“ ʼE Au Haʼele Anai ʼi Tau Moʼoni”

1-3. (1) Kotea ʼae ʼe tonu ke tou logoʼi ʼo ʼuhiga mo te ʼu moʼoni Fakatohi-tapu? Tuku mai he faʼifaʼitaki. (Vakaʼi te ʼu ʼuluaki pāki.) (2) Kotea ʼae ka tou vakaʼi ʼi te alatike ʼaeni?

KO TE tokolahi ia ʼaho nei ʼe natou toe fakaliliu ki te fale koloa te ʼu meʼa ʼae neʼe natou totogi ai. Kae ʼe kaugā malie age ia natou ʼae ʼe natou fakaliliu te ʼu meʼa ʼae neʼe natou totogi ʼi te Neti. ʼE lagi mole natou leleiʼia te ʼu meʼa ʼae neʼe natou totogi, peʼe lagi natou fakatokagaʼi ʼe ʼi ai te faʼahi ʼe mole lelei ʼi te ʼu meʼa ʼaia. Koia ʼae ʼe natou loto ai ke natou fetogi te meʼa ʼae neʼe natou totogi peʼe ke liufaki age tanatou foʼi falā.

² ʼE mole tou loto anai ʼi he temi ke tou fai te faʼahi ʼaia mo te ʼu moʼoni Fakatohi-tapu. Kapau kua tou “totogi” te moʼoni, ʼe mole tou loto anai ke tou fakatau, ko tona fakaʼuhiga, kapau kua tou ako ia te moʼoni, ʼe mole tou loto anai ke tou liʼaki ʼi he temi. (Lau ia Taaga Lea 23:23; 1 Timoteo 2:4) Ohage ko tatatou vakaʼi ʼi te alatike ʼae neʼe hoki ʼosi atu, neʼe lahi te temi ʼae neʼe tou fakaʼaogaʼi moʼo ako ia te moʼoni. Pea tahi ʼae, neʼe lagi tou mavae ʼi he gaue neʼe totogi lelei. Pea neʼe tou fetogi ʼatatou felogoi mo ʼihi, mo ʼatatou faʼahiga manatu, mo ʼatatou aga, mo tou liʼaki te ʼu agaʼi fenua mo te ʼu agamahani ʼae ʼe fehiʼa ai Sehova. Kae ʼe tou tui papau, ʼe fakalaka maumau te ʼu tapuakina ʼae neʼe tou maʼu ʼaki tatatou iloʼi te moʼoni ʼi te ʼu sakilifisio ʼae neʼe tou fai.

³ Neʼe fakamatala e Sesu te lea fakata ʼo ʼuhiga mo he tagata fakatau koloa ʼe ina kumi he ʼu mataʼi tofe matalelei. ʼI te temi pe ʼae neʼe maʼu ai e te tagata ia he mataʼi tofe maʼuhiga ʼaupito, neʼe alu ai ʼo fakatau ʼana meʼa fuli moʼo totogi te mataʼi tofe ʼaia. Neʼe fakata e te mataʼi tofe ʼaia ia te moʼoni ʼo ʼuhiga mo te Puleʼaga ʼo te ʼAtua. ʼAki tana fakamatala, neʼe fakaha ai e Sesu ʼe feia pe anai te maʼuhiga ʼo te moʼoni kia natou ʼae ʼe natou kumi ia te moʼoni. (Mateo 13:45, 46) ʼI tatatou iloʼi te moʼoni, ia te moʼoni ʼo ʼuhiga mo te Puleʼaga ʼo te ʼAtua pea mo ʼihi moʼoni Fakatohi-tapu maʼuhiga, neʼe tou fakafisi kia meʼa fuli ke feala hatatou maʼu ia te moʼoni. Kapau ʼe tou fakamaʼuhigaʼi tuʼumaʼu te moʼoni, pea ʼe mole tou liʼaki anai ʼi he temi. Kae ʼe fakaʼofaʼofa foki, ko ʼihi kaugana ʼa te ʼAtua neʼe natou liʼaki te moʼoni he neʼe mole kei natou fakamaʼuhigaʼi. ʼE mole tou loto anai ke hoko te aluʼaga ʼaia ʼi he ʼaho. Koia, ʼe ʼaoga ke tou fakalogo ki te fakalotomalohi ʼaeni ʼi te Tohi-Tapu, ke tou maʼuʼuli ʼo “mulimuli ki te moʼoni.” (Lau ia 3 Soane 2-4.) Ko tona fakaʼuhiga ʼe tonu ke tou fakaha ʼi totatou faʼahiga maʼuli, ʼe tou fakamuʼamuʼa ia te moʼoni. Kae kotea ʼae ʼe feala ke tupu ai te liʼaki peʼe ko te “fakatau” ʼo te moʼoni e he tahi? Pea ʼe feafeaʼi anai hana fai te faʼahi ʼaia? Kotea ʼae ʼe tonu ke tou fai ke mole tou fai te faʼahi ʼaia? Pea kotea ʼae ʼe tonu ke tou fai ke tou fia haʼele tuʼumaʼu ʼi te moʼoni?

ʼE FEAFEAʼI TE “FAKATAU” E ʼIHI IA TE MOʼONI PEA KOTEA TONA TUPUʼAGA?

4. ʼI te temi ʼo Sesu, he koʼe neʼe mole kei haʼele ʼihi ʼi te moʼoni?

⁴ ʼI te temi ʼo Sesu, ko ʼihi ʼae neʼe natou tali te moʼoni, neʼe mole kei natou haʼele ʼi te moʼoni. Ohage la ʼi te tahi ʼaho, ʼi te ʼosi fakahoko e Sesu ia he milakulo pea mo ina fafaga ia he toe hahaʼi kaugā malie, neʼe mulimuli te toe hahaʼi ʼaia ia te ia ʼi te tahi kauvai ʼo te Tai ʼo Kalilea. Kae neʼe natou punamaʼuli ʼi te fai leva ʼae e Sesu te ʼu palalau ʼaeni: “Kapau ʼe mole kotou kai te kakano ʼo te Foha ʼo te tagata pea mo inu ki tona taʼataʼa, ʼe mole ia koutou te maʼuli.” Neʼe mole natou kole kia Sesu ke ina fakamahino age ʼana palalau, kae natou ui fenei: “Kotea koa te taʼi palalau ʼaia? Ko ai ʼae ʼe kei fia fakalogo ki ai?” Koia, “tokolahi ʼi ʼana tisipulo neʼe natou toe liliu ki te ʼu meʼa ʼae ʼi muli pea neʼe mole kei natou mulimuli ia te ia.”—Soane 6:53-66.

5, 6. (1) He koʼe ʼe fakamamaʼo ʼihi mai te moʼoni ia ʼaho nei? (2) ʼE feala ke fakamamaʼo feafeaʼi he tahi mai te moʼoni?

⁵ Meʼa fakaʼofaʼofa he ʼe toe feia pe ia ʼaho nei, ko ʼihi kua natou mavae mai te moʼoni. Kotea tona tupuʼaga? Ko ʼihi neʼe natou tukia ʼuhi ko he fakamahino foʼou ʼo he vaega Tohi-Tapu, peʼe ʼuhi ko he ʼu palalau peʼe ko he aga neʼe fai e he tehina iloa. Ko ʼihi neʼe mole natou leleiʼia te foaki age ʼo he tokoni Fakatohi-tapu e he tahi, pe neʼe natou fihi mo he tahi ʼi te kokelekasio. Pea ko ʼihi neʼe natou mulimuli ki te ʼu akonaki hala ʼa te kau aposita pea ko ʼihi ʼe natou faʼufaʼu he ʼu loi ʼo ʼuhiga mo tatou. Ko he ʼu tupuʼaga ʼaia neʼe fakamamaʼo ai ʼihi mai ia Sehova pea mo te kokelekasio ʼi tonatou pe loto faʼitaliha. (Hepeleo 3:12-14) Neʼe lelei age ke natou falala kia Sesu ohage ko te apositolo ko Petelo. ʼI te temi ʼae neʼe punamaʼuli ai ʼihi ʼi te ʼu palalau ʼa Sesu, neʼe fehuʼi e Sesu ki ʼana apositolo pe ʼe toe fia olo mo natou. Neʼe tali fenei ia Petelo: “ ʼAliki, ke matou olo la kia ai? ʼE ke maʼu te ʼu folafola ʼo te maʼuli heʼe gata.”—Soane 6:67-69.

⁶ Neʼe fakamamaʼo mamalie pe ʼihi mai te moʼoni, pea neʼe lagi mole natou fakatokagaʼi te aluʼaga ʼaia. Ko he tahi ʼe mavae mamalie ʼi te moʼoni, ʼe hage pe ia ko he vaka ʼe tafea mamalie mai te kauvai. ʼE fakatokaga tatou ʼi te Tohi-Tapu ke tou tokakaga “naʼa tou tafea.” (Hepeleo 2:1) Ko te kilisitiano ʼaia, ʼe lagi mole ina tokagaʼi tana fakamamaʼo mai te moʼoni. Kae ʼe ina fakagafua ke vaivai ʼana felogoi mo Sehova pea ʼaki te temi ʼe feala ai ke puli ʼana felogoi ʼaia. Kotea ʼae ʼe tonu ke tou fai ke mole hoko te aluʼaga ʼaia kia tatou ʼi he temi?

KOTEA ʼAE ʼE TONU KE TOU FAI KE MOLE TOU FAKATAU TE MOʼONI ʼI HE TEMI?

7. Kotea ʼae ka tokoni mai ke mole tou fakatau te moʼoni ʼi he temi?

⁷ ʼE tonu ke tou tali mo fakalogo ki te ʼu folafola fuli ʼa Sehova ke feala hatatou haʼele tuʼumaʼu ʼi te moʼoni. ʼE tonu ke tou fakamuʼamuʼa ia te moʼoni pea mo tou maʼuliʼi te ʼu pelesepeto Fakatohi-tapu ʼi te ʼaho fuli. Ko te Hau ko Tavite, neʼe ina fai ia te fakapapau ʼaeni kia Sehova ʼi te faikole: “ ʼE au haʼele anai ʼi tau moʼoni.” (Pesalemo 86:11, MN) Neʼe fakatotonu e Tavite ke haga haʼele ʼi te moʼoni, pea ʼe tonu ke tou toe faʼifaʼitakiʼi ia ia. He ʼe kapau ʼe mole tou fai feia, ʼe feala pe ke tou toe manatu ki te ʼu meʼa ʼae neʼe tou liʼaki ke tou ako ia te moʼoni pea mo tou fakahemala. Kae ʼe mole feala ke tou filifili te ʼu moʼoni Fakatohi-tapu ʼae ʼe tou fakalogo anai ki ai peʼe kailoa. ʼE tonu ke tou haʼele ʼi te ‘moʼoni katoa.’ (Soane 16:13) ʼI te alatike ʼae neʼe hoki ʼosi atu, neʼe tou talanoa kia faʼahi ʼe nima neʼe lagi tou liʼaki ke feala hatatou ako mo maʼuliʼi ia te moʼoni. Tou vakaʼi pe kotea ʼae ʼe tonu ke tou fai ke mole tou toe kumi te ʼu faʼahi ʼaia.—Mateo 6:19.

8. ʼE feala ke fakamamaʼo feafeaʼi he Kilisitiano mai te moʼoni ʼaki tana faʼahiga fakaʼaogaʼi ia tona temi? Tuku mai he faʼifaʼitaki.

⁸ Te temi. ʼE tonu ke tou fakaʼaogaʼi fakapotopoto totatou temi ke mole tou fakamamaʼo mai te moʼoni. Kapau ʼe mole tou nofo tokaga, ʼe feala pe ke lahi fau te temi ʼae ʼe tou fakaʼaogaʼi ki te ʼu fakafiafia, te Neti, peʼe ki te sioʼi ʼo te televisio. Logo la ʼe mole kovi te ʼu aluʼaga ʼaia, kae ʼe feala pe ke mole kei maʼu he temi ki te ako ʼo te Tohi-Tapu pea mo te faifakamafola. Tou vakaʼi te faʼifaʼitaki ʼo Emma.a (Vakaʼi te kiʼi nota.) Talu mai tana kei veliveli, ko te meʼa pe ʼe ina leleiʼia ko te heka hosi. Kae neʼe ina fakatokagaʼi, neʼe lahi fau te temi ʼae neʼe ina fakaʼaogaʼi ki tana fakafiafia ʼaia pea neʼe fai leva he ʼu fetogi ʼo ina fakamuʼamuʼa te ʼu faʼahi ʼae ʼe maʼuhiga. Neʼe toe fakalotomalohiʼi ia ia e te faʼifaʼitaki ʼo Cory Wells, ʼae neʼe kau ki te ʼu rodéos ʼi muʼa atu.b (Vakaʼi te kiʼi nota.) ʼI te temi nei, kua fakaʼaogaʼi lahi e Emma ia tona temi ki te tauhi kia Sehova. Pea kua toe lahi mo te temi ʼae ʼe fakatahi ai mo tona famili mo ʼona kaumeʼa ʼae ʼe tauhi kia Sehova. Kua lelei age ʼana felogoi mo te ʼAtua pea ʼe fiafia he ʼe ina fakaʼaogaʼi fakapotopoto ia tona temi.

9. ʼE feala ke liliu feafeaʼi te ʼu koloa ʼo maʼuhiga lahi age kia tatou?

⁹ Te ʼu koloa. Ke feala hatatou haga haʼele ʼi te moʼoni, ʼe tonu ke tou maʼu he manatu fakapotopoto ʼo ʼuhiga mo te ʼu koloa. Neʼe tou fiafia ʼi te liʼaki ʼo ʼihi aluʼaga ʼi tatatou ako ia te moʼoni he neʼe kua tou mahino ʼe maʼuhiga age te tauhi kia Sehova ʼi te ʼu koloa. Kae ʼaki te temi, ʼe lagi tou sisio ki ʼihi ʼe natou totogi te ʼu kiʼi masini toʼotoʼo foʼou peʼe ko ʼihi atu meʼa. ʼE feala pe ke tou manatu ʼe mole tou maʼu te ʼu meʼa ʼae ʼe tou loto ki ai ʼo puli ai totatou fiafia. Pea ʼe tou kamata fakamuʼamuʼa ai anai te ʼu koloa ʼi tatatou tauhi kia Sehova. Ko te aluʼaga ʼaia ʼe ina fakamanatuʼi mai te faʼifaʼitaki ʼo Temasi. ʼI te lahi fau ʼo tana manako ki “te tuʼu ʼo te ʼu faʼahiga meʼa ʼaeni,” neʼe mole fia liliu ko he kaugā gaue ʼo te apositolo ko Paulo. (2 Timoteo 4:10) Neʼe lagi lahi age te manako ʼa Temasi ki te ʼu koloa ʼi te tauhi ki te ʼAtua. Peʼe lagi neʼe mole kei ina fia fai he ʼu sakilifisio ke feala hana kaugā gaue mo Paulo. Kotea te ako kia tatou? Neʼe lagi tou manako ki te ʼu koloa ʼi te temi muʼa. Koia kapau ʼe mole tou nofo tokaga, ʼe feala pe ke tou toe manako ki te ʼu koloa pea mo puli ai totatou ʼofa ʼae ki te moʼoni.

10. Ko te fakahala fea ʼae ʼe tonu ke tou tauʼi?

¹⁰ ʼAtatou felogoi mo ʼihi. Ke feala hatatou haga haʼele ʼi te moʼoni, ʼe mole tonu ke tou tuku ke fakahalaʼi tatou e natou ʼae ʼe mole tauhi kia Sehova. ʼI tatatou ako te moʼoni, neʼe mole kei tatau ʼatatou felogoi mo totatou famili pea mo ʼotatou kaumeʼa ʼae ʼe mole tauhi kia Sehova. Neʼe lagi fakaʼapaʼapa peʼe fakafeagai ʼihi ki te ʼu akonaki foʼou ʼae ʼe tou tui ki ai. (1 Petelo 4:4) ʼE moʼoni, ʼe tou faiga malohi ke tou felogoi lelei mo totatou famili pea mo tou agalelei kia natou. Kae ʼaua naʼa tou meʼa noaʼi te ʼu lekula ʼa Sehova ʼuhi pe ko tatatou fia fakafiafiaʼi ʼonatou loto. Pea ohage pe ko tona ui ia 1 Kolonito 15:33, ʼe tonu ke tou kaumeʼa mo natou ʼae ʼe ʼoʼofa ia Sehova.

11. Kotea ʼae ʼe tonu ke tou fai ke tou tauʼi ai te ʼu manatu pea mo te ʼu aga heʼe maʼa?

¹¹ Te ʼu manatu pea mo te ʼu aga heʼe maʼa. ʼE tonu ke tou maʼoniʼoni peʼe ke tou maʼa kia mata ʼo Sehova ke feala hatatou haʼele ʼi te moʼoni. (Esaia 35:8; lau ia 1 Petelo 1:14-16.) ʼI tatatou ako ia te moʼoni, neʼe tou fai he ʼu fetogi ke tou fakaalu tahi totatou maʼuli mo te ʼu lekula Fakatohi-tapu ʼo ʼuhiga mo te aga ʼae ʼe tonu ke fai. Ko ʼihi, neʼe natou fai he ʼu toe fetogi. ʼI te temi nei kua tou maʼa ʼi te ʼu aga ʼae ʼe tonu ke fai, koia tou tokakaga ke ʼaua naʼa tou fetogi totatou faʼahiga maʼuli ʼaia mo he faʼahiga maʼuli ʼe heʼe maʼa. Kotea ʼae ʼe feala ke tokoni mai ke mole tou fai he aga ʼe heʼe ʼaoga? Tou fakakaukauʼi te totogi ʼae neʼe foaki mai e Sehova ke feala ai hatatou liliu ʼo maʼoniʼoni. Neʼe ina foaki ia te maʼuli ʼo tona ʼAlo ʼofaina, ia Sesu Kilisito. (1 Petelo 1:18, 19) ʼE tonu ke tou manatuʼi tuʼumaʼu ia te sakilifisio maʼuhiga ʼo Sesu ke feala hatatou nonofo maʼa kia mata ʼo Sehova.

12, 13. (1) He koʼe ʼe tonu ke tou maʼu te manatu ʼa Sehova ʼo ʼuhiga mo te ʼu fakafiafia ʼo te malama? (2) Kotea ʼae ka tou talanoa anai ki ai?

¹² Te ʼu agaʼi fenua mo te ʼu agamahani ʼae ʼe fehiʼa ki ai te ʼAtua. ʼE lagi faigaʼi e totatou famili, mo kaugā gaue, mo kaugā ako ke tou kau ki ʼanatou fakafiafia ohage la ko te ʼu ʼaho tupu peʼe ko te ʼu ʼaho lalahi. Kae ʼe feafeaʼi hatatou teteke totatou fakaneke ʼae ke tou kau ki te ʼu fakafiafia ʼae ʼe fehiʼa ki ai Sehova? ʼE ʼaoga ke tou manatuʼi te ʼu tupuʼaga ʼae ʼe fehiʼa ai Sehova ki te ʼu fakafiafia ʼaia. Tou fai he ʼu fekumi ʼi ʼatatou tohi pea mo tou manatuʼi te haʼuʼaga ʼo te ʼu fakafiafia ʼaia. Ka tou metitasio ki te ʼu tupuʼaga Fakatohi-tapu ʼo tatatou mole kau ki te ʼu fakafiafia ʼaia, ʼe tou tui papau ai ʼe tou haʼele ʼi te moʼoni ʼi hona aluʼaga ʼe “lelei ki te ʼAliki.” (Efeso 5:10) Kapau ʼe tou falala kia Sehova mo tana Folafola, ʼe mole tou tuʼania anai ki te manatu ʼa ʼihi.—Taaga Lea 29:25.

¹³ ʼE tou fakaʼamu ke tou haʼele ʼi te moʼoni ʼo talu ai. Kae kotea ʼae ʼe tonu ke tou fai ke tou fia haʼele tuʼumaʼu ʼi te moʼoni? Tou vakaʼi te ʼu faʼahi ʼe tolu ʼe ʼaoga ke tou fai.

KE TOE LAHI AGE TATATOU FIA HAʼELE ʼI TE MOʼONI

14. (1) He koʼe ko tatatou haga ako te Tohi-Tapu ʼe tokoni mai anai ke tou fia haʼele tuʼumaʼu ʼi te moʼoni? (2) He koʼe ʼe ʼaoga kia tatou ia te poto, mo te akonakiʼi, pea mo te ʼatamai?

¹⁴ ʼUluaki, tou haga ako te Tohi-Tapu pea mo tou metitasio ki te ʼu faʼahi ʼae ʼe tou ako. Tou fakatuʼutuʼu tuʼumaʼu he temi ki ai. Kapau ʼe lahi te temi ʼae ʼe tou fakaʼaogaʼi ki te ako ʼo te Tohi-Tapu, ʼe toe lahi ai anai mo tatatou ʼofa ki te moʼoni pea ʼe mole tou fia liʼaki anai te moʼoni ʼi he temi. ʼE ui mai ia Taaga Lea 23:23 ke tou “Totogi te mooni” pea ke tou toe totogi mo “te poto, mo te ako [“te akonakiʼi,” MN], pea mo te atamai.” ʼE mole gata pe ki tatatou iloʼi ia te ʼu moʼoni Fakatohi-tapu. ʼE toe ʼaoga foki ke tou maʼuliʼi. Ko te ʼatamai, ʼe tokoni mai ke tou mahino ki te pikipikiga ʼo te ʼu faʼahi ʼae ʼe tou ako mo te ʼu faʼahi ʼae kua tou iloʼi. Ko te poto ʼe ina uga tatou ke tou fakaalu tahi ia tatatou aga mo te ʼu faʼahi ʼae ʼe tou ako. Pea ʼi ʼihi temi, ʼe akonakiʼi tatou e te moʼoni he ʼe tokoni mai ke tou mahino pe kotea te ʼu fetogi ʼae ʼe tonu ke tou fai. ʼAua naʼa tuai tatatou tali ia totatou akonakiʼi ʼaia, koteʼuhi ko te ʼu folafola ʼae ʼe maʼu ʼi te Tohi-Tapu ʼe maʼuhiga age ia ʼi te siliva.—Taaga Lea 8:10, MN.

15. ʼE puipui feafeaʼi tatou e te moʼoni ohage ko he kiliʼi pipi?

¹⁵ Lua, tou haga maʼuliʼi te moʼoni ʼi te ʼaho fuli. ʼE fakatatau ʼi te Tohi-Tapu ia te moʼoni ki he kiliʼi pipi ʼa he tagata solia. (Efeso 6:14) ʼI te temi muʼa, neʼe puipui te tagata solia e tona kiliʼi pipi ʼi te tau. Kae neʼe tonu ke pipiki maʼu tona kiliʼi pipi. He ʼe kapau neʼe to tona kiliʼi pipi, neʼe mole kei ʼi ai hona ʼaoga. ʼE puipui feafeaʼi tatou e te moʼoni ohage ko he kiliʼi pipi? Kapau ʼe tou taupau maʼu ia te ʼu moʼoni Fakatohi-tapu ʼi te temi fuli pe, ʼe puipui ai anai tatou mai he ʼu faʼahiga manatu ʼe kovi pea ʼe tokoni mai anai ke tou toʼo he ʼu tonu ʼe lelei. Pea ka tou tau mo he fihifihia peʼe tou fia fai he meʼa ʼe kovi, ʼe tokoni mai anai te ʼu moʼoni Fakatohi-tapu ke tou haga fai te meʼa ʼae ʼe lelei. Ko he tagata solia ʼe tokaga tuʼumaʼu ke ina ʼai tona kiliʼi pipi moka alu ki te tau. ʼE toe feia pe mo tatou, ʼe mole tonu anai ke tou mavae mai te moʼoni ʼi he ʼaho. Pea tou tokakaga ʼo maʼuliʼi te ʼu moʼoni Fakatohi-tapu ʼi te ʼu faʼahi fuli ʼo totatou maʼuli. Neʼe tonu foki ki te tagata solia ke ina fakapipiki ia tana heleta ki tona kiliʼi pipi. Tou vakaʼi pe ʼe kotea tona fakaʼuhiga kia tatou.

16. ʼE tokoni feafeaʼi mai te akoʼi ʼo te moʼoni ki te hahaʼi ke tou haʼele tuʼumaʼu ʼi te moʼoni?

¹⁶ Tolu, tou faiga malohi ʼo akoʼi te ʼu moʼoni Fakatohi-tapu ki te hahaʼi. Ko te Tohi-Tapu ʼe fakatatau ki he heleta. Ko he tagata solia lelei ʼe ina puke maʼu tana heleta, pea ʼe toe feia pe mo tatou, ʼe tonu ke tou puke maʼu ia te Folafola ʼa te ʼAtua. (Efeso 6:17) ʼE feala ke tou liliu fuli ko he kau faiako faiva ʼo tou “fakaʼaogaʼi lelei te folafola ʼo te moʼoni.” (2 Timoteo 2:15) Ka tou fakaʼaogaʼi te Tohi-Tapu moʼo akoʼi te hahaʼi, ʼe toe lahi ai tatatou ʼatamai malama pea mo totatou ʼofa ʼae ki te moʼoni. Pea ʼe toe ʼekenaki ai tatou ke tou haʼele tuʼumaʼu ʼi te moʼoni.

17. He koʼe ʼe maʼuhiga te moʼoni kia koe?

¹⁷ Ko te moʼoni ʼe ko he meʼa ʼofa maʼuhiga mai ia Sehova. ʼE ina fakafealagia ke tou maʼu he ʼu felogoi lelei mo tatatou Tamai ʼae ʼi selo. Pea ʼe ko he faʼahi ʼe mole hona fakatatau. ʼE moʼoni, ʼe lahi te ʼu faʼahi kua akoʼi mai e Sehova, kae ʼe ko tona kamataʼaga pe ʼaia. ʼE ina fakapapau mai ʼe ina akoʼi anai tatou ʼo talu ai. Koia, ke maʼuhiga kia koe ia te moʼoni ohage pe ko te maʼuhiga ʼo he mataʼi tofe. Ke ke haga “totogi te mooni, pea aua naa ke fakatau.” Pea ohage pe ko Tavite, ʼe ke fakahoko anai te fakapapau ʼaeni neʼe ina fai kia Sehova: “ ʼE au haʼele anai ʼi tau moʼoni.”—Pesalemo 86:11, MN.