Neʼe Ko Ai Koa Te Famili ʼo Sesu?

ʼE LAHI te ʼu fenua ʼi te malamanei, ʼi te māhina ʼo Tesepeli, ʼe tou sio ai ki te ʼu fakatātā ʼo te kiʼi tamasiʼi ko Sesu mo tana faʼe ko Malia pea mo tana tāmai tauhi ko Sosefo. Māʼia pe la mo ni hahaʼi ʼe mole ko he kau Kilisitiano ʼe lagi nātou fia sio ki te ʼu taʼi paki ʼaia. ʼUhi ʼe ko Sesu ʼaē ʼe faka maʼuhigaʼi ʼi te ʼu paki ʼaia, koteā ʼaē ʼe ʼui mai e te Tohi-Tapu ʼo ʼuhiga mo te famili fakakelekele ʼo Sesu?

Neʼe haʼu ia Sesu mai te famili neʼe lelei ʼaupito tonatou maʼuli. Neʼe tupu ʼi te fafine taupoʼou ko Malia, ʼo liliu ko te tamasiʼi tagata ʼi te famili ʼi te kele. ʼE ʼui ʼi te Tohi-Tapu, ʼaki te laumālie maʼoniʼoni, neʼe ʼaumai tona maʼuli mai lagi ki te fatu ʼo Malia. (Luka 1:​30-​35) ʼI muʼa ʼo te fakahā ʼo te tupu faka milakulo ʼo Sesu, neʼe fakatuʼutuʼu e Malia ke ʼohoana mo te tagata ʼe higoa ko Sosefo, ʼaē neʼe liliu ko te tāmai tauhi ʼa Sesu.

ʼI te ʼosi tupu ʼo Sesu, neʼe maʼu e Sosefo mo Malia tanā tahi ʼu tamaliki, ko te ʼu tēhina mo tuagaʼane ʼo Sesu. ʼE ʼiloga te faʼahi ʼaia ʼi te fehuʼi neʼe fai ʼo ʼuhiga mo Sesu e te hahaʼi ʼo Nasaleti ki muli age: “E mole ko ia aeni e ko te foha o te tufugaʼakau? Pe e mole higoa tana fae ko Malia pea mo ona tehina, ia Sakopo mo Sosefo mo Simone pea mo Suta? Pea mo ona tuagaane, pe e mole natou fakatahi fuli mo tatou?” (Mateo 1:​25; 13:​55, 56; Maleko 6:3) ʼE tou mahino ai ko te famili ʼo Sesu, neʼe ko tana ʼu mātuʼa, mo tona ʼu tēhina e toko fā pea lagi mo tona ʼu tuagaʼane e toko lua.

Kae ko ʼihi ia ʼaho nei ʼe mole nātou tui ko te ʼu tēhina pea mo te ʼu tuagaʼane ʼo Sesu neʼe ko te ʼu tamaliki ʼa Sosefo pea mo Malia. Koteā tona tupuʼaga? ʼE ʼui fēnei e te New Catholic Encyclopedia: “Talu mai te kamata, ko te Lotu neʼe ina akoʼi ki te hahaʼi, ko Malia neʼe hoko atu aipe tana nofo taupoʼou. ʼO mahino ai ki te hahaʼi, neʼe mole ʼi ai he tahi ʼu tamaliki ʼo Malia.” ʼE ʼui pe ʼi te tohi ʼaia, ʼe feala ke faka ʼuhiga te ʼu kupu “tēhina” pea mo “tuagaʼane” ki “he ʼu hahaʼi ʼe nātou lotu tahi peʼe nātou logo tahi ʼi he tahi faʼahiga ʼaluʼaga,” peʼe ko he ʼu kāiga, lagi ko ni ʼu tēhina mo tuagaʼane mataʼi tama.

ʼE ko te moʼoni koa? Māʼiape la mo ʼihi teolosia Katolika, ʼe mole nātou lagolago ki te manatu faka talatisio ʼaia, ʼe nātou fakamoʼoni ki te ʼui ʼaē ko Sesu neʼe ʼi ai tona ʼu tēhina pea mo tona ʼu tuagaʼane totonu. Ko John P. Meier, ko te pelesita ʼāfea ʼo te Catholic Bible Association ʼo Amelika, neʼe ina tohi fēnei: “ ʼI te Tauhi Foʼou ko te kupu adelphos [tēhina], kapau ʼe mole fakaʼaogaʼi moʼo talanoa ki ni ʼu meʼa fakatātā, pea ʼe fakaʼaogaʼi moʼo talanoa ki he vāhaʼa ʼa he ʼu hahaʼi, pea ʼe fakaʼaogaʼi pe moʼo talanoa ki he ʼu tēhina totonu, kae mole faka ʼuhiga ki he tahi meʼa.”a Ei, ʼe fakahā mai e te Tohi-Tapu neʼe ʼi ai te ʼu tēhina pea mo tuagaʼane ʼo Sesu, neʼe ko te ʼu fānau totonu ʼa Sosefo pea mo Malia.

ʼE talanoa te ʼu Evaselio ki te tahi ʼu kāiga ʼo Sesu, kae tou vakaʼi age muʼa te famili totonu ʼo Sesu pea mo tou sio ai pe koteā te ako ʼe tou lava maʼu mai ia nātou.

[Kiʼi nota]