Tou Faʼifaʼitakiʼi Te ʼAtua ʼo Te Moʼoni
“Koutou liliu ko he kau faʼifaʼitaki ʼo te ʼAtua, ohage ko he fānau ʼofaina.”—Efeso 5:1, MN.
1. Koteā te manatu ʼa ʼihi ʼo ʼuhiga mo te moʼoni, pea he koʼe ʼe mole lelei te manatu ʼaia?
“KOTEA ia te mooni?” (Soane 18:38) Ko te fehuʼi ʼaia neʼe fai e Posio Pilato ohage ko hana manukinuki, kua hili kiai teitei taʼu e 2 000, pea neʼe ina fia fakahā te faigataʼa ʼo te maʼu ʼo te moʼoni mokā kita kumi. Tokolahi ʼe nātou manatu feiā anai. ʼE ʼui e te hahaʼi ʼe mole feala ke tou maʼu te moʼoni. Neʼe lagi koutou logo ki te ʼui ʼaē ʼe tahi vakaʼi pe e te tagata takitokotahi peʼe koteā te moʼoni, peʼe ko te ʼui ʼaē ko te moʼoni ʼe fetogi tuʼumaʼu. ʼE mole lelei te faʼahiga manatu ʼaia. Ko te fakatuʼutuʼu tāfito ʼa te hahaʼi ʼaē ʼe nātou fai te ʼu kumi pea mo te hahaʼi faiako, ko te fia ʼiloʼi peʼe koteā ʼaē neʼe hoko moʼoni ʼo ʼuhiga mo te mālama ʼaē ʼe tou maʼuʼuli ai. Ko te moʼoni ʼe mole ko he faʼahi ke tou vakaʼi e tatou takitokotahi. Ohage la, ʼe ʼi ai koa he nefesi tuputupua peʼe kailoa? ʼE maʼuli moʼoni koa Satana peʼe kailoa? ʼE ʼi ai koa he fakatuʼutuʼu ʼo te maʼuli peʼe kailoa? ʼI te ʼu faʼahi fuli ʼaia, ʼe ko he tali pe e tahi. ʼE ʼi ai te tali ʼe moʼoni pea mo te tahi tali ʼe loi, kae ʼe mole feala ke moʼoni lualua te ʼu tali ʼaia.
2. Koteā te ʼu faʼahi ʼe fakahā ai ko Sehova ʼe ko te ʼAtua ʼo te moʼoni, pea koteā te ʼu fehuʼi ʼaē ka tou vakaʼi?
2 ʼI te ʼuluaki alatike, neʼe tou vakaʼi ko Sehova ʼe ko te ʼAtua ʼo te moʼoni. ʼE ina ʼiloʼi te moʼoni ʼo meʼa fuli pe. Ko Sehova ʼe ina tala tuʼumaʼu te moʼoni, ʼo mole hage ko tona fili ʼaē ʼe kākā, ia Satana te Tevolo. Tahi ʼaē meʼa, ʼe lahi te fakahā e Sehova te moʼoni ki te hahaʼi. Neʼe uga fēnei e te ʼapositolo ko Paulo te kau Kilisitiano: “Koutou liliu ko he kau faʼifaʼitaki ʼo te ʼAtua, ohage ko he fānau ʼofaina.” (Efeso 5:1, MN ) ʼI totatou ʼuhiga kau Fakamoʼoni ʼa Sehova, ʼe tou lava faʼifaʼitakiʼi feafeaʼi ia ia, ʼo tou palalau ʼaki te moʼoni pea mo tou maʼuliʼi? He koʼe ʼe maʼuhiga ke tou fai te faʼahi ʼaia? Pea ʼe tou lava ʼiloʼi papau feafeaʼi ʼe leleiʼia e Sehova ia nātou ʼaē ʼe nātou haga maʼuliʼi te moʼoni? Tou tali ki te ʼu fehuʼi ʼaia.
3, 4. Neʼe fakamatala feafeaʼi e te ʼu ʼapositolo ko Paulo pea mo Petelo te ʼu meʼa ʼaē ka hoko ʼi “te ʼu ʼaho fakamuli”?
3 ʼI totatou temi kua lahi ʼaupito te ʼu loi ʼi te faʼahi ʼo te lotu. Ohage ko tona fakakikite e te ʼapositolo ko Paulo ʼaki te takitaki ʼa te ʼAtua, tokolahi te hahaʼi ʼi “te ʼu ʼaho fakamuli” ʼaenī ʼe hage ʼe nātou pipiki ki te ʼAtua, kae ʼe nātou fakafisi ki tona mālohi. Ko ʼihi ʼe nātou fakafeagai ki te moʼoni, heʼe “fakapōʼuli tonatou ʼatamai katoa.” Pea “ko te ʼu tagata agakovi pea mo te ʼu hahaʼi kākā ʼe nātou tuputupu . . . ki te kovi ʼaupito, ʼo nātou fakahēʼi pea mo nātou hēʼia.” Logola ʼe ako tuʼumaʼu te hahaʼi ʼaia, kae ʼe mole nātou maʼu anai te “ ʼatamai mālama totonu ʼo te moʼoni.”—2 Timoteo 3:1, 5, 7, 8, 13, MN.
4 Neʼe toe takitaki e te ʼAtua ia te ʼapositolo ko Petelo ke faitohi ʼo ʼuhiga mo te ʼu ʼaho fakamuli. Ohage pe ko te meʼa ʼaē neʼe ina fakakikite, ko te hahaʼi ʼe mole nātou fakafisi pe ki te moʼoni, kae ʼe nātou toe manukiʼi te Folafola ʼa te ʼAtua pea mo te hahaʼi ʼaē ʼe nātou tala te moʼoni ʼaē ʼe tuʼu ai. “ ʼO mulimuli pe ki tonatou ʼu holi,” ʼe mole ʼiloʼi e te kau vāvā ʼaia neʼe hoko te lōmaki ki te mālama ʼo te temi ʼo Noe, ko te faʼifaʼitaki ʼaia ʼo te ʼaho ʼo te fakamāu ʼaē ka hoko mai anai ʼi te ka haʼu. Ko te meʼa ʼaē ʼe moʼoni kia nātou ʼe liliu ia ko honatou tuʼutāmaki, mokā hoko mai te temi ʼaē ka fakaʼauha ai e te ʼAtua te ʼu hahaʼi ʼaē ʼe mole pipiki ki te ʼAtua.—2 Petelo 3:3-7.
ʼE ʼIloʼi e Te ʼu Kaugana ʼa Sehova Ia Te Moʼoni
5. ʼO mulimuli ki te meʼa ʼaē neʼe ʼui e te polofeta ko Taniela, koteā ʼaē ʼe tonu ke hoko ʼi “te temi ʼo te fakaʼosi,” pea neʼe hoko feafeaʼi te lea faka polofeta ʼaia?
5 ʼI tana fakamatala ʼaē “te temi ʼo te fakaʼosi,” neʼe fakakikite e te polofeta ko Taniela te tuputupu foʼou ʼaē ka hoko ʼi te lotolotoiga ʼo te hahaʼi ʼa te ʼAtua—ko te toe fakatuʼu ʼo te moʼoni faka lotu. Neʼe ina tohi fēnei: “Ko te tokolahi ʼe ʼolo anai ʼi hē mo hē, pea ko te ʼatamai mālama moʼoni ʼe mahu anai ia.” (Taniela 12:4) Ko te hahaʼi ʼa Sehova ʼe mole fakahēʼi pea mo fakakiviʼi nātou e ia ʼaē ko te Kākā lahi. ʼI tanatou kumi ʼi te ʼu pasina ʼo te Tohi-Tapu, neʼe nātou maʼu ai te ʼatamai mālama moʼoni. ʼI te ʼuluaki sēkulō, neʼe fakamālamaʼi e Sesu tana kau tisipulo. Neʼe “ina avahi katoa ai tonatou ʼatamai ke nātou mahino ki te ʼu Tohi.” (Luka 24:45, MN ) ʼI totatou temi, ʼe toe fai feiā e Sehova. ʼAki tana Folafola, mo tona laumālie, pea mo tana kautahi, neʼe ina faka fealagia ki te ʼu lauʼi miliona hahaʼi ʼi te kele katoa ke nātou mahino ki te meʼa ʼaē kua ina ʼiloʼi—ia te moʼoni.
6. Koteā te ʼu moʼoni faka Tohi-Tapu ʼaē kua mahino kiai te hahaʼi ʼa te ʼAtua ia ʼaho nei?
6 ʼI totatou ʼuhiga hahaʼi ʼa te ʼAtua, ʼe lahi te ʼu meʼa kua tou mahino kiai. ʼE tou ʼiloʼi te ʼu tali ki te ʼu fehuʼi ʼaē neʼe faiga ia te hahaʼi popoto ʼo te mālama ke nātou mahino kiai lolotoga ni ʼu taʼu e afe. Ohage la, ʼe tou ʼiloʼi te tupuʼaga ʼo te mamahi, pe koʼe ʼe tou mamate, pea he koʼe ʼe mole feala ke fakatuʼu e te tagata te tokalelei pea mo te logo tahi. Neʼe toe fakahā mai peʼe feafeaʼi anai te ka haʼu—te Puleʼaga ʼo te ʼAtua, te palatiso ʼi te kele, pea mo te maʼuli heʼegata pea mo haohaoa. Kua tou ʼiloʼi ia Sehova, te Māfimāfi. Neʼe tou ako tona ʼulugaaga ʼaē ʼe tou leleiʼia pea mo te ʼu meʼa ʼaē ʼe tonu ke tou fai ke tou maʼu ai tana tapuakina. ʼI tatatou ʼiloʼi ia te moʼoni ʼe feala ke tou ʼiloʼi ai te meʼa ʼaē ʼe mole moʼoni. Ko te maʼuliʼi ʼo te moʼoni ʼe ina puipui tatou ke mole tou faiga ki he ʼu fakatuʼutuʼu ʼe mole hona fua, mo tou fiafia ʼi totatou maʼuli, pea mo foaki mai kia tatou he ʼamanaki taulekaleka ki te ka haʼu.
7. Ko ai ʼaē ʼe feala ke nātou mahino ki te Tohi-Tapu, pea ko ai ʼaē ʼe mole feala ke mahino kiai?
7 ʼE koutou mahino koa ki te moʼoni ʼaē ʼe tuʼu ʼi te Tohi-Tapu? Kapau koia, pea kua lahi te ʼu tapuakina kua koutou maʼu. Ka fai e he tagata peʼe ko he fafine hana tohi, pea ʼi te agamāhani ʼe ina tohi maʼa he faʼahiga hahaʼi. Ko ʼihi tohi neʼe fai maʼa te hahaʼi ʼaē neʼe ʼolo ki te ʼu faleako lalahi, ko ʼihi tohi maʼa te ʼu tamaliki, pea mo ʼihi tohi maʼa te ʼu hahaʼi ʼaē ʼe nātou popoto ʼi he faʼahiga gāue. Logola ʼe feala ke maʼu e te hahaʼi fuli ia te Tohi-Tapu, kae neʼe tohi ke mahino pea ke leleiʼia e he faʼahiga hahaʼi. Neʼe tohi e te ʼAtua te Tohi-Tapu maʼa te hahaʼi agavaivai, mo fia mālalo. Ko te faʼahiga hahaʼi ʼaia ʼe feala ke nātou mahino ki te Tohi-Tapu, tatau aipe peʼe koteā tanatou ako, tanatou agaʼi fenua, tanatou gāue, peʼe ko tonatou lanu. (1 Timoteo 2:3, 4) ʼI te tahi age faʼahi, ʼe mole feala ke mahino ki te Tohi-Tapu ia te hahaʼi ʼaē ʼe mole nātou lotolelei kiai, tatau aipe peʼe feafeaʼi tonatou poto peʼe ko tanatou ako. Ko ia ʼaē ʼe fiatuʼu pea mo fialahi, ʼe mole feala ke mahino ki te ʼu moʼoni maʼuhiga ʼo te Folafola ʼa te ʼAtua. (Mateo 13:11-15; Luka 10:21; Gaue 13:48) Ko te ʼAtua tokotahi pe ʼaē neʼe feala ke ina tohi he tohi feiā.
ʼE Moʼoni Te ʼu Kaugana ʼa Sehova
8. He koʼe ko Sesu te moʼoni?
8 Ohage ko Sehova, ʼe moʼoni tana kau Fakamoʼoni agatonu. Ko Sesu Kilisito, te Fakamoʼoni maʼuhiga ʼa Sehova, neʼe ina tala te moʼoni ʼi te ʼu meʼa ʼaē neʼe ina akoʼi pea ʼi tona maʼuli pea mo tona mate. Neʼe lagolago ki te moʼoni ʼo te folafola pea mo te ʼu fakapapau ʼa Sehova. Koia, neʼe ʼui totonu e Sesu ko ia te moʼoni.—Soane 14:6; Apokalipesi 3:14; 19:10.
9. Koteā ʼaē ʼe ʼui e te Tohi-Tapu ʼo ʼuhiga mo te palalau ʼaki te moʼoni?
9 Ko Sesu neʼe “fonu ʼi te ʼofa makehe pea mo te moʼoni,” pea “neʼe mole he kākā ʼi tona gutu.” (Soane 1:14, MN; Isaia 53:9) ʼE mulimuli te kau Kilisitiano ki te faʼifaʼitaki ʼaē neʼe tuku e Sesu, ʼo nātou palalau ʼaki te moʼoni ki te hahaʼi. Neʼe tokoni fēnei ia Paulo ki te kau Kilisitiano: “Koutou tahi tala te mooni ki tona kaiga, he ko tatou, e tou kaiga.” (Efeso 4:25) ʼI muʼa atu, neʼe tohi fēnei e te polofeta ko Sakalia: “Koutou fepalalauʼaki ʼi te moʼoni.” (Sakalia 8:16) ʼE moʼoni te kau Kilisitiano heʼe nātou fia fakafiafia te ʼAtua. Ko Sehova ʼe moʼoni pea ʼe ina ʼiloʼi te mamahi ʼaē ʼe feala ke hoko ʼaki te loi. Koia ko tana fakaʼamu ke tala e tana ʼu kaugana te moʼoni.
10. He koʼe ʼe loi te hahaʼi, pea koteā tona ʼu fua kovi?
10 Tokolahi te hahaʼi ʼe nātou loi ke feala hanatou maʼu he ʼu lelei. Ko te hahaʼi ʼe nātou loi ke mole fakatūʼa nātou, ke fua lelei kia nātou, peʼe ke vikiʼi ia nātou. Kae ko te loi ʼe ko he aga ʼe kovi. Tahi ʼaē meʼa, ko ia ʼaē ʼe loi ʼe mole leleiʼia e te ʼAtua. (Apokalipesi 21:8, 27; 22:15) Ka ʼiloʼi tatou e te hahaʼi heʼe tou palalau ʼaki te moʼoni, pea ʼe nātou tui ki te meʼa ʼaē ʼe tou ʼui, ʼe nātou falala kia tatou. Kae kapau ʼe tou loi, tatau aipe peʼe tou fai tuʼa tahi, ʼe mole toe tui anai te hahaʼi ki te ʼu meʼa ʼaē ka tou ʼui. ʼE ʼui fēnei e te tākuga lea Afelika: “Ko te loi pe e tahi ʼe fakatupu kovi ki te ʼu moʼoni e lauʼi afe.” ʼE ʼui fēnei e te tahi tākuga lea: “Ko he tahi ʼe māhani ʼi te loi ʼe mole toe tui anai ki ai te hahaʼi, tatau aipe mokā ina tala te moʼoni.”
11. ʼO mole gata ʼaki pe tana ʼui te moʼoni, koteā te tahi meʼa ʼe fai e ia ʼaē ʼe moʼoni?
11 Ko he tahi ʼe moʼoni, ʼe mole ina ʼui pe te moʼoni. ʼE ina maʼuliʼi. ʼE ina fakahā ai totatou ʼuhiga ʼo tatou. ʼE tou fakahā te moʼoni ki te hahaʼi mole ʼaki pe tatatou ʼu palalau, kae ʼaki te ʼu meʼa ʼaē ʼe tou fai. Neʼe ʼui fēnei e te ʼapositolo ko Paulo: “E ke fakaʼako te tahi kaiga, kae e mole ke akoʼi ia koe totonu! Ko koe ae e ke ako ke aua te kaihaa, kae e ke kaihaa! E ke lau ke aua te tono, kae e ke tono!” (Loma 2:21, 22) Kapau ʼe tonu ke tou fakahā te moʼoni ki te hahaʼi, pea ʼe tonu ke tou fai ia meʼa fuli ʼaki te moʼoni. Kapau ʼe ʼiloʼi kita ʼi tatatou aga ʼaia, pea ʼe feala anai ke tali e te hahaʼi te ʼu meʼa ʼaē ʼe tou akoʼi age kia nātou.
12, 13. Koteā ʼaē neʼe tohi e te kiʼi taʼahine ʼo ʼuhiga mo te aga fakahagatonu, pea koteā te tupuʼaga ʼo tana taupau te lekula māʼoluga ʼo te aga ʼaē ʼe tonu ke fai?
12 ʼE toe mahino ki te kau tūpulaga Fakamoʼoni ʼa Sehova te maʼuhiga ʼaē ke mole nātou aga kākā. Ko Jenny, ʼi tana kei ako, ʼi tona taʼu 13, neʼe tonu ke ina fai te gāue maʼa te faleako, pea koʼeni te meʼa ʼaē neʼe ina tohi: “ ʼE maʼuhiga ʼaupito kia ʼau ke ʼau aga fakahagatonu. Kae ʼe mole ko te hahaʼi fuli ʼaē ʼe nātou maʼu te manatu ʼaia. Neʼe ʼau fai te fakapapau ke ʼau aga fakahagatonu tuʼumaʼu ʼi toku maʼuli. Tatau aipe peʼe ʼi te temi pe ʼaia ʼe mole fua lelei kia ʼau pea mo toku ʼu kaumeʼa taku tala ia te moʼoni, kae ʼe ʼau faiga tuʼumaʼu pe anai ke ʼau aga fakahagatonu. ʼE ʼau tokaga ke ʼau kaumeʼa mo nātou ʼaē ʼe palalau ʼaki te moʼoni pea mo nātou ʼaē ʼe aga fakahagatonu.”
13 ʼO ʼuhiga mo te meʼa ʼaia neʼe tohi e Jenny, neʼe ʼui fēnei e tona fafine faiako: “Kei ke finemui kae kua ke maʼu te manatu mālohi ʼo ʼuhiga mo te aga ʼaē ʼe tonu ke fai. ʼE ʼau ʼiloʼi e ke mulimuli anai kiai heʼe ke maʼu te mālohi.” Koteā ʼaē neʼe tupu ai te maʼu e te kiʼi taʼahine ʼaia te mālohi ke mulimuli ki te aga ʼaē ʼe tonu ke fai? ʼI te kamata ʼo tana tohi ʼaia, neʼe ʼui e Jenny ko tana lotu ʼe ina “fakatuʼu he ʼu lekula ʼi tona maʼuli.” Kua hili taʼu e fitu ʼi te kua tohi e Jenny te ʼu palalau ʼaia. Ohage ko tona fakahā fakanounou e tana fafine faiako, ko Jenny, ʼi tona ʼuhiga Fakamoʼoni ʼa Sehova, ʼe kei mulimuli ki te lekula māʼoluga ʼo te aga ʼaē ʼe tonu ke fai.
ʼE Fakahā e Te ʼu Kaugana ʼa Sehova Te Moʼoni
14. He koʼe ʼe ko he maʼua tāfito ʼo te ʼu kaugana ʼa te ʼAtua ke nātou lagolago ki te moʼoni?
14 ʼE moʼoni, ʼe ʼi ai ʼihi ʼe mole ko he kau Fakamoʼoni ʼa Sehova, kae ʼe nātou palalau ʼaki te moʼoni pea mo nātou faiga ke nātou aga fakahagatonu. Kae ʼi totatou ʼuhiga kaugana ʼa te ʼAtua, ʼe tou maʼu te maʼua tāfito ʼaē ke tou lagolago ki te moʼoni. Neʼe foaki mai kia tatou te ʼu moʼoni ʼo te Tohi-Tapu—ko te ʼu moʼoni ʼaia ʼe feala ke nātou taki he tahi ki te maʼuli heʼegata. Koia ʼe ko totatou maʼua ke tou vaevae te ʼatamai mālama ʼaia mo te hahaʼi. Neʼe ʼui fēnei e Sesu: “Ko ia ʼaē neʼe foaki lahi ki ai, ʼe fakamaʼua lahi anai kia te ia.” (Luka 12:48, MN ) ʼE mahino ia ‘ ʼe lahi te ʼu meʼa ka fakamaʼua’ anai kia nātou ʼaē neʼe tapuakiʼi ʼaki te ʼatamai mālama maʼuhiga ʼo ʼuhiga mo te ʼAtua.
15. Koteā te fiafia ʼe koutou maʼu ʼi takotou vaevae te moʼoni ʼa te Tohi-Tapu ki te hahaʼi?
15 ʼE tou fiafia ʼi te vaevae mo te hahaʼi te ʼu moʼoni faka Tohi-Tapu. Ohage ko te ʼu tisipulo ʼa Sesu ʼo te ʼuluaki sēkulō, ʼe tou tala te logo lelei—ko he logo ʼo te ʼamanaki ʼe malave ki te loto—kia nātou ʼaē ʼe “ ʼāhua pea mo mavetevete, ohage he faga ōvi ʼe mole honatou tagata tauhi ōvi,” pea mo nātou ʼaē ʼe kivi pea mo loto maveuveu ʼuhi ko te ʼu “akonaki ʼa te kau temonio.” (Mateo 9:36, MN; 1 Timoteo 4:1, MN ) Neʼe tohi fēnei e te ʼapositolo ko Soane: “E mole lahiʼage toku fiafia ki niʼihiʼage mea i te mea aeni, i taku logo e mauli aku fanau i te mooni.” (3 Soane 4) Neʼe tupu te fiafia ʼa Soane ʼuhi ko te nofo agatonu ʼa tana ʼu “fanau”—lagi ko ia ʼaē neʼe ina tala age kia nātou te moʼoni. ʼE ko he meʼa fakafiafia kia tatou mokā tou sisio ki te hahaʼi, ʼe nātou tali ʼaki he loto fakafetaʼi ia te Folafola ʼa te ʼAtua.
16, 17. (a) He koʼe ʼe mole tali e te hahaʼi fuli te moʼoni? (b) Koteā te fiafia ʼe feala ke tou maʼu mokā ʼe tou tala te moʼoni ʼa te Tohi-Tapu?
16 ʼE moʼoni, ʼe mole ko te hahaʼi fuli ʼaē ʼe nātou tali te moʼoni. Neʼe palalau ia Sesu ki te moʼoni ʼo ʼuhiga mo te ʼAtua, logola neʼe mole ko he meʼa māhani te fai ʼo te faʼahi ʼaia. Neʼe ina ʼui fēnei ki te kau Sutea ʼaē neʼe fakafeagai: “He koʼe ʼe mole koutou tui mai kia te ʼau? Ko ʼaē ʼe haʼu mai te ʼAtua, ʼe fakalogo ia ki te ʼu folafola ʼa te ʼAtua. Ko te tupuʼaga la ʼaia ʼo takotou mole fakalogo, koteʼuhi ʼe mole koutou ʼōmai mai te ʼAtua.”—Soane 8:46, 47, MN.
17 Koia, ohage ko Sesu, ʼaua naʼa tou līaki te tala ʼo te ʼu moʼoni maʼuhiga ʼo ʼuhiga mo Sehova. ʼE mole tou ʼamanaki ke tali e te hahaʼi fuli te meʼa ʼaē ʼe tou fakahā age kia nātou, he neʼe mole tali e te hahaʼi fuli te ʼu meʼa ʼaē neʼe tala e Sesu. Kae ʼe tou maʼu te fiafia ʼi te ʼiloʼi ʼaē ʼe tou fai te meʼa ʼaē ʼe totonu. Ko Sehova, ʼi tona lotoʼofa, ʼe ina loto ke fakahā te moʼoni ki te malamanei katoa. ʼI tanatou maʼu te moʼoni, ʼe ʼave e te kau Kilisitiano te mālama ʼi te malamanei ʼaē ʼe fakapōʼuli. ʼI tatatou tuku ʼaē ke gigila te mālama ʼo te moʼoni ʼaki tatatou ʼu palalau pea mo tatatou ʼu aga, ʼe feala ke tou tokoni ai ki ʼihi ke nātou faka kolōliaʼi tatatou Tāmai ʼaē ʼe ʼi selo. (Mateo 5:14, 16) ʼE tou fakahā ia muʼa ʼo te hahaʼi, ʼe tou fakafisi ki te loi ʼa Satana, kae ʼe tou lagolago ki te Folafola ʼa te ʼAtua ʼaē ʼe maʼa pea mo moʼoni. Ko te moʼoni ʼaē ʼe tou ʼiloʼi pea mo vaevae, ʼe feala ke ina faka ʼāteainaʼi moʼoni te hahaʼi ʼaē ʼe nātou tali te moʼoni ʼaia.—Soane 8:32.
Tou Mulimuli Ki Te Meʼa ʼAē ʼe Moʼoni
18. He koʼe neʼe ʼofa ia Sesu kia Natanaele pea neʼe ina fakahā feafeaʼi?
18 Neʼe ʼofa ia Sesu ki te moʼoni pea neʼe palalau ʼaki te moʼoni. Lolotoga tona minisitelio ʼi te kele, neʼe ina fakahā tana ʼofa kia nātou ʼaē neʼe palalau ʼaki te moʼoni pea mo fai te meʼa ʼaē ʼe moʼoni. ʼO ʼuhiga mo Natanaele, neʼe ʼui fēnei e Sesu: “Koeni he tagata iselaele mooni e mole mau he kaka ia te ia.” (Soane 1:47) Pea ko Natanaele ʼaē neʼe toe fakahigoaʼi ko Paletolomeo, neʼe fili ia ia ke kau ki te toko 12 kau ʼapositolo. (Mateo 10:2-4) Neʼe ko he toe pilivilesio lahi ʼaia!
19-21. Neʼe tapuakina feafeaʼi ia te tagata kivi ʼuhi ko tona lototoʼa ʼaē neʼe moʼoni?
19 ʼI te tohi faka Tohi-Tapu ʼo Soane, ʼe ʼi ai te kapite katoa ʼe fakamatala ai te tagata neʼe aga fakahagatonu pea neʼe tapuakina e Sesu. ʼE mole tou ʼiloʼi tona higoa. Ko te meʼa ʼaē ʼe tou ʼiloʼi ko te tagata ʼaia neʼe ko he tagata masiva, neʼe kivi talu mai tana tupu. Neʼe ōfo ʼaupito te hahaʼi ʼi te fakamālōlō e Sesu ia te tagata ke sio. Ko te logo ʼo ʼuhiga mo te mālōlō faka milakulo ʼaia neʼe aʼu ki ʼihi kau Faliseo, ʼaē neʼe nātou fehiʼa ki te moʼoni, pea neʼe nātou manatu tahi ke kapu ʼi te sinakoka te hahaʼi fuape ʼaē ʼe tui kia Sesu. ʼI tanā ʼiloʼi te meʼa ʼaē neʼe feala ke hoko, neʼe matataku te ʼu mātuʼa ʼa te tagata ʼaē neʼe kivi, ʼo nā loi ai ki te kau Faliseo, ʼo nā ʼui ʼe mole nā ʼiloʼi pe neʼe hoko feafeaʼi te fakamālōlō ʼo tanā tama, peʼe ko ai ʼaē neʼe ina fai te milakulo ʼaia.—Soane 9:1-23.
20 Neʼe toe pāuiʼi e te kau Faliseo te tagata ʼaē neʼe fakamālōlō. Neʼe lototoʼa ʼo ina tala te moʼoni, tatau aipe peʼe koteā ʼaē neʼe feala ke hoko. Neʼe ina fakamatala tona fakamālōlō pea neʼe ko Sesu ʼaē neʼe ina fakahoko te faʼahi ʼaia. Neʼe punamaʼuli te tagata ʼaia ʼi tana sio ʼaē ko te hahaʼi maʼuhiga ʼaia pea mo popoto ʼe mole nātou tui ko Sesu neʼe fekauʼi mai e te ʼAtua, pea ʼaki he lototoʼa, ko te tagata ʼaia neʼe fakamālōlō neʼe ina uga nātou ke nātou tali te moʼoni: “Kapau nee mole haù ia mai te Atua, e mole ina mafai-he mea.” ʼI tanatou mole maʼu hanatou tali ki te ʼu palalau ʼaia, neʼe tukugakoviʼi e te kau Faliseo ko te tagata ʼaia neʼe agatuʼu ʼo nātou kapu ai ia ia.—Soane 9:24-34.
21 ʼI te ʼiloʼi e Sesu te meʼa ʼaia, neʼe ina toʼo he temi ke ina kumi te tagata. ʼOsi ʼaia, neʼe ina fakaloto mālohi te tui ʼaē neʼe fakahā e te tagata kivi ʼaia. Neʼe tala fakahagatonu age e Sesu ki te tagata ʼaia, ko ia te Mesia. Neʼe tapuakinaʼi lahi te tagata ʼaia he neʼe ina tala te moʼoni! ʼE mahino ia ʼe nofo te ʼofa ʼo te ʼAtua ia nātou ʼaē ʼe nātou palalau ʼaki te moʼoni.—Soane 9:35-37.
22. He koʼe ʼe tonu ke tou mulimuli ki te moʼoni?
22 Ko te maʼuliʼi ʼo te moʼoni ʼe ko he meʼa ʼe tonu ke maʼuhiga kia tatou. ʼE maʼuhiga ke tou maʼu pea mo taupau he ʼu felogoi lelei mo te hahaʼi pea mo te ʼAtua. Ko he tahi ʼe moʼoni ʼe ko he tahi ʼe aga fakahagatonu, mo loto fakamalotoloto, mo faigafua takita fakaōvi kia ia, pea mo tou falala kia ia, pea ʼe ʼofa Sehova kia ia. (Pesalemo 15:1, 2) Ko he tahi ʼe mole moʼoni, ʼe ko he tahi ʼe kākā, ʼe mole feala ke kita falala kia ia, pea ʼe loi pea ʼe mole ʼofa Sehova kia ia. (Tāʼaga Lea 6:16-19) Koia tou faiga mālohi ke tou mulimuli ki te meʼa ʼaē ʼe moʼoni. Ei, ke feala hatatou faʼifaʼitakiʼi te ʼAtua ʼo te moʼoni, ʼe tonu ke tou ʼiloʼi te moʼoni, ke tou palalau ʼaki te moʼoni pea mo tou maʼuliʼi te moʼoni.
ʼE Koutou Tali Feafeaʼi Anai?
• He koʼe ʼe feala ke tou loto fakafetaʼi ʼi tatatou ʼiloʼi ia te moʼoni?
• ʼE tou lava faʼifaʼitakiʼi feafeaʼi ia Sehova ke tou fai te meʼa ʼaē ʼe moʼoni?
• Koteā te ʼu lelei ʼe tou maʼu mokā tou tala ki te hahaʼi te moʼoni ʼo te Tohi-Tapu?
• He koʼe ʼe maʼuhiga ke tou mulimuli ki te moʼoni?
[Paki ʼo te pasina 17]
ʼAki he loto faʼafai, ʼe tala e te kau Kilisitiano te moʼoni ʼo te Tohi-Tapu
[Paki ʼo te pasina 18]
Ko te tagata kivi ʼaē neʼe fakamālōlō e Sesu neʼe tapuakina lahi he neʼe ina tala te moʼoni