Tou Fakaʼapaʼapa Lahi Ki Te Tuʼulaga Makehe Tokotahi ʼAē ʼo Sesu ʼi Te Fakatuʼutuʼu ʼa Te ʼAtua

“Ko au ko te ala pea mo te moʼoni pea mo te maʼuli. ʼE mole he tahi ʼe haʼu ki te Tamai ʼi tuʼa atu iā te au.”—SOA. 14:6.

1, 2. He koʼē ʼe tonu ke tou tokagaʼi ia te tuʼulaga makehe tokotahi ʼaē ʼe maʼu e Sesu ʼi te fakatuʼutuʼu ʼa te ʼAtua?

LOLOTOGA te ʼu taʼi tupu, tokolahi neʼe natou faigaʼi ke natou makehe age ʼi ʼihi, kae neʼe natou tokosiʼi pē. ʼE toe tokosiʼi age ia nātou ʼaē ʼe feala ke natou ʼui moʼoni ʼe natou makehe ʼi ʼihi ʼaluʼaga. Kae ko Sesu Kilisito, ia te ʼAlo ʼo te ʼAtua, ʼe makehe tokotahi ʼi te ʼu ʼaluʼaga kehekehe.

² He koʼē ʼe tonu ke tou tokagaʼi ia te tuʼulaga makehe tokotahi ʼaē ʼe maʼu e Sesu? Heʼe ʼi ai te pikipikiga ʼo te faʼahi ʼaia pea mo tatatou ʼu felōgoi ʼaē mo tatatou Tamai ʼe ʼi selō, ko Sehova! Neʼe ʼui fēnei e Sesu: “Ko au ko te ala pea mo te moʼoni pea mo te maʼuli. ʼE mole he tahi ʼe haʼu ki te Tamai ʼi tuʼa atu iā te au.” (Soa. 14:6; 17:3) Tou vakaʼi age muʼa he ʼu ʼaluʼaga ʼe makehe tokotahi ai ia Sesu. Kā tou fai ia te faʼahi ʼaia, pea ʼe tou loto fakafetaʼi ai anai ki tona tuʼulaga ʼaē ʼi te fakatuʼutuʼu ʼa te ʼAtua.

“Te ʼAlo ʼUlu Tokotahi”

3, 4. (a) He koʼē ʼe feala ke tou ʼui ʼe makehe tokotahi ia Sesu ʼi tona tuʼulaga ʼAlo ʼulu tokotahi? (b) Neʼe makehe tokotahi feafeaʼi ia te tuʼulaga ʼo Sesu ʼi te ʼu meʼa ʼaē neʼe fakatupu?

³ ʼE mole gata pē ʼi te ʼui ʼaē ko Sesu ʼe ko te “ ʼalo ʼo te ʼAtua,” neʼe fakahigoa fēia e Satana ia Sesu ʼi tana fakahalaʼi ʼaē ia ia. (Mat. 4:3, 6) ʼE tuha ke higoaʼi ia Sesu ko “te ʼAlo ʼulu tokotahi ʼo te ʼAtua.” (Soa. 3:16, 18) Ko te kupu Fakakeleka ʼaē neʼe fakaliliu ʼaki te kupusiga palalau “ ʼulu tokotahi,” ko tona fakaʼuhiga ʼe “ko ia tokotahi pē ʼaē ʼe fēia,” peʼe “ko ia tokotahi pē ʼi he fāmili.” Ko te ʼu foha fakalaumālie ʼo Sehova ʼe toko lauʼi teau miliona. Koia, koteā te fakaʼuhiga ʼo te ʼui ʼaē, ko Sesu ʼe ʼulu tokotahi ‘ ʼi tona fāmili’?

⁴ ʼE makehe tokotahi ia Sesu, mai tona ʼaluʼaga ʼaē neʼe ko ia tokotahi pē neʼe fakatupu fakahagatonu e tana Tamai. Ko ia te ʼuluaki Foha neʼe fakatupu, ʼe ko ia “te ʼuluaki tupu ʼo te ʼu meʼa fuli ʼaē neʼe fakatupu.” (Kol. 1:15) Ko ia “te kamataʼaga ʼo te ʼu fakatupu ʼa te ʼAtua.” (Fakh. 3:14) Ko te tuʼulaga ʼo te ʼAlo ʼulu tokotahi ʼi te fakatupu, ʼe toe makehe foki. Neʼe mole ko ia te Tupuʼaga ʼo meʼa fuli. Kae neʼe fakaʼaogaʼi e Sehova ia ia ko hana tagata gāue moʼo fakatupu ia meʼa fuli. (Lau ia Soane 1:3.) Neʼe tohi fēnei e te ʼapositolo ko Paulo: “Kiā tātou ʼe ʼi ai moʼoni te ʼAtua pē e tahi, te Tamai, ia ia ʼaē ʼe haʼu mai ai te meʼa fuapē, pea ko tātou maʼa ia; pea ko te ʼAliki pē e tahi, ia Sesu Kilisito, ʼaē ʼaki ia ia neʼe fakatupu ai ia meʼa fuapē, pea ʼaki ia ia neʼe tou tutupu ai.”—1 Ko. 8:6.

5. ʼE fakamaʼuhigaʼi feafeaʼi ʼi te Tohi-Tapu ia te makehe tokotahi ʼaē ʼo Sesu?

⁵ Kae, ʼe lahi age ia te ʼu ʼaluʼaga neʼe makehe tokotahi ai ia Sesu. ʼE lahi tona ʼu higoa fakatuʼulaga ʼe tou maʼu ʼi te Tohi-Tapu, ʼo fakahā ai ia te maʼuhiga ʼaē ʼo tona tuʼulaga makehe tokotahi ʼi te fakatuʼutuʼu ʼa te ʼAtua. Tou vakaʼi age muʼa ia te ʼu higoa fakatuʼulaga e nima ʼe fakaʼaogaʼi kiā Sesu ʼi te ʼu Tohi Fakakilisitiano Fakakeleka.a

Ko “Te Folafola”

6. He koʼē ʼe tāu mo feʼauga ke fakahigoaʼi ia Sesu ʼe ko “te Folafola”?

⁶ Lau ia Soane 1:14. He koʼē ʼe fakahigoaʼi Sesu ʼe ko “te Folafola,” peʼe ko te Logos? ʼE fakaʼuhiga te higoa fakatuʼulaga ʼaia ki te gāue ʼaē neʼe ina fai talu mai te kua ʼosi fakatupu ʼo ʼihi laumālie popoto. Neʼe fakaʼaogaʼi e Sehova ia tona ʼAlo moʼo ʼave ni ʼu logo pea mo he ʼu fakatotonu ki ʼihi foha fakalaumālie, pea neʼe toe fakaʼaogaʼi pē foki e te ʼAtua ia te ʼAlo ʼaia moʼo fakahā ia Tana logo ki te hahaʼi ʼaē ʼi te kele. Ko te ʼui ʼaē ko Sesu ʼe ko te Folafola, peʼe ko te Tagata ʼAve Logo ʼa te ʼAtua, ʼe ko he fakamoʼoni ʼo te ʼu palalau ʼaē neʼe fai e Kilisito ki te nofoʼaki Sutea: “Ko te ʼu meʼa ʼaē ʼe au akonaki ʼe mole ʼaʼaku ia, kae ʼe ʼa ia ʼaē neʼe ina fekauʼi mai au. Kapau ʼe fia fai e he tahi Tona finegalo, pea ʼe ina ʼiloʼi anai ʼo ʼuhiga mo te akonaki, peʼe haʼu mai te ʼAtua peʼe au palalau pē au mai iā te au totonu pē.” (Soa. 7:16, 17) ʼE kei fakahigoaʼi pē ia Sesu ko “te Folafola ʼo te ʼAtua” logolā tana kua toe liliu ki tona nofoʼaga fakakolōlia ʼaē ʼe ʼi selō.—Fakh. 19:11, 13, 16.

7. ʼE feafeaʼi hatatou faʼifaʼitakiʼi ia te agavaivai ʼa Sesu ʼi tana fakahoko ia tana gāue ʼaē ko “te Folafola”?

⁷ Kotou fakakaukauʼi age muʼa ia te fakaʼuhiga ʼo te ʼu higoa fakatuʼulaga ʼaia. Logolā ko Sesu ʼe ko ia ʼaē ʼe lahi age tona poto ʼi te ʼu meʼa ʼaē neʼe fakatupu e Sehova, kae neʼe mole falala ia ki tona ia poto. ʼE palalau ia ohagē ko tona akoʼi age e tana Tamai. ʼE ina fakamaʼuhigaʼi tuʼumaʼu ia Sehova kae mole ko ia totonu. (Soa. 12:50) ʼE ko he faʼifaʼitaki lelei ke tou muliʼi! Mo tātou foki neʼe tuku mai ia te pilivilēsio lahi ʼaē ke tou “tala te ʼu logo lelei ʼo te ʼu meʼa lelei.” (Loma 10:15) ʼI tatatou loto fakafetaʼi ʼaē ki te faʼifaʼitaki agavaivai ʼo Sesu, ʼe tonu ke ina uga tātou ke tou tōkakaga naʼa tou palalau ʼaki pē totatou poto fakatagata. Kā tou fakamafola ia te logo lelei ʼo te Folafola, ʼe mole tou fia “fakalaka [anai] ʼi te ʼu meʼa ʼaē kua tohi.”—1 Ko. 4:6.

“Te Ameni”

8, 9. (a) Koteā te fakaʼuhiga ʼo te kupu “ameni,” pea he koʼē ʼe fakahigoaʼi ia Sesu ko “te Ameni”? (b) Neʼe fakahoko feafeaʼi e Sesu ia tona tuʼulaga ʼaē ko “te Ameni”?

⁸ Lau ia Fakahā 3:14. He koʼē ʼe fakahigoaʼi ia Sesu ko “te Ameni”? Ko te kupu ʼaē neʼe fakaliliu ʼaki te kupu “ameni” ʼe ko te fakaliliu ʼo te kupu Fakahepeleo, pea ʼe fakaʼuhiga “ke fai pē kiai” peʼe “mahino papau.” ʼE haʼu mai te kupu Fakahepeleo ʼaē ʼe fakaʼuhiga “ke kita agatonu” peʼe “ke tāu mo kita te falala.” ʼE toe fakaʼaogaʼi ia te kupu ʼaia moʼo fakahā ia te agatonu ʼaē ʼa Sehova. (Teu. 7:9; Isa. 49:7) Koia, ʼe fakaʼuhiga feafeaʼi ia te ʼui ʼaē ʼe makehe tokotahi ia Sesu mokā ʼe fakahigoaʼi ko “te Ameni”? Kotou fakatokagaʼi peʼe tali feafeaʼi kiai ia te koga tohi ʼo 2 Kolonito 1:19, 20: “Ko te ʼAlo ʼo te ʼAtua, ia Kilisito Sesu, ʼaē neʼe matou fakahā atu kiā koutou . . . neʼe mole liliu ia ʼo ʼEī pea mo ʼOho, kae ko te ʼEī neʼe liliu ʼo ʼEī iā ia. Tatau aipē peʼe lahi te ʼu fakapapau ʼa te ʼAtua, kae kua liliu ia ko te ʼIo ʼaki ia ia. Koia ʼaē ʼaki pē foki ia ia ʼe ko te ‘Ameni’ ʼe ʼui ki te kolōlia ʼo te ʼAtua.”

⁹ Ko Sesu ʼe ko “te Ameni” ki te ʼu fakapapau fuli ʼa te ʼAtua. Ko tona maʼuli haohaoa ʼaē ʼi te kele, ʼo kau ai mo tona mate fakasākilifisio, neʼe ina fakamoʼoni pea mo fakafealagia ke hoko ia te ʼu fakapapau fuli ʼa Sehova ʼAtua. ʼI te nofo agatonu ʼaē ʼa Sesu, neʼe ina toe fakahā lelei ia te gutuloi ʼa Satana, ohagē ko tona tuʼu ʼi te tohi ʼo Sopo, ʼaē neʼe ina ʼui ai ʼe fakafisi anai ia te ʼu kaugana ʼa te ʼAtua kiā te Ia mo kapau ʼe natou maʼuli māsisiva, mo mamahi, pea mo fakatagaʼi nātou. (Sopo 1:6-12; 2:2-7) ʼI te ʼu meʼa maʼuli fuli ʼa te ʼAtua ʼaē neʼe ina fakatupu, ʼe gata pē ki te ʼAlo ʼuluaki tupu neʼe feala ke ina foaki ia he tali kātoa ki tana fasituʼu ʼaia. Tahi ʼaē, neʼe foaki e Sesu ia te toe fakamoʼoni lahi, ʼi tana lagolago ki tana Tamai ki te fehuʼi lahi ʼaē neʼe lagaʼi ʼo ʼuhiga mo Sehova, te tuha mo ia ke pule faʼifaʼitaliha ki te ʼatulaulau.

10. ʼE feafeaʼi hatatou faʼifaʼitakiʼi ia Sesu ʼi tona tuʼulaga makehe tokotahi ʼaē ko “te Ameni”?

¹⁰ ʼE feafeaʼi hatatou faʼifaʼitakiʼi ia Sesu ʼi tona tuʼulaga makehe tokotahi ʼaē ko “te Ameni”? ʼAki hatatou nonofo agatonu kiā Sehova pea mo tou lagolago ki tona pule faʼitaliha ʼi te ʼatulaulau. Kapau ʼe tou fai ia te faʼahi ʼaia, pea ʼe tou foaki ai anai ia he tali lelei ki te kole ʼaē ʼe tou maʼu iā Tāʼaga Lea 27:11: “Ke ke fakapotopoto Ê toku foha, pea mo ke fakafiafia toku loto, ke feala haku tali kiā ia ʼaē ʼe fakalaga fihi mai kiā te au.”

“Te Tagata Fakafelōgoi ʼo He Fuakava Foʼou”

11, 12. ʼE makehe tokotahi feafeaʼi ia Sesu ʼi tona tuʼulaga Tagata Fakafelōgoi?

¹¹ Lau ia 1 Timoteo 2:5, 6. Ko Sesu ʼe ko “te tagata fakafelōgoi e tahi ʼi te ʼAtua pea mo te tagata.” Ko ia “te tagata fakafelōgoi ʼo he fuakava foʼou.” (Hep. 9:15; 12:24) Kae ʼe toe ʼui foki ko Moisese neʼe ko he tagata fakafelōgoi—ko te tagata fakafelōgoi ʼo te fuakava ʼo te Lao. (Kal. 3:19) Koia, ʼe fakaʼuhiga feafeaʼi ia te makehe tokotahi ʼaē ʼa Sesu ʼi tona tuʼulaga Tagata Fakafelōgoi?

¹² ʼI te lea Fakahepeleo, ko te kupu ʼaē neʼe fakaliliu ʼaki te kupu “tagata fakafelōgoi” ʼe ko he higoa ʼe fakaʼaogaʼi ʼi te lao. ʼE fakaʼuhiga kiā Sesu ʼe ko he Tagata Fakafelōgoi ʼi te lao (peʼe ko he avoka) ʼo te fuakava foʼou, ʼo ina fakafealagia ai ke fakatuʼu ia he puleʼaga foʼou, “te Iselaele ʼo te ʼAtua.” (Kal. 6:16) Pea ʼe faʼufaʼu ia te puleʼaga ʼaia e te kau Kilisitiano fakanofo, ʼe ko he kau “pelepitelō fakahau.” (1 Pet. 2:9; Eke. 19:6) Ko Moisese ʼaē neʼe ko te tagata fakafelōgoi ʼo te fuakava ʼo te Lao, neʼe mole feala ke ina fakatuʼu ia he puleʼaga fēia.

13. Koteā ʼaē ʼe pipiki ki te tuʼulaga Tagata Fakafelōgoi ʼaē ʼa Sesu?

¹³ Koteā ʼaē ʼe pipiki ki te tuʼulaga Tagata Fakafelōgoi ʼaē ʼa Sesu? ʼE fakaʼaogaʼi e Sehova ia te maʼuhiga ʼo te taʼataʼa ʼo Sesu kiā nātou ʼaē ʼe natou kau ki te fuakava foʼou. ʼAki te faʼahi ʼaia, ʼe fakaʼuhiga ai e Sehova ia nātou kua natou agatonu. (Loma 3:24; Hep. 9:15) Koia ʼe feala ai ki te ʼAtua ke ina fakaʼuhiga ʼe tāu mo nātou ke natou hū ki te fuakava foʼou ʼaki te ʼamanaki ʼaē ke natou liliu ko he kau pelepitelō hau ʼi selō! Ohagē ko tonatou Tagata Fakafelōgoi, ʼe tokoni ia Sesu kiā nātou ke natou nonofo maʼa iā muʼa ʼo te ʼAtua.—Hep. 2:16.

14. He koʼē ʼe tonu ki te kau Kilisitiano fuli ke natou fakaʼapaʼapa ki te tuʼulaga Tagata Fakafelōgoi ʼo Sesu logolā te ʼamanaki ʼaē ʼe natou maʼu?

¹⁴ ʼE feafeaʼi kiā nātou ʼaē ʼe mole natou kau ki te fuakava foʼou, ia nātou ʼaē ko tanatou ʼamanaki ʼe ko te maʼuli ʼi te kele, kae mole ʼi te lagi? Logolā ia tanatou mole kau ʼaē ki te fuakava foʼou, kae ʼe natou maʼu ia tona ʼu fua lelei. ʼE natou maʼu ia te fakamolemole ki ʼanatou agahala pea ʼe tala e natou faitotonu ohagē ko he ʼu kaumeʼa ʼo te ʼAtua. (Sake 2:23; 1 Soa. 2:1, 2) Peʼe tou maʼu ia te ʼamanaki ʼaē ki selō peʼe ʼi te kele, kae ko tātou fuli ʼe tou maʼu ia te ʼu tupuʼaga lelei ke tou fakaʼapaʼapa ai ki te tuʼulaga Tagata Fakafelōgoi ʼo Sesu ʼi te fuakava foʼou.

Te “Pelepitelō Lahi”

15. He koʼē ko te tuʼulaga Pelepitelō Lahi ʼo Sesu ʼe kehe ia mo te ʼu tagata fuli ʼaē neʼe pelepitelō lahi?

¹⁵ Tokolahi te hahaʼi neʼe ko te ʼu pelepitelō lahi ʼi te temi muʼa, kae ʼe makehe tokotahi age pē ia Sesu ʼi tona tuʼulaga Pelepitelō Lahi. ʼO feafeaʼi? ʼE ʼui fēnei e Paulo: “ ʼE mole ʼaoga ia ki ai, ke hagē ko te kau pelepitelō lahi, ke ina momoli he u sākilifisio ʼi te ʼaho fuli, ʼuluaki maʼa tana ʼu agahala totonu, pea lua maʼa te ʼu agahala ʼa te hahaʼi (heʼe ko te meʼa ʼaia, neʼe ina fai tuʼa tahi ʼo talu ai, ʼi te temi ʼaē neʼe ina momoli ai ia ia totonu); heʼe fakanofo e te Lao ia te ʼu tagata mo ʼonatou vaivaiʼia ke natou pelepitelō lahi, kae ko te folafola ʼo te fuakava ʼaē neʼe fakatuʼu ki muli mai ʼo te Lao, neʼe ina fakanofo ia te ʼAlo, ʼaē kua kātoa ia ʼo talu ai.”—Hep. 7:27, 28.b

16. He koʼē ko te sākilifisio ʼa Sesu ʼe makehe tokotahi ia?

¹⁶ Ko Sesu neʼe ko te tagata haohaoa, pea neʼe tatau ia mo Atama ʼi muʼa ʼo tana agahala. (1 Ko. 15:45) ʼI tona ʼuhiga haohaoa ʼaia, neʼe ko Sesu tokotahi pē ʼi te ʼu tagata fuli, neʼe feala ke ina momoli he sākilifisio haohaoa, ʼe kātoa—te taʼi sākilifisio ʼaē ʼe tuʼa tahi pē tona fai ʼo talu ai. ʼI te Lao ʼa Moisese, neʼe fai ʼi te ʼaho fuli ia te ʼu sākilifisio. Ko te ʼu sākilifisio fuli ʼaia pea mo te ʼu gāue fakapelepitelō neʼe ko he ʼu fakaʼata ʼo te ʼu meʼa ʼaē neʼe fakahoko e Sesu. (Hep. 8:5; 10:1) Ko te gāue ʼa Sesu ʼi tona tuʼulaga Pelepitelō Lahi ʼe makehe tokotahi, mai tona ʼaluʼaga ʼaē ʼe laka age ia tana ʼu gāue ʼi te ʼu pelepitelō lahi ʼaē, pea ʼo talu ai.

17. He koʼē ʼe tonu ke tou loto fakafetaʼi ki te gāue ʼa Sesu ʼi tona tuʼulaga Pelepitelō Lahi, pea ʼe feafeaʼi hatatou fakahā ia te faʼahi ʼaia?

¹⁷ ʼE ʼaoga kiā tātou ia te ʼu gāue ʼa Sesu ʼi tona tuʼulaga Pelepitelō Lahi, ke feala ai ke tou faitotonu kiā mata ʼo te ʼAtua. ʼE ko he Pelepitelō Lahi taulekaleka ʼaē ʼe tou maʼu! Neʼe tohi fēnei e Paulo: “ ʼE ʼi ai totatou pelepitelō lahi, ʼe mole ko he tahi ʼe hala mo manavaʼofa ki ʼotatou ʼu vaivaiʼaga, kae ko he tahi neʼe ʼahiʼahiʼi ʼi te faʼahi fuli pē ohagē ko tātou, kae neʼe mole hana agahala.” (Hep. 4:15) Koia, ko tatatou loto fakafetaʼi ki te faʼahi ʼaia, ʼe tonu ke ina uga tātou ke ‘mole tou māʼuʼuli maʼa tātou totonu pē, kae maʼa ia ʼaē neʼe mate maʼa tātou.’—2 Ko. 5:14, 15; Luka 9:23.

Te “Hako” ʼAē Neʼe Fakakikite

18. Ko te lea fakapolofetā fea ʼaē neʼe fai ʼi te ʼosi agahala ʼa Atama, pea koteā ʼaē neʼe fakahā ki muli age ʼo ʼuhiga mo te lea fakapolofetā ʼaia?

¹⁸ ʼI Eteni, ʼi te temi ʼaē neʼe kua puli ai ia lelei fuli maʼa te mālamanei, ia he ʼu felōgoi lelei mo te ʼAtua, te maʼuli heʼegata mo fiafia, pea mo te Palatiso, neʼe fakakikite e Sehova ʼAtua ia te Haofakiʼaga. Ko ia ʼaia ʼaē neʼe ʼui ko te “hako.” (Sen. 3:15) Ko te Hako fakalilo ʼaia ʼaē neʼe talanoa tāfito kiai te ʼu tuʼuga lea fakapolofetā lolotoga te temi. Neʼe tonu ko he tahi mai te hōloga ʼo Apalahamo, mo Isaake pea mo Sakopo. Ko he tahi foki mai te hōloga ʼo te Hau ko Tavite.—Sen. 21:12; 22:16-18; 28:14; 2 Sam. 7:12-16.

19, 20. (a) Neʼe ko ai ia te Hako ʼaē neʼe fakapapauʼi mai? (b) He koʼē ʼe feala ke ʼui ʼe ʼi ai ʼihi ʼe toe kau mo Sesu ki te hako ʼaē neʼe fakakikite mai?

¹⁹ Neʼe ko ai ia te Hako ʼaia ʼaē neʼe fakapapauʼi mai? Ko te tali ki te fehuʼi ʼaia ʼe feala ke tou maʼu iā Kalate 3:16. (Lau.) Kae ʼi te vaega ki muli mai ʼo te kāpite pē ʼaia, neʼe ʼui fēnei e te ʼapositolo ko Paulo ki te kau Kilisitiano fakanofo: “Kapau ko koutou ʼe ʼa Kilisito, pea tā ko koutou ko te hako moʼoni ʼo Apalahamo, ko he kau tofiʼa ʼo ʼuhiga mo he fakapapau.” (Kal. 3:29) Koteā ʼaē ʼe ʼui ai ko Kilisito ʼe ko te Hako ʼaē neʼe fakapapauʼi mai, pea ʼe toe kau koa kiai mo ʼihi age?

²⁰ Ko te ʼu toko lauʼi miliona hahaʼi ʼe natou lau ʼe natou hifo mai te hōloga ʼo Apalahamo, pea ko ʼihi ʼe natou gāue ohagē ni ʼu polofetā. Ko ʼihi lotu ʼe natou fakamaʼuhigaʼi tāfito tanatou ʼui ʼaē ko tanatou ʼu polofetā ʼe natou hifo mai te hōloga ʼo Apalahamo. Kae ko nātou ʼaia ʼe ko te Hako koa ʼaē neʼe fakapapauʼi mai? Kailoa ia, koteʼuhi ohagē ko tona ʼui e Paulo ʼaki te takitaki ʼa te ʼAtua, ʼe mole ko nātou fuli ʼo te hōloga ʼo Apalahamo ʼaē ʼe feala ke natou ʼui ʼe ko nātou te Hako ʼaē neʼe fakapapauʼi mai. Neʼe mole fakaʼaogaʼi ia te hōloga ʼo ʼihi foha ʼo Apalahamo moʼo tapuakinaʼi te mālamanei. Ko te hako ʼaē kā maʼu ai anai ia te tapuakina, neʼe tonu pē ia ke tupu mai iā Isaake. (Hep. 11:18) Ki muli age, neʼe ko te tagata pē e tahi ko Sesu Kilisito ʼaē ko te koga tāfito ʼo te hako ʼaē neʼe fakakikite mai, pea ko tona hākoga mai iā Apalahamo ʼe tohi ʼi te Tohi-Tapu.c Ko nātou fuli ki muli age ʼaē neʼe kau ki te hako ʼo Apalahamo neʼe ko te lua koga ʼaia, heʼe ko nātou “ ʼe ʼa Kilisito.” ʼEī, ʼe makehe tokotahi ia te gāue ʼa Sesu ʼi te fakahoko ʼo te lea fakapolofetā ʼaia.

21. Koteā ʼaē neʼe malave kiā koutou ʼi te faʼahiga fakahoko ʼaē e Sesu ia tona tuʼulaga makehe tokotahi ʼaē ʼi te fakatuʼutuʼu ʼa Sehova?

²¹ Koteā te ako ʼe tou tāʼofi mai te tuʼulaga makehe tokotahi ʼo Sesu ʼi te fakatuʼutuʼu ʼa Sehova? Talu mai te temi ʼaē neʼe fakatupu ai, ko te ʼAlo ʼulu tokotahi ʼo te ʼAtua neʼe makehe tokotahi pē ia. Kae ko te ʼAlo makehe tokotahi ʼaia ʼo te ʼAtua ʼaē neʼe liliu ko Sesu, neʼe agavaivai tuʼumaʼu pē ia ʼo fai ia te finegalo ʼo tana Tamai, neʼe mole ina kumi ʼi he temi ia tona kolōlia. (Soa. 5:41; 8:50) ʼE ko he faʼifaʼitaki taulekaleka kiā tātou iā ʼaho nei! Ohagē ko Sesu, ʼofa pē ke tou “fai te ʼu meʼa fuli moʼo fakakolōliaʼi ʼo te ʼAtua.”—1 Ko. 10:31.

[ʼU nota]

ʼE Kei Kotou Manatuʼi Koa?

• Koteā te ako ʼe kotou tāʼofi ʼo ʼuhiga mo te tuʼulaga makehe tokotahi ʼo Sesu, ʼi tona ʼu higoa fakatuʼulaga ʼaē ʼe ina maʼu? (Vakaʼi te fakamatala ʼaē ʼe ʼātakai.)

• ʼE feafeaʼi hakotou muliʼi ia te faʼifaʼitaki ʼo te ʼAlo makehe tokotahi ʼo Sehova?

[Fakamatala/Paki ʼo te pasina 23]

TE ʼU HIGOA FAKATUʼULAGA ʼO SESU ʼE HĀ AI TE MAKEHE TOKOTAHI ʼO TANA ʼU GĀUE ʼAĒ ʼI TE FAKATUʼUTUʼU ʼA TE ʼATUA

◼ Te ʼAlo ʼUlu Tokotahi. (Soa. 1:3) Ko Sesu tokotahi pē neʼe fakatupu fakahagatonu e tana Tamai.

◼ Te Folafola. (Soa. 1:14) ʼE fakaʼaogaʼi e Sehova ia tona ʼAlo ko he Tagata ʼAve Logo moʼo fakahā ia he ʼu logo pea mo he ʼu fakatotonu ki tana ʼu meʼa maʼuli.

◼ Te Ameni. (Fakh. 3:14) Ko te maʼuli haohaoa ʼaē ʼa Sesu ʼi te kele, ʼo kau ai mo tona mate fakasākilifisio, neʼe fakamoʼoni pea mo fakafealagia ke hoko ia te ʼu fakapapau ʼa Sehova ʼAtua.

◼ Te Tagata Fakafelōgoi ʼo Te Fuakava Foʼou. (1 Tim. 2:5, 6) ʼI tona ʼuhiga Tagata Fakafelōgoi ʼi te lao, neʼe fakafealagia e Sesu ke fakatuʼu ia he puleʼaga foʼou, “te Iselaele ʼo te ʼAtua,” ʼe faʼufaʼu e te kau Kilisitiano ʼaē kā natou liliu anai ko he kau “pelepitelō fakahau” ʼi selō.—Kal. 6:16; 1 Pet. 2:9.

◼ Te Pelepitelō Lahi. (Hep. 7:27, 28) Neʼe ko te tagata tokotahi pē ʼaē ko Sesu neʼe feala ke ina momoli ia he sākilifisio haohaoa, pea neʼe fai tuʼa tahi pē ʼo talu ai. ʼE feala ke ina fakamaʼa tātou mai ʼatatou agahala pea mo fakaʼāteaina tātou mai te mate.

◼ Te Hako ʼAē Neʼe Fakapapauʼi Mai. (Sen. 3:15) ʼE gata pē ki te tagata e tahi ko Sesu Kilisito, ʼe ko te koga tāfito ʼo te hako ʼaia ʼaē neʼe fakakikite. Ko nātou fuli ʼaē ki muli age, neʼe natou liliu ko te lua koga ʼo te hako ʼo Apalahamo ʼaē “ ʼe ʼa Kilisito.”—Kal. 3:29.