ʼE Lava Tokoni Te Tohi-Tapu Ki Tokotou ʼOhoana
TE ʼOHOANA—maʼa ʼihi ʼe ko he meʼa fakafiafia mokā nātou logo ki te kupu ʼaia. Kae maʼa ʼihi, ʼe tupu ai hanatou lotomamahi. ʼE meomeo fēnei te fafine: “ ʼE hage kia ʼau kua ma mavete. ʼE mole ina gaohi fakaleleiʼi ʼau pea tuʼumaʼu pe ʼe ʼau nofo tokotahi.”
He koʼe ko te taumatuʼa ʼaē neʼe nā fefakapapauʼaki ʼi te kamata ke nā feʼofani pea mo feagaleleiʼaki, kua puli ia nāua te ʼu fakatuʼutuʼu ʼaia? ʼI te ʼu faʼahi ʼaē ʼe tupu ai te faʼahi ʼaia, ʼe ʼi ai te mole teuteu ki te ʼu maʼua ʼo te ʼohoana. ʼE ʼui fēnei e te sulunale faka tōketā: “ ʼE tou ʼohoana kae heʼeki tou teuteu ki te ʼu maʼua ʼaē ʼe pipiki kiai.”
Ko te kau gāue ʼo te The National Marriage Project, te Univelesitē ʼa Rutgers ʼi New Jersey, ʼi Amelika, neʼe nātou sivisivi te potu ʼaia pea ʼe nātou fakamoʼoni ki te ʼaluʼaga ʼaia. ʼE tohi fēnei e te ʼu tagata takitaki ʼo te kau gāue ʼaia: “ ʼI tamatou sivisivi ʼaia, neʼe mātou fakatokagaʼi ko te tokolahi neʼe nātou lahilahi ake ʼi te ʼu famili ʼe faigataʼaʼia peʼe kua mavete tanatou ʼu mātuʼa. ʼE nātou ʼiloʼi lelei peʼe feafeaʼi he nofo ʼohoana ʼe kovi, kae ʼe mole nātou faʼa ʼiloʼi peʼe feafeaʼi he nofo ʼohoana fakafiafia. Ko ʼihi ʼe feala pe ke nātou ʼui ko te nofo ʼohoana lelei, ʼe ‘mole tatau mo te nofo ʼohoana ʼo taku ʼu mātuʼa.’ ”
ʼE mole kei hoko koa ki te ʼu Kilisitiano ʼaē kua ʼohoana ni ʼu fihifihia faka taumatuʼa? Kailoa. ʼI tona fakagahatonu, neʼe tonu ki ʼihi Kilisitiano ʼo te ʼuluaki sēkulō ke nātou muliʼi te tokoni ʼaē ke ‘ ʼaua naʼa nātou mavae’ mai tanatou nofo ʼohoana. (1 Kolonito 7:27) ʼE mahino ia, ko te ʼohoana ʼa he toko lua ʼe heʼe haohaoa ʼe hoko ai he ʼu fihifihia, kae ʼe ʼi ai totatou tokoniʼaga. ʼE feala ki te ʼu hahaʼi ʼohoana ke nātou hikihiki tanatou ʼu felogoi mokā nātou muliʼi te ʼu pelesepeto faka Tohi-Tapu.
ʼIo ko te Tohi-Tapu ʼe mole ko he tohi pe ʼo ʼuhiga mo te ʼohoana. Kae ko te tohi mai ia Ia ʼaē neʼe ina fakatuʼu te ʼohoana, koia ʼaē ʼe feala ai ke ʼaoga kia tatou tana ʼu pelesepeto. ʼAki te polofeta ko Isaia, neʼe ʼui fēnei e Sehova ʼAtua: “Ko ʼau, Sehova, ko ʼau tou ʼAtua, ia Ia ʼaē ʼe ina akoʼi koe ke ʼaoga kia te koe, ia Ia ʼaē ʼe ina taki koe ʼi te ala ʼaē ʼe tonu ke ke haʼele ai. Kanapaula neʼe ke tokagaʼi moʼoni taku ʼu fakatotonu. Pea ko tou tokalelei ʼe hage anai ia ko te liuʼa, pea ko tau faitotonu ʼe hage anai ko te ʼu peau ʼo te tai.”—Isaia 48:17, 18.
Kua puli koa te ʼofa ʼaē neʼe koulua maʼu ʼi te kamata? Kua hage koa kia koulua ʼe koulua pilisoni ʼi he ʼohoana ʼe mole kei ʼi ai te ʼofa? Neʼe ʼui fēnei e te fafine kua taʼu 26 tana nofo ʼohoana: “Ko te lotomamahi ʼo te ʼu taʼi felogoi ʼaia ʼe faigataʼa tona fakamatala. ʼE tou lotomamahi tuʼumaʼu pe.” ʼE mole tonu ke koutou lotovaivai ʼuhi heʼe mole koutou maʼu ʼi tokotou maʼuli faka taumatuʼa te ʼu meʼa ʼaē neʼe koutou fakaʼamu kiai, kae ʼe tonu ke koutou fai he puleʼaki kiai. Ko te alatike ka hoa mai ʼe ina fakahā anai ki te ʼu tagata ʼohoana pea mo te ʼu fafine ʼohoana peʼe lava tokoni feafeaʼi te ʼu pelesepeto faka Tohi-Tapu ki tonatou maʼuli faka taumatuʼa ʼi te potu maʼuhiga—ʼaē ko tanā fakapapau ʼi te kamata.