666—ʼE Mole Ko He Misitelio

“ ʼE mole feala ki he tahi ke ina totogi he meʼa peʼe ina fakatau he meʼa, gata pe kia ia ʼaē ʼe ina maʼu te fakaʼiloga, te higoa ʼo te manu fekai peʼe ko te numelo ʼo tona higoa. Koʼeni la te faʼahi ʼaē ʼe ʼaoga ai ke maʼu he poto: Ko ʼaē ʼe ina maʼu he ʼatamai ke ina lau te numelo ʼo te manu fekai, heʼe ko te numelo fakatagata; pea ko tona numelo ko te onogeau onogofulu-ma-ono.”​—Apokalipesi 13⁠:​17, 18, MN.

ʼE MOLE lahi he ʼu puani faka Tohi-Tapu, ʼe fia ʼiloʼi e te hahaʼi pea mo nātou tuʼaniaʼi ohage ko te lea faka polofeta ʼo ʼuhiga mo te fakaʼiloga peʼe ko te higoa faka misitelio ʼo “te manu fekai”: te numelo 666. ʼI te televisio mo te Internet, mo te ʼu ata, te ʼu tohi pea mo te ʼu nusipepa, neʼe lahi te ʼu manatu kehekehe neʼe fakahā ʼo ʼuhiga mo te fakaʼiloga ʼo te manu fekai.

Ko ʼihi ʼe nātou ʼui ko te numelo 666 ʼe ko he fakaʼiloga ʼo te tagata ʼaē ʼe ʼui e te Tohi-Tapu ʼe fakafeagai kia Kilisito. Ko ʼihi ʼe nātou ʼui ʼe ko he faʼahiga fakaʼiloga ʼe fakamaʼua ke fai, ohage ko he tā ʼi te kili, peʼe ko he kiʼi ukamea hila ʼe fakaulu ki te kili, ʼaki ni ʼu numelo ʼe ina fakaʼiloga kehe ia ia ʼaē ʼe tauhi ki te manu. Pea ko ʼihi ʼe nātou ʼui ko te numelo ʼaia ʼe ko he fakaʼiloga ʼa te kau tuʼi tapu. Kapau ʼe fetogi te ʼu mataʼi numelo Loma ʼaki te ʼu mataʼi tohi ʼo te higoa fakatuʼulaga ʼo te tuʼi tapu, te Vicarius Filii Dei (Vikaliatu ʼo te ʼAlo ʼo te ʼAtua), ʼo fai he ʼu kiʼi fetogi veliveli, pea ʼe nātou faʼufaʼu anai te numelo 666. ʼE toe ʼui foki, ko te numelo ʼaia ʼe lava fakaʼau ʼi te higoa faka Latina ʼo te Hau Loma ko Dioclétien pea mo te higoa faka Hepeleo ʼo Sesale Nelone.a

Ko te ʼu fakamahino ʼaia neʼe faʼu pe ia e he ʼu hahaʼi popoto, kae ʼe kehe ʼaupito mo te meʼa ʼaē ʼe ʼui e te Tohi-Tapu ʼo ʼuhiga mo te fakaʼiloga ʼo te manu, ʼaē ka tou vakaʼi ʼi te alatike ʼaē ka hoa mai. ʼE fakahā mai e te Tohi-Tapu, ko te hahaʼi ʼaē ʼe nātou maʼu te fakaʼiloga ʼaia, ʼe fakaʼauha ai anai nātou e te ʼAtua, ʼi te temi ʼaē ka ina fakaʼauha anai te tuʼu ʼaenī. (Apokalipesi 14⁠:​9-11; 19⁠:20) Koia ko tatatou mahino ki te faka ʼuhiga ʼo te numelo 666, ʼe mole gata ʼaki pe hatatou mahino ki he meʼa ʼe mahino gataʼa. Kae ko Sehova ʼAtua, te faʼifaʼitaki lahi ʼo te ʼofa pea mo te Matapuna ʼo te mālama fakalaumālie, ʼe ina loto ke mahino tana ʼu kaugana ki te faʼahi maʼuhiga ʼaia.​—2 Timoteo 3⁠:16; 1 Soane 1⁠:5; 4⁠:⁠8.

[Kiʼi nota]