Te ʼu Fehuʼi ʼa Te Kau Lautohi

He koʼe neʼe fakagafua e Tavite, ko he kaugana agatonu ʼa Sehova, ke nofo tona ʼohoana mo he fakatātā, ohage ko tana fakamatala ia 1 Samuele 19:12, 13?

ʼUluaki, tou lau muʼa te ʼu vaega ki muʼa atu. ʼI te temi ʼaē neʼe logo ai e te ʼohoana ʼo Tavite te fonofono ʼa te hau ko Saulo ke ina matehi tona ʼohoana, neʼe ina foimo fai atu aipe te fakatuʼutuʼu. ʼE ʼui fēnei e te Tohi-Tapu: “Neʼe fakahifo atu aipe e Mikale ia Tavite ʼi te matapā fakamālama ke feala hana ʼalu, pea ke hola moʼo hāofaki ia ia. Pea neʼe toʼo e Mikale ia te telafime [ʼaē neʼe lagi lahi ohage ko he tagata pea neʼe paki ki te tagata] pea neʼe ina fakatakoto ʼi te palepale, pea neʼe ina ʼai te kie fuluʼi tao ki te ʼuluga, pea ina fakakafuʼi.” ʼI te temi ʼaē neʼe ʼōmai ai te hahaʼi faifekau ʼa Saulo ʼo puke ia Tavite, neʼe ʼui fēnei age e Mikale kia nātou: “ ʼE mahaki.” Ko te puleʼaki ʼaia neʼe lelei, pea neʼe lava hola ai ia Tavite.​—1 Samuele 19:11-​16.

ʼE fakahā e te ʼu fekumi alekeolosia ʼi te temi ʼāfea, ko te ʼu telafime neʼe mole fakaʼaogaʼi pe ki he ʼu toʼotoʼoga faka lotu, kae neʼe toe fakaʼaogaʼi foki ki he ʼu ʼaluʼaga ʼe pipiki ki te lao. Ko te ʼu pepa moʼo fakamoʼoni ki he maʼu koloā pea mo te ʼu pepa ʼaē ʼe nātou fakamoʼoni ki he maʼu tofiʼa ʼe nātou faka fealagia ki he tahi ʼi te temi nei ke ina maʼu hona tofiʼa, ʼo toe feiā pe mo te ʼu telafime neʼe ko tona ʼaoga ʼaia ʼi te ʼu temi ʼāfea. ʼE ʼiloga mai ia, ka nofo he tama ʼohoana mo he ʼu telafime, pea neʼe feala kia ia ke ina fakaʼui ke ʼavage te tofiʼa ʼo te tāmai ʼo tona ʼohoana. ʼE lagi ko te tupuʼaga la ʼaia ʼo te toʼo e Lasele ia te ʼu telafime ʼo tana tāmai ko Lapane, pea mo te hoha feiā ʼa Lapane ke ina maʼu. ʼO ʼuhiga mo te ʼaluʼaga ʼaia, neʼe mole ʼiloʼi e Sakopo, te ʼohoana ʼo Lasele, ia te meʼa ʼaē neʼe fai e tona ʼohoana.​—Senesi 31:14-​34.

ʼI te temi ʼaē neʼe liliu ai leva te kau Iselaele ko te puleʼaga, neʼe fakatoʼo age kia nātou ia te ʼu Folafola e hogofulu, pea neʼe tapuʼi tāfito e tona lua Folafola te faʼu ʼo he ʼu fakatātā. (Ekesote 20:​4, 5) Ki muli age, neʼe talanoa ia te polofeta ko Samuele ki te lao ʼaia ʼi tana palalau ki te Hau ko Saulo. Neʼe ina ʼui fēnei age ki ai: “Ko te loto fia agatuʼu ʼe hage ia ko te agahala ʼo te tivinasio, pea ko te fiameʼalahi, ʼe hage ia ko he fakaʼaogaʼi ʼo te mālohi fakamanamana pea mo te ʼu telafime.” (1 Samuele 15:23) ʼUhi ko te faʼahi ʼaia, neʼe mole feala ia ke fakaʼaogaʼi te ʼu telafime moʼo maʼu ʼo he tofiʼa ʼi Iselaele. Kae ʼe ʼiloga ia ko te aga fakamanamana ʼaia ʼa te kau Sutea neʼe kei fai pe ʼi ʼihi loto fale ʼo te kau Iselaele. (Kau Fakamāu 17:​5, 6; 2 Hau 23:24) ʼE ʼiloga mai ia ʼi te taupau e Mikale ia te telafime, neʼe mole heʼeki katoa tona loto kia Sehova. Neʼe lagi mole ʼiloʼi e Tavite ia te ʼu telafime, peʼe neʼe ina fakagafua koteʼuhi ko Mikale neʼe ko te ʼofafine ʼo te Hau ko Saulo.

ʼE ʼiloga te pipiki katoa ʼa Tavite kia Sehova ʼi te ʼu palalau ʼaenī neʼe ina fai: “Koteʼuhi ko Sehova ʼe lahi pea ʼe tonu ke fakavikiviki lahi kia te ia, pea ʼe tonu ke laka age tatatou manavasiʼi kia te ia ʼi te ʼu ʼatua fuli. Koteʼuhi ko te ʼu ʼatua fuli ʼo te hahaʼi ʼe ko te ʼu ʼatua noa. Kae ko Sehova neʼe ina fakatupu te lagi.”​—1 Fakamatala 16:25, 26.

[Paki ʼo te pasina 29]

Te lua Folafola ʼo te ʼu Folafola e Hogofulu neʼe ina tapuʼi te ʼu fakatātā, ohage ko te telafime ʼaenī

[Haʼuʼaga ʼo te paki]

From the book The Holy Land, Vol. II, 1859