ʼE Koutou Kumi Moʼoni Koa Ia Sehova?
KO TE tagata Kilisitiano neʼe ina fia fakahā te logo lelei ʼa te Tohi-Tapu ki te hahaʼi ʼe heheka ʼi te saliote afi. (Maleko 13:10) Kae neʼe mataku ʼi te palalau. Neʼe ina tuku feiāʼi koa? Kailoa, neʼe faikole fakamalotoloto, pea mo ina teuteuʼi tana ʼu palalau. Neʼe tali e Sehova ʼAtua ki te kole ʼa te tagata ʼaia, pea mo ina foaki age ki ai ia te mālohi ke ina fakahoko tana fagonogono.
Ko te taʼi loto mālohi ʼaia ʼe maʼuhiga mokā tou kumi ia Sehova pea mo tana tapuakina. Neʼe ʼui fēnei e te ʼapositolo ko Paulo: “Ko ʼaē ʼe fakaōvi ki te ʼAtua ʼe tonu ke tui ko ia pea ʼe ko ia ʼaē ʼe ina fakapale ia nātou ʼaē ʼe nātou kumi moʼoni ia ia.” (Hepeleo 11:6, MN ) Kae ʼe mole feʼauga ʼaki pe te kumi ʼo Sehova. Ko te kupuʼi palalau faka Keleka ʼaē neʼe fakaliliu ki te “kumi moʼoni” ʼe fakapipiki kiai ia te holi mālohi pea mo he faiga fakamalotoloto. ʼE fakapipiki ai tokita loto katoa, mo tokita ʼatamai, mo tokita maʼuli, pea mo tokita mālohi gāue. Kapau ʼe tou kumi moʼoni ia Sehova, pea ʼe mole tou fakaʼaoʼaoganoa anai. Kae ʼe tou faiga fakamalotoloto anai ʼi tona kumi.—Gaue 15:17.
Ko Nātou ʼAē Neʼe Nātou Kumi Moʼoni Ia Sehova
ʼE lahi te ʼu faʼifaʼitaki ʼo nātou ʼaē neʼe nātou faiga mālohi ʼi te kumi ʼo Sehova. Ia nātou ʼaia neʼe kau ai ia Sakopo, ʼaē neʼe tautakao mo te ʼaselo ʼa te ʼAtua ʼo aʼu ki te mafoa ʼo te ʼaho. Ko te meʼa ʼaē neʼe hoko ai, neʼe fakatoʼo kia Sakopo ia te higoa ko Iselaele (Ko Ia ʼaē neʼe tau mo te ʼAtua) koteʼuhi neʼe tau, neʼe ina haga fai, peʼe tau mālohi, mo te ʼAtua. Neʼe tapuakina ia ia e te ʼaselo ʼuhi ko tana faiga mālohi.—Senesi 32:24-30.
Neʼe ʼi ai te fafine Kalilea neʼe mole fakahā tona higoa, neʼe kua taʼu 12 te maligi ʼo te toto ia ia, pea neʼe “mamahi aupito” ai. ʼI tona ʼaluʼaga ʼaia, neʼe mole tonu ke fāfā ki te hahaʼi. Kae neʼe ina tekeʼi tona mataku, ke feala hana ʼalu ʼo felāveʼi mo Sesu. Neʼe ina ʼui pe: “Kapaupe e au kapa ki ona teu, pea e au mauli anai.” Koutou fakakaukauʼi age tana faiga ʼi te lotolotoiga ʼo ‘he hahaʼi tokolahi neʼe mulimuli ia Sesu pea mo fefakaʼefihiʼaki kia te ia.’ ʼI tana fāfā ki te kofu tuʼa ʼo Sesu, neʼe ina logoʼi “nee fakamagemage atu aipe te maligaʼaga o tona toto”—kua fakamālōlō tona mahaki ʼaē neʼe kua fualoa ʼaupito tana tau mo ia! ʼI te fehuʼi e Sesu, “Ko ai ae nee kapa mai ki oku teu?” neʼe mataku ai. Kae neʼe ʼui age ki ai e Sesu ʼaki he loto manavaʼofa: “Fanau, kua fakamauli koe e tau tui, alu-la i te tokalelei, pea ke ke malolo mai tou mahaki.” Neʼe fakapale ia ia ʼuhi ko tana ʼu faiga.—Maleko 5:24-34; Levitike 15:25-27.
ʼI te tahi lakaga, neʼe kole mamahi age e te fafine Fenisia kia Sesu ke ina fakamālōlō tana taʼahine. Neʼe tali age e Sesu ʼe mole lelei ke foaki te meʼa kai ʼa te kiʼi tamaliki maʼa te ʼu kiʼi kuli. Neʼe ina fia fakahā age ʼe mole feala hana tokaga kia nātou ʼaē ʼe mole ko he kau Iselaele, kae lītuʼa ki te kau Sutea. Kae ʼi te mahino ʼa te fafine ki te faka ʼuhiga ʼo te fakatā, neʼe ina kole age fēnei: “Io, Aliki! Kae kai e te u uhiʼi kuli te u evei pane e maofa ifo mai te laupapa kai o onatou pule.” Neʼe malave kia Sesu tana tui mālohi pea mo tana fakamalotoloto, ʼo ina ʼui fēnei ai: “Oie, fafine, e lahi tau tui; ke hokosia kia te koe o hage ko te mea e ke loto ki ai.”—Mateo 15:22-28.
Koteā ʼapē te meʼa neʼe lagi feala ke hoko mo kanapaula neʼe mole haga faiga te ʼu hahaʼi ʼaia? ʼE tapuakina anai koa ia nātou mo kapau la neʼe nātou tukunoaʼi feiāʼi tanatou tau mo te ʼuluaki fihifihia ʼaia peʼe ko te faigataʼaʼia ʼaia? Kailoa ia! ʼE fakahā lelei e te ʼu faʼifaʼitaki lelei ʼaenī ia te puani ʼaē neʼe akoʼi e Sesu, ʼe lelei te “kole fakakinau” pea ʼe maʼuhiga ki te kumi ʼo Sehova.—Luka 11:5-13, MN.
ʼO Mulimuli Ki Tona Finegalo
ʼI te ʼu fakamatala ʼaē ʼe tuʼu ʼi ʼaluga ʼo ʼuhiga mo nātou ʼaē ʼe fakamālōlō faka milakulo, neʼe feʼauga pe koa ia te faiga? Kailoa, neʼe tonu ke ʼalutahi te ʼu kole ʼaia mo te finegalo ʼo te ʼAtua. Neʼe foaki kia Sesu ia te ʼu mālohi faka milakulo moʼo fakamoʼoni ʼaki ko ia neʼe ko te ʼAlo ʼo te ʼAtua, te Mesia ʼo te fakapapau. (Soane 6:14; 9:33; Gaue 2:22) Pea tahi ʼaē meʼa, neʼe fakahā fakatomuʼa e te ʼu milakulo ʼaē neʼe fakahoko e Sesu, ia te ʼu tapuakina lalahi ka maʼu anai e te hahaʼi mai ia Sehova lolotoga Te ʼAfio ʼa Sesu ia Taʼu e Afe.—Apokalipesi 21:4; 22:2.
ʼO ʼuhiga mo te fealagia ʼaē ko te fakamālōlō ʼo te ʼu mahaki peʼe ko te palalau ʼi te ʼu lea kehekehe, ʼe mole kei kau ia ki te finegalo ʼo te ʼAtua ke maʼu he ʼu mālohi faka milakulo feiā e nātou ʼaē ʼe nātou maʼuliʼi te tauhi moʼoni. (1 Kolonito 13:8, 13) Ko tona finegalo ki totatou temi, ke tala te logo lelei ʼo te Puleʼaga ʼi te kele katoa, ‘moʼo faka fealagia ki te faʼahiga tagata fuli pe ke nātou aʼu ki te ʼatamai mālama totonu ʼo te moʼoni.’ (1 Timoteo 2:4; Mateo 24:14; 28:19, 20) ʼE feala ke ʼamanaki te kau kaugana ʼa te ʼAtua ke tali leleiʼi tanatou ʼu faikole e Sehova, mo kapau ʼe nātou faiga fakamalotoloto ke ʼalutahi mo tona finegalo.
ʼE feala ke fehuʼi fēnei e ʼihi, ‘He koʼe koa ʼe tonu ke tou faiga mālohi kae ʼe fakahoko pe anai ia te fakatuʼutuʼu ʼa te ʼAtua?’ Logope ʼe moʼoni ko Sehova ʼe ina fakahoko anai tana fakatuʼutuʼu kae mole tokoni age te tagata, kae ʼe ina leleiʼia ke ʼi ai he ʼu hahaʼi ʼe nātou kau mo ia ki te fakahoko ʼo tona finegalo. ʼE feala ke fakatatau ia Sehova ki he tagata ʼe ina laga he ʼapi. ʼE ʼiloʼi lelei e te tagata tufuga ia te ʼu meʼa ʼaē ka ʼaoga moʼo laga ʼo te ʼapi, kae ʼe ina filifili pe anai te ʼu meʼa laga fale ʼaē ka ina maʼu ʼi tona kolo. ʼO feiā mo Sehova, ʼe ʼi ai tana fakatuʼutuʼu ʼe tonu ke ina fakahoko ʼi te temi nei, pea ʼe fiafia ʼi te fakaʼaogaʼi ʼo tana kau kaugana, ʼaē ʼe nātou fia foaki ia nātou totonu mo he lotolelei.—Pesalemo 110:3; 1 Kolonito 9:16, 17.
Koutou tokagaʼi age muʼa te meʼa ʼaē neʼe hoko ki te tūpulaga ko Toshio. ʼI tana hū ako ki te kolesi, neʼe fia fagonogono ʼi tana telituale makehe. Neʼe nofo tuʼumaʼu mo tana Tohi-Tapu, pea neʼe faiga fakalelei ke ina tuku he faʼifaʼitaki faka Kilisitiano. ʼI te fakaōvi ki te fakaʼosi ʼo tona ʼuluaki taʼu ako, neʼe ʼi ai te faigamālie ke ina fai hana akonaki ki te kalasi. Neʼe kumi tokoni ia Toshio kia Sehova ʼi te faikole, pea neʼe fiafia ʼi tana sio ki te kalasi katoa ʼe nātou fakalogo lelei ki tana akonaki, ko tona kupu tāfito “Ko Taku Fakatuʼutuʼu Ke ʼAu Gāue Pionie.” Neʼe ina fakamahino tana loto ʼaē ke liliu ko he minisi Fakamoʼoni ʼa Sehova ʼe gāue temi katoa. Neʼe ʼi ai tona kaugā ako neʼe ina tali ke ina ako te Tohi-Tapu mo Toshio, pea neʼe tuputupu ʼo aʼu ki te papitema. Ko te ʼu faiga fakamalotoloto ʼa Toshio ke ʼalutahi mo tana faikole neʼe ina maʼu ai te ʼu fakapale lahi.
E Feafeaʼi Takotou Faiga?
ʼE koutou lava fakahā ʼi te ʼaluʼaga kehekehe takotou kumi moʼoni ia Sehova mo tana ʼu tapuakina. ʼUluaki ʼe ʼi ai te ʼu meʼa tāfito ʼe koutou lava fai, ohage la ko te teuteuʼi fakalelei ki te ʼu fono faka Kilisitiano. ʼAki he ʼu tali neʼe lelei tona teuteuʼi, mo he ʼu akonaki ʼe nātou ʼeke ke fai he ʼu gāue, mo he ʼu faʼifaʼitaki ʼe lave ki te loto, ʼe koutou fakahā ai ia takotou kumi moʼoni ia Sehova. ʼE koutou toe lava fakahā pe foki takotou faiga ʼo koutou hikihiki tokotou minisitelio. He koʼe koa ʼe mole koutou faigaʼi ke koutou aga fakakaumeʼa mokā koutou palalau mo he tahi ʼo he loto fale, pea mo koutou fai he ʼu ʼuluaki palalau ʼe to lelei mo takotou telituale? (Kolose 3:23) ʼAki hana gāue fakamalotoloto, ʼe feala ki he tagata Kilisitiano ke ina tali te ʼu pilivilesio ʼi te kokelekasio, ohage la ke tagata faifekau faka minisitelio peʼe tagata ʼāfea. (1 Timoteo 3:1, 2, 12, 13) ʼAki takotou faka fealagia ia koutou ke fakaʼaogaʼi ia koutou ki he faʼahiga gāue, ʼe koutou lava ʼiloʼi anai ia te fiafia ʼaē ko te foaki. ʼE feala pe he fakaʼaogaʼi ʼo koutou ke koutou gāue ʼi he laga fale ʼo he filiale, peʼe koutou gāue ʼi te ʼu pilō ʼo te kau Fakamoʼoni ʼa Sehova. Kapau ko koutou ko he selipatea ʼe koutou maʼu te ʼu kalitate fakalaumālie, ʼe lagi koutou fia kau anai ki te Ako ʼaē ʼe ina teuteuʼi Ki Te Minisitelio, ʼaē ʼe ina teuteuʼi ai he kau tagata fakalaumālie ke nātou liliu ko he kau leʼoleʼo faga ōvi agalelei. Kapau kua koutou ʼohoana, ko te gāue misionea ʼe lagi ko he fealagia ʼaia ke koutou fakahā ai takotou holi mālohi ke koutou tauhi lahi kia Sehova. ʼE toe lagi feala pe foki kia koutou ke koutou fetogi nofoʼaga ʼo koutou ʼolo ki he koga meʼa ʼe ʼaoga lahi ai he kau fai faka mafola ʼo te Puleʼaga.—1 Kolonito 16:9.
Ko te meʼa ʼaē ʼe maʼuhiga tāfito, ʼe ko takotou faʼahiga fakahoko ʼo tokotou pilivilesio. Logope he faʼahiga maʼua neʼe foaki atu kia koutou, koutou fakahoko ʼaki he lotomālohi pea mo he “loto fakamalotoloto.” (Gaue 2:46; Loma 12:8, MN ) ʼE tonu ke koutou faka ʼuhiga te ʼu pilivilesio fuli ʼaē ʼe fakatoʼo atu, ko he faigamālie ʼaia ke koutou fakahā ai ʼe koutou loto moʼoni ke koutou fakavikiviki ia Sehova. Koutou faikole tuʼumaʼu ke koutou maʼu te tokoni ʼa Sehova, pea mo koutou fai te meʼa ʼaē ʼe koutou lavaʼi. Pea ʼe koutou utu ai anai he fakapale lahi.
Ko He ʼu Fakapale Ki He ʼu Faiga Mālohi
ʼE kei koutou manatuʼi koa te tagata Kilisitiano ʼaē neʼe faikole ke ina tauʼi tona mataku ke feala hana fai faka mafola ʼi te saliote afi? Neʼe tapuakina tana fakamalotoloto. Neʼe faigaʼi e te tēhina ke lelei tana ʼu ʼuluaki palalau pea mo ina teuteuʼi te ʼu puani ʼaē ka palalau kiai. Neʼe ina lava fakaʼaogaʼi fakalelei te Tohi-Tapu ki te tagata neʼe tuʼania ʼo ʼuhiga mo te ʼu felogoi fakatagata. Ko te ʼu ʼaʼahi ʼaē neʼe tau fai ki te tagata ʼaia ʼi te saliote afi neʼe iku ai ki te fai ʼo tana ako Tohi-Tapu ʼi tona ʼapi. Neʼe tapuakina moʼoni e Sehova ia tana ʼu faiga fakamalotoloto!
ʼE feala ke fua lelei feiā kia koutou, mo kapau ʼe koutou haga kumi moʼoni ia Sehova. Kapau ʼe koutou kātaki ʼaki te agavaivai pea mo koutou fai fakamalotoloto ʼi he faʼahiga gāue faka teokalatike ʼe koutou kau ai, ʼe fakaʼaogaʼi anai koutou e Sehova ʼo mulimuli ki ʼana fakatuʼutuʼu pea mo ina foaki atu anai he tapuakina lahi.
[Paki ʼo te pasina 26]
Koteā ʼapē te meʼa neʼe feala ke hoko mo kanapaula neʼe mole haga kātaki te fafine ʼaenī?
[Paki ʼo te pasina 27]
ʼE koutou kātaki anai koa ʼo kole kia Sehova ke ina tapuakina koutou?
[Paki ʼo te pasina 28]
ʼE koutou fakahā feafeaʼi ʼe koutou kumi moʼoni ia Sehova?