ʼE Kotou Taupau Maʼu Anai Koa Ia Takotou Agatonu?

“ ʼO aʼu ki toku mate, ʼe mole au tuku anai taku agatonu!”—SOPO 27:5.

1, 2. Koteā ʼaē ʼe tonu ke tou maʼu, pea ko te ʼu fehuʼi fea ʼaē kā tou vakaʼi anai?

KOTOU fakakaukauʼi age muʼa ʼe kotou sioʼi te pepa ʼe pāki ai te laga ʼo he fale. ʼE kotou punamaʼuli ʼi te tohi lelei ʼo te pāki ʼaia. ʼE kotou fiafia ʼi takotou fakakaukauʼi ia te ʼu lelei ʼo te ʼapi ʼaia kiā koutou pea mo tokotou fāmili. Kae ʼe mahino ia kiā koutou ko te pepa ʼaia ʼo te pāki ʼo te fale pea mo takotou fakakaukau ʼo ʼuhiga mo te ʼapi, ʼe mole ʼi ai anai hona ʼaoga mo kapau ʼe mole kotou laga ia te ʼapi, mo nonofo ai, pea mo tokaga fakalelei kiai.

² ʼO toe fēia pē, kapau ʼe maʼuhiga kiā tātou ia te agatonu, pea ʼe ʼaoga anai kiā tātou pea mo nātou ʼaē ʼe tou ʼoʼofa ai. Kae ʼe mole lahi anai ia te ʼu fua lelei ʼaē kā tou maʼu mokā ʼe tou fakakaukau pē ki te ʼu lelei ʼo te agatonu, kae ʼe mole tou maʼu pea mo taupau maʼu ia tatatou agatonu Fakakilisitiano. ʼI te mālamanei, ʼi te agamāhani ko te laga ʼo he fale ʼe totogi kovi. (Luka 14:28, 29) ʼO toe hagē pē ko te maʼu ʼo te agatonu, ʼe tonu ke tou fakaʼaogaʼi he temi pea mo he ʼu faiga ʼe lahi kiai, heʼe ʼi ai anai tona ʼu fua lelei. Koia tou vakaʼi ia fehuʼi e tolu: ʼE feafeaʼi hatatou maʼu ia te agatonu Fakakilisitiano? ʼE tou lava taupau maʼu feafeaʼi ia tatatou agatonu? Koteā ʼaē ʼe feala ke tou fai mo kapau neʼe ʼi ai he temi neʼe mole taupau maʼu e he tahi tana agatonu?

ʼE Feafeaʼi Hatatou Maʼu Ia Te Agatonu?

3, 4. (a) ʼE tokoni feafeaʼi mai ia Sehova ke tou maʼu ia te agatonu? (b) ʼE tou lava maʼu feafeaʼi ia te agatonu, ohagē ko te faʼifaʼitaki ʼaē neʼe tuku mai e Sesu?

³ Neʼe tou vakaʼi ʼi te ʼalatike ʼaenī kua ʼosi, ko Sehova neʼe ina foaki mai ia te pilivilēsio ʼaē ke tou filifili peʼe tou fia maʼu ia te agatonu peʼe kailoa. Kae meʼa fakafiafia, heʼe mole ina tuku fēiaʼi tātou mokā tou fia maʼu ia te agatonu. ʼE ina akoʼi mai peʼe feafeaʼi hatatou maʼu ia te kalitātē maʼuhiga ʼaia, pea ʼe ina foaki lahi mai ia tona laumālie māʼoniʼoni, ʼaē ʼe tokoni mai ke tou maʼuliʼi ia tana ʼu akonaki. (Luka 11:13) ʼE ina toe foaki mai ia te puipui fakalaumālie kiā nātou ʼaē ʼe natou faiga ke natou haʼele ʼi te agatonu.—Taag. 2:7.

⁴ ʼE akoʼi feafeaʼi mai e Sehova ke tou maʼu ia te agatonu? ʼE ina akoʼi tāfito tātou ʼaki tana fekauʼi mai ia tona ʼAlo ko Sesu ki te kele. Neʼe fakalogo kātoa Sesu ʼi tona maʼuli. “Neʼe talagafua ʼo aʼu ki te mate.” (Filp. 2:8) Iā meʼa fuli pē ʼaē neʼe ina fai, neʼe fakalogo ia Sesu ki tana Tamai ʼaē ʼe ʼi selō, māʼia mo te ʼu temi ʼaē neʼe faigataʼa ʼaupitō ai. Neʼe ina ʼui fēnei kiā Sehova: “Ke mole ko toku finegalo ʼaē ʼe tonu ke fai, kae ʼo koe ia.” (Luka 22:42) ʼE lelei ke tou tahi fai e tātou takitokotahi ia te fehuʼi ʼaenī: ‘ ʼE au fakalogo koa ohagē ko Sesu?’ ʼI tatatou haga fakalogo ʼaki he ʼu manatu ʼe lelei, ʼe tou maʼu ai anai ia te agatonu. Tou vakaʼi he ʼu faʼahi ʼo te maʼuli ʼaē ʼe maʼuhiga ʼaupitō ai ia te fakalogo.

5, 6. (a) Neʼe fakahā feafeaʼi e Tavite ia te maʼuhiga ʼaē ke tou taupau maʼu ia te agatonu māʼiapē lā mokā ʼe mole sio mai niʼihi? (b) Koteā ia te faigataʼaʼia ʼe tau iā ʼaho nei mo te kau Kilisitiano ʼo ʼuhiga mo tanatou taupau maʼu ia tanatou agatonu mokā nātou tokotahi?

⁵ ʼE tonu ke tou fakalogo kiā Sehova māʼiapē lā mokā lagi tou nonofo tokotahi. Neʼe tohi e te tagata fai pesalemo ko Tavite ia te maʼuhiga ʼo te agatonu ʼi te ʼu lakaga ʼaē neʼe lagi nofo tokotahi ai. (Lau ia Pesalemo 101:2.) ʼI tona ʼuhiga hau, neʼe hā tuʼumaʼu pē Tavite iā muʼa ʼo te hahaʼi. ʼE mahino ia neʼe lahi te ʼu lakaga ʼaē neʼe sioʼi ai ia ia e te kaugamālie. (Vakaʼi ia Pesalemo 26:12.) Ko te taupau maʼu ʼo te agatonu ʼi te ʼu temi ʼaia neʼe maʼuhiga, heʼe ko te hau neʼe tonu ke ina tuku he faʼifaʼitaki lelei ki tana hahaʼi. (Teu. 17:18, 19) Kae neʼe ʼiloʼi e Tavite ʼi te temi ʼaē neʼe tokotahi ai, ‘ ʼi tona ʼapi,’ neʼe kei ʼaoga pē ke haʼele ʼi te agatonu. ʼE feafeaʼi ʼo ʼuhiga mo tātou?

⁶ Iā Pesalemo 101:3, ʼe tou maʼu ia te ʼu palalau ʼaenī ʼa Tavite: “ ʼE mole au tuku anai he meʼa ʼe kovi iā muʼa ʼo toku ʼu mata.” ʼE lahi te ʼu lakaga iā ʼaho nei ʼaē ʼe feala ke sio ai totatou ʼu mata ki he ʼu meʼa ʼe kovi, tāfito lā mokā tou tokotahi. Kua liliu ia te Itineti ko he fihifihia ki te hahaʼi mokā natou tokotahi. ʼE faigafua hatatou sioʼi ia he ʼu meʼa ʼe kovi, pea mo he ʼu pāki ʼe hā ai ni ʼu felāveʼi fakasino heʼeʼaoga. Kae kapau ʼe tou fai te faʼahi ʼaia, ʼe tou fakalogo anai koa ki te ʼAtua ʼaē neʼe ina takitaki ia Tavite ke ina tohi ia te ʼu palalau ʼaē ʼi te kamataʼaga ʼo te palakalafe? Ko te ʼu pāki ʼaē ʼe hā ai te ʼu felāveʼi fakasino heʼeʼaoga ʼe ʼi ai tona ʼu fua kovi, heʼe natou fakatupu he ʼu holi ʼe kovi pea mo te mānumānu, ʼe natou maumauʼi te leʼo ʼo loto, mo te ʼu maʼuli fakataumātuʼa pea mo nātou ʼaē ʼe natou sioʼi te ʼu pāki heʼeʼaoga ʼaia.—Taag. 4:23; 2 Ko. 7:1; 1 Tes. 4:3-5.

7. Ko te pelesepeto fea ʼaē kā tokoni mai, ke tou taupau maʼu ia tatatou agatonu ʼi te ʼu temi ʼaē ʼe tou nonofo tokotahi ai?

⁷ ʼE mahino ia, ʼe mole he temi ʼe nofo tokotahi ai he kaugana ʼa Sehova. ʼE sioʼi tātou e tatatou Tamai, ʼaki he toe ʼofa lahi. (Lau ia Pesalemo 11:4.) ʼI toe fiafia lahi ʼa Sehova ʼi tana sio ifo ʼaē ʼe kotou tauʼi ia te fakahala! ʼI takotou fai fēia, ʼe kotou tokagaʼi ia te fakatokaga ʼaē ʼe tou maʼu ʼi te ʼu palalau ʼa Sesu iā Mateo 5:28. Pea kotou fakatotonu ke ʼaua naʼa kotou sisio ki he ʼu pāki ʼaē kā fakaneke anai koutou ke kotou fai te meʼa ʼaē ʼe kovi. ʼAua naʼa kotou liʼaki takotou agatonu ʼaē ʼe maʼuhiga, moʼo fai ia te aga ʼaē ʼe fakaufiufi, ʼaē ko te sioʼi peʼe ko te lau ʼo he ʼu tohi ʼe fakahā ai he ʼu felāveʼi fakasino heʼeʼaoga!

8, 9. (a) Ko te faigataʼaʼia fea neʼe hoko ki te agatonu ʼa Taniela pea mo tona ʼu kaumeʼa? (b) ʼE fakafiafia feafeaʼi e te kau Kilisitiano tūpulaga iā ʼaho nei ia Sehova pea mo tonatou ʼu tehina mo tuagaʼane?

⁸ ʼE feala ke tou toe maʼu ia te agatonu ʼaki tatatou fakalogo ʼaē kiā Sehova ʼi te lotolotoiga ʼo he ʼu hahaʼi ʼe mole tui. Kotou manatuʼi ia Taniela pea mo tona ʼu kaumeʼa e toko tolu. Neʼe kei natou tūpulaga pea neʼe natou ʼaunofo ʼi Papiloni. ʼI te fenua ʼaia, ʼi te lotolotoiga ʼo te hahaʼi neʼe mole tui pea neʼe mole natou ʼiloʼi ia Sehova, neʼe fakaneke ia te kau Hepeleo ʼaia ʼe toko fā ke natou kai ki te ʼu meʼa kai neʼe tapuʼi e te Lao ʼa te ʼAtua. Neʼe faigafua pē maʼa te ʼu tama ʼaia hanatou manatu ʼe mole ko he aga ʼaia ʼe kovi. Ko tanatou ʼu mātuʼa, mo te kau tagata ʼāfea, pea mo te kau pelepitelō neʼe mole feala hanatou sisio ki te ʼu meʼa ʼaē ʼe fai e te toko fā ʼaia. Kae ko ai ʼaē neʼe ina ʼiloʼi lelei te ʼu ʼaluʼaga ʼaia? Ko Sehova totonu pē. Koia neʼe natou fakatotonu ai ke natou nonofo agatonu pea mo fakalogo ki te ʼAtua, logolā ia te ʼu fakaneke pea mo te lava matehi ʼo nātou.—Tan. 1:3-9.

⁹ ʼI te mālamanei kātoa, ko te kau tūpulaga Fakamoʼoni ʼa Sehova ʼe natou nonofo agatonu mo nātou, ʼe natou tokagaʼi ia te ʼu lēkula ʼa te ʼAtua maʼa te kau Kilisitiano pea mo natou fakafisi ke natou mulimuli ki te ʼu fakaneke ʼo tonatou ʼu kaugā ako. ʼI te temi ʼaē ʼe kotou fakafisi ai kau tūpulaga ki te toloke, mo te agamālohi, mo te tauvele, mo te fai ʼo he ʼu aga heʼeʼaoga, pea mo te tahi atu ʼu aga ʼe kovi, ʼe kotou fakahā ai ia takotou fakalogo ʼaē kiā Sehova. ʼI takotou fai fēia, ʼe kotou taupau maʼu ia takotou agatonu. ʼE fua lelei kiā koutou, pea mo fakafiafia ai Sehova pea mo tokotou ʼu tehina mo tuagaʼane!—Pes. 110:3.

10. (a) Ko te ʼu manatu hala fea ʼo ʼuhiga mo te fai folonikāsio neʼe taki ai ʼihi kau tūpulaga ke natou liʼaki tanatou agatonu? (b) Kapau ʼe tou maʼu ia te agatonu, pea ʼe tou feafeaʼi anai ʼi te ʼu ʼaluʼaga ʼaē ʼe feala ai ke tou tō ki te fai folonikāsio?

¹⁰ ʼE toe ʼaoga ia te fakalogo mokā ʼe fakaʼuhiga ki te felōgoi ʼa he tehina mo he tuagaʼane. ʼE tou ʼiloʼi lelei ʼe tapuʼi ʼi te Folafola ʼa te ʼAtua ia te fai folonikāsio. Kae ʼe faigafua pē hatatou tuku tatatou aga ʼaē ko te fakalogo kae tou liliu ʼo tali ia he ʼu aga ʼe mole lelei. Ohagē lā, ko ʼihi tūpulaga neʼe natou fai te ʼu felāveʼi fakasino ʼe fakaʼaogaʼi ai ia te gutu ki te ʼu koga tapu peʼe ko he taʼahine mo he tama ʼe nā femuluʼaki, ʼo natou takuʼaki ko te ʼu aga ʼaia ʼe mole kovi ia heʼe mole natou ‘fai ni ʼu felāveʼi fakasino.’ Kae ʼe galo ki te kau tūpulaga ʼaia, peʼe lagi mole natou fia mahino pē kiai, ko te kupu fai folonikāsio ʼi te Tohi-Tapu ʼe fakaʼuhiga ki te ʼu aga heʼe ʼaoga fuli ʼaia, ʼaē ʼe feala ai ke fakamavae he tahi ʼi te kōkelekāsio.a Kae ko te meʼa ʼaē ʼe kovi age, heʼe mole natou ʼiloʼi ia te ʼaoga ʼaē ke natou maʼu ia te agatonu. Mai tona ʼaluʼaga ʼaē, ʼe tou faiga ke tou taupau maʼu ia tatatou agatonu, ʼe mole tonu ke tou kumi ia he ʼu takuʼaki moʼo fai ia te aga ʼaē ʼe kovi. ʼE mole tou faiga anai ke tou fai he ʼu aga ʼe mole lelei kae ʼe mole fakatūʼā ai tātou. ʼE mole tou tokagaʼi tāfito pē anai ia te ʼu tūʼā ʼaē kā tou maʼu anai mokā tou fai ia he aga ʼe kovi. Kae ʼe tou tokagaʼi tāfito ia te meʼa ʼaē kā ina fakafiafia ai anai ia Sehova pea mo tou tekeʼi ia te aga ʼaē kā fakatupu lotomamahi ki tona loto. ʼAua naʼa tou kumi peʼe lava feafeaʼi hatatou fai he ʼu aga ʼe mole lelei kae ke mole tou aʼu ki te fai ʼo te agahala, kailoa ia, kae tou fakamamaʼo mai ai pea mo “hola mai te folonikāsio.” (1 Ko. 6:18) ʼE tou fakahā ai anai ko tātou ʼe tou maʼu ia te agatonu moʼoni.

ʼE Tou Lava Taupau Maʼu Feafeaʼi Ia Tatatou Agatonu?

11. He koʼē ʼe maʼuhiga ia te ʼu faʼahi fuli ʼaē ʼe tou fakahā ai ia tatatou fakalogo? Kotou tuku mai he faʼifaʼitaki.

¹¹ ʼE feala ke tou maʼu ia te agatonu mokā tou fakalogo, pea ʼe tou taupau maʼu ia tatatou agatonu mokā ʼe tou faʼa kātaki ʼo fakalogo. Ko he fakalogo tuʼa tahi pē ʼe lagi mole faʼa maʼuhiga, ko he faʼahi ʼe lagi veliveli. Kae ʼaki te taʼi fakalogo ʼaia, ʼe tou liliu ai ʼaki te temi ʼo maʼu ia te agatonu. Koʼenī te faʼifaʼitaki: Ko he foʼi piliki ʼe tahi ʼe lagi mole faʼa maʼuhiga, kae kapau ʼe tou hilifaki atu kiai ia he ʼu tuʼuga piliki, pea ʼe feala ke tou laga he fale matalelei. Koia kapau ʼe tou haga fakalogo tuʼumaʼu, pea ʼe tou taupau maʼu ai anai ia tatatou agatonu.—Luka 16:10.

12. Koteā te faʼifaʼitaki ʼaē neʼe tuku e Tavite ʼo ʼuhiga mo te taupau maʼu ʼo te agatonu mokā gaohi koviʼi tātou peʼe fai mai e he tahi ia he aga heʼe faitotonu?

¹² ʼE hā tāfito ia tatatou agatonu mokā tou tauʼi he ʼu faigataʼaʼia, mokā gaohi koviʼi tātou, peʼe mokā neʼe fai mai e he tahi ia he aga heʼe faitotonu. Tou vakaʼi age muʼa ia te faʼifaʼitaki ʼa Tavite ʼaē ʼe tuʼu ʼi te Tohi-Tapu. ʼI tana kei tūpulaga, neʼe ina kātakiʼi ia tona fakatagaʼi e te hau ʼaē neʼe lau neʼe ina fakafofoga ia te pule ʼo Sehova. Kae neʼe mole kei ʼofa Sehova ki te Hau ko Saulo pea neʼe maheka ia kiā Tavite, ʼaē neʼe ʼofa ki ai Sehova. Kae neʼe hoko atu pē e Saulo ia tana fakafofoga ia te tuʼulaga hau lolotoga te temi pea neʼe ina fakaʼaogaʼi ia te kautau ʼo Iselaele moʼo tuli ia Tavite. Neʼe tuku e Sehova ia te aga heʼe faitotonu ke hoholo atu lolotoga ni ʼu taʼu. Neʼe ʼita koa ia Tavite ki te ʼAtua? Neʼe manatu koa ia ʼe mole ʼi ai he ʼuhiga ke ina taupau maʼu ai ia tana agatonu? Kailoa ia. Neʼe fakaʼapaʼapa ʼaupitō ia Tavite ki te tuʼulaga ʼo Saulo he neʼe ko te fakanofo ʼa te ʼAtua, ʼo fakafisi ke ina fai ia he meʼa ʼe kovi kiā Saulo ʼi te ʼu lakaga ʼaē neʼe feala ai ke ina fai ia te faʼahi ʼaia.—1 Sam. 24:2-7.

13. ʼE tou lava taupau maʼu feafeaʼi ia tatatou agatonu mo kapau ʼe fakalotomamahiʼi tātou?

¹³ ʼE mālohi ia te faʼifaʼitaki ʼaē neʼe tuku mai e Tavite kiā tātou iā ʼaho nei! ʼE tou kau ki te kōkelekāsio fakamālamanei ʼe faʼufaʼu e te hahaʼi heʼe haohaoa, ʼe feala pē ki he tahi ke agakovi mai peʼe ke heʼe agatonu. ʼE mahino ia, ʼe tapuakina tātou heʼe tou māʼuʼuli ʼi he temi ʼe mole feala ai ke ʼulihi ia te hahaʼi kātoa ʼa Sehova. (Isa. 54:17) Kae ʼe feafeaʼi anai tatatou aga mokā ʼe fakalotomamahiʼi tātou e he tahi? Kapau ʼe tou nonofo ʼita ki hotatou tehina peʼe tuagaʼane, pea ʼe fakatupu kovi anai ki tatatou agatonu ʼaē ki te ʼAtua. Ko te aga ʼa ʼihi ʼe mole tonu ke liliu ko he takuʼaki ke tou ʼiʼita ai ki te ʼAtua peʼe tou liʼaki ia tatatou tauhi agatonu ʼaē kiā te ia. (Pes. 119:165) Ko tatatou faʼa kātaki logolā ia te ʼu faigataʼaʼia, ʼe tokoni mai anai ke tou taupau maʼu ia tatatou agatonu.

14. Ko nātou ʼaē ʼe natou maʼu ia te agatonu, ʼe natou tali feafeaʼi ia te ʼu fetogi ʼaē ʼe fai ʼi te kautahi pea mo te ʼu fakamahino Fakatohi-tapu?

¹⁴ ʼE feala ke tou toe taupau maʼu ia tatatou agatonu ʼaki hatatou mole kumi ia te ʼu hala fuli peʼe tou fai fatufatu. ʼE mahino ia ʼe fakaʼuhiga ia te faʼahi ʼaia, ke tou pipiki kiā Sehova. ʼE lahi age ia tana tapuakina tana hahaʼi ʼi te temi nei. Neʼe mole he tahi age temi ʼi te hisitolia ʼo te tagata neʼe maʼu ai he kolōlia fēia ʼo te tauhi maʼa ʼi te kele. (Isa. 2:2-4) Kā hoko he ʼu fetogi ʼi te ʼu fakamahino ʼo te ʼu vaega Tohi-Tapu, peʼe ki te faʼahiga fai ʼo te ʼu gāue, ʼe tou tali anai ʼaki ia he lotolelei. ʼE tou fiafia ʼi te sio ki te fakamoʼoni ʼaē ko te mahino fakalaumālie ʼe tuputupu aipē. (Taag. 4:18) Kapau ʼe faigataʼa kiā tātou ia hatatou mahino ki he fetogi, tou kole kiā Sehova ke tokoni mai ke tou mahino ki te manatu ʼaia. Pea ʼo tou faʼa kātaki aipē ʼo fakalogo pē anai, ʼo tou haga taupau maʼu ia tatatou agatonu.

ʼE Feafeaʼi Mokā ʼe Mole Taupau Maʼu e He Tahi Ia Tana Agatonu?

15. Ko ai tokotahi pē ʼaē ʼe feala ke ina toʼo takotou agatonu?

¹⁵ ʼE tonu ke tou fakakaukauʼi lelei ia te fehuʼi ʼaia. Ohagē ko te ʼu manatu neʼe tou akoʼi ʼi te ʼalatike ʼaē kua ʼosi atu, ʼe maʼuhiga ʼaupitō ia te agatonu. Kapau ʼe mole tou maʼu ia te agatonu, ʼe mole feala ke tou felōgoi mo Sehova pea mo maʼu ia he ʼamanaki moʼoni. Kotou manatuʼi ia te faʼahi ʼaenī: Ko te tokotahi pē ʼi te ʼatulaulau ʼe feala ke ina toʼo takotou agatonu. Ko koutou totonu ʼaē ʼe feala ke kotou fai ia te faʼahi ʼaia. Neʼe mahino lelei kiā Sopo ia te moʼoni ʼaia. Neʼe ina ʼui fēnei: “ ʼO aʼu ki toku mate, ʼe mole au tuku anai taku agatonu!” (Sopo 27:5) Kapau ʼe kotou fakatotonu fēia mo koutou pea kapau ʼe kotou nonofo ovi kiā Sehova, pea ʼe mole kotou liʼaki anai takotou agatonu.—Sake 4:8.

16, 17. (a) Kapau ʼe agahala mamafa he tahi, koteā te aga ʼe mole lelei ʼe mole tonu ke ina fai? (b) Koteā te aga ʼe lelei ʼe tonu ke ina fai?

¹⁶ Kae neʼe mole taupau maʼu e ʼihi ia tanatou agatonu. Ohagē pē ko tona hoko ʼi te temi ʼaē neʼe kei māʼuʼuli ai ia te kau ʼapositolo, ko ʼihi iā ʼaho nei ʼe natou fai he ʼu agahala mamafa. Kapau neʼe hoko kiā koutou ia te faʼahi ʼaia, ʼe fakaʼuhiga koa ʼe mole feala hakotou toe maʼu ia te agatonu? ʼE feala pē kae koteā ʼaē ʼe tonu ke kotou fai? Tou vakaʼi muʼa pe koteā ʼaē ʼe mole tonu ke tou fai. Ko te aga ʼaē ʼe tau fai e te tagata, ko te fufū ʼo te hala ke mole ʼiloʼi e te ʼu mātuʼa, te ʼu tehina mo tuagaʼane, peʼe ko te ʼu tagata ʼāfea. Kae ʼe fakamanatuʼi mai fēnei ʼi te Tohi-Tapu: “Ko ʼaē ʼe ina ʼuʼufi tana ʼu agahala ʼe mole lava anai ia, kae ko ʼaē ʼe ina vevete pea mo ina siʼaki, ʼe fakahā anai kiā te ia te manavaʼofa.” (Taag. 28:13) Ko nātou ʼaē ʼe natou kumi ke natou fufū ia tanatou ʼu agahala ʼe natou faihala ʼaupitō, heʼe mole feala ke tou fufū he meʼa ki te ʼAtua. (Lau ia Hepeleo 4:13.) Ko ʼihi ʼe natou faiga ke natou maʼuli mālualoi, ʼo natou lau ʼe natou tauhi kiā Sehova kae natou fai ia te agahala. ʼE mole natou maʼu ia te agatonu, kae ʼe ko he aga ia ʼe fakafeagai ki te agatonu. ʼE mole tali e Sehova te tauhi ʼaē ʼe fai e ʼihi ʼaē ʼe natou fufū ia te ʼu agahala mamafa. Kae ʼe ʼita ia ʼi tana sio ki te taʼi aga fakamalualoi ʼaia.—Taag. 21:27; Isa. 1:11-16.

¹⁷ Kā fai e he Kilisitiano ia he agahala mamafa, ʼe tou ʼiloʼi lelei ia te ʼu faʼahi ʼaē ʼe tonu ke ina fai ohagē ko tona tuʼu ʼi te Tohi-Tapu. ʼE ko te temi ʼaia ke ina kumi ia te tokoni ʼa te kau tagata ʼāfea. Kua fai e Sehova he ʼu fakatuʼutuʼu mokā vaivai he tahi ʼi te faʼahi fakalaumālie. (Lau ia Sake 5:14.) ʼAua naʼa kotou tuku ia te mataku ʼaē naʼa fakatonutonuʼi koutou ke ina tāʼofi koutou ke kotou toe mālohi ʼi te faʼahi fakalaumālie. ʼE tuku anai koa e he tahi ia te mamahi fakatemi ʼo he foʼi huki peʼe ko he tafa ke ina tāʼofi ia ia ke faitoʼo ke feala hana maʼu ia he fīmālie?—Hep. 12:11.

18, 19. (a) ʼE fakahā feafeaʼi e te faʼifaʼitaki ʼa Tavite ʼe feala hatatou toe maʼu ia tatatou agatonu? (b) Koteā ʼaē ʼe kotou fakatotonu ke kotou fai ʼo ʼuhiga mo takotou agatonu?

¹⁸ ʼE feala koa ke toe hagē ia tona maʼuli ko te temi ʼaē ʼi muʼa ʼo tana agahala? ʼE feala koa ke ina toe maʼu ia tana agatonu kae neʼe kua agahala? Tou toe vakaʼi ia te faʼifaʼitaki ʼa Tavite. Neʼe ina fai ia tana toe agahala mamafa. Neʼe holi ki te ʼohoana ʼo te tahi tagata, neʼe tono, pea neʼe ina fakatuʼutuʼu ke matehi ia te ʼohoana ʼo te fafine ʼaē neʼe tono mo ia. ʼE faigataʼa hatatou manatu ʼi te temi ʼaia ko Tavite neʼe ko he tagata agatonu. Kae neʼe fakaʼuhiga koa neʼe mole kei he fakamolemole ki te agahala ʼa Tavite? Neʼe tonu ke fakatonutonuʼi ia Tavite pea neʼe fakatonutonuʼi ia ia. Koia ʼaki ia tana fakahemala moʼoni neʼe fakamolemole ai tana agahala e Sehova. Neʼe fua lelei kiā Tavite tona fakatonutonuʼi ʼaia pea neʼe ina toe maʼu ia tana agatonu ʼaki tana fakalogo ki te ʼAtua ʼi tona maʼuli kātoa. ʼE ʼalutahi ia te faʼifaʼitaki ʼaia ʼo te maʼuli ʼo Tavite pea mo te ʼu palalau ʼaē ʼe tou lau iā Tāʼaga Lea 24:16: “[ʼE] feala ke tō tuʼa fitu te faitotonu, kae ʼe mahino papau ia ʼe toe tuʼu ake anai.” Koteā tona fua? Kotou tokagaʼi pe koteā ʼaē neʼe ʼui e Sehova kiā Salomone ʼo ʼuhiga mo Tavite ʼi tana kua ʼosi mate. (Lau ia 1 Hau 9:4.) Neʼe manatuʼi e te ʼAtua ia Tavite ohagē ko he tagata neʼe ina maʼu ia te agatonu. Koia, ʼe feala ke fakamaʼa e Sehova ia te kau agahala mai tanatou ʼu agahala, māʼia mo te ʼu agahala mamafa.—Isa. 1:18.

¹⁹ ʼEī, ʼe kotou liliu anai ko he tahi ʼe agatonu ʼaki takotou fakalogo ki te ʼAtua ʼuhi ko tokotou ʼofa ʼaē kiā te ia. Kotou haga faʼa kātaki ʼo nofo agatonu, pea kapau ʼe kotou agahala mamafa, kotou fakahemala moʼoni. Ko te agatonu ʼe ko he koloa maʼuhiga ia! ʼOfa pē ke tou tahi maʼu ia te fakatotonu mālohi ʼaē neʼe maʼu e Tavite, ʼaē neʼe ina ʼui fēnei: “Kiā au, ʼe au haʼele anai ʼi taku agatonu.”—Pes. 26:11.

[Nota]

ʼE Kotou Tali Feafeaʼi Anai?

• ʼE feafeaʼi hakotou liliu ko he tahi ʼe agatonu?

• Ko te ʼu ʼaluʼaga fea ʼaē ʼe feala ai hakotou taupau maʼu ia takotou agatonu?

• ʼE lava feafeaʼi hakotou toe maʼu ia takotou agatonu?

[Fakamatala ʼo te pasina 16]

“NEʼE KO HE AGA ʼE MATALELEI”

Ko te fafine neʼe faitama, neʼe ko tona māhina nima, neʼe ina fai ia te ʼu palalau ʼaē ʼe tuʼu ʼi ʼoluga ʼo ʼuhiga mo te agalelei pea mo te agatonu ʼa te fafine neʼe mole nā feʼiloʼiʼaki. Neʼe ʼi te fale kafe, pea hili kiai ni ʼu hola ʼi tana kua mavae mai ai, neʼe ina fakatokagaʼi neʼe ina tuku tana kato ʼi te fale kafe ʼaia. Ko te foʼi falā ʼaē neʼe ʼi te kato neʼe ko te foʼi teau afe tupu, neʼe ko hana agamāhani ia tana taka mo he foʼi falā fēia. Neʼe ina ʼui fēnei ki muli age ki te sulunale ʼo te kolo: “Neʼe au lotovaivai ʼaupitō.” Kae ko te fafine ʼaē neʼe ina maʼu ia te kato neʼe ina foimo kumi ia te tagata peʼe ko te fafine ʼaē ʼa ʼana ia te kato. ʼI tana mole maʼu, neʼe ina ʼave ki te kau polisi, pea neʼe maʼu leva e te kau polisi ia te fafine faitama ʼaia. ʼAki he loto fakafetaʼi, neʼe ʼui fēnei e te fafine faitama: “Neʼe ko he aga ʼe matalelei moʼoni ʼaia neʼe fai.” He koʼē neʼe faiga mālohi e te fafine ke ina toe fakaliliu ia te falā? Neʼe tohi ʼi te sulunale, ʼuhi he neʼe ko te Fakamoʼoni ʼa Sehova, neʼe “ina ʼui neʼe agatonu ʼuhi ko te lotu ʼaē neʼe lahilahi ake ai.”

[Paki ʼo te pasina 17]

ʼE feala ke taupau maʼu e te kau tūpulaga ia tanatou agatonu mokā ʼahiʼahiʼi nātou

[Paki ʼo te pasina 18]

Neʼe ʼi ai te temi neʼe mole taupau maʼu ai e Tavite ia tana agatonu, kae neʼe feala ke ina toe maʼu ia tana agatonu