Kei Koutou Manatuʼi Koa?

Neʼe koutou leleiʼia koa te ʼu Tule Leʼo fakamuli? Pea koutou vakaʼi peʼe koutou lava tali ki te ʼu fehuʼi ʼaenī:

• Koteā koa te Polyglotta Compluti, pea he koʼe koa neʼe maʼuhiga?

Neʼe ko te Tohi-Tapu neʼe tā fakaʼatu ia te koga lelei ʼaupito ʼi te temi ʼaia ʼi te lea faka Hepeleo, mo te faka Keleka, pea mo te faka Latina, pea mo te ʼu kogaʼi tohi faka Alamea. Ko te Tohi-Tapu ʼaia ki te ʼu lea kehekehe neʼe ko he laka ʼaia ki muʼa ki te faka fealagia ʼaē ke maʼu he koga tohi ʼe totonu ʼi te ʼu lea ʼuluaki.​—15/4 pasina 28 ki te 31.

• ʼE lava feafeaʼi ki te tagata ke ina fakafiafiaʼi te ʼAtua?

Ko Sehova ʼe maʼuli moʼoni, pea ʼe lava manatu, mo gāue pea mo ina logoʼi te ʼu meʼa ʼi tona loto. ʼE ko “te ʼAtua fiafia” pea ʼe ina logoʼi te fiafia ʼi tana fakahoko tana fakatuʼutuʼu. (1 Timoteo 1⁠:​11, MN; Pesalemo 104⁠:31) Ka lahi tatatou mahino ki te meʼa ʼaē ʼe logoʼi e te ʼAtua, pea ʼe lahi ai mo tatatou mālama ki te meʼa ʼaē ʼe tou lava fai moʼo fakafiafiaʼi tona loto.​—15/5, pasina 4 ki te 7.

• He koʼe koa neʼe fakagafua e Tavite ke nofo tona ʼohoana ko Mikale mo he fakatātā, ko he telafime?

ʼI te fakatuʼutuʼu e te Hau ko Saulo ke ina matehi ia Tavite, neʼe tokoni age ia Mikale ki tona fakahola, ʼo ina ʼai ki tona palepale ia he fakatātā neʼe hage tona agaaga ko he tagata. Neʼe lagi nofo mo he telafime koteʼuhi neʼe mole katoa tona loto ki te ʼAtua. Peʼe neʼe mole lagi ʼiloʼi e Tavite ia te faʼahi ʼaia peʼe lagi neʼe ina fakagafua koteʼuhi ko Mikale neʼe ko te ʼofafine ʼo te Hau ko Saulo. (1 Fakamatala 16⁠:​25, 26)​—1/6, pasina 29.

• Koteā te moʼoni tāfito ʼe faka maʼuhigaʼi mai e te ʼu fakatotonu ʼa te ʼAtua ʼo ʼuhiga mo te toto?

ʼAki te meʼa ʼaē neʼe tala e te ʼAtua ʼi te hili ʼo te Tulivio, mo te Lao ʼa Moisese, pea mo te fakatotonu ʼaē ʼe maʼu ia Gaue 15⁠:​28, 29, neʼe ko he faka maʼuhigaʼi ʼo te sakilifisio ʼaē ʼe fakapipiki kiai ia te toto ʼaē neʼe liligi e Sesu. Ko te toto pe ʼaia e tahi ʼe feala ke ina fakamolemole tatatou ʼu agahala pea mo tou maʼu ai te tokalelei mo te ʼAtua. (Kolose 1⁠:20)​—15/6, pasina 14 ki te 19.

• Ko te ʼu milakulo e fia ʼa Sesu ʼaē ʼe fakamatala ʼi te Tohi-Tapu?

ʼI te ʼu fakamatala ʼo te ʼu Evaselio, ʼe lau ko milakulo e 35 neʼe fai e Sesu. Kae ʼe mole ʼiloʼi papau peʼe ko milakulo e fia ʼaē neʼe fai e Sesu, heʼe lahi tana tahi ʼu milakulo ʼe mole fakamatala. (Mateo 14⁠:14)​—15/7, pasina 5.