Ko Te Kau Fai Faka Mafola ʼo Te Puleʼaga
Te ʼu Fua Lelei ʼo Te Faʼa Kātaki Pea Mo Te Tatuʼu Tuʼumaʼu
NEʼE fakakikite e Sesu Kilisito ʼi te ʼu ʼaho fakamuli ko “te ʼofa ʼo te tokolahi ʼe momoko anai.” Koia ʼe lahi te ʼu fenua ʼi te malamanei ia ʼaho nei, ko te hahaʼi ʼe nātou fakaʼauʼauganoa ki te logo lelei ʼo te Puleʼaga. Māʼiape la mo ʼihi ʼe nātou meʼa noaʼi te lotu.—Mateo 24:12, 14, MN.
Kae ʼaki te tui pea mo te faʼa kātaki, ko te ʼu kaugā fagona ʼo te Puleʼaga ʼe nātou tauʼi fakalelei tonatou ʼu faigataʼaʼia, ohage la ko te faʼifaʼitaki ʼaenī mai te Lepupilika Tchèque.
Ko te ʼu fafine Fakamoʼoni e toko lua neʼe nā fai palalau mo te fafine ʼe mole ina avahi katoa tona matapā. ʼOsi ʼaia, neʼe ina avahi māmālie te matapā, pea neʼe ina faoʼi mai tona nima, ʼo toʼo Te Tule Leʼo pea mo te Réveillez-vous ! ʼaē neʼe fakahā age e te ʼu Fakamoʼoni. Ko te leʼo mai te loto fale neʼe ina ʼui fēnei mai “mālo,” pea neʼe pupunu te matapā. Neʼe feʼekeʼaki fēnei e te ʼu Fakamoʼoni: “ ʼE tonu koa ke ma toe liliu ʼo ʼaʼahi te fafine?” Pea ko ia ʼaē neʼe pionie ia nāua, ko te minisi temi katoa, neʼe ina fakatuʼutuʼu ke toe liliu ʼo ʼaʼahi te fafine, kae neʼe hage tona tali e te fafine ko tana ʼuluaki haʼu, ʼo fai hoholo feiā ʼi te taʼu katoa.
Neʼe ina fakatuʼutuʼu leva ke ina fetogi tana fai faka mafola, pea neʼe faikole te pionie ke tokoni age ia Sehova kia ia. Ki muli age, ʼi tana ʼosi foaki te ʼu nusipepa, neʼe ina fehuʼi fēnei age ki te fafine: “ ʼE ke lelei pe? Koteā tau manatu ki te ʼu nusipepa?” ʼI te kamata, neʼe mole fai hana tali, kae ʼaki pe te ʼu kiʼi ʼaʼahi ʼaē neʼe ina fai tuʼumaʼu, neʼe kamata agalelei leva te fafine. ʼI te tahi ʼaʼahi neʼe ina avahi katoa tona matapā, kae neʼe mole fualoa tanā fai palalau.
ʼI te sio ʼa te pionie ki te faigataʼa ʼo te fafine mokā nā fai palalau ʼi te muʼa matapā, neʼe fakatuʼutuʼu ke faitohi ʼo fakahāhā ki te fafine ia te tupuʼaga ʼo te ʼu ʼaʼahi, pea mo te fakaʼui ke fai hana ako Tohi-Tapu. ʼOsi ʼaia, hili te taʼu katoa vaelua mo tana faʼa kātaki pe, neʼe kamata ai leva e te pionie te ako Tohi-Tapu ʼa te fafine. Neʼe punamaʼuli pea mo lotomālohi ʼi te ʼui age e te fafine fēnei kia ia: “Neʼe hoki ʼau tui ki te ʼAtua ʼi te temi pe ʼaē neʼe koulua ʼaumai ai te ʼu nusipepa.”
ʼIo, ʼe feala ke fua lelei te faʼa kātaki pea mo te tatuʼu tuʼumaʼu ʼi te gāue fai faka mafola ʼo te Puleʼaga pea mo te fai ʼo ni ʼu tisipulo.—Mateo 28:19, 20.