa Fakafiafia He Nonofo Fakatahi ʼi Te Logo Tahi!
ʼE mahino ʼe lahi te lelei pea mo te fiafia moʼoni ʼi te tokoni ki ʼihi pea mo kumi he fakakaumeʼa mo nātou ʼaē ʼe tauhi kia Sehova. Neʼe ʼui fēnei e te tagata tohi pesalemo: “Koutou sisio! ʼE ko he meʼa lelei pea mo fakafiafia ki he ʼu tēhina hanatou nonofo fakatahi ʼi te logo tahi!” (Pesalemo 133:1) Ko te logo tahi faka famili ʼe ko he koga maʼuhiga ki te felagolagoʼaki, ohage ko tona fakahā ʼi te meʼa ʼaē neʼe hoko kia Miguel, mo Froylán, pea mo Alma Ruth. Pea ʼe ko he tapuakina ia te fefakatahiʼaki ʼi te tauhi moʼoni! ʼI tana ʼosi foaki te tokoni ki te ʼu tagata pea mo te ʼu fafine Kilisitiano, neʼe tohi fēnei e te ʼapositolo ko te Petelo: “Pea hili ia, ke koutou mau fuli te manatu e tahi, koutou agalelei, mo ofa ki te u tehina, mo manavaofa, pea mo agavaivai.”—1 Petelo 3:8.
ʼE lahi te ʼu lelei ʼe maʼu mai te fakakaumeʼa moʼoni, ʼi te faʼahi ʼo te loto pea mo te faʼahi fakalaumālie. ʼI tana palalau ki tona ʼu tēhina ʼi te tui, neʼe tokoni fēnei te ʼapositolo ko Paulo: “Koutou fakalotomalohiʼi natou kua lotovaivai, koutou poupouki natou e vaivai, koutou kataki ki te tagata fuape. . . . Koutou fekumi tuumau te lelei kia koutou mo te tagata fuape.”—1 Tesalonika 5:14, 15.
Koia koutou kumi he ʼu puleʼaki ʼaoga ke koutou fai ai te meʼa ʼaē ʼe lelei ki niʼihi. Koutou “fai ia te lelei ki te tagata fuape, kae tafito ia te lelei o [tokotou] kaiga o te tui,” koteʼuhi ʼaki te faʼahi ʼaia ʼe koutou maʼu anai he ʼuhiga moʼoni ki tokotou maʼuli pea mo fakatupu ai hokotou fīmālie. (Kalate 6:9, 10) Neʼe tohi fēnei e te tisipulo ʼa Sesu ʼaē ko Sakopo: “Kapau ko he tehina, pe ko he tuagaane e ’na telefua pea e hala mo meakai i te aho fuli, pea leaʼage he tahi o koutou kia naua: ‘Koulua olo-la i te tokalelei o fakamafana mo taupau mauli’, kae e mole koutou foakiʼage kia naua ia mea e aoga mo te sino, kotea tona aoga?” (Sakopo 2:15, 16) ʼE tou ʼiloʼi lelei pe te tali ki te fehuʼi ʼaia. ʼE mole tonu ke tou ‘tokakaga pe ki te ʼu meʼa ʼaē tatou totonu, kae ke tou toe tokakaga pe foki ki te ʼu meʼa ʼa ʼihi.’—Filipe 2:4.
ʼI tuʼa atu ʼo tanatou tokoni ʼi te faʼahi faka koloā kia nātou ʼaē ʼe ʼaoga tāfito kiai mokā hoko ki ai he tuʼutāmaki, ʼe toe maʼumaʼua pe foki te kau Fakamoʼoni ʼa Sehova ʼi te foaki ʼo te tahi lelei ʼe toe maʼuhiga pe foki ki te hahaʼi—ko te faka mafola age kia nātou ia te logo lelei ʼo ʼuhiga mo te Puleʼaga. (Mateo 24:14) ʼAki te toko 6 000 000 tupu kau Fakamoʼoni ʼaē ʼe nātou kalagaʼi te logo ʼaia ʼo te ʼamanaki pea mo te fakaloto fīmālie, ʼe ko he fakahā ʼaia ʼo tanatou tokakaga moʼoni pea mo nātou fai ʼaki te ʼofa ki ʼihi. Kae ʼi te tokoni ki te hahaʼi ʼaki te Tohi-Tapu, ʼe toe tokoni aipe foki moʼo foaki te tahi meʼa ʼe ʼaoga ki te tagata. Koteā te meʼa ʼaia?
Te Foaki ʼo Te Meʼa ʼe Maʼuhiga ʼAupito
Ke tou maʼu te fiafia moʼoni, ʼe tonu ke ʼi ai hatatou ʼu felogoi lelei mo te ʼAtua. Neʼe ʼui fēnei e te tagata: “ ʼI te logoʼi e te tagata hana fia pāui ki he tahi ʼe māʼoluga age pea mo mālohi age ia ia, ʼi te ʼu potu fuli pea mo te temi fuli, talu mai te kamataʼaga ʼo aʼu mai ki te temi nei, ʼe hā ʼaki mai ko te lotu ʼe ko he meʼa neʼe tupu ake mo te tagata pea ʼe tonu ke fakamoʼoni kiai te poto fakatagata. . . . ʼE tou punamaʼuli pea mo fakaʼapaʼapa mokā tou sisio ki te faiga ʼa te tagata ʼi te malamanei katoa ke tui ki he tahi ʼe māʼoluga.”—Man Does Not Stand Alone (ʼE Mole Feala Ke Nofo Tokotahi Te Tagata), neʼe tohi e A. Cressy Morrison.
Neʼe tala fēnei e Sesu Kilisito: “Manuʼia ia nātou ʼaē ʼe nātou ʼiloʼi tonatou masiva fakalaumālie.” (Mateo 5:3, MN ) ʼE mole feala ia ke maʼuli fīmālie te hahaʼi mo kapau lolotoga he temi fualoa, ʼe nātou nonofo taki tokotahi, ʼo mamaʼo ʼi te hahaʼi. Kae ʼe kovi age ia tatatou fakamamaʼo mai totatou Tupuʼaga. (Apokalipesi 4:11) ʼE tonu ke maʼuhiga ʼi totatou maʼuli ia te maʼu pea mo te maʼuliʼi ʼo “te ʼatamai mālama ʼo te ʼAtua.” (Tāʼaga Lea 2:1-5) ʼI tona fakahagatonu, ʼe tonu ke tou fakafimālieʼi te ʼaoga kia tatou te ʼu meʼa fakalaumālie, koteʼuhi ʼe mole tou lava nofo tokotahi pea mo tou to kehe mai te ʼAtua. ʼE fakalogo tatatou maʼu ʼo he maʼuli fiafia pea mo fua lelei moʼoni, ki tatatou ʼu felogoi lelei mo Sehova, “te Māʼoluga ʼAupito ʼi te kele katoa.”—Pesalemo 83:18.
[Paki ʼo te pasina 5]
Ko Miguel: “Neʼe lahi te ʼu temi ʼaē neʼe ʼau lotomamahi ʼaupito ai, kae ʼi taku kamata fakatahi mo te hahaʼi ʼa Sehova, neʼe fetogi ai toku maʼuli”
[Paki ʼo te pasina 5]
Ko Alma Ruth: “ ʼI taku ako ke ʼau ʼiloʼi ia Sehova, neʼe ʼau logoʼi ai ʼe feala haku felogoi lelei mo ia”
[Paki ʼo te pasina 6]
Ko Emelia: “ ʼI muʼa ʼo taku ʼiloʼi te moʼoni, . . . neʼe hage kia ʼau ʼe mole ʼi ai hoku ʼuhiga”
[Paki ʼo te pasina 7]
Ko tatatou fakatahi mo te kau atolasio moʼoni ʼe tokoni mai ke tou fakafimālie totatou maʼuli fakalaumālie