Te Kau Fai Faka Mafola ʼo Te Puleʼaga
ʼE Faka Kolōliaʼi Ia Sehova e Te Hahaʼi Gaohi Meʼa Fakahagatonu
ʼI TE kele kātoa, ʼe ʼiloa te kau Fakamoʼoni ʼa Sehova, tūpulaga pea mo mātutuʼa, ʼuhi ko tanatou gaohi meʼa fakahagatonu. Tou vakaʼi te ʼu faʼifaʼitaki mai te ʼu potu kehekehe e tolu ʼo te malamanei.
Ko Olusola, ko te taʼahine ʼe taʼu hogofulu-ma-fitu, ʼe nofo ʼi Niselia, neʼe ina maʼu te kato paʼaga ʼi te ala ʼi tana liliu ki tona ʼapi ʼi te hili ako. Neʼe ina ʼavage te kato ʼaia ki te tagata pule ʼo tona faleako, ʼaē neʼe ina lau te falā, pea neʼe ko te foʼi 3 500. Neʼe liufaki e te tagata pule ʼo te faleako te kato paʼaga ki te tagata faiako ʼaē ʼaʼana te kato. Moʼo fakamālo kiā Olusola, neʼe foaki age e te tagata faiako kiā ia tana foʼi falā e 600 pea neʼe ina ʼui age ke ina totogi ʼaki tana ʼu meʼa ako. ʼI te logo ʼa ʼihi kau ako ki te meʼa ʼaē neʼe hoko, neʼe nātou vāʼi ia Olusola. ʼI te ʼu vāhaʼa ki muli age, neʼe kaihaʼa te falā ʼa te tama ʼi te faleako, pea neʼe kole ai e te kau faiako ke sivi te ʼu kau ako fuli. Neʼe ʼui fēnei e te tagata faiako kiā Olusola: “Nofo koe ʼi henā. ʼE au ʼiloʼi ʼe mole ko koe ʼaē neʼe kaihaʼa, heʼe ko koe ko te Fakamoʼoni ʼa Sehova.” Neʼe maʼu te pāʼaga ʼaē neʼe kaihaʼa ʼi te ʼu tama e lua ʼaē neʼe nā vāʼi ia Olusola, pea neʼe fai te fakatūʼā mamafa kiā nāua. Neʼe tohi fēnei e Olusola: “ ʼE au fiafia lahi ʼi te ʼiloʼi ʼaē ko au ko te Fakamoʼoni ʼa Sehova, ʼe mole au kaihaʼa anai ʼi he temi, pea ʼe faka kolōlia ai ia Sehova.”
ʼI tana ʼamanaki mavae mai tona ʼapi, ko Marcelo ʼi Alasatine, neʼe ina maʼu te kato taki neʼe tuku ōvi ʼi tona matapā. Neʼe ina toʼo te kato ʼo ʼave ki fale pea nā ʼavahi mo tona ʼohoana. Neʼe nā punamaʼuli ʼi tana maʼu te tuʼuga paʼaga, mo te ʼu foʼi kate keleti, pea mo te ʼu seki kua ʼosi sinie, ko te tahi seki neʼe ko te ʼu miliona falā neʼe tohi ai. Neʼe nā maʼu ʼi te loto kato te numelo telefoni. Neʼe nā pāui te tagata ʼaē ʼaʼana te kato, pea nā fakatuʼutuʼu mo Marcelo ke nā fēlaveʼi ʼi tana fale gāue, ke feala hanā toe liufaki age tana kato taki pea mo te ʼu meʼa ʼaē neʼe tuku ʼi loto. Neʼe tau mai te tagata ʼaki he lotohoha. Neʼe ʼui age e te patolo ke tuku tana hoha heʼe ko Marcelo ʼe ko te Fakamoʼoni ʼa Sehova. Moʼo fakamālo kiā Marcelo ʼo ʼuhiga mo te kato taki, neʼe foaki age e te tagata tana falā e 600 pe. Neʼe ʼita ʼaupito te patolo ʼi te kiʼi totogi veliveli ʼaē moʼo fakapale ʼo Marcelo, he neʼe punamaʼuli ia ʼi tana gaohi meʼa fakahagatonu. Neʼe ko te faigamālie ʼaia kiā Marcelo ke ina fakamahino ʼe ina loto ʼi te temi fuli ke aga fakahagatonu, heʼe ko ia ko te Fakamoʼoni ʼa Sehova.
Koʼeni te fakamatala mai Kyrgyzstan. Ko Rinat, ko te kiʼi tama ʼe taʼu ono, neʼe ina maʼu te kato paʼaga ʼa te fafine ʼi tona vāhaʼa fale. Neʼe tuku ʼi te kato te falā e 2 000. ʼI te toe liufaki age e Rinat te kato ki te fafine, neʼe ina lau te falā pea neʼe ina ʼui age ki te faʼē ʼa Rinat ʼe puli te foʼi 500. Neʼe ʼui age e Rinat neʼe mole ko ia ʼaē neʼe ina toʼo te falā ʼaia. Neʼe kumi e nātou fuli te falā ʼaē neʼe puli, pea neʼe maʼu ʼi te koga meʼa pe ʼaē neʼe maʼu ai te kato paʼaga. Neʼe punamaʼuli te fafine. Neʼe fakamālo kiā Rinat pea mo loto fakafetaʼi ki tana faʼē, ʼi te toe liufaki age ʼo tana falā pea mo te ako faka Kilisitiano ʼaē neʼe ina akoʼi age ki tana kiʼi tama.