Ko Te Mole Kau Ki Te Malamanei ʼe Ina Tāʼofi Koa Te Kau Kilisitiano Ke Nātou ʼOʼofa?

KO HE tahi ʼe ina ʼui ko he Kilisitiano ʼe mole gata pe ki tana lau ia te Tohi-Tapu, mo tana faikole, pea mo tana hiva ʼi te ʼu ʼAhotapu. ʼE ʼi ai te ʼu gāue ʼe tonu ke ina fai maʼa te ʼAtua pea mo te hahaʼi. ʼE ʼui fēnei e te Tohi-Tapu: “Aua naa tou ofa aki te lea mo te alelo, kae i te u gaue mo te mooni.” (1 Soane 3:18) Neʼe tokaga moʼoni ia Sesu ki te hahaʼi, pea ʼe fia mulimuli te kau Kilisitiano ki tana faʼifaʼitaki. Neʼe uga fēnei e te ʼapositolo ko Paulo te hahaʼi tui ‘ke lahi tuʼumaʼu tanatou ʼu gāue ʼi te ʼAliki.’ (1 Kolonito 15:58) Kae koteā te gāue ʼi te ʼAliki? ʼE kau ai koa te faiga ʼaē ke fetogi te ʼu fakatuʼutuʼu ʼa te puleʼaga ke fua lelei ki te kau masiva pea mo nātou ʼe gaohi koviʼi? Neʼe ko te meʼa koa ʼaia neʼe fai e Sesu?

Logola neʼe uga ia Sesu ke kau ki te ʼu meʼa faka politike, kae neʼe mole fia lagolago kiai. Neʼe fakafisi ki te foaki age e Satana kia ia te pule ki te ʼu puleʼaga fuli pe ʼo te malamanei, neʼe mole ina fia fakafihiʼi te totogi ʼo te tukuhau, pea neʼe hola ʼi te temi ʼaē neʼe fia fakanofo hau ai ia ia e te hahaʼi. (Mateo 4:8-10; 22:17-21; Soane 6:15) Logola tana mole kau ki te ʼu meʼa faka politike kae neʼe ina fai te ʼu gāue lelei maʼa te hahaʼi.

Neʼe tokaga tāfito ia Sesu ki te faʼahi ʼaē ka ina foaki anai ki te hahaʼi he ʼu lelei heʼegata. Logola neʼe ina fafaga te toko nima afe hahaʼi pea mo fakamālōlō te kau mahahaki, ʼo foaki he fakafimālie faka temi ki ʼihi, kae ko tana faiakonaki neʼe ina foaki he ʼu tapuakina heʼegata ki te malamanei katoa. Neʼe ʼiloa ia Sesu, ʼe ko “te Tagata Faiakonaki,” kae neʼe mole ʼiloa ko he tagata fai politike. (Mateo 26:18; Maleko 5:35; Soane 11:28, MN ) Neʼe ina ʼui fēnei: “Ko te mea aeni, nee au tupu mai ai pea nee au haele mai ai ki te malama-nei, ke au fakamooni ki te mooni.”—Soane 18:37.

Tou Faka Mafola Te Manatu ʼe Lelei Age ʼi Te ʼu Manatu Faka Politike

Ko te moʼoni ʼaē neʼe akoʼi e Sesu neʼe mole ko he manatu faka politike. Kae neʼe fakatafito ki te Puleʼaga pea ʼe ko ia totonu te Hau. (Luka 4:43) Ko te Puleʼaga ʼaia ʼe ko he puleʼaga ʼe tuʼu ʼi selo, pea ʼe ina fetogi anai te ʼu kautahi fakatagata fuli pea mo fakatuʼu he tokalelei heʼegata ʼi te malamanei. (Isaia 9:6, 7; 11:9; Taniela 2:44) Ko te ʼamanaki moʼoni pe ʼaia e tahi ʼe ʼaoga ki te malamanei. ʼE tou fakahā ai totatou ʼofa lahi ki te hahaʼi mokā tou tala te ʼamanaki moʼoni ʼaia ki te ka haʼu, kae mole tou fakaloto mālohi te hahaʼi ke nātou falala ki te tagata ke ina foaki he ka hau fīmālie. ʼE ʼui fēnei e te Tohi-Tapu: “ ʼAua naʼa ke falala ki te kau ʼaliki, peʼe ki te foha ʼo te tagata kelekele, ʼaē ʼe mole ʼa ia te fakamaʼuli. Ko tona laumālie ʼe mavae, pea ʼe toe liliu ia ki te kele; ʼi te ʼaho pe ʼaia ʼe puli ai tana ʼu fakakaukau. Manuʼia ia ia ʼaē ko tona hāofaki ko te ʼAtua ʼo Sakopo, pea ko tona falalaʼaga ko Sehova, tona ʼAtua.” (Pesalemo 146:3-5) Neʼe mole fekauʼi e Sesu tana ʼu tisipulo ke nātou faka mafola he ʼu fetogi lelei ʼe feala ke fakahoko e te ʼu puleʼaga, kae neʼe ina akoʼi nātou ke nātou faka mafola te “Logolelei . . . o te Puleaga.”—Mateo 10:6, 7; 24:14.

Ko te ‘gāue ʼaia ʼa te ʼAliki’ ʼaē neʼe fakatotonu ke fai e te kau fai faka mafola Kilisitiano. Mai tona ʼaluʼaga ʼaē ʼe fakamaʼua kia nātou ʼaē ʼe fakalogo ki te Puleʼaga ʼo te ʼAtua ke nātou feʼofaniʼaki, koia ʼe fua lelei anai te gāue ʼo te Puleʼaga moʼo pulihi te masiva ʼo ina foaki fakatatau ki te hahaʼi. (Pesalemo 72:8, 12, 13) ʼE ko he logo lelei ʼaia pea ʼe tau mo feʼauga ke tou faka mafola te faʼahi ʼaia.

Ia ʼaho nei, kua fakahoko e te kau Fakamoʼoni ʼa Sehova te ‘gāue ʼaia ʼa te ʼAliki’ ia fenua e 235. ʼO mulimuli ki te fakatotonu ʼa Sesu, ʼe nātou fakaʼapaʼapa ki te ʼu puleʼaga fuli. (Mateo 22:21) Kae ʼe nātou toe mulimuli ki te ʼu palalau ʼaenī neʼe ina fai ki tana ʼu tisipulo: “ ʼE mole koutou kau ʼi te malamanei, ka neʼe ʼau filifili koutou mai te lotolotoiga ʼo te malamanei.”—Soane 15:19, MN.

Ko ʼihi ʼaē neʼe lagolago ki te ʼu faʼahi faka politike neʼe nātou fai te ʼu fetogi ʼi tanatou ako fakalelei te Tohi-Tapu. Ko te tagata fai politike italia neʼe kau ki te Gāue Katolika, ko te kautahi neʼe ina sivisivi te ʼēkelesia, pea neʼe ina ʼui fēnei: “Neʼe ʼau fai politike, ʼi taku manatu ʼaē ʼe tonu ki he tahi ke lagolago ki te hikihiki ʼo te sosiete ʼi te faʼahi faka politike pea mo faka sosiale.” ʼI tana mavae ʼi tona tuʼulaga pule ʼo te kolo taulaga ke feala hana faka mafola te Puleʼaga ʼo te ʼAtua ʼi tona ʼuhiga Fakamoʼoni ʼa Sehova, neʼe ina fakamahino pe koʼe neʼe mole hoko te ʼu faiga moʼoni ʼa te hahaʼi ʼi te politike. “Ko te ʼaluʼaga ʼo te malamanei, ʼe mole feiā ʼuhi ko te mole faiga fakamalotoloto ʼa te hahaʼi faitotonu ke hoko he ʼu fetogi lelei, kae ʼe tupu heʼe ko te agakovi lahi ʼa te tokolahi ʼe ina taʼomia te ʼu faiga fakamalotoloto ʼaē ʼe fai e te tokosiʼi.”

ʼE mole kau te kau Kilisitiano moʼoni ki te ʼu meʼa faka politike moʼo faka mafola te ʼamanaki moʼoni pe e tahi maʼa te malamanei, kae ʼe nātou fai he ʼu fakatuʼutuʼu ʼaoga moʼo tokoni ki te hahaʼi. Ko te hahaʼi ʼaē ʼe nātou akoʼi ke nātou liliu ko he ʼu hahaʼi fakalogo ʼo te Puleʼaga ʼo te ʼAtua, ʼe nātou fetogi tanatou agamālohi, mo nātou fakaʼapaʼapa ki te pule, mo hikihiki tonatou maʼuli faka famili, pea mo nātou manatu fakapotopoto ʼo ʼuhiga mo te ʼu koloā. Ko te meʼa ʼaē ʼe maʼuhiga tāfito, ʼe tokoni te kau Fakamoʼoni ʼa Sehova ke nātou maʼu he ʼu felogoi lelei mo te ʼAtua.

Ko te kau fai faka mafola ʼo te Puleʼaga ʼo te ʼAtua ʼe nātou fai he ʼu meʼa lelei ʼi te ʼu kolo ʼaē ʼe nātou nonofo ai. Kae ko te meʼa ʼaē ʼe maʼuhiga tāfito, ʼe nātou taki te hahaʼi ke nātou falala ki te puleʼaga ʼaē ʼe moʼoni ʼaē ka ina foaki anai he tokalelei heʼegata kia nātou fuli ʼaē ʼe ʼoʼofa ki te ʼAtua. Koia ʼi tanatou mole kau ki te politike, ʼe feala ai ki te kau Kilisitiano ʼaia ke nātou foaki te tokoni ʼaē ʼe tologa pea mo ʼaoga ʼi te temi nei.

[Talanoa ʼo te pasina 7]

Mole Kei Lagolago Ki Te Politike Kae ʼe Ina Faka Mafola Te Puleʼaga ʼo Te ʼAtua

Ko Átila, ko te tama ʼe nofo ʼi Pelesile, neʼe akoʼi age kia ia te manatu ki te ʼāteaina e tana kau patele ʼi Belém. Neʼe ina leleiʼia te fakalogo ki te ʼu palalau ʼo ʼuhiga mo te faka ʼāteaina ʼo te malamanei mai te aga fefeka. Neʼe toe kau ki te kautahi, neʼe ina akoʼi age kia ia ke ina fakatuʼutuʼu he ʼu hahaʼi ke nātou ʼolo ʼo haʼele ʼi te ala pea mo fai he ʼu gāue ʼe fakafeagai ki te puleʼaga.

Kae neʼe toe leleiʼia e Átila tana akoʼi te ʼu fānau, ʼo ina fakaʼaogaʼi te tohi neʼe foaki age, Écoutez le grand Enseignant.a Neʼe talanoa ʼo ʼuhiga mo te agalelei pea mo te fakalogo ki te ʼu puleʼaga. Neʼe feʼekeʼaki ai e Átila pe koʼe ko nātou ʼaē ʼe lagolago ki te manatu ki te faka ʼāteaina ʼe mole nātou mulimuli ki te ʼu pelesepeto māʼoluga ʼa Sesu pea he koʼe ʼe galoʼi te hahaʼi māsisiva mokā maʼu tuʼulaga ʼihi. Neʼe mole kei kau ki te ʼu gāue ʼo te kautahi. Ki muli age, neʼe ʼōmai te ʼu Fakamoʼoni ʼa Sehova ki tona ʼapi pea neʼe fai palalau mo ia ʼo ʼuhiga mo te Puleʼaga ʼo te ʼAtua. Mole tuai, pea neʼe ina ako te Tohi-Tapu pea mo ina ʼiloʼi ai te puleʼaki moʼoni moʼo fakagata te maʼuli masiva ʼo te malamanei.

ʼI te temi ʼaia, neʼe kau ia Átila ki te seminalio Katolika ʼo ʼuhiga mo te tui pea mo te politike. Neʼe ʼui fēnei e te tagata faiako: “Ko te ʼu faʼahi ʼaia e lua ʼe nā tatau.” Neʼe kau leva ki te fono ʼi te Fale ʼo te Puleʼaga, pea neʼe sio ai ki te kehekehe ʼaupito! Ohage la, neʼe mole he tahi neʼe suluka, peʼe ʼinu kava, peʼe ina fai he ʼu fakahuahua heʼeʼaoga. Neʼe ina fakatotonu ai ke kau mo te kau Fakamoʼoni ʼa Sehova ki tanatou gāue fai faka mafola, mole fualoa pea neʼe papitema. ʼI te temi ʼaenī kua mahino kia ia ko te puleʼaki moʼoni ki te ʼu fihifihia ʼo te kau māsisiva, neʼe mole ko te manatu ʼaē ki te ʼāteaina.

[Kiʼi nota]

[Paki ʼo te pasina 6]

Logola te mole fai politike ʼa te kau Kilisitiano, kae ʼe nātou tokoni ki te hahaʼi