Ko Te Fai Faka Mafola ʼa Saulo Neʼe Fakatupu Ai Te Tokakovi

NEʼE mahino gataʼa ki te kau Sutea ʼo Tamaso te meʼa ʼaē kua hoko. Pe koteā ʼaē kua liliu ai te tagata tauhi mālohi ki te lotu faka Sutea ko he ʼaposita? Ko te tagata ʼaia, neʼe ko Saulo, ko te tagata ʼaē neʼe ina gaohi koviʼi ia te hahaʼi ʼaē neʼe fetapa ki te huafa ʼo Sesu ʼi Selusalemi. Neʼe ʼalu ki Tamaso ke ina fakatagaʼi ia te ʼu tisipulo ʼaē ʼe nonofo ai. Kae koʼeni leva ia kua ina faka mafola ko te Sesu ʼaē neʼe manukiʼi pea mo tutuki ki te pou ohage he tagata malaʼia neʼe ko te Mesia! Neʼe kua vale koa ia Saulo?​—Gaue 9:1, 2, 20-22.

Neʼe lagi ʼi ai he fakamahino. Ko nātou ʼaē neʼe fagona tahi mo Saulo mai Selusalemi neʼe lagi nātou palalau ki te meʼa ʼaē neʼe hoko ʼi te ala. ʼI tanatou fakaōvi ki Tamaso, fokifā pe kua tapa age kiā nātou ia te mālama gigila, pea nātou fetōkaʼi fuli. Neʼe ʼi ai te logoaʼa ohage he leʼo. Neʼe gata pe ko Saulo neʼe kua tuʼutāmaki. Neʼe foʼohake ʼi te ala. ʼI tana tuʼu ake, neʼe kua kivi pea neʼe taki ia ia ki Tamaso e nātou ʼaē neʼe kau fagona tahi mo ia.​—Gaue 9:3-8; 26:13, 14.

Ko Te Tagata Fakafeagai Kua Liliu Ko He Tagata Lagolago

Koteā ʼaē neʼe hoko kiā Saulo ʼi te ala ʼo Tamaso? Neʼe tupu koa tana kivi ʼuhi ko te fagona loaloaga peʼe ko te vevela ʼo te laʼā ʼo te fetapā? ʼI tanatou faigaʼi ʼaē ke nātou maʼu he ʼu fakamahino ki te meʼa ʼaē neʼe hoko, ko te ʼu hahaʼi ʼaē ʼe mole faʼa tui ki te Tohi-Tapu, ʼe nātou ʼui neʼe lagi moemisi, peʼe neʼe mahaki moa ʼuhi ko te hoha ʼo tona leʼo ʼo loto, pe neʼe ko hona pe mahaki neʼe kua nofo mo ia.

Ko te meʼa ʼaē neʼe hoko, neʼe hā age ia Sesu Kilisito kiā Saulo ʼi te mālama fakatupu pulagia, ʼo fakamoʼoni age ki ai neʼe ko Ia te Mesia. Ko ʼihi hahaʼi fai pāki ʼe nātou pāki ia Saulo neʼe tō ifo ʼi te hōsi. Logola neʼe feala pe ke hoko feiā, kae ʼe fakamatala mai ʼi te Tohi-Tapu ko ia neʼe “to ifo ki te kele.” (Gaue 22:6-11) Logope pe neʼe feafeaʼi tana tō, kae neʼe mole leva lainoa ai ohage ko hona fakahifo mai hona tuʼulaga māʼoluga. Neʼe tonu ke mahino kiā ia ko te meʼa ʼaē neʼe faka mafola e te kau tisipulo ʼa Sesu neʼe ko te moʼoni ʼaia. Koia neʼe tonu ke gāue tahi ia Saulo mo nātou. Mai tona ʼuhiga tagata fakafeagai kovi ki te logo ʼa Sesu, kua liliu ia Saulo ʼo kau kiā nātou ʼaē ʼe lagolago mālohi ki ai. ʼI tana kua toe sio pea mo papitema, “nee asili tuputupua te malohi o Saulo pea nee ina fakahei ai te kaiga sutea nee nonofo i Tamaso, i tana fakamooni kia Sesu e ko Kilisito.”​—Gaue 9:22.

Neʼe Iku Noa Te Fakatuʼutuʼu Moʼo Fakapogi Ia Ia

ʼI tana ʼosi tafoki, neʼe ʼalu kifea ia Saulo, ʼaē neʼe higoa ki muli age ko Paulo? ʼI tana faitohi ki te kau Kalate, neʼe ina ʼui fēnei: “Nee au alu ki Alape pea nee au toe liliu mai ki Tamaso.” (Kalate 1:17) Ko te kupu “Alape” ʼe lagi faka ʼuhiga ki hana fagona ki he faʼahi ʼo te potu fenua ʼo Alapi. ʼE ʼui e ʼihi hahaʼi popoto neʼe lagi ʼalu ia Saulo ki te toafa ʼi Silia, peʼe ko he tahi koga meʼa ʼo te puleʼaga nabatéen ʼo Aletasi 4. ʼE mahino ia, neʼe ʼalu ia Saulo ki he koga meʼa lāvaki ke metitāsio ai ʼi te hili ʼo tona papitema, ohage pe la ko te ʼalu ʼa Sesu ki te toafa ʼi tona ʼosi papitema.​—Luka 4:1.

ʼI te temi ʼaē neʼe liliu ai ia Saulo ki Tamaso, “nee fono fakatahi te kau Sutea ke natou fakapogi [ia ia].” (Gaue 9:23) Ko te kovana ʼaē neʼe ina fakafofoga te Hau ko Aletasi ʼi Tamaso, neʼe ina leʼoleʼo te kolo ke puke ia Saulo. (2 Kolonito 11:32) Kae ʼi te lolotoga lamalama e te ʼu fili ke nātou fakapogi ia Saulo, neʼe fai te fakatuʼutuʼu e te kau tisipulo ʼa Sesu ke nātou fakahola ia Saulo.

Iā nātou ʼaē neʼe kau ki te fakahola ʼo Saulo, neʼe kau ai ia Ananiasi pea mo te kau tisipulo ʼaē neʼe gāue fakatahi mo Paulo ʼi te hili pe ʼo tana maliu ki te lotu Faka Kilisitiano.a (Gaue 9:17-19) Neʼe lagi kau ai mo ʼihi iā nātou ʼaē neʼe liliu ko he ʼu hahaʼi tui ʼi te fai faka mafola ʼa Saulo ʼi Tamaso, koteʼuhi ʼe ʼui fēnei ia Gaue 9:25: “I he pouli, nee too iaʼia e ana tisipulo o fakahifo i he kato i te kaupa o te kolo.” Ko te kupuʼi palalau “ana tisipulo” ʼe lagi faka ʼuhiga kiā nātou ʼaē neʼe akoʼi e Saulo. Ko te faʼahi ʼaē ʼe tou ʼiloʼi papau, neʼe lagi fakaʼāʼāsili te ʼita ʼa te hahaʼi kiā ia ʼi te fua lelei ʼo tana minisitelio.

Ko He Ako Kiā Tatou

ʼI tatatou sivi te ʼu meʼa ʼaē neʼe hoko ʼi te ʼosi tafoki ʼa Saulo mo tona papitema, ʼe tou sio lelei ai neʼe mole faʼa hoha ʼo ʼuhiga mo te manatu ʼa te hahaʼi ʼo ʼuhiga mo ia, pea neʼe mole lītuʼa ki te tauhi moʼoni ʼuhi ko te fakafeagai mālohi ʼaē neʼe hoko ki ai. Ko te faʼahi ʼaē neʼe maʼuhiga tāfito kiā Saulo, neʼe ko te fakahoko ʼo te fai faka mafola ʼaē neʼe fakatotonu age.​—Gaue 22:14, 15.

Kua hoki koutou mahino koa ki te maʼuhiga ʼo te faka mafola ʼo te logo lelei? Kapau koia ʼaia, pea ʼe tonu ke koutou ʼiloʼi ko te kau Kilisitiano fuli ʼe tonu ke nātou liliu ko he kau fai faka mafola ʼo te Puleʼaga. ʼE mole tonu ke koutou punamaʼuli mo kapau ʼi ʼihi temi ʼe ʼi ai te ʼu hahaʼi ʼe ʼiʼita atu kiā koutou ʼi takotou fai faka mafola. (Mateo 24:9; Luka 21:12; 1 Petelo 2:20) Ko te tali ʼaē neʼe fai e Saulo ki te fakafeagai ʼe ko he faʼifaʼitaki kiā tatou. Ko te kau Kilisitiano ʼaē ʼe nātou ʼutakiʼi te ʼu ʼahiʼahi kae mole nātou lītuʼa ki tanatou tauhi ʼe tapuakina anai ia nātou e te ʼAtua. Neʼe ʼui fēnei e Sesu ki tana kau tisipulo: “E fehia anai te tagata fuape ia koutou uhi’pe ko toku huafa.” Kae neʼe ina fakaloto mālohiʼi fēnei ia nātou: “I tautou kataki e koutou malo anai ki outou mauli.”​—Luka 21:17-19.

[Kiʼi nota]

[Paki ʼo te pasina 28]

Ko Saulo neʼe “to ifo ki te kele” ʼi te hā age ʼa Sesu

[Paki ʼo te pasina 29]

Neʼe hāo ia Saulo mai te fakatuʼutuʼu ʼaē neʼe fai moʼo fakapogi ia ia ʼi Tamaso