Koutou Haʼele ʼi Te Ala ʼo Te Agatonu
“Kiā au, ʼe au haʼele anai ʼi taku agatonu.”—PESALEMO 26:11.
1, 2. (a) He koʼe ʼe maʼuhiga ia te agatonu ʼa te hahaʼi ʼo ʼuhiga mo te pule faʼitaliha ʼa te ʼAtua? (b) ʼE lava fakahā feafeaʼi e te hahaʼi pea mo te kau ʼāselo ia tanatou lagolago ki te pule faʼitaliha ʼa Sehova?
ʼI TE temi ʼaē neʼe fakafeagai ai ia Satana ʼi te ʼōloto ʼo Eteni, neʼe ina fakafihiʼi ia te tāu ʼaē mo te ʼAtua ke pule faʼitaliha ki Tana ʼu meʼa fuli ʼaē neʼe ina fakatupu. Ki muli age, neʼe ina toe fakafihiʼi ia te ʼAtua, ʼo ina ʼui ko te hahaʼi ʼe nātou tauhi pe anai kiā te ia mo kapau ʼe ina tapuakinaʼi nātou. (Sopo 1:9-11; 2:4) Koia ʼi te temi leva ʼaia neʼe maʼuhiga ai ia te agatonu ʼa te tagata moʼo fakatokatoka ia te fakafihiʼi ʼo te pule faʼitaliha ʼo Sehova ʼo te ʼatulaulau.
2 ʼE pule faʼitaliha tuʼumaʼu pe ia te ʼAtua ki te hahaʼi pea mo te kau ʼāselo tatau aipe peʼe nātou agatonu peʼe kailoa, kae ʼe ina faka fealagia ke nātou fakahā pe ko ai ʼaē ʼe nātou lagolago ki ai. ʼO feafeaʼi? ʼE tonu ke nātou filifili peʼe nātou māʼuʼuli agatonu anai peʼe kailoa. Pea ʼo mulimuli pe ki te faʼahi ʼaia ʼe ina fakamāuʼi anai ia nātou ʼaia.
3. (a) Koteā ʼaē neʼe loto e Sopo pea mo Tavite ke sivisivi pea mo fakamāuʼi e Sehova? (b) Koteā te ʼu fehuʼi ʼe lagaʼi ʼi henī ʼo ʼuhiga mo te agatonu?
3 ʼAki he loto falala, neʼe ʼui fēnei e Sopo: “[Ko Sehova] ʼe ina fua anai ia au ʼi he meʼa fua ʼe totonu pea ʼe ʼiloʼi anai e te ʼAtua taku agatonu.” (Sopo 31:6) Ko Tavite ia te Hau ʼo Iselaele ʼo te temi muʼa, neʼe ina kole kiā Sehova ke ina sivisivi ia tana agatonu, ʼo ina ʼui fēnei: “Fakamāuʼi au, Ê Sehova, he neʼe au haʼele ʼi taku agatonu, pea neʼe au falala kiā Sehova, ke ʼaua naʼa au tūkia.” (Pesalemo 26:1) ʼE maʼuhiga ʼaupito mo tatou, ke tou haʼele ʼi te ala ʼo te agatonu! Kae koteā te faka ʼuhiga ʼo te agatonu, pea ʼe faka ʼuhiga feafeaʼi ia te haʼele ʼi te ala ʼo te agatonu? Koteā ʼaē ka tokoni mai ke tou nofo agatonu?
“ ’Neʼe Au Haʼele ʼi Taku Agatonu”
4. Koteā te faka ʼuhiga ʼo te agatonu?
4 Ko te agatonu ʼe faka ʼuhiga ki he tahi ʼe maʼuli faitotonu, mo heʼe mele pea mo haohaoa. Kae ʼe mole faka tuʼakoi pe ia te agatonu ki te fai ʼo te meʼa ʼaē ʼe totonu. Ko te agatonu ʼe ko takita tauhi ki te ʼAtua mo tokita loto kātoa. Neʼe fakafihiʼi e Satana ia te ʼofa ʼo Sopo, ʼo ina ʼui fēnei ki te ʼAtua: “Moʼo fetogi, fakalelei muʼa, kae faoʼi atu tou nima, pea mo ala ki tona hui pea mo tona kakano, pea ke sio ai leva peʼe mole laukovi anai kiā te koe ʼi ʼou muʼa.” (Sopo 2:5) Koia, ʼo mole gata pe ʼi takita fai te meʼa ʼaē ʼe totonu, ʼe toe pipiki ia te agatonu ki he ʼofa ʼe kātoa.
5. Koteā ʼaē ʼe hā mai ʼe mole faka ʼuhiga leva ia te agatonu kua tou maʼuli māʼoniʼoni?
5 Kae ko te agatonu ʼe mole faka ʼuhiga leva ke kita maʼuli haohaoa. Ko te Hau ko Tavite neʼe ko te tagata agahala pea neʼe lahi te ʼu hala mamafa neʼe ina fai ʼi tona maʼuli. Kae ʼe ʼui ʼi te Tohi-Tapu neʼe ko te tagata neʼe haʼele “ ʼaki he loto agatonu.” (1 Hau 9:4) Koteā tona tupuʼaga? Koteʼuhi ko Tavite neʼe ʼofa kiā Sehova, pea neʼe kātoa ia tona loto ki te ʼAtua. Neʼe ina fakamoʼoni ki tana ʼu hala, neʼe ina tali tona fakatonutonuʼi, pea neʼe ina fetogi tana ʼu aga. Ei, neʼe ʼiloga ia te agatonu ʼa Tavite ʼi tana pipiki ʼaki tona loto kātoa kiā Sehova tona ʼAtua, pea mo ʼofa kātoa kiā te ia.—Teutalonome 6:5, 6.
6, 7. Koteā ʼaē ʼe pipiki ki tatatou haʼele ʼi te agatonu?
6 Ko te agatonu ʼe mole ko he faʼahi pe e tahi ʼo te maʼuli ʼo te hahaʼi, ohage la ko tanatou pipiki ki te ʼAtua. Ko te agatonu ʼe tonu ke hā ʼi te ʼu ʼaluʼaga fuli ʼo totatou maʼuli. Neʼe “haʼele” agatonu ia Tavite. ʼE ʼui ʼi te tohi The New Interpreter’s Bible: “Ko te kupu ‘haʼele’ ʼe lava faka ʼuhiga ki ‘he faʼahiga maʼuli.’ ” ʼI tana palalau ʼo ʼuhiga mo nātou ʼaē ʼe maʼuli “agatonu ʼi tonatou ʼu ala,” neʼe hiva fēnei ia te tagata fai Pesalemo: “Fiafia ia nātou ʼaē ʼe nātou mulimuli ki tana ʼu fakamanatu; ʼaki tonatou loto kātoa ʼe nātou haga kumi ia ia. ʼE moʼoni ia, neʼe mole nātou maʼuliʼi ia te heʼe faitotonu. Neʼe nātou haʼele ʼi tona ʼu ala.” (Pesalemo 119:1-3) Ko te agatonu ʼe ina fakamaʼua mai ke tou fai tuʼumaʼu ia te finegalo ʼo te ʼAtua pea mo tou haʼele ʼi tona ala.
7 Ko te haʼele ʼi te agatonu ʼe ina fakamaʼua mai ke kita pipiki agatonu ki te ʼAtua, māʼiape la mo te ʼu temi ʼaē ʼe kita felāveʼi ai mo he ʼu ʼaluʼaga faigataʼaʼia. Ko tatatou agatonu ʼe ʼiloga tāfito ʼi te ʼu temi ʼaē ʼe tou tauʼi ai te ʼu fihifihia, pea mokā tou faʼa kātaki logola te ʼu faigataʼaʼia, peʼe ko tatatou faʼa tekeʼi te ʼu fakahala ʼo te mālama agakovi ʼaenī. ʼE tou ‘fakafiafia ia te loto ʼo Sehova’ ke feala ai hana tali kiā ia ʼaē ʼe ina manukinuki ia ia. (Tāʼaga Lea 27:11) Koia, ʼe tou hage ko Sopo, ʼi te temi ʼaē neʼe ina ʼui ai: “ ʼO aʼu ki toku mate, ʼe mole au tuku anai taku agatonu!” (Sopo 27:5) Pea ko te ʼu manatu ʼaē ia Pesalemo 26, ʼe tokoni mai anai ke tou haʼele ʼi te agatonu.
“Fakamaʼa Toku ʼu Ifiifi Pea Mo Toku Loto”
8. Koteā te ako ʼe tou maʼu ʼi te kole ʼa Tavite kiā Sehova ke ina sivisivi tona ʼu ifiifi pea mo tona loto?
8 Neʼe faikole fēnei ia Tavite: “Sivisivi au, Ê Sehova, pea mo ʼahiʼahiʼi au; fakamaʼa toku ʼu ifiifi pea mo toku loto.” (Pesalemo 26:2) Ko te ʼu ifiifi ʼe tuʼu ʼi lalo ifo ʼi totatou tuʼa ʼo totatou sino. ʼE nā fakatātā ia tatatou ʼu manatu pea mo te ʼu meʼa ʼaē ʼi ʼotatou loto. Pea ko te loto ʼe ina fakatātā totatou ʼuhiga ʼaē ʼi loto—ia tatatou ʼu manatu, pea mo te ʼu meʼa ʼi ʼotatou loto. ʼI te temi ʼaē neʼe kole ai e Tavite kiā Sehova ke ina sivisivi ia ia, neʼe ina kole age ke ina vakavakaʼi ia tana ʼu manatu loloto pea mo te ʼu meʼa ʼaē ʼi tona loto.
9. ʼE fakamaʼa feafeaʼi e Sehova ia totatou ʼu ifiifi pea mo totatou loto?
9 Neʼe kolekole e Tavite ke fakamaʼa tona ʼu ifiifi pea mo tona loto. E feafeaʼi he fakamaʼa e Sehova ia te ʼu meʼa ʼaē ʼi ʼotatou loto? Neʼe hiva fēnei ia Tavite: “ ʼE au fakafetaʼi anai kiā Sehova ʼaē neʼe ina tokoniʼi au. Ei, neʼe fakatonutonuʼi au e toku ʼu ifiifi ʼi te pōʼuli.” (Pesalemo 16:7) Koteā te faka ʼuhiga ʼo tana ʼu palalau ʼaia? Ko te tokoni ʼa te ʼAtua neʼe malave ʼaupito ki te loto ʼo Tavite pea neʼe nofo ai, ʼo ina fakatonutonuʼi tana ʼu manatu. Koia ʼe toe feala ke feiā mo tatou mo kapau ʼe tou metitāsioʼi ʼaki he loto fakafetaʼi ia tana tokoni, ʼaē ʼe haʼu mai tana Folafola, mai tana kau fakafofoga, pea mai tana kautahi, pea mo tou faka fealagia ki te tokoni ʼaia ke nofo iā tatou. ʼE tou haʼele anai ʼi te agatonu mo kapau ʼe tou kole tuʼumaʼu kiā Sehova ke ina fakamaʼa feiā tatou.
‘Ko Tou Manavaʼofa ʼe ʼi ʼOku Muʼa’
10. Koteā ʼaē neʼe tokoni kiā Tavite ke haʼele ʼi te ʼu moʼoni ʼo te ʼAtua?
10 Neʼe toe ʼui fēnei e Tavite: “Ko tou loto manavaʼofa ʼe iā muʼa ʼo ʼoku mata, pea neʼe au haʼele ʼi tou moʼoni.” (Pesalemo 26:3) Neʼe mahino lelei ia Tavite ki te ʼu gāue loto manavaʼofa ʼa te ʼAtua, pea neʼe ina metitāsioʼi fakalelei. Neʼe hiva fēnei: “Fakafetaʼi kiā Sehova, Ê toku nefesi, pea ʼaua naʼa galo kiā te koe tana ʼu gāue fuli.” ʼI tana manatuʼi ia te “ ʼu gāue” ʼa te ʼAtua, neʼe toe ʼui fēnei e Tavite: “ ʼE fakahoko e Sehova he ʼu gāue faitotonu pea mo he ʼu tonu fakamāu maʼa nātou fuli ʼaē neʼe kākāʼi. Neʼe ina fakahā tona ʼu ala kiā Moisese, pea mo tana ʼu gāue ki te ʼu foha ʼo Iselaele.” (Pesalemo 103:2, 6, 7) ʼE lagi neʼe manatuʼi e Tavite ia te kākāʼi ʼo te kau Iselaele e te kau Esipito ʼi te temi ʼo Moisese. Kapau koia, pea ʼe mahino ia ko te metitāsioʼi ʼaē e Tavite ia te ʼu fakatuʼutuʼu ʼaē neʼe fakahā e Sehova kiā Moisese moʼo hāofaki ia Iselaele, neʼe malave ki tona loto pea mo ina fakaloto mālohiʼi ia tana fia haʼele moʼoni ʼaē ʼi te ʼu moʼoni ʼo te ʼAtua.
11. Koteā ʼaē ʼe feala ke tokoni mai ke tou haʼele ʼi te ala ʼo te agatonu?
11 Kapau ʼe tou lau tuʼumaʼu ia te Folafola ʼa te ʼAtua pea mo metitāsioʼi te ʼu meʼa ʼaē ʼe tou ako, ʼe ko he tahi ʼaia tokoni kiā tatou ke tou haʼele ʼi te ala ʼo te agatonu. Ohage la, ka tou manatuʼi ia te hola ʼa Sosefo mai te ʼu fai fakahala ʼo te ʼohoana ʼa Potifale ke nā fai he ʼu felāveʼi fakasino, ʼe tokoni moʼoni mai anai ke tou fakamamaʼo mai te ʼu fai fakahala feiā ʼaē ʼe hoko ʼi tatatou ʼu fale gāue, ʼi te ʼu faleako, peʼe ʼi he tahi ʼatu ʼu potu. (Senesi 39:7-12) E feafeaʼi ʼo ʼuhiga mo ni ʼu fai fakahala ʼi te faʼahi faka koloā, peʼe ʼi te fia ʼiloa peʼe ko te fia maʼu tuʼulaga ʼi te mālama ʼaenī? ʼE ʼi ai ia te faʼifaʼitaki ʼa Moisese, ʼaē neʼe fakafisi ki te ʼu koloā ʼo Esipito. (Hepeleo 11:24-26) Kapau ʼe tou manatuʼi ia te faʼa kātaki ʼa Sopo, ʼe tou lotomālohi anai ʼo nofo agatonu kiā Sehova ʼi te ʼu temi ʼaē ʼe tou māhahaki ai, pea mo te ʼu temi ʼaē ʼe tou fihifihia ai. (Sakopo 5:11) E feafeaʼi mo kapau ʼe fakatagaʼi tatou? ʼE tou lototoʼa anai mo kapau ʼe tou manatuʼi te ʼaluʼaga ʼo Taniela ʼi te luo ʼo te ʼu laione!—Taniela 6:16-22.
“Neʼe Mole Au Nofo Mo Te Hahaʼi Kākā”
12, 13. Ko te ʼu faʼahiga fakakaugā fea ʼaē ʼe tonu ke tou fakamamaʼo mai ai?
12 ʼI tana talanoa ʼo ʼuhiga mo te tahi meʼa ʼaē neʼe ina fakaloto mālohiʼi tana agatonu, neʼe ʼui fēnei e Tavite: “Neʼe mole au nofo mo te hahaʼi kākā; pea ʼe mole au hū ki te hahaʼi ʼaē ʼe nātou fufū tonatou ʼuhiga moʼoni. Neʼe au fehiʼa ki te kokelekasio ʼa te kau tagata agakovi, pea ʼe mole au nofo mo te kau agakovi.” (Pesalemo 26:4, 5) Ko Tavite neʼe mole gata pe ia tana mole nofo mo te hahaʼi agakovi kae neʼe toe fehiʼa foki ia ki te ʼu fakakaugā kovi.
13 E feafeaʼi kiā tatou? ʼE tou fakafeagai koa ki te hahaʼi kākā ʼaē ʼe ʼasi mai ʼi te televisio, ʼi te ʼu ʼata viteo, ʼi te ʼu ʼata sinema, mo te Internet, peʼe ʼi he tahi age ʼu faʼahi? ʼE tou fakamamaʼo koa mai iā nātou ʼaē ʼe nātou fufū tonatou ʼuhiga moʼoni? Ko ʼihi ʼi te fale gāue ʼe feala ke nātou aga fakakaumeʼa, kae ʼi tona fakahagatonu ʼe ʼi ai tanatou ʼu fakatuʼutuʼu kovi ʼo ʼuhiga mo tatou. ʼE tou fia kaumeʼa koa mo te hahaʼi ʼaē ʼe mole nātou haʼele ʼi te ʼu moʼoni ʼo te ʼAtua? ʼE fia fakahā e te kau ʼaposita ʼe nātou tauhi fakamalotoloto ki te ʼAtua, kae ʼe feala pe ke nātou fufū tanatou fia fakamamaʼo ia tatou mai iā Sehova. Kae e feafeaʼi mo kapau ʼe ʼi ai ʼihi ʼi te kokelekasio ʼe nātou maʼuli lua? Mo nātou foki ʼaia, ʼe nātou fufū tonatou ʼuhiga moʼoni. Ko Jayson ʼi te temi nei kua tagata faifekau faka minisitelio, kae ʼi tona temi tūpulaga neʼe ʼi ai tona ʼu fakakaugā feiā. ʼO ʼuhiga mo nātou ʼaia, ʼe ina ʼui fēnei: “ ʼI te tahi ʼaho neʼe ʼui fēnei mai e te tahi tūpulaga: ‘ ʼE mole maʼuhiga te ʼu meʼa ʼaē ʼe tou lolotoga fai nei heʼe ka hoko mai anai ia te tuʼu foʼou, ʼe tou mamate anai. ʼE mole tou lava ʼiloʼi anai te ʼu meʼa ʼaē ʼe tou lava fai ʼi te temi nei.’ Ko te ʼu palalau ʼaia neʼe ko he fakatokaga kiā au. Neʼe mole au fia mate mokā hoko mai anai te tuʼu foʼou.” Neʼe fakapotopoto ia Jayson ʼo mavae mai tona ʼu fakakaugā ʼaia. Neʼe fēnei ia te fakatokaga ʼa te ʼapositolo ko Paulo: “Aua naa koutou faihala: Ko te u fakakauga ae e kovi, e ina maumauʼi te u aga e lelei.” (1 Kolonito 15:33) ʼE maʼuhiga ke tou fakamamaʼo mai te ʼu fakakaugā kovi!
‘ ʼE Au Tala Anai Tau ʼu Gāue Fakaofoofo Fuli’
14, 15. E feafeaʼi hatatou ‘haʼele ʼo foliʼi ia te ʼaletale ʼo Sehova’?
14 Neʼe toe ʼui fēnei e Tavite: “ ʼE au fanofano anai ʼoku nima ʼi te maʼa, pea ʼe au haʼele anai ʼo foliʼi tou ʼaletale, Ê Sehova.” Koteā tona tupuʼaga? “Moʼo kalagaʼi leʼo lahi he ʼu fakavikiviki, pea mo tala tau ʼu gāue fakaofoofo fuli.” (Pesalemo 26:6, 7) Neʼe fia aga maʼa ia Tavite ke feala hana atolasio kiā Sehova pea mo fakahā ia tana tauhi kātoa ʼaē ki te ʼAtua.
15 Ko meʼa fuli ʼo ʼuhiga mo te tauhi moʼoni ʼi te tapenakulo pea ki muli age ʼi te fale lotu neʼe ko “he fakatata pea mo he ata o te u mooni o Selo.” (Hepeleo 8:5; 9:23) Ko te ʼaletale neʼe ina fakatātā ia te finegalo ʼo Sehova ʼaki ia te tali ʼaē ʼo te sākilifisio ʼo Sesu Kilisito moʼo fakamolemole ia te ʼu agahala ʼo te malamanei. (Hepeleo 10:5-10) ʼE tou fanofano ʼotatou nima ʼi te meʼa ʼaē ʼe totonu pea mo tou ‘haʼele ʼo foliʼi ia te ʼaletale ʼo Sehova’ ʼaki ia tatatou tui ki te sākilifisio ʼaia.—Soane 3:16-18.
16. Koteā anai te ʼu fua lelei ʼaē ʼe tou maʼu ʼi tatatou tala ia te ʼu gāue fakaofoofo ʼa te ʼAtua ki te hahaʼi?
16 Ka tou fakakaukauʼi ia te ʼu lelei fuli ʼaē ʼe tou maʼu ʼaki te totogi ʼaē neʼe foaki e Kilisito, ʼe mole tou fonu koa ʼi te loto fakafetaʼi kiā Sehova pea mo tona ʼAlo ulu tokotahi? Koia ʼe fakavikiviki totatou loto, ʼo tou fakahā ki te hahaʼi te ʼu gāue fakaofoofo ʼa te ʼAtua—mai te fakatupu ʼo te tagata ʼi te ʼōloto ʼo Eteni ʼo aʼu ki te toe fakatuʼu kātoa ʼo meʼa fuli ʼi te mālama foʼou ʼa te ʼAtua. (Senesi 2:7; Gaue 3:21) ʼE puipui anai ia tatou ʼi te faʼahi fakalaumālie mokā ʼe tou faka mafola ia te Puleʼaga pea mo tou fai ni ʼu tisipulo! (Mateo 24:14; 28:19, 20) Kapau ʼe lahi tatatou ʼu gāue, pea ʼe tokoni mai anai ia te faʼahi ʼaia ke mole fetogi tatatou ʼamanaki ki te ka haʼu, pea mo tou tui mālohi ki te ʼu fakapapau ʼa te ʼAtua, pea mo tou haga ʼofa kiā Sehova pea mo te hahaʼi.
“ ʼE Au Manako Ki Te Nofoʼaga ʼo Tou ʼApi”
17, 18. ʼE tonu ke feafeaʼi kiā tatou ia tatatou ʼu fono faka Kilisitiano?
17 Ko te tapenakulo, mo tona ʼaletale ʼaē neʼe fai ai te ʼu sākilifisio neʼe ko te potu tāfito ʼaia ʼo te tauhi kiā Sehova ʼi Iselaele. Moʼo fakahā ia tana leleiʼia ia te nofoʼaga ʼaia, neʼe faikole fēnei ia Tavite: “Sehova, ʼe au manako ki te nofoʼaga ʼo tou ʼapi pea mo te potu ʼaē ʼe nofo ai tou kolōlia.”—Pesalemo 26:8.
18 ʼE tou leleiʼia koa te ʼu fakatahiʼaga ʼaē ʼe tou fakatahitahi ai moʼo akoʼi pe ko ai ia Sehova? Ko te ʼu Fale Fono fuli ʼo te Puleʼaga pea mo te ʼu fakatuʼutuʼu fakalaumālie ʼaē ʼe fai tuʼumaʼu ai, ʼe ko te ʼu faʼahi tāfito ʼaia ʼo te tauhi moʼoni. Tahi ʼaē meʼa, ʼi te taʼu fuli ʼe ʼi ai tatatou ʼu fakatahi lalahi, mo te ʼu fakatahi ʼa te ʼu kokelekasio pea mo te ʼu fakatahi makehe ʼaho tahi. ʼI te ʼu fakatahi ʼaia ʼe fakahā ai e Sehova ia tana “ ʼu fakamanatu.” Kapau ʼe tou ako ke tou “manako lahi [ki te ʼu fakamanatu ʼaia],” ʼe tou fiafia anai ʼi te kau ki te ʼu fono ʼaia pea mo tou fakalogo lelei anai ki te ʼu akonaki ʼaē ʼe fai ai. (Pesalemo 119:167) ʼI meʼa fakaloto mālohi hatatou fakatahi mo he ʼu tēhina mo tuagaʼane ʼe nātou ʼoʼofa moʼoni kiā tatou takitokotahi, pea mo nātou fia tokoni mai ke tou haga haʼele ʼi te ala ʼo te agatonu!—Hepeleo 10:24, 25.
‘ ʼAua Naʼa Ke Toʼo Ia Toku Maʼuli’
19. Koteā te ʼu agahala ʼaē neʼe mole fia kau kiai ia Tavite?
19 Neʼe ʼiloʼi lelei e Tavite ia te ʼu fua kovi mo kapau ʼe mole kei haga haʼele ʼi te ʼu moʼoni ʼo te ʼAtua, koia neʼe ina ʼui fēnei ai: “ ʼAua naʼa ke toʼo fakatahi toku nefesi mo te kau agahala, mo toku maʼuli mo te hahaʼi ligi toto, ʼaē ʼe maʼu ʼi ʼonatou nima te ʼu aga fakavalevale, pea ʼe fonu te ʼu totogi fakafūfū ʼi tonatou nima mataʼu.” (Pesalemo 26:9, 10) Neʼe mole fia fakakaugā ia Tavite mo te hahaʼi heʼe lotu ʼaē neʼe mole pipiki ki te ʼAtua, te hahaʼi neʼe nātou fai te ʼu aga heʼeʼaoga peʼe nātou tali te ʼu totogi fakafūfū.
20, 21. Koteā te ʼu faʼahi ʼaē ʼe lava tupu ai hatatou fai he ʼu aga ʼe fakafeagai ki te ʼAtua?
20 Kua fonu ʼi te malamanei ia te ʼu aga heʼeʼaoga. ʼE tou sio ʼi te televisio, mo te ʼu nusipepa, pea mo te ʼu ʼata ki te ʼu aga heʼeʼaoga. (Kalate 5:19) Ko ʼihi kua nātou maʼuli popūla ki te ʼu faʼahi kehekehe ʼaē ʼe fakahā ai he ʼu felāveʼi fakasino heʼeʼaoga, ʼaē ʼi te agamāhani ʼe tupu ai tanatou fai he ʼu felāveʼi fakasino heʼeʼaoga. Ko te kau tūpulaga tāfito ʼaē ʼe tō ki te ʼu fakahala ʼaia. ʼI ʼihi fenua, ʼe ko he agamāhani ki he tama mo he taʼahine hanā fai gutu kākā, pea ʼe ko he fakaneke ʼaia ki te kau tūpulaga ke nātou manatu ʼe tonu ke nātou fai gutu kākā mo ni ʼu taʼahine peʼe mo ni ʼu tama. Logola ʼe mole heʼeki feala ke nātou ʼohoana heʼe kei nātou liliki fau, kae ʼe lahi te kau tūpulaga ʼe nātou fai te taʼi fakatahi ʼaia. ʼI te mālohi fau ʼo tonatou ʼu holi ki he ʼu felāveʼi fakasino, ʼe nātou fai te ʼu aga heʼeʼaoga ohage la ko te folonikasio.
21 ʼE toe kau pe foki kiai mo te hahaʼi lalahi. ʼE hā te heʼe agatonu, ʼi te aga fakakākā ʼaē ʼe fai ʼi te ʼu matani gāue, pea mo te ʼu tonu ʼaē ʼe kita fai ʼo mulimuli pe ki takita manatu. Kapau ʼe tou haʼele ʼi te ʼu ala ʼo te malamanei, pea ʼe tou mamaʼo anai mai iā Sehova. Tou ‘fehiʼa ki te meʼa ʼaē ʼe kovi, kae tou manako ki te meʼa ʼaē ʼe lelei’ pea mo tou haga haʼele ʼi te ala ʼo te agatonu.—Amosi 5:15.
“Hāofaki Au Pea Mo Fakahā Mai Ia Tou ʼOfa”
22-24. (a) Koteā te fakaloto mālohi ʼe koutou maʼu ʼi te ʼu palalau fakaʼosi ʼo te Pesalemo 26? (b) Koteā te hele ʼaē ka tou vakaʼi anai ʼi te alatike ka hoa mai?
22 Neʼe fakaʼosi e Tavite ia tana ʼu palalau ki te ʼAtua, ʼo ina ʼui fēnei: “Kiā au, ʼe au haʼele anai ʼi taku agatonu. Hāofaki au pea mo fakahā mai ia tou ʼofa. Ei, ʼe tuʼu anai ia toku vaʼe ʼi he koga meʼa tokalelei; ʼe au fakavikiviki anai kiā Sehova ʼi te lotolotoiga ʼo te kaugamālie ʼaē ʼe fakatahitahi.” (Pesalemo 26:11, 12) Ko te lotomālohi ʼa Tavite ke nofo agatonu, ʼe pipiki ki tana kole age ki te ʼAtua ke fakamolemole age kiā ia. ʼE ko he fakaloto mālohi ʼaia kiā tatou! Logola totatou ʼuhiga agahala, kae ʼe tokoni mai anai ia Sehova mo kapau ʼe tou faiga mālohi ke tou haʼele ʼi te ala ʼo te agatonu.
23 ʼI te ʼu ʼaluʼaga fuli ʼo totatou maʼuli, ʼofa pe ke tou fakahā ia tatatou fakaʼapaʼapa pea mo tatatou lagolago ki te pule faʼitaliha ʼa te ʼAtua. ʼE feala kiā tatou takitokotahi, ke tou kole kiā Sehova ke ina sivisivi pea mo fakamaʼa ia tatatou ʼu manatu pea mo te ʼu meʼa ʼaē ʼi ʼotatou loto. Kapau ʼe tou ako tuʼumaʼu ia te Folafola ʼa te ʼAtua, pea ʼe tou manatuʼi tuʼumaʼu anai ia tona ʼu moʼoni. Koia tou fakamamaʼo mālohi mai te ʼu fakakaugā kovi kae tou tapuakiʼi ia Sehova ʼi te lotolotoiga ʼo te kaugamālie ʼaē ʼe fakatahitahi. Tou faʼafai ʼo kau ki te faka mafola ʼo te Puleʼaga pea mo fai ni ʼu tisipulo, ʼo mole tou faka fealagia ai ki te malamanei ke ina pulihi tatatou ʼu felogoi lelei ʼaē mo te ʼAtua. ʼE feala ke tou falala ko Sehova ʼe ʼofa anai kiā tatou mo kapau ʼe tou faiga mālohi ke tou haʼele ʼi te ala ʼo te agatonu.
24 Ko te agatonu ʼe tonu ke ʼasi ʼi te ʼu ʼaluʼaga fuli ʼo totatou maʼuli, koia ʼe ʼaoga ai ke tou ʼiloʼi ia te hele fakamataku—ʼaē ko te ʼinu kava. ʼE tou vakaʼi anai ia te faʼahi ʼaia ʼi te alatike ʼaē ka hoa mai.
ʼE Kei Koutou Manatuʼi Koa?
• He koʼe ʼe feala ke fakamāuʼi ia te hahaʼi pea mo te kau ʼāselo ʼo mulimuli ki tanatou agatonu?
• Koteā te faka ʼuhiga ʼo te agatonu, pea koteā te faka ʼuhiga ʼo te haʼele ʼi te ala ʼo te agatonu?
• Koteā ʼaē ka tokoni mai anai ke tou haʼele ʼi te ala ʼo te agatonu?
• Ke feala hatatou nonofo agatonu, koteā te ʼu faʼahi ʼaē ʼe tonu ke tou ʼiloʼi pea mo tekeʼi?
[Paki ʼo te pasina 14]
ʼE ke kole tuʼumaʼu koa kiā Sehova ke ina sivisivi tau ʼu manatu?
[Paki ʼo te pasina 14]
ʼE ke taupau tuʼumaʼu koa ia te ʼu gāue manavaʼofa ʼo Sehova ʼi muʼa ʼo ʼou mata?
[Paki ʼo te pasina 15]
ʼE tou fakafiafia ia te loto ʼo Sehova ʼi tatatou nofo agatonu ʼi te ʼu temi ʼahiʼahi
[Paki ʼo te pasina 17]
ʼE koutou leleiʼia koa te ʼu fakatuʼutuʼu ʼa Sehova moʼo tokoni kiā koutou ke kotou haʼele ʼi te ala ʼo te agatonu?