“ ʼE Tonu Ke Koutou Faikole Fēnei”

ʼE KOUTOU ʼiloʼi koa te ʼu kupu ʼo te Faikole ko tatatou Tāmai ʼaē ʼe ʼi Selo? ʼE ko te faikole neʼe akoʼi mai e Sesu Kilisito ke tou faʼifaʼitaki kiai. ʼI tana fai tana Akonaki ʼiloa ʼi te Moʼuga, neʼe ʼui fēnei e Sesu: “Koia ʼe tonu ke koutou faikole fēnei.” (Mateo 6⁠:​9, MN ) Mai tona ʼaluʼaga ʼaē neʼe ko Sesu ʼaē neʼe ʼuluaki talanoa kiai, koia ʼe fakahigoa ko te Faikole ʼo te ʼAliki, pea ʼe toe ʼiloʼi e te hahaʼi te faikole ʼaia ʼi tona higoa ʼaē ko tatatou Tāmai ʼaē ʼe ʼi Selo.​—ʼI te faka Latina ʼaē ko te Pater.

Tokolahi te hahaʼi ʼi te malamanei neʼe nātou ako fakaʼatamai tatatou Tāmai ʼaē ʼe ʼi Selo pea mo nātou lau liuliuga, lagi ʼi te ʼaho fuli. ʼI te ʼu taʼu pe ʼaenī, tokolahi ʼe nātou lau leʼo lahi te kole ʼaia ʼi te ʼu faleako pea mokā hoko he ʼu fakatahi lalahi. He koʼe ʼe faka maʼuhigaʼi ʼaupito feiā te faikole ko tatatou Tāmai ʼaē ʼe ʼi Selo?

Neʼe tohi fēnei e te tagata teolosia ʼo te tolu sēkulō ko Cyprien: “ ʼE ʼi ai koa he tahi faikole ʼe lahi age tana talanoa ki te ʼu meʼa fakalaumālie ʼi te faikole ʼaē neʼe foaki mai kia tatou e Kilisito? . . . ʼE ʼi ai koa he tahi faikole ʼe tou fai ki te Tāmai ʼe moʼoni lahi age ʼi te faikole ʼaē neʼe foaki mai kia tatou e te ʼAlo, ʼaē ʼe ko te Moʼoni?”​—Soane 14⁠:⁠6.

ʼI te ʼu fai kapite ʼaē ʼe fakatuʼutuʼu e te Lotu Katolika, ko te faikole ko tatatou Tāmai ʼaē ʼe ʼi Selo ʼe ko “te faikole faka Kilisitiano maʼuhiga tāfito.” ʼE fakamoʼoni e te tohi The World Book Encyclopedia ki te tuʼulaga maʼuhiga ʼo te faikole ʼaia ʼi te ʼu lotu fuli ʼo te Keletiate, ʼo ʼui e te tohi ʼaia ʼe kau te faikole ʼaia ʼi te ʼu “akonaki tāfito ʼo te tui faka Kilisitiano.”

Kae ʼe moʼoni, tokolahi ʼe nātou lau tatatou Tāmai ʼaē ʼe ʼi Selo kae ʼe mole nātou mahino katoa kiai. ʼE ʼui fēnei e te sulunale Ottawa Citizen ʼo Kanata: “Kapau ʼe koutou kau ʼi he Lotu Faka Kilisitiano, pea ʼe mahino ia ʼe koutou lava lau fakavilivili anai pea mo lau hoholo tatatou Tāmai ʼaē ʼe ʼi Selo, kae ʼe lagi faigataʼa age anai hakotou lau māmālie te faikole pea mo koutou mahino kiai.”

ʼE maʼuhiga moʼoni koa ke tou mahino ki te ʼu faikole ʼaē ʼe tou fai ki te ʼAtua? He koʼe neʼe foaki mai e Sesu te faikole ko tatatou Tāmai ʼaē ʼe ʼi Selo? Koteā tona faka ʼuhiga kia koutou? Tou vakaʼi te ʼu fehuʼi ʼaia.