He Koʼē ʼe Tonu Ke Kotou Taupau Maʼu Takotou Agatonu?

“Fakamāuʼi au, Ê Sehova, . . . ʼo mulimuli ki taku agatonu.”—PES. 7:8.

1, 2. Koteā he ʼu ʼaluʼaga māhani ʼe feala ke faigataʼa ai ki he Kilisitiano ke ina taupau maʼu ia tana agatonu?

KOTOU fakakaukauʼi age ia te ʼu ʼaluʼaga ʼaenī e tolu: ʼE manukiʼi te tama e tona ʼu kaugā ako. ʼE natou faiga ke ʼita, lagi ke tauvele peʼe fuhu mo nātou. ʼE ʼita anai koa, peʼe ina lolomi anai ia ia pea mo haga ʼalu? Ko te tagata ʼohoana ʼe nofo tokotahi ʼi tona ʼapi pea ʼe lolotoga fai tana ʼu kumi ʼi te Itineti. ʼE hā ʼi te olotinatea te pāki, ʼe ko te tuʼasila ʼe feala hana ʼalu kiai, pea mo sio ai ki ni ʼu pāki heʼeʼaoga ʼe fakahāhā ai. ʼE fia sio anai koa ki te ʼu pāki ʼaia peʼe ina fakatotonu anai ke ʼaua naʼa ina fai ia te faʼahi ʼaia? Ko te tuagaʼane ʼe fai palalau mo ʼihi tuagaʼane pea ʼe natou kamata fatufatuʼi he tahi age tuagaʼane ʼo te kōkelekāsio. ʼE kau anai koa mo ia ki te fai fatufatu ʼaia peʼe faiga anai ia ke natou palalau ki he tahi age meʼa?

² Logolā te kehekehe ʼo te ʼu ʼaluʼaga ʼaia, kae ʼe ʼi ai te meʼa e tahi ʼe natou tatau ai. ʼI tonatou ʼuhiga Kilisitiano, ʼe natou faiga fuli ke natou taupau maʼu ia tanatou agatonu. ʼE kotou manatuʼi koa ke kotou taupau maʼu ia takotou agatonu mokā kotou tauʼi tokotou ʼu tuʼania, te ʼu meʼa ʼaē ʼe ʼaoga kiā koutou, pea mo fai hakotou ʼu fakatuʼutuʼu ʼi tokotou maʼuli? ʼI te agamāhani, ʼe tōkakaga ia te hahaʼi ki tonatou ʼu faʼahiga faiteuteu, ke natou hao mai te mahaki, te ʼu faigataʼaʼia ʼo te taupau ʼo te maʼuli, te ʼu fihifihia ʼo tonatou ʼu kaumeʼa, peʼe lagi natou manamanatu kiā ia ʼaē ʼe natou manako ki ai. ʼE feala ke tou tōkakaga fau ki te ʼu faʼahi ʼaia. Kae koteā ʼaē ʼe maʼuhiga age kiā Sehova ʼi tana vakavakaʼi ia totatou loto? (Pes. 139:23, 24) ʼE maʼuhiga kiā ia tatatou agatonu.

3. Koteā ia te pilivilēsio ʼaē ʼe foaki mai e Sehova, pea koteā ʼaē kā tou vakaʼi anai ʼi te ʼalatike ʼaenī?

³ Ko Sehova, ia ia ʼaē ʼe ina foaki “te meʼa ʼofa lelei fuli pea mo te mōlaga haohaoa fuli,” neʼe ina foaki mai kiā tātou takitokotahi ia he ʼu meʼa ʼofa kehekehe. (Sake 1:17) ʼE tou loto fakafetaʼi kiā te ia ʼi tatatou maʼu he ʼu meʼa ʼofa ohagē ko te sino, te ʼatamai, he maʼuli ʼe hao mai te mahaki, pea mo ni ʼu fealagia kehekehe ʼe tou maʼu. (1 Ko. 4:7) Kae ʼe mole fakakinauʼi tātou e Sehova ke tou maʼu ia te agatonu. ʼE ina tuku ke tou filifili ʼe tātou totonu peʼe tou fia maʼu peʼe kailoa ia te kalitātē ʼaia. (Teu. 30:19) Koia ʼe ʼaoga ai ke tou vakavakaʼi pe koteā ia te agatonu. ʼE tou toe vakaʼi anai mo he ʼu tupuʼaga e tolu ʼo te maʼuhiga ʼaupitō ʼo te kalitātē ʼaia.

Koteā Te Agatonu?

4. Koteā te fakaʼuhiga ʼo te agatonu, pea koteā ʼaē ʼe tou ako mai te lao ʼa Sehova ʼo ʼuhiga mo te ʼu manu ʼaē neʼe sākilifisioʼi?

⁴ Tokolahi ʼe mole natou faʼa mahino lelei ki te fakaʼuhiga ʼo te agatonu. Ohagē lā, kā laupisi te hahaʼi fai politike ʼo ʼuhiga mo tanatou agatonu, kiā nātou ʼe hagē ia ʼe fakaʼuhiga ki hanatou mole aga fakakākā. ʼE maʼuhiga ia te kalitātē ʼaia, kae ʼe ko he koga pē ia ʼo te agatonu. Ohagē ko tona fakaʼaogaʼi ʼi te Tohi-Tapu, ko te agatonu ʼe fakaʼuhiga ki he mulimuli kātoa ki te ʼu pelesepeto ʼo te faitotonu pea mo te aga ʼaē ʼe tonu ke fai. Ko te ʼu kupu Fakahepeleo ʼo te kupu “agatonu” ʼe haʼu mai te kupu ʼe fakaʼuhiga ki he faʼahi ʼe kātoa peʼe mole hona mele. ʼE fakaʼaogaʼi te tahi kupu ʼi te ʼu kupu ʼaia ki te ʼu sākilifisio ʼaē neʼe momoli kiā Sehova. Neʼe ina tali te manu ʼaē neʼe sākilifisioʼi mo kapau neʼe heʼe mele peʼe kātoa. (Lau ia Levitike 22:19, 20.) Neʼe fakatonutonuʼi e Sehova ia nātou ʼaē neʼe natou talagataʼa ʼaki tonatou loto kātoa ki tana fakatotonu, ʼo natou momoli he ʼu manu ʼe ketu, mahaki peʼe kivi.—Mala. 1:6-8.

5, 6. (a) Ko te ʼu faʼifaʼitaki fea ʼe fakahā ai ʼe maʼuhiga kiā tātou ia te meʼa ʼaē ʼe kātoa? (b) Ko te hahaʼi agahala ʼe tonu koa ke natou haohaoa ke feala ai hanatou maʼu ia te agatonu? Kotou fakamahino.

⁵ ʼE mole ko he manatu faikehe te kumi pea mo fakamaʼuhigaʼi ia te meʼa ʼaē ʼe kātoa. Ohagē lā ko he tagata ʼe ina leleiʼia te tānaki ʼo te ʼu tohi kehekehe, ʼe ina maʼu ia te tohi maʼuhiga neʼe ina kumi talu mai fualoa, pea ina tokagaʼi ʼe ʼi ai te ʼu pāsina maʼuhiga ʼe puli. ʼI tana lotomamahi ʼaia, ʼe lagi ina tuku anai ia te tohi ʼaia ki te puha. Peʼe ko he fafine ʼe haʼele ʼi te matātai, ʼe ina tae he ʼu figota. ʼI tana punamaʼuli ʼuhi ko te kehekehe pea mo te matalelei ʼo te ʼu figota, ʼe ina toe vakavakaʼi ia te ʼu figota ʼaia. Ko te figota fea ʼaē kā ina taupau? Te ʼu figota ʼaē ʼe kei kātoa, ʼe mole honatou mele. ʼO toe fēia, ʼe kumi e te ʼAtua ia te hahaʼi ʼaē ʼe kātoa ia tonatou loto kiā te ia.—2 Fkma. 16:9.

⁶ Kae ʼe lagi kotou feʼekeʼaki anai, peʼe tonu koa ke tou haohaoa ke tou maʼu ia te agatonu. ʼUhi ʼaē ʼe tou agahala pea mo heʼe haohaoa, ʼe lagi tou manatu ʼe tou hagē ko he tohi ʼe mole kātoa tona ʼu pāsina peʼe ko he figota ʼe ʼi ai hona mele. ʼE kotou manatu fēia koa ʼi ʼihi temi? Kotou tui papau ko Sehova ʼe mole ina fakamaʼua mai ke tou haohaoa. ʼE mole ina fakamaʼua mai he ʼu meʼa ʼe mole tou lavaʼi.a (Pes. 103:14; Sake 3:2) Kae ʼe loto ia ke tou taupau maʼu ia tatatou agatonu. ʼE ʼi ai koa he kehekehe ʼo te haohaoa pea mo te agatonu? ʼEī. Tou toʼo te faʼifaʼitaki: Ko he tūpulaga ʼe manako ki te taʼahine ʼaē ʼe fakatuʼutuʼu ke ʼohoana mo ia. ʼE mahino ia, ʼe mole ʼamanaki ia ke haohaoa ia te taʼahine. Kae ʼe ʼamanaki anai ke ʼofa kiā ia ʼaki tona loto kātoa, ke manako kiā ia tokotahi pē. ʼO toe fēia aipē, ko Sehova ʼe ko “te ʼAtua ʼe ina fakamaʼua he pipiki ʼāteaina pē kiā te [ia].” (Eke. 20:5) ʼE mole ʼamanaki ia ke tou haohaoa, kae ke tou ʼoʼofa age kiā te ia ʼaki totatou loto kātoa, ʼo tou tauhi kiā te ia tokotahi pē.

7, 8. (a) Koteā te faʼifaʼitaki neʼe tuku mai e Sesu ʼo ʼuhiga mo te agatonu? (b) Ohagē ko tona fakahā ʼi te Tohi-Tapu, koteā te fakaʼuhiga moʼoni ʼo te agatonu?

⁷ ʼE lagi tou manatuʼi ia te tali ʼaē neʼe fai e Sesu ʼi te fehuʼi age ʼaē pe ko te lao fea ʼaē ʼe maʼuhiga ʼaupitō age ʼi te ʼu lao fuli. (Lau ia Maleko 12:28-30.) Neʼe mole gata ʼaki pē ʼi te foaki age ʼaē e Sesu ia te tali kae neʼe ina toe maʼuliʼi ia te ʼu palalau ʼaē neʼe ina fai age. Neʼe ina tuku ia he faʼifaʼitaki lelei ʼaupitō ʼi tana ʼofa ʼaē kiā Sehova ʼaki tona ʼatamai kātoa, tona loto kātoa, tona nefesi kātoa pea mo tona mālohi kātoa. Neʼe ina fakahā ko te agatonu ʼaia ʼe mole gata pē ʼi te palalau, kae ʼe toe hā ʼi te ʼu gāue ʼaē ʼe fai ʼaki he loto ʼe maʼa. Ke tou taupau maʼu ia tatatou agatonu, ʼe tonu ke tou mulimuli ki te ʼu tapugā vaʼe ʼo Sesu.—1 Pet. 2:21.

⁸ Ohagē ko tona fakahā ʼi te Tohi-Tapu, ʼe fakaʼuhiga fēnei ia tatatou agatonu: ko he pipiki ʼaki tokita loto kātoa kiā Ia tokotahi pē ʼaē ʼe ʼi selō, ia Sehova ʼAtua, ki tona finegalo pea mo tana fakatuʼutuʼu. Ko te taupau maʼu ʼo te agatonu, ko tona fakaʼuhiga ʼe tou kumi tāfito anai ke tou fakafiafia ia Sehova ʼAtua ʼi te ʼaho fuli ʼo totatou maʼuli. Ko te ʼu meʼa ʼaē ʼe maʼuhiga kiā te ia ʼe ko te ʼu meʼa ʼaē ʼe maʼuhiga kiā tātou. Tou vakaʼi age muʼa ia te ʼu tupuʼaga e tolu ʼo te maʼuhiga ʼaē ʼo te faʼahi ʼaia.

1. Tatatou Agatonu Pea Mo Te Fakafihiʼi ʼo Te Pule Faʼitaliha ʼa Sehova

9. Koteā te pikipikiga ʼo tatatou agatonu takitokotahi pea mo te fehuʼi ʼo ʼuhiga mo te pule faʼitaliha ʼo te ʼatulaulau?

⁹ ʼE mole fakalogo ia te pule faʼitaliha ʼa Sehova ki tatatou agatonu. Ko tana pule faʼitaliha ʼe faitotonu, mo heʼegata, pea ʼe pule ia ki te ʼatulaulau. ʼE fēia tuʼumaʼu pē anai, tatau aipē pe koteā ʼaē ʼe ʼui peʼe fai e he tahi. Kae neʼe laukoviʼi ia te pule faʼitaliha ʼa te ʼAtua ʼi te lagi pea ʼi te kele. Koia ʼe tonu ai ke lagavaka ia te ʼAtua ʼo ʼuhiga mo tona tuʼulaga pule iā muʼa ʼo te hahaʼi—ke ina fakamoʼoni ʼe tonu ko Ia ʼaē ʼe pule, ʼe faitotonu tana pule pea ʼe ina fai ʼaki te ʼofa. ʼI totatou ʼuhiga kau Fakamoʼoni ʼa Sehova, ʼe tou leleiʼia te fai palalau mo he tahi ʼe fia logo anai ʼo ʼuhiga mo te pule faʼitaliha ʼa te ʼAtua ʼo te ʼatulaulau. Kae kiā tātou takitokotahi, ʼe tou feafeaʼi ʼo ʼuhiga mo te fihi ʼaia neʼe lagaʼi? ʼE tou fakahā feafeaʼi ko Sehova ʼaē ʼe tou lagolago ki ai ke liliu ko totatou Tuʼi? ʼAki tatatou taupau maʼu ia tatatou agatonu.

10. Koteā te loi neʼe lau e Satana ʼo ʼuhiga mo te agatonu ʼa te hahaʼi, pea ʼe kotou fia tali feafeaʼi anai ki ai?

¹⁰ Kotou tokagaʼi ia te maʼuhiga ʼo takotou agatonu ʼo ʼuhiga mo te pule faʼitaliha ʼa te ʼAtua. Neʼe lau e Satana ʼe mole he tahi ʼe lagolago anai ki te pule faʼitaliha ʼa te ʼAtua, ʼe mole he tahi ʼe tauhi anai kiā Sehova ʼaki he ʼofa moʼoni. Iā muʼa ʼo te kau ʼāselo tokolahi ʼaē neʼe fakatahitahi, neʼe ʼui fēnei e te Tēvolo kiā Sehova: “Ko te kili maʼa te kili, pea ko meʼa fuli ʼaē ʼe maʼu e te tagata, ʼe ina foaki anai ia moʼo haofaki tona maʼuli.” (Sopo 2:4) Kotou tokagaʼi neʼe mole leakovi pē ia Satana ki te tagata faitotonu ko Sopo kae neʼe toe leakovi foki ki te hahaʼi fuli pē. Koia ʼe fakahigoaʼi ai ʼi te Tohi-Tapu ia Satana ko “ia ʼaē ʼe ina fakakoviʼi totatou ʼu tehina.” (Fakh. 12:10) ʼE ina manukiʼi ia Sehova ʼo ina lau ko te kau Kilisitiano, pea mo koutou, ʼe mole kotou nonofo agatonu anai. ʼE lau e Satana ʼe kotou laukovi anai kiā Sehova moʼo haofaki ia tokotou maʼuli. Koteā takotou manatu ʼo ʼuhiga mo te ʼu loi ʼaia ʼe lau e Satana ʼo ʼuhiga mo koutou? ʼE mole kotou fia maʼu koa he faigamālie moʼo fakamoʼoni ai ko Satana ʼe gutuloi? ʼAki takotou taupau maʼu ia takotou agatonu, ʼe feala ke kotou fai ia te faʼahi ʼaia.

11, 12. (a) Ko te ʼu faʼifaʼitaki fea ʼe fakahā ai ko te ʼu tonu ʼaē ʼe tou fai ʼi te ʼaho fuli ʼe ʼi ai tonatou pikipikiga mo tatatou agatonu takitokotahi? (b) He koʼē ʼe ko he pilivilēsio ia te taupau maʼu te agatonu?

¹¹ ʼE liliu ʼo maʼuhiga tatatou aga pea mo te ʼu meʼa ʼaē ʼe tou filifili ke tou fai, ʼuhi he pipiki kiai tatatou agatonu. Tou toe vakaʼi age mo te ʼu ʼaluʼaga e tolu ʼaē neʼe tou talanoa kiai ʼi te kamataʼaga ʼo te ʼalatike. ʼE taupau feafeaʼi anai e te tama, te tagata ʼohoana, pea mo te tuagaʼane tanatou agatonu? Ko te tama ʼaē ʼe fakahalaʼi e tona ʼu kaugā ako kua teitei pē ke ʼita, kae ʼe ina manatuʼi ia te fakatotonu ʼaenī: “ ʼAua naʼa kotou lagavaka, kau ʼofaina, kae kotou tuku ke fakalaka te ʼita; koteʼuhi neʼe tohi fēnei: ‘ ʼE ʼaʼaku te lagavaka; ʼe au liufaki anai te totogi, ko te ʼui ʼaia ʼa Sehova.’ ” (Loma 12:19) ʼE haga ʼalu te tama. Ko te tagata ʼohoana ʼaē ʼe ina fakaʼaogaʼi te Itineti neʼe feala hana ʼalu ki te tuʼasila ʼaē ʼe fakahāhā ai ia te ʼu pāki heʼeʼaoga, kae ʼe ina manatuʼi ia te pelesepeto ʼaē ʼe tou maʼu ʼi te ʼu palalau ʼaenī ʼa Sopo: “Neʼe au fai te fuakava mo toku ʼu mata. Koia ʼe lava feafeaʼi anai haku tokagaʼi he taʼahine tāupoʼou?” (Sopo 31:1) ʼO toe fēia, ʼe fakafisi ia te tagata ke sio ki he ʼu pāki heʼeʼaoga, ʼo ina tekeʼi ia te ʼu fakahala ʼaia ohagē ko he meʼa ʼe fakatupu mate. Ko te tuagaʼane ʼaē ʼe fai palalau mo ʼihi fafine pea mo logo ki he ʼu fai fatufatu peʼe natou laukovi, ʼe ina tāʼofi anai tona ʼalelo, ʼo ina manatuʼi ia te tokoni ʼaenī: “Ke takitahi faiga ia tātou ke leleiʼia ʼe tona kāiga ʼi te meʼa ʼaē ʼe lelei, ʼo ʼuhiga mo tona laga ake ʼo ia.” (Loma 15:2) ʼE mole fakalotomālohi ia te fai fatufatu ʼaē ʼe feala ke ina toe lau ki he tahi. ʼE mole fua lelei ki tona tehina Kilisitiano; pea ʼe mole fiafia ai tana Tamai. Koia ʼe ina puleʼi ia tona ʼalelo pea mo fakahaga ia te fai palalau ki he tahi age meʼa.

¹² ʼI te ʼu ʼaluʼaga takitahi ʼaia, ʼe filifili anai e te Kilisitiano ia te meʼa ʼaē ʼe ina fai, ohagē ʼe ina ʼui fēnei: ‘Ko Sehova ko toku Pule. ʼE au fai anai ʼi te ʼaluʼaga ʼaenī ia te meʼa ʼaē ʼe fakafiafia ai tona loto.’ Kā kotou filifili he ʼu meʼa peʼe kotou fai he ʼu tonu, ʼe kotou toe faiga koa ke kotou fakafiafia ia Sehova? Kapau ʼe kotou fai ia te faʼahi ʼaia, pea ʼe kotou mulimuli anai ki te ʼu palalau fakamalave loto ʼaē iā Tāʼaga Lea 27:11: “Ke ke fakapotopoto ê toku foha, pea mo ke fakafiafia toku loto, ke feala haku tali kiā ia ʼaē ʼe fakalaga fihi mai kiā te au.” ʼE ko he toe pilivilēsio lahi ʼe tou maʼu ke tou fakafiafia ia te loto ʼo te ʼAtua! ʼE mole tuha anai koa mo te ʼu faiga ʼaupitō ʼaē ke tou fai moʼo taupau maʼu ia tatatou agatonu?

2. ʼE Fakamāuʼi Tātou e Sehova ʼo Fakatafito Ki Tatatou Agatonu

13. ʼE fakahā feafeaʼi e te ʼu palalau ʼaē neʼe fai e Sopo pea mo Tavite, ʼe fakamāuʼi tātou e Sehova ʼo fakatafito ki tatatou agatonu?

¹³ ʼE tou fakatokagaʼi ko tatatou taupau maʼu ia te agatonu, ʼe feala ai hatatou lagolago ki te pule faʼitaliha ʼa Sehova. ʼE fakatafito kiai e te ʼAtua ia tana fakamāuʼi tātou. Neʼe mahino lelei kiā Sopo ia te moʼoni ʼaia. (Lau ia Sopo 31:6.) Neʼe ʼiloʼi e Sopo ko te ʼAtua ʼe ina fua te mālamanei kātoa ʼi he ʼu “meʼa fua ʼe totonu,” ʼo ina fakaʼaogaʼi Tana lēkula haohaoa moʼo sivisivi ia tatatou agatonu. Neʼe toe fēia mo te ʼu palalau ʼaē neʼe fai e Tavite, ʼo ina ʼui fēnei: “Ko Sehova totonu ʼe ina fakatūʼā anai ia te hahaʼi. Fakamāuʼi au, Ê Sehova, ʼo mulimuli ki toku faitotonu pea ʼo mulimuli ki toku agatonu. . . . Pea ko te ʼAtua, ʼaē ʼe faitotonu, ʼe ina sivisivi te loto pea mo te ʼu ifiifi.” (Pes. 7:8, 9) ʼE tou ʼiloʼi ʼe feala ke sio te ʼAtua ki te ʼu faʼahi loloto ʼaē ʼi te loto ʼo he tahi, ʼaē ʼe fakatā ki “te loto pea mo te ʼu ifiifi.” Kae ʼe tonu ke tou manatuʼi te meʼa ʼaē ʼe ina kumi. Ohagē ko tona ʼui e Tavite, ʼe fakamāuʼi tātou e Sehova ʼo mulimuli ki tatatou agatonu.

14. He koʼē ʼe mole tonu ke tou ʼui ʼe mole feala ke tou taupau maʼu ia tatatou agatonu ʼuhi ko totatou ʼuhiga agahala?

¹⁴ Kotou fakakaukauʼi age muʼa ia Sehova ʼAtua ʼe ina sivisivi ia te loto ʼo te ʼu toko lauʼi miliale hahaʼi ʼo te temi nei. (1 Fkma. 28:9) Ko hahaʼi ʼe fia ʼe ina tokagaʼi ʼe natou taupau maʼu ia tanatou agatonu? ʼE mahino ia ʼe mole natou hahaʼi! Kae ʼe mole tonu ke tou ʼui ʼe mole feala hatatou taupau maʼu ia tatatou agatonu heʼe lahi fau tatatou ʼu hala. Kailoa ia, ʼe tonu ke tou falala, ohagē ko Tavite pea mo Sopo, ko Sehova ʼe sio anai ki tatatou taupau maʼu ia tatatou agatonu, logolā totatou ʼuhiga agahala. Kotou manatuʼi, ko he tahi ʼe haohaoa ʼe mole ʼui leva ʼe ina taupau maʼu anai ia tana agatonu. Neʼe ko hahaʼi haohaoa pē e toko tolu neʼe māʼuʼuli ʼi te kele nei, pea ko te toko lua, ia Atama mo Eva, neʼe mole nā taupau maʼu ia tanā agatonu. Kae ko te toko lauʼi miliona hahaʼi agahala neʼe natou lava taupau maʼu ia tanatou agatonu. ʼE toe feala pē foki mo koutou.

3. ʼE Maʼuhiga Ia Te Agatonu Ki Tatatou ʼAmanaki

15. Neʼe fakahā feafeaʼi e Tavite ia te maʼuhiga ʼaē ʼo te agatonu ki tatatou ʼamanaki ki te kā haʼu?

¹⁵ ʼUhi ʼaē ʼe fakamāuʼi tātou e Sehova ʼo fakatafito ki tatatou agatonu, koia ʼe maʼuhiga ai tatatou agatonu ki tatatou ʼamanaki ki te kā haʼu. Neʼe ʼiloʼi e Tavite ʼe moʼoni ia te faʼahi ʼaia. (Lau ia Pesalemo 41:12.) Neʼe maʼuhiga kiā ia te ʼamanaki ʼaē ke ina maʼu ʼo talu ai ia te tokaga ʼofa ʼo te ʼAtua. Ohagē ko te kau Kilisitiano moʼoni iā ʼaho nei, neʼe ʼamanaki ia Tavite ki te maʼuli heʼegata, ʼo haga nofo ovi kiā Sehova ʼAtua ʼi tana tauhi ʼaē kiā te ia. Neʼe mahino kiā Tavite ia te maʼuhiga ʼaē ʼo tana taupau maʼu ia tana agatonu mo kapau neʼe tonu ke sio ki te fakahoko ʼo tana ʼamanaki. ʼO toe fēia pē, ko Sehova ʼe tokoni mai, ʼe ina akoʼi tātou, mo takitaki tātou, pea mo tapuakina tātou ʼi tatatou taupau maʼu ia tatatou agatonu.

16, 17. (a) He koʼē ʼe kotou fakatotonu ke kotou taupau tuʼumaʼu pē ia takotou agatonu? (b) Koteā te ʼu fehuʼi ʼaē kā tou vakaʼi anai ʼi te ʼalatike kā hoa mai?

¹⁶ Ko te ʼamanaki ʼe maʼuhiga ke tou fiafia ai ʼi te temi nei. ʼE ina foaki mai ia te fiafia ʼaē ʼe ʼaoga moʼo tauʼi ia te ʼu temi faigataʼa. Ko te ʼamanaki ʼe feala ke ina puipui mo tatatou fakakaukau. Kotou manatuʼi, ʼe fakatatau ʼi te Tohi-Tapu ia te ʼamanaki ki he puloga. (1 Tes. 5:8) Ohagē ko te puipui e te puloga ia te ʼulu ʼa he tagata sōlia ʼi te tau, ko te ʼamanaki ʼe ina puipui totatou ʼatamai mai he ʼu manatu ʼe kovi ʼe fakamafola e Satana ʼi te tuʼu ʼāfea ʼaenī kā pulihi. ʼE mole he ʼuhiga ʼo totatou maʼuli mokā ʼe mole ʼi ai hatatou ʼamanaki. ʼE tonu ke tou vakavakaʼi fakahagatonu ia tātou totonu, ʼo tou vakaʼi fakalelei pe feafeaʼi ia tatatou agatonu pea mo te ʼamanaki ʼaē ʼe pipiki kiai. ʼAua naʼa galo kiā koutou kā kotou taupau maʼu ia takotou agatonu, pea ʼe kotou lagolago anai ki te pule faʼitaliha ʼa Sehova pea mo haofaki takotou ʼamanaki maʼuhiga ʼaē ki te kā haʼu. ʼOfa pē ke kotou taupau tuʼumaʼu ia takotou agatonu!

¹⁷ Mai tona ʼaluʼaga ʼaē ʼe maʼuhiga ia te agatonu, ʼe tonu ke tou vakaʼi te tahi atu ʼu fehuʼi. Koteā ʼaē ʼe tonu ke tou fai ke tou maʼu ia te agatonu? ʼE feafeaʼi hatatou taupau maʼu ia te agatonu? Pea koteā ʼaē ʼe feala ke fai e he tahi mokā neʼe hoko he temi neʼe mole ina taupau maʼu ai ia tana agatonu? ʼE tou vakaʼi anai ʼi te ʼalatike kā hoa mai ia te ʼu fehuʼi ʼaia.

[Nota]

ʼE Kotou Tali Feafeaʼi Anai?

• Koteā te agatonu?

• Koteā te pikipikiga ʼo te agatonu pea mo te fehuʼi ʼo ʼuhiga mo te pule faʼitaliha ʼo te ʼatulaulau?

• ʼE fakatafito feafeaʼi ia tatatou ʼamanaki ki tatatou agatonu?

[Paki ʼo te pasina 13]

ʼI te ʼaho fuli pē ʼo totatou maʼuli ʼe tou felāveʼi ai mo he ʼu tuʼuga ʼaluʼaga ʼe natou ʼahiʼahiʼi ai tatatou agatonu