Ko Ai ʼAē ʼe Tau Mo Te ʼOfa ʼa Te ʼAtua?

KO TATOU fuli ʼe tou loto ke ʼofaina tatou ʼe ʼotatou ʼu kaumeʼa. Ki he kilisitiano ʼe ina holi mālohi ke ina maʼu te ʼofa ʼa te ʼAtua. ʼO ʼuhiga mo Sehova ʼAtua, ʼe fēnei te ʼui ia Pesalemo 84:11: “Ko te ʼofa pea mo te kolōlia ʼaē ʼe ina foaki. Ko Sehova ʼe mole ina fakafisi anai he meʼa lelei kia nātou ʼaē ʼe haʼele fakahagatonu.” ʼI te tupu ʼa Sesu, ko te kau ʼaselo ʼi selo neʼe nātou kalaga fakafiafia te fakapapau ʼaenī: “Fīmālie ʼi te kele ki te ʼu tagata ʼe ʼofa ki ai!” — Luka 2:14, Osty.

Kae, ko ai ʼe tau mo te ʼofa ʼo te ʼAtua? Ko te meʼa ʼaē ʼe faka maʼuhiga e te ʼAtua ʼe tatau koa mo ʼaē ʼa te tagata? ʼE mahino ia, ʼe mole tatau mo te ʼu meʼa neʼe fakamatala ʼi te ʼuluaki alatike. ʼUhi ʼe tokoniʼi te kau kilisitiano ke nātou ‘liliu ko he kau faʼifaʼitaki ʼa te ʼAtua’, ʼe tonu ke tou fakakaukau takitokotahi peʼe ʼe ʼau ʼofa koa ia nātou ʼaē ʼe ʼofa ki ai te ʼAtua peʼe ʼe ʼau tautau mulimuli ki te ʼu meʼa ʼaē ʼe faka maʼuhiga e te hahaʼi ʼo te mālama ʼo ʼuhiga mo te sivi ʼo he tahi? (Efesi 5:1.) Moʼo maʼu te agalelei ʼa te ʼAtua pea mo tona ʼofa, ʼe tonu ke tou tokakaga ʼo vakaʼi te ʼu meʼa ʼaē ʼe tau mo tana faʼahiga sio.

Ko te ʼu meʼa ʼe faka maʼuhiga e te ʼAtua ʼe nātou maʼaluga

ʼE fēnei te ʼui ʼa te ʼapositolo ko Petelo: “Ko te ʼAtua ʼe mole fakapalatahi, ʼi te fenua fuli pe ko te tagata ʼaē ʼe manavasiʼi kia te ia pea mo maʼuli ʼi te faitotonu ʼe ina leleiʼia.” Ki muli age ko te ʼapositolo ko Paulo neʼe ina fakamoʼoni ko te ʼAtua “ ʼaki te tagata pe e tahi, neʼe ina fai te tagata fuli pe ʼo te ʼu puleʼaga”. (Gāue 10:34, 35; 17:26.) Ko ia ʼe feala ai hatatou ʼui, ko te tagata fuli pe ʼe nātou tatau ia mata ʼo te ʼAtua, logope te kehekehe ʼo tonatou ʼuhiga fakasino. Uhi ko te ʼu faʼahi ʼaia, ʼe mole tau anai mo he kilisitiano hana ʼofa ki he tahi ʼuhi pe ko tana haʼu mai he tahi koga meʼa age peʼe ko te lanu ʼo tona kili peʼe ko tana haʼu ia mai he fenua kehe. Kailoa ia, ʼe mulimuli lelei anai kia ia ʼaē neʼe ina tuku te Faʼifaʼitaki, ia Sesu Kilisito, ʼaē māʼia pe la mo nātou ʼaē neʼe fakafeagai kia ia neʼe nātou fakamoʼoni ko Sesu neʼe mole fakapalatahi. — Mateo 22:16.

Ko te kupuʼi palalau ʼaē ko te “superficiel” neʼe faka ʼuhiga ʼi te lakaga ʼaē ki he meʼa ʼe mole maʼuhiga. Pea ko te lanu ʼo te kili ko he meʼa ia ʼe mole faka maʼuhiga. Ko te lanu ʼo te kili ʼo he tahi ʼe mole ko he meʼa ia ʼe fakahāʼaki ai leva tona ʼu kalitate. Ka ʼe hoko te temi ʼaē ʼe tou fili he ʼu hahaʼi ke fakatahi mo tatou, peʼe ki te kai, peʼe ki te ʼalofa, ʼe tou tokaga anai ʼo mole sioʼi pe te lanu ʼo te kili. Koutou manatuʼi, te taʼahine ʼaē neʼe tupu ai te fai ʼo te ʼu palalau fakatuketuke ʼaē neʼe ina ʼui fēnei ʼo ʼuhiga pe mo ia totonu: “ ʼE ʼau kili ʼuli, kae ʼe ʼau finemui, (...) ʼe ʼau lanu vaelua ʼuhi ko te laʼā neʼe ina tokagaʼi ʼau.” (Katiko ʼo te ʼu katiko 1:5, 6). ʼE mole ko te lanu ʼo te kili ʼaē ʼe faka ʼuhiga tāfito ki te fakahā ʼo te ʼofa. Ko te ʼu meʼa ʼaē ʼe maʼuhiga ʼe ko he tahi ʼe manavasiʼi ki te ʼAtua pea mo fai te ʼu gāue agatonu.

Koteā te manatu ʼa te ʼAtua ʼo ʼuhiga mo te maʼu koloā? ʼI te ʼu hahaʼi fuli ʼaē ʼe fakahā ki ai te agalelei pea mo te ʼofa e te ʼAtua, ko tona ʼAlo ʼe takimuʼa ia meʼa fuli. ʼI tana nofo ʼi te kele, ko Sesu neʼe ‘mole he potu moʼo ʼuluga ai tona ʼulu’. (Mateo 8:20.) Neʼe mole ʼi ai hona kele, pea mo hona ʼapi, pea mo hona ʼu gāueʼaga, pea mo he ʼu fuʼu ʼakau fua pea mo he ʼu manu. Pea, ko Sehova neʼe ina fakapale ia ia ʼo ina fakanofo ki te tuʼulaga ʼe mole he tahi ʼi te ʼatulaulau ʼe māʼoluga age ia ia gata pe ki te ʼAtua. — Filipe 2:9.

Ko Sesu Kilisito neʼe ina maʼu te ʼofa ʼa te ʼAtua koteʼuhi neʼe koloaʼia, mole ʼi te faʼahi fakasino kae ʼi te ʼu gāue matamatalelei (Vakaʼi ia 1 Timoteo 6:17, 18). Neʼe fēnei tana tokoniʼi tana kau tisipulo: “Tuku takotou tānaki maʼa koutou he ʼu koloā ʼi te kele, ʼaia ʼe kaina ai e te ane pea mo te ukaukamea, pea ʼe puhi ai e te kau kaihaʼa ke kaihaʼasia ia. Kae ke koutou tānaki maʼa koutou he ʼu koloā ʼi selo, ʼaia ʼe mole kaina ai e te ane pea mo te ukaukamea, pea ʼe mole puhi ai pea mo kaihaʼasia ai e te kau kaihaʼa.” (Mateo 6:19, 20). Koia, ko te kau kilisitiano ʼe mole nātou fili nātou ʼaē ʼe maʼu koloā pea ʼe mole nātou fai anai he ʼu fakakehekehe ʼuhi ko te ʼu meʼa ʼo te mālama. ʼE nātou kumi ia nātou ʼaē koloaʼia ia muʼa ʼo te ʼAtua, peʼe nātou koloaʼia peʼe nātou masisiva ʼi te faʼahi fakasino. Ke ʼaua naʼa galo ia koutou ‘ko te ʼAtua neʼe ina fili ia nātou ʼaē ʼe masisiva ʼi te mālama ke nātou liliu ʼo koloaʼia ʼi te tui pea ke nātou maʼu te tōfiga ʼo te puleʼaga’. (Sake 2:5.) Kapau ʼe koutou taupau maʼu te manatu ʼa te ʼAtua, ʼe mole koutou to anai ki te tuʼutāmaki ʼo te malamanei ʼaē ko te ʼoʼofa pe ki te hahaʼi maʼu koloā.

ʼO ʼuhiga mo tatatou ako, ʼe fakahā fakalelei mai e te Tohi-Tapu ko te ʼAtua ʼe ina uga tatou ke tou kumi te mālama (ʼo te Tohi-Tapu) pea mo te poto, pea ʼe ina toe fakahā mai foki ko Sesu Kilisito neʼe ko te tagata faiako lahi tokotahi neʼe maʼuli ʼi te kele (Tāʼaga Lea 4:7; Mateo 7:29; Soane 7:46). Kae mole ko te poto fakamālama peʼe ko te ako fakamālama ʼaē ʼe fealagia ai te maʼu ʼo te ʼofa ʼa te ʼAtua. Kailoa ia, ʼe ʼui mai e Paulo “ ʼe mole lahi he kau popoto ʼi te kakano neʼe pāuʼi, (...) kae ko te ʼAtua neʼe ina filifili te ʼu meʼa ʼaē ʼe vale ʼo te malamanei moʼo fakaufiufi ki te ʼu tagata popoto”. — 1 Kolonito 1:26, 27.

Ko te ʼAtua ʼe ʼofa kia nātou ʼaē ʼe lelei tanatou ako, mole ʼi te ʼu faleako lalahi ʼo te malamanei, kae ʼi te “lea maʼa” ʼaē ʼe maʼu ʼi tana Folafola, ko te Tohi-Tapu (Sofonia 3:9). Ko Sehova ʼe ina lolotoga ako nei tana hahaʼi ʼaki te polokalama ako ʼe hoko ʼi te ʼu potu fuli ʼo aʼu ki te potu mamaʼo ʼo te kele. Ohage ko tona fakakikite e te polofeta ko Isaia, ʼe fēnei te tali ʼa te hahaʼi mai te fenua fuli pe: “Koutou ʼomai pea ke tou hake ki te moʼuga ʼo Sehova, ki te fale ʼo te ʼAtua ʼo Sakopo; pea ʼe ina akonakiʼi anai tatou ki tona ʼu ala, pea ʼe tou haʼele anai ʼi tona ʼu ala foufou.” Koia, ko te kau kilisitiano ʼe mole nātou faka kolōliaʼi anai te ako ʼo te mālama ʼaenī, kae ʼe nātou kumi anai ia nātou ʼaē ʼe nātou fakamoʼoni ʼaki tanatou ʼu palalau pea mo tanatou ʼu aga ko nātou “ko te ʼu hahaʼi neʼe akoʼi e Sehova”. ʼI hanatou fai feiā, ʼe nātou fakafiafia anai ki te “mahu ʼo te fīmālie” ʼe foaki age e te ʼAtua — Isaia 2:3; 54:13.

ʼE feala hatatou maʼu te ʼofa ʼa te ʼAtua

Ei, ko te ʼu meʼa ʼe faka maʼuhiga e te ʼAtua moʼo vakaʼi ʼo he tahi ʼe kehekehe ia mo te ʼu meʼa ʼe faka maʼuhiga e te tagata. Koia, ʼe tonu ke tou mulimuli ʼi tana ʼu ala mo kapau ʼe tou fia maʼu te ʼofa ʼa te ʼAtua. Ko tona faka ʼuhiga ʼe tonu ke tou popoto ʼi te sioʼi te hahaʼi ohage ko te sio ʼa te ʼAtua, kae ʼo mole ohage ko te ʼu meʼa ʼe faka maʼuhiga e te tagata, ʼaē ʼe taki e te tahi manatu pe kia kita pea mo te heʼehaohaoa. ʼE feafeaʼi anai hatatou fakahoko ʼo te faʼahi ʼaia?

Ko Sehova ʼAtua ʼe ina sioʼi te loto ʼo te tagata pea ʼe ʼofa ia nātou ʼaē ʼe nātou maʼu te ʼu kalitate ohage ko te ʼofa, pea mo te agaʼofa pea mo te manavaʼofa pea mo te loto ʼutaki. ʼE tonu ke tou feiā (1 Samuele 16:7; Kalate 5:22, 23). ʼE ʼaoga ke tou sioʼi te meʼa ʼaē ʼi te loto, ʼi te fakafuafua ʼa te tagata, kae mole tou sioʼi te lanu ʼo te kili peʼe ko tona haʼuʼaga. ʼI hatatou mole faiga ke tou kumi ia nātou ʼaē ʼe koloaʼia ʼi te faʼahi fakasino, ʼe tou fakakaukauʼi anai te faʼahiga manatu ʼa te ʼAtua ʼo ʼuhiga mo nātou ʼaē ʼe koloaʼia ʼi te faʼahi fakasino, pea mo tou faigaʼi anai ke “tou koloaʼia ʼi te ʼu gāue matamatalelei, ke tou loto foaki, pea ke tou haga vaevae”. (1 Timoteo 6:18.) Moʼo maʼu te ʼofa ʼa te ʼAtua, ʼe tonu ke tou haga kumi te mālama totonu ʼo ʼuhiga mo te ʼAtua pea mo tona ʼAlo, ia Sesu Kilisito, pea ke lelei tatatou ako ʼi te lea maʼa ʼo te moʼoni (Soane 17:3, 17). ʼI hatatou fai feiā, ʼe tou kau anai ia nātou ʼaē ʼe tau mo te ʼofa ʼa te ʼAtua.