Te Faiga ʼa Te Malamanei Ke Ina Fakafiafia Te ʼAtua

NEʼE ʼui e John Bowker ʼi tana tohi God—A Brief History: “ ʼI te temi fuli ʼo te maʼuli ʼo te tagata neʼe maʼuhiga te ʼAtua kia ia, ʼi te agamāhani ʼe nātou faka tui ʼe ina puleʼi te ʼatulaulau pea ko ia ʼaē neʼe ina fakatupu ia meʼa fuli. Pea ʼe toe feiā pe mo te ʼu fenua ʼaē ʼe mole felogoi ai te politike pea mo te lotu.” Logola te ʼu ʼaluʼaga kehekehe, kae ko te fia maʼu ʼo te ʼAtua pea mo tona ʼofa ʼe ko he meʼa ia ʼe loto kiai te tagata fuli. ʼI te malamanei katoa, tokolahi ʼe nātou faiga fakamalotoloto ke nātou fakafiafia te ʼAtua. ʼE moʼoni, ʼe kehekehe tanatou faʼahiga fakahoko te faʼahi ʼaia heʼe nātou lotu kehekehe.

ʼI te manatu ʼa ʼihi ko te meʼa pe e tahi ʼaē ʼe lelei moʼo maʼu te ʼofa ʼo te ʼAtua, ʼe tonu ke lelei tonatou maʼuli. Ki ʼihi ʼe tonu ke nātou fai he ʼu gāue moʼo foaki he ʼu meʼa ʼofa maʼa te hahaʼi māsisiva. Tahi ʼaē meʼa, ʼe maʼuhiga ki te ʼu lauʼi miliona hahaʼi te ʼu toʼotoʼoga pea mo te ʼu gāue faka lotu.

ʼI te tahi faʼahi, ko ʼihi ʼe nātou ʼui ʼe faigataʼa fau te fakaōvi ki te ʼAtua—ʼe mamaʼo fau peʼe maʼumaʼua fau ki tana tahi ʼu gāue ʼo mole maʼu ai hona temi moʼo tokaga ki te hahaʼi. Neʼe ʼui ʼi te tahi ʼaho e Épicure te tagata filosofia ʼo te Keleka ʼāfea ‘ ʼe mamaʼo fau te ʼu ʼatua moʼo tokaga ki te ʼu meʼa ʼaē ʼe fai e te hahaʼi.’ Kae ʼe lahi te ʼu manatu ʼe ko te ʼu manatu faka lotu. ʼE lagi ko ʼihi ʼe nātou fai te ʼu sakilifisio pea mo te ʼu toʼotoʼoga moʼo fakafimālieʼi tanatou ʼu kui ʼaē kua mamate.

Koteā takotou manatu? ʼE tokaga moʼoni koa te ʼAtua ki tatatou ʼu faiga ʼaē ke tou maʼu tona ʼofa? ʼE tou lava fai koa he ʼu meʼa ke malave ki te loto ʼo te ʼAtua pea mo fakafiafia ia ia?