ʼE Nātou Gaʼegaʼe Kae Mole Nātou Fiu
“Ko Sehova te Tupuʼaga ʼo te ʼu potu taupotu ʼo te kele, . . . ʼe ina foaki te mālohi kia ia ʼaē kua gaʼegaʼe; pea ʼe ina fakatuputupu te mālohi ia ia ʼaē ʼe mole hona mālohi.”—Isaia 40:28, 29.
1, 2. (a) Koteā te fakaafe fakaofoofo ʼe fai ki te hahaʼi fuli ʼaē ʼe nātou fia fai ki te tauhi maʼa? (b) Koteā te meʼa ʼe feala ke fakatupu kovi ai ki totatou maʼuli fakalaumālie?
ʼE TOU ʼiloʼi ʼi totatou ʼuhiga tisipulo ʼa Sesu ia tana fakaafe fakaofoofo ʼaenī: “Koutou ʼōmai kia te ʼau, ia koutou fuli ʼaē ʼe kinakina pea mo mafasia, pea ʼe ʼau fakafimālie anai koutou. . . . Heʼe ko taku ʼakau ʼamo ʼe mālū pea ko taku kavega ʼe maʼamaʼa.” (Mateo 11:28-30, MN ) ʼE toe maʼu e te kau Kilisitiano “te ʼu temi mokomoko mai ia Sehova.” (Gaue 3:19, MN ) ʼE lagi neʼe hoko he meʼa feiā kia koutou ʼi takotou ako te ʼu moʼoni ʼo te Tohi-Tapu, ʼi takotou maʼu te ʼamanaki taulekaleka ki te ka haʼu, pea mo takotou maʼuliʼi te ʼu pelesepeto ʼa Sehova ʼi tokotou maʼuli.
2 Kae ko ʼihi kaugana ʼa Sehova ʼe nātou lotomamahi ʼi ʼihi temi. ʼI ʼihi ʼaluʼaga ʼe faka temi pe te ʼu mamahi ʼaia, kae ʼi ʼihi leva ʼaluʼaga ʼe hoko fualoa. ʼAki te temi, kua nātou mafasia ʼi tonatou ʼu maʼua faka Kilisitiano, pea ʼe mole kei hage kia nātou ʼe maʼamaʼa te kavega ʼa Sesu ohage ko tana fakapapauʼi mai. ʼE fakatupu kovi te ʼu taʼi manatu ʼaia ki te felogoi ʼa he Kilisitiano pea mo Sehova.
3. He koʼe neʼe fai e Sesu te tokoni ʼaē ia Soane 14:1?
3 ʼI muʼa pe ʼo tona puke pea mo tona matehi, neʼe ʼui fēnei e Sesu ki tana kau tisipulo: “Aua naʼa hoha outou loto; koutou tui ki te Atua pea koutou tui mai kia te au.” (Soane 14:1) Neʼe fai e Sesu te ʼu palalau ʼaia he neʼe ʼamanaki hoko ki te kau ʼapositolo te ʼu meʼa fakamataku. ʼE ʼi ai anai te fakataga lahi. Neʼe ʼiloʼi e Sesu neʼe feala ke lotovaivai ʼaupito ai tana kau ʼapositolo. (Soane 16:1) Kapau ʼe mole nātou ʼutakiʼi te faʼahi ʼaia, pea ʼe vaivai fakalaumālie anai te kau ʼapositolo pea mo puli tanatou falala ʼaē kia Sehova. ʼE toe moʼoni foki te faʼahi ʼaia ki te kau Kilisitiano ʼo te temi nei. Ka fualoa he lotovaivai pea ʼe feala ke tou loto hoha ʼaupito ai, pea mo mafasia ʼotatou loto. (Selemia 8:18) ʼI te lahi fau ʼo te mamahi, ʼe feala ai ke tou vaivai ʼi totatou loto pea mo te faʼahi fakalaumālie, ʼo mole kei tou fia tauhi ai kia Sehova.
4. Koteā ʼaē ka tokoni mai kia tatou ke tou taupau totatou loto mai te vaivai fakalaumālie?
4 ʼE ʼaoga tāfito te tokoni ʼaenī ʼa te Tohi-Tapu kia tatou: “Ko te meʼa tāfito ʼaē ʼe tonu ke ke hāofaki, hāofaki tou loto, heʼe haʼu mai ai te ʼu matapuna ʼo te maʼuli.” (Tāʼaga Lea 4:23) ʼE foaki mai e te Tohi-Tapu te tokoni moʼo puipui totatou loto mai te lotovaivai pea mo te vaivai fakalaumālie. Kae ʼuluaki, ʼe tonu ke tou mahino lelei ki te tupuʼaga ʼo totatou vaivai.
ʼE Mole Fefeka Te Lotu Faka Kilisitiano
5. Koteā ʼaē ʼe hoko ki te kau tisipulo Kilisitiano ʼe feala ke mole tou mahino kiai?
5 ʼE mahino ia ʼi totatou ʼuhiga Kilisitiano ʼe tonu ke tou gāue mālohi. (Luka 13:24) Neʼe toe ʼui fēnei e Sesu: “Ko ʼaē ʼe mole ina fua tona pou fakamamahi pea mo haʼu ʼo mulimuli ia te ʼau ʼe mole feala ia ke liliu ko haku tisipulo.” (Luka 14:27, MN ) Ka tou lau te ʼu palalau ʼaia, ʼe feala ke tou ʼui neʼe loi ia Sesu ʼi tana ʼui ʼaē ʼe maʼamaʼa anai tana kavega pea mo faka fīmālie, kae neʼe mole loi ia Sesu.
6, 7. He koʼe ʼe tou ʼui ʼe mole tou mafasia ʼi tatatou tauhi?
6 Logola ʼe fakatupu gaʼegaʼe he gāue kinakina neʼe fai moʼo lagolago ki he meʼa ʼe lelei, kae ʼe fakatupu fiafia pea mo fakaloto mālohi. (Tagata Tānaki 3:13, 22) Pea ko te meʼa lelei ʼaia ʼe ko takita fakahā te ʼu moʼoni taulekaleka ʼo te Tohi-Tapu ki te hahaʼi. ʼO toe feiā mo tatatou faiga ʼaē ke tou maʼuliʼi te ʼu lekula māʼoluga ʼa te ʼAtua, ʼe veliveli age mokā tou fakatatau mo te ʼu tapuakina ʼaē ʼe tou maʼu. (Tāʼaga Lea 2:10-20) Tatau aipe mokā fakatagaʼi tatou, ʼe ko he meʼa lelei mokā tou mamahi ʼuhi ko te Puleʼaga ʼo te ʼAtua.—1 Petelo 4:14.
7 ʼE mahino ia ʼe fakaloto fīmālie te ʼāmoga ʼa Sesu, tāfito la mo kapau ʼe fakatatau ki te pōʼuli fakalaumālie ʼaē ʼe maʼuʼuli ai te hahaʼi ʼaē ʼe puleʼi e te lotu hala. Ko te ʼAtua ʼe ʼofa kia tatou pea ʼe mole ina fakamaʼua mai he ʼu meʼa ʼe mole tou lavaʼi. Ko te ʼu “fakatotonu [ʼa Sehova] ʼe mole faka mafasia ia.” (1 Soane 5:3, MN ) ʼE fakahā ʼi te Tohi-Tapu ko te Lotu Faka Kilisitiano moʼoni ʼe mole fefeka ia. Ei, ʼe mole tou mafasia pea mo lotovaivai ʼi tatatou tauhi.
Tou “Līaki Te ʼu Meʼa Fuli Pe ʼAē ʼe Mamafa”
8. ʼI te agamāhani, he koʼe ʼe tou vaivai fakalaumālie?
8 ʼE lagi tou gaʼegaʼe fakalaumālie heʼe tou tautau fua he tahi ʼu kavega ʼe fakatupu e te tuʼu ʼaenī. Heʼe “mauli te malama-nei katoa i te Kovi,” koia ʼe tou tau ai mo te ʼu mālohi fakafeagai ʼe feala ai ke tou mafasia pea mo ina fakaloto vaivaiʼi totatou maʼuli faka Kilisitiano. (1 Soane 5:19) ʼE feala ke tou mafasia ʼi he ʼu meʼa ʼe mole faʼa maʼuhiga tāfito kia tatou, pea mo fakatupu loto hoha ai ki tatatou ʼu gāue ʼaē ʼe tou fai māhani ʼi totatou ʼuhiga Kilisitiano. Ko te ʼu kavega ʼaia ʼe feala ke nātou faka mafasia pea mo fakamamahiʼi totatou ʼatamai. Pea ʼe fakaloto mālohiʼi tatou e te Tohi-Tapu ke tou “līaki te ʼu meʼa fuli pe ʼaē ʼe mamafa.”—Hepeleo 12:1-3, MN.
9. He koʼe ʼe feala ke tou mafasia mo kapau ʼe tou kumi te ʼu koloā?
9 Ohage la, ʼe feala ke tou fia fai ki te ʼu meʼa ʼaē ʼe hoha kiai te malamanei, ohage la ko te fia hā, te mānumānu falā, te ʼu fakafiafia, te ʼu folau, pea mo te kumi koloā. (1 Soane 2:15-17) Neʼe faigataʼa te maʼuli ʼo ʼihi Kilisitiano ʼi te ʼuluaki sēkulō ʼi tanatou faiga ʼaē ke nātou maʼu meʼa. ʼE fakamahino fēnei e te ʼapositolo ko Paulo: “Kia natou e fia maumea, e natou higa ki te fakahala, mo te matahele, pea mo te u manumanu kehekehe fakavale mo fakatupu tuutamaki, e natou fakaʼuku te hahai ki te auha mo te malaia. Koteuhi ko te aka o te kovi fuape e ko te manumanu paaga, nee oho ki ai ihi, onatou hehe mamao mai te tui pea nee fakakafo onatou loto aki te mamahi kehekehe.”—1 Timoteo 6:9, 10.
10. Koteā te ako ʼe tou maʼu ʼo ʼuhiga mo te ʼu koloā ʼi te lea fakatātā ʼa Sesu ʼo te tagata tūtū pulapula?
10 Ka tou vaivai pea mo lotovaivai ʼi tatatou tauhi ki totatou ʼAtua, ʼe lagi tupu ko totatou maʼuli fakalaumālie kua taʼomia e te ʼu koloā faka mālama ʼaē ʼe tou faiga kiai. Ei, neʼe palalau ia Sesu ki te faʼahi ʼaia ʼi tana lea fakatātā ʼo te tagata tūtū pulapula. Neʼe fakatatau e Sesu “te ʼu hoha ʼo te tuʼu ʼo te ʼu faʼahiga meʼa ʼaenī pea mo te mālohi fakahala ʼo te ʼu koloā, pea mo te ʼu holi ʼaē ki niʼihi ʼatu meʼa,” ki te vao talatala ʼaē ʼe nātou “hū pea mo nātou taʼotaʼo” te pulapula ʼo te Folafola ʼa te ʼAtua ʼi ʼotatou loto. (Maleko 4:18, 19, MN ) Pea ʼe tokoni fēnei mai te Tohi-Tapu: “Fakaateaina outou mauli mai te manumanu paaga, pea koutou fakafimalie i te u mea e koutou mau i te temi-nei, io, nee folafola totonu mai te Aliki: ‘E mole au tukunoa anai koe, pea e mole au liaki anai koe.’ ”—Hepeleo 13:5.
11. ʼE tou līaki feafeaʼi te ʼu meʼa ʼaē ʼe nātou faka mafasia kia tatou?
11 ʼI ʼihi temi, ʼe faigataʼaʼia totatou maʼuli ʼuhi ko te meʼa ʼaē ʼe tou fai mo te ʼu meʼa ʼaē kua tou maʼu, kae ʼe mole tupu ko tatatou faiga lahi ki te tahi ʼu meʼa. Ko Teuvo pea mo Anne, ko te taumatuʼa neʼe kua fualoa tanā gāue misionea, neʼe nā lotovaivai ʼuhi ko te mahaki pea mo te mate ʼo te ʼu hahaʼi neʼe nā ʼoʼofa ai. ʼI ʼihi temi, neʼe tonu kia nāua ke nā fakatonutonuʼi tanā faʼahiga manatu. ʼE ʼui fēnei e Anne: “Neʼe heʼeki faʼa fualoa neʼe ma tuku ʼihi fakafiafia neʼe ma fia fai kiai pea mo tamā ʼu fakatuʼutuʼu neʼe mole hona ʼaoga. Neʼe ma toe vakavakaʼi te ʼu meʼa kehekehe ʼo tomā ʼapi, pea neʼe ma fafaʼo ki te ʼu kalato te ʼu meʼa fuli ʼaē neʼe ʼaoga ki te ʼu fakatuʼutuʼu ʼaia, ʼo ma laku.” ʼE lelei ʼi ʼihi temi kia tatou fuli ke tou toe vakavakaʼi tatatou ʼu agamāhani pea mo te ʼu meʼa ʼaē ʼe tou maʼu, ʼo tou līaki te ʼu meʼa fuli ʼe mole ʼaoga ke ʼaua naʼa vaivai pea mo fiu totatou ʼu nefesi.
ʼE Tonu Ke Tou Fakapotopoto Pea Mo Agavaivai
12. Koteā ʼaē ʼe tonu ke tou mahino kiai ʼo ʼuhiga mo tatatou ʼu hala?
12 ʼAki te temi ʼe feala ke faigataʼa totatou maʼuli ʼaki tatatou ʼu hala, tatau aipe peʼe veliveli. ʼE moʼoni te ʼu palalau ʼaenī ʼa Tavite: “Kua fakalaka taku ʼu hala ʼi toku fuga ulu; ohage ko he ʼāmoga mamafa kua mamafa fau kia te ʼau.” (Pesalemo 38:4) Ka tou fai he ʼu kiʼi fetogi pea ʼi te agamāhani ʼe tou ʼāteaina mai te ʼu kavega mamafa.
13. ʼE lava tokoni feafeaʼi mai te aga fakapotopoto ke tou fakafuafua lelei totatou minisitelio?
13 ʼE fakaloto mālohi tatou e te Tohi-Tapu ke tou fakatuputupu totatou “poto pea mo [totatou] fealagia fakakaukau.” (Tāʼaga Lea 3:21, 22) ʼE ʼui fēnei e te Tohi-Tapu: “Ko te poto mai oluga . . . e maʼa.” (Sakopo 3:17) Ko ʼihi ʼe nātou loto hoha mokā ʼe nātou fia fakatatau mo ʼihi Kilisitiano tanatou ʼu gāue faka minisitelio. Kae ʼe tokoniʼi fēnei tatou e te Tohi-Tapu: “Ke tahi vakai e te tagata tana gaue, e ina mau ai anai he mea ke fiameamea ai, kae mole ko he gaue a he tahi kehe. Koteuhi, e tahi fua’pe anai e te tagata tana kavega totonu.” (Kalate 6:4, 5) ʼE moʼoni, ʼe feala ke tou lotomālohi ʼaki te faʼifaʼitaki lelei ʼa te ʼu tēhina pea mo tuagaʼane Kilisitiano, ke tou tauhi kia Sehova mo totatou loto katoa, kae ko te poto pea mo te aga fakapotopoto ʼe tokoni mai anai kia tatou ke tou fai he ʼu fakatuʼutuʼu ʼe tou lava fakahoko ʼo mulimuli pe ki ʼotatou ʼu fealagia.
14, 15. ʼE feafeaʼi hatatou fakahā te poto mokā tou tokakaga ki te ʼu meʼa ʼaē ʼe ʼaoga ki totatou sino pea mo totatou loto?
14 Māʼiape la mo te ʼu kiʼi meʼa noa, ʼe tonu ke tou fakapotopoto ai ke mole tou lotovaivai ai. Ohage la, ʼe tou faigaʼi koa ke tou fai he ʼu gāue ʼe fakafuafua lelei ke kita maʼu ai he maʼuli fakasino fīmālie? Ko Timo pea mo Tiina neʼe nā gāue ʼi te filiale ʼa te kau Fakamoʼoni ʼa Sehova. Neʼe mahino kia nāua ʼe tonu ke nā popoto ke ʼaua naʼa nā gaʼegaʼe. ʼE ʼui fēnei e Tiina: “Tatau aipe pe koteā te gāue ʼaē neʼe ma fai, ʼe ma faiga aipe ke ma momoe ʼi te po fuli ʼi te hola kua ma fakatuʼutuʼu māhani kiai. ʼI te agamāhani, ʼe ma momoe ʼi te hola hogofulu. ʼE ma faigaoʼi tuʼumaʼu, heʼe ko he faʼahi ʼe tokoni lelei kia māua. ʼE ma fai tamā ʼu gāue ʼo mulimuli pe ki tomā ʼu tuʼakoi. ʼE mole lelei takita gāue vave fau ʼi te temi fuli. Koia ʼe mole ma faiga ke ma fakatatau ia māua mo ʼihi ʼe lagi mālolohi age.” ʼE lelei koa tatatou kai pea mo tatatou moe? Kapau ʼe tou tokaga fakalelei ki totatou maʼuli fakasino, ʼe feala ke tou fakasiʼisiʼi te ʼu meʼa ʼaē ʼe mamahi kiai ʼotatou loto pea mo totatou vaivai fakalaumālie.
15 Ko ʼihi ia tatou, ʼe ʼaoga kia nātou te ʼu meʼa makehe. Ohage la, ko te tuagaʼane ko Sole ʼaē neʼe pionie temi katoa ʼi te ʼu koga meʼa neʼe faigataʼa ai te gāue. Neʼe tau mo te mahaki faigataʼa, ko te kosea. Koteā ʼaē neʼe tokoni kia ia ke ina kātakiʼi te ʼu ʼaluʼaga faigataʼa ʼaia? ʼE ina ʼui fēnei: “ ʼE maʼuhiga kia ʼau ke ʼau maʼu hoku temi ke ʼau nofo tokotahi ai pea ʼe mole logoaʼa. Ka ʼau logoʼi ʼe ʼau hoha fau pea mo gaʼegaʼe, ʼe ʼau foimo kumi fakavilivili he koga meʼa ʼe mole logoaʼa ke feala ai haku lautohi pea mo mālōlō ai.” Ko te poto pea mo te fealagia fakakaukau ʼe tokoni mai ke tou mahino pea mo tou maʼu te ʼu meʼa ʼaē ʼe ʼaoga kia tatou, ke ʼaua naʼa tou vaivai fakalaumālie.
ʼE Fakamālohiʼi Tatou e Sehova
16, 17. (a) He koʼe ʼe maʼuhiga ʼaupito ke tou tokakaga ki totatou maʼuli fakalaumālie? (b) Koteā te meʼa ʼe tonu ke tou fakapipiki ki tatatou ʼu agamāhani ʼo te ʼaho fuli?
16 ʼE moʼoni, ʼe maʼuhiga tāfito ke tou tokakaga ki totatou maʼuli fakalaumālie. ʼE feala ke tou gaʼegaʼe ʼi te faʼahi fakasino, tatau aipe mokā tou felogoi lelei mo Sehova ʼAtua, kae ʼe mole tou pipiko ʼi te tauhi kia te ia. Ko Sehova ʼaē ʼe ina “foaki te mālohi kia ia ʼaē kua gaʼegaʼe; pea ʼe ina fakatuputupu te mālohi ia ia ʼaē ʼe mole hona mālohi.” (Isaia 40:28, 29) Ko te ʼapositolo ko Paulo, ʼaē neʼe hoko tonu kia ia te ʼu meʼa ʼaia, neʼe ina ʼui fēnei: “Koia, e mole matou lotovaivai, kae kapau e lolotoga auha omatou gaasi tagata, e fakafoou aipe omatou tagata lotovaivai mai te aho ki te aho.”—2 Kolonito 4:16.
17 Koutou fakatokagaʼi ʼe ʼui “mai te aho ki te aho.” Ko tona faka ʼuhiga ʼe tou maʼu te ʼu fua lelei ʼo te ʼu fakatuʼutuʼu ʼaē ʼe foaki e Sehova ʼi te ʼaho fuli. Ko Susie, ʼaē neʼe gāue misionea agatonu ia taʼu e 43, neʼe tau mo te ʼu temi gaʼegaʼe ʼi te faʼahi fakasino pea neʼe lotovaivai. Kae neʼe heʼeki piko ia ʼi te gāue. ʼE ina ʼui fēnei: “Neʼe kua ʼau māhani ʼi te ʼala ʼi te kei uhuuhu, ke feala haku faikole kia Sehova pea mo lau tana Folafola, ʼi muʼa ʼo taku kamata taku ʼu gāue. Ko taku ʼu agamāhani ʼaia ʼi te ʼaho fuli neʼe tokoni mai kia ʼau ke ʼau faʼa kātaki ʼo aʼu mai ki te temi nei.” ʼIo ʼe tou lava falala ki te tokoni mālohi ʼa Sehova, mo kapau ‘ ʼi te ʼaho ki te ʼaho’ ʼe tou faikole kia te ia pea mo metitasioʼi tona ʼu kalitate pea mo tana ʼu fakapapau.
18. Koteā te fakaloto fīmālie ʼe foaki e te Tohi-Tapu ki te hahaʼi agatonu ʼaē kua matutuʼa peʼe mahahaki?
18 ʼE ʼaoga tāfito te meʼa ʼaia ki te hahaʼi ʼaē ʼe lotovaivai ʼuhi ko tanatou kua matutuʼa pea mo mahahaki. Ko nātou ʼaia ʼe mole nātou lotovaivai ʼuhi ko tanatou fakatatau ki niʼihi, kae ʼe nātou lotovaivai ki tanatou fakatatau mo te ʼu gāue ʼaē neʼe nātou fai ʼi muʼa atu. ʼE ko he meʼa fakaloto fīmālie hakita ʼiloʼi ko Sehova ʼe ina faka maʼuhigaʼi te hahaʼi matutuʼa! ʼE ʼui fēnei e te Tohi-Tapu: “Ko te ʼu ʼulu hina ʼe ko he kolona matalelei mokā ʼe maʼu ia nātou ʼi te ala ʼo te faitotonu.” (Tāʼaga Lea 16:31) ʼE ʼiloʼi e Sehova ʼotatou tuʼakoi pea ʼe ina leleiʼia ʼaupito tatatou tauhi mo totatou loto katoa logola totatou ʼu vaivaiʼaga. Pea ko te ʼu gāue lelei ʼaē kua tou fai ʼe mole galo ʼi te ʼatamai ʼo te ʼAtua. ʼE fakapapau mai ia te Tohi-Tapu: “ ʼE mole heʼe agatonu te ʼAtua ke ina galoʼi takotou gāue pea mo te ʼofa ʼaē neʼe koutou fakahā ʼo ʼuhiga mo tona huafa, ʼi takotou tauhi te kau maʼoniʼoni pea ʼe kei hoko atu pe takotou tauhi kia nātou.” (Hepeleo 6:10, MN ) ʼE ko he meʼa fakafiafia ʼi tatatou fakatahi mo nātou fuli ʼaē neʼe nātou fakahā tanatou agatonu kia Sehova lolotoga te ʼu taʼu!
ʼAua Naʼa Tou Pipiko
19. Koteā te fua lelei ʼe tou maʼu mo kapau ʼe tou fai te ʼu meʼa ʼaē ʼe lelei?
19 ʼE ʼui e te tokolahi ʼe feala ki he gāue fakasino mālohi ke ina fakasiʼisiʼi te gaʼegaʼe. ʼE toe feiā foki mo te ʼu gāue fakalaumālie, ʼe feala ke ina fakamaʼamaʼa te ʼu meʼa ʼi te loto peʼe ko te vaivai fakalaumālie. ʼE ʼui fēnei e te Tohi-Tapu: “Aua naa tou lotovaivai i te fai o te lelei, koteuhi e tou utu anai moka hoko mai tona temi, kapau foki e mole tou lotovaivai. Koia leva, i tatatou kei mau te temi, tou fai ia te lelei ki te tagata fuape, kae tafito ia te lelei o te kaiga o te tui.” (Kalate 6:9, 10) Koutou fakatokagaʼi te ʼu kupusiga palalau “fai o te lelei” pea mo te “fai ia te lelei.” ʼE ʼasi mai ʼi te ʼu palalau ʼaia ʼe tonu ke tou gāue mālohi. Kapau ʼe tou fai he ʼu meʼa lelei maʼa ʼihi ʼe feala ke tokoni mai kia tatou ke ʼaua naʼa tou vaivai ʼi tatatou gāue maʼa Sehova.
20. Moʼo tauʼi te lotovaivai, ko ai ʼaē ʼe tonu ke tou fakamamaʼo mai ai?
20 Kae kapau ʼe tou fakakaugā pea mo kaugā gāue mo te hahaʼi ʼaē ʼe mole nātou tokagaʼi te ʼu lao ʼa te ʼAtua, ʼe feala ke tou mafasia ai. ʼE fakatokaga fēnei mai e te Tohi-Tapu: “ ʼE mamafa te maka pea ʼe mamafa te ʼone—kae ʼe mamafa age ʼi te ʼu meʼa ʼaia e lua te ʼita ʼaē ʼe fakatupu e te vale.” (Tāʼaga Lea 27:3) Moʼo tauʼi te ʼu manatu fakaloto vaivai pea mo fakaloto fītaʼa, ʼe lelei ke tou fakamamaʼo mai ia nātou ʼe mole lelei tanatou ʼu manatu pea mo nātou valoki te ʼu hala ʼa ʼihi pea mo gutu fatufatu.
21. E feafeaʼi hatatou lava fakaloto mālohiʼi niʼihi ʼi te ʼu fono?
21 Ko te ʼu fono faka Kilisitiano ʼe ko he fakatuʼutuʼu mai ia Sehova, pea ʼe feala ke ina foaki mai te mālohi fakalaumālie. ʼI te ʼu fono ʼaia, ʼe tou maʼu ai te faigamālie ʼaē ke tou fefakaloto mālohiʼaki, ʼe tou maʼu ai mo te ʼu ako ʼe fakatupu lotomālohi pea mo he fakakaugā ʼe lelei. (Hepeleo 10:25) ʼE tonu kia nātou fuli ʼaē ʼi te kokelekasio ke nātou fakaloto mālohi te nofoʼaki mokā nātou fai hanatou ʼu tali ʼi te ʼu fono peʼe mokā nātou fai hanatou kiʼi akonaki mai muʼa. Ko nātou te kau takitaki ʼi tonatou ʼuhiga kau faiako, ʼe fakamaʼua tāfito kia nātou ʼaia ke nātou fakaloto mālohiʼi te hahaʼi. (Isaia 32:1, 2) Peʼe tonu ke fai he fakaloto mālohi, peʼe ko he fakatonutonuʼi, ʼe tonu ke fakaloto mālohi te tokoni. (Kalate 6:1, 2) Ko totatou ʼofa ki te hahaʼi ʼe tokoni mai anai ke tou tauhi kia Sehova kae ke mole tou vaivai.—Pesalemo 133:1; Soane 13:35.
22. Logola totatou ʼuhiga heʼe haohaoa, he koʼe ʼe feala ke tou lotomālohi?
22 Ko te tauhi kia Sehova ʼi te temi fakaʼosi ʼaenī, ʼe fakamaʼua kiai he gāue. ʼE mole hāo te kau Kilisitiano mai te ʼu meʼa ʼaē ʼe feala ke fakatupu vaivai ai tonatou ʼatamai, ke mamahi ʼonatou loto, pea mo te ʼu ʼaluʼaga fakatupu hoha. Ohage ko he ipu kele, ʼe vaivai gafua totatou natula heʼe haohaoa. ʼE ʼui fēnei e te Tohi-Tapu: “Kae ko te koloā ʼaia, ʼe tou maʼu ʼi te ʼu ipu kele, koteʼuhi ko te mālohi ʼaē ʼe laka age ʼi te mālohi māhani, ʼe ko te mālohi ia ʼo te ʼAtua kae mole ko te mālohi ʼaē ʼe haʼu mai ia tatou.” (2 Kolonito 4:7, MN ) ʼE moʼoni, ʼe feala ke tou mafasia kae ʼe mole feala ke tou vaivavai peʼe tou pipiko. Tou “lotomālohi pea mo ʼui: ‘Ko Sehova ʼe ko toku tokoni.’ ”—Hepeleo 13:6, MN.
Ko He Fakamanatu Nounou
• Koteā te ʼu kavega mamafa ʼaē ʼe feala ke tou līaki?
• E lava feafeaʼi hatatou “fai ia te lelei” maʼa ʼotatou ʼu tēhina pea mo tuagaʼane?
• ʼE tokoni feafeaʼi mai ia Sehova mokā tou gaʼegaʼe peʼe tou lotovaivai?
[Paki ʼo te pasina 23]
Neʼe ʼiloʼi e Sesu ko te lotovaivai fualoa ʼe feala ke ina fakahoha te kau ʼapositolo
[Paki ʼo te pasina 24]
Ko ʼihi neʼe nātou līaki ʼihi fakafiafia pea mo te ʼu fakatuʼutuʼu ʼe mole faʼa maʼuhiga
[Paki ʼo te pasina 26]
Logola totatou ʼu tuʼakoi kae ko Sehova ʼe ina faka maʼuhigaʼi ʼaupito tatatou tauhi ʼaē ʼe tou fai age ʼaki totatou loto katoa