“Fiafia Ia Nātou ʼAē ʼe Nātou ʼIloʼi Tonatou Masiva Fakalaumālie”

ʼI TE agamāhani ʼi te ʼuhu fuli, ʼe tagi te ʼu manu lele lolotoga he kiʼi temi pea nātou ʼolo leva ʼo kumi hanatou meʼa kai. ʼI te afiafi, ʼe nātou toe liliu ki tanatou ʼu fātaʼi, ʼo nātou tagi lolotoga he kiʼi temi, pea nātou momoe leva. ʼI te tahi ʼu lakaga ʼo te taʼu ʼe nātou kumi tonatou hoa pea mo fakatupu he ʼu kiʼi ʼuhi, pea mo taupau tanatou kiʼi fāgauna. ʼE toe feiā te maʼuli ʼo te tahi ʼu manu.

Kae ʼe kehe te maʼuli ʼa te tagata. ʼE moʼoni ʼe tou kakai, mo momoe, pea mo fanaunau, kae tokolahi ia tatou ʼe mole tou fai pe te ʼu meʼa ʼaia. ʼE tou fia ʼiloʼi te tupuʼaga pea mo te faka ʼuhiga ʼo totatou maʼuli. ʼE tou fia maʼu mo he ʼamanaki ki te ka haʼu. Ko te ʼu holi ʼaia ki te ʼu meʼa fakalaumālie ʼe ʼāteaina pe ki te tagata.

Neʼe Faʼu Ki Te Pāki ʼo Te ʼAtua

ʼE fakamahino ʼi te Tohi-Tapu te tupuʼaga ʼo te holi ʼa te tagata ki te ʼu meʼa fakalaumālie, heʼe ʼui fēnei ai: “Neʼe faʼu e te ʼAtua te tagata ki tona pāki, neʼe ina faʼu ia ia ki te pāki ʼo te ʼAtua; neʼe ina faʼu ia nāua ko te tagata mo te fafine.” (Senesi 1:27) Mai tona ʼuhiga ʼaē neʼe faʼu tatou “ki te pāki ʼo te ʼAtua,” koia ʼe feala ke tou maʼu he ʼu kalitātē ʼa te ʼAtua logola totatou ʼuhiga agahala pea mo heʼe haohaoa. (Loma 5:12) Ohage la, ʼe feala ke tou faʼu he ʼu meʼa. ʼE tou toe maʼu mo he faʼahiga poto, he faʼahiga faitotonu, pea mo te fealagia ʼaē ke tou fefakahāʼaki te ʼofa faka sākilifisio. Tahi ʼaē meʼa, ʼe feala ke tou fakakaukauʼi ʼo ʼuhiga mo te temi ʼaē kua hili pea mo fai he ʼu fakatuʼutuʼu ki te temi ka haʼu.​—Tāʼaga Lea 4:7; Tagata Tānaki 3:​1, 11; Mikea 6:8; Soane 13:34; 1 Soane 4:⁠8.

ʼE ʼiloga tatatou fia fai ki te ʼu meʼa fakalaumālie heʼe tou fia atolasio ki te ʼAtua. ʼE mole feala anai ke tou maʼu te fiafia moʼoni pea mo heʼegata, mo kapau ʼe mole tou maʼu he ʼu felogoi mo totatou Tupuʼaga. Neʼe ʼui fēnei e Sesu: “Fiafia ia nātou ʼaē ʼe nātou ʼiloʼi tonatou masiva fakalaumālie.” (Mateo 5:​3, MN ) Kae ʼe tonu ke tou tōkakaga ke tou fakafīmalie totatou ʼaluʼaga fakalaumālie ʼaki te moʼoni​—te ʼu fakamatala ʼo ʼuhiga mo te ʼAtua, mo tana ʼu lēkula, pea mo tana fakatuʼutuʼu ki te malamanei. ʼE tou lava maʼu ʼifea ia te moʼoni fakalaumālie? ʼI te Tohi-Tapu.

“Ko Tau Folafola ʼe Moʼoni”

Neʼe tohi fēnei e te ʼapositolo ko Paulo: “Ko te Tohi-Tapu kātoa ʼe haʼu mai te ʼAtua pea ʼe ʼaoga moʼo akoʼi, moʼo fakatonutonuʼi, moʼo fakatokatoka ʼo te ʼu meʼa.” (2 Timoteo 3:​16, MN ) ʼE ʼalutahi te ʼu palalau ʼa Paulo pea mo te ʼu palalau ʼa Sesu, ʼaē neʼe ina ʼui fēnei ʼi tana faikole ki te ʼAtua: “Ko tau folafola ʼe moʼoni.” ʼE tou ʼiloʼi ia ʼaho nei ko te Folafola ʼaia ʼe ko te Tohi-Tapu, pea ʼe lelei anai ke tou vakaʼi peʼe mulimuli te ʼu meʼa ʼaē ʼe tou tui kiai pea mo tatatou ʼu lēkula ki te Tohi-Tapu.​—Soane 17:​17, MN.

Ka tou fakatatau te ʼu meʼa ʼaē ʼe tou tui kiai pea mo te Folafola ʼa te ʼAtua, ʼe tou faʼifaʼitakiʼi te hahaʼi ʼo te temi muʼa ʼo te fenua ʼo Pelea, ʼaē neʼe nātou vakaʼi fakalelei peʼe ʼalutahi te ʼu akonaki ʼa Paulo pea mo te Tohi-Tapu. Neʼe mole valoki e Luka te kau Pelea, kae neʼe ina vikiʼi tanatou aga. Neʼe ina tohi fēnei: “Nee natou fakaapaapaʼage i te hahai o Tesalonika, nee natou tali fulipe te Folafola mo te lotolelei, pea i te aho fuape nee natou vakaʼi i te Tohitapu, te mooni o mea aia.” (Gaue 17:11) ʼE lahi ʼaupito ia ʼaho nei te ʼu akonaki faka lotu kehekehe pea mo te ʼu manatu ʼo ʼuhiga mo te aga ʼaē ʼe tonu ke fai, koia ʼe maʼuhiga ai ke tou faʼifaʼitakiʼi te manatu lelei ʼa te hahaʼi ʼo Pelea.

Ko te tahi faʼahi moʼo ʼiloʼi te moʼoni ʼe ko tona ʼu fua ki te maʼuli ʼo te hahaʼi. (Mateo 7:17) Ohage la, ko he tahi ʼe maʼuli ʼo mulimuli ki te moʼoni ʼe tonu ke liliu ko he tagata ʼohoana ʼe lelei age, he tāmai ʼe lelei age, he fafine ʼohoana ʼe lelei age, peʼe ko he faʼē ʼe lelei age, ke feala ai ki tonatou famili ke nātou māʼuʼuli fiafia pea mo hikihiki tonatou fiafia ʼo nātou takitokotahi. Neʼe ʼui fēnei e Sesu: “[“Fiafia ia,” MN ] natou e natou fakalogo te folafola a te Atua pea e natou taupau.”​—Luka 11:⁠28.

ʼAki te ʼu palalau ʼa Sesu ʼe tou manatuʼi ai te ʼu palalau ʼo tana Tāmai ʼaē ʼe ʼi selo, aē neʼe ina ʼui fēnei ki te kau Iselaele: “Ko au, Sehova, ko au tou ʼAtua, ia Ia ʼaē ʼe ina akoʼi koe ke ʼaoga kiā te koe, ia Ia ʼaē ʼe ina taki koe ʼi te ala ʼaē ʼe tonu ke ke haʼele ai. Kanapaula neʼe ke tokagaʼi moʼoni taku ʼu fakatotonu. Pea ko tou tokalelei ʼe hage anai ia ko te liuʼa, pea ko tau faitotonu ʼe hage anai ko te ʼu peau ʼo te tai.” (Isaia 48:​17, 18) Ko nātou fuli ʼaē ʼe ʼoʼofa ki te agaʼofa pea mo te faitotonu ʼe mahino ia ʼe nātou tali anai ki te pāui ʼofa ʼaia!

Ko ʼIhi ʼe Nātou Loto Ke “Alaala . . . Tonatou ʼu Taliga”

Neʼe fai e te ʼAtua te pāui ʼofa ʼaia ki te kau Iselaele he neʼe loiʼi nātou e te ʼu lotu. (Pesalemo 106:​35-40) ʼO feiā mo tatou, ʼe tonu ke tou tōkakaga ki te ʼu loi. ʼO ʼuhiga mo nātou ʼaē ʼe nātou lau ko ni kau Kilisitiano, neʼe tohi fēnei e Paulo: “ ʼE hoko mai anai he temi, ʼe mole nātou kātakiʼi anai te akonaki ʼo te fakamaʼuli, kae ʼo mulimuli ki tanatou ʼu holi, ʼe nātou tānaki anai he kau faiakonaki maʼa nātou totonu, ke feala he alaala ʼo tonatou ʼu taliga. Pea ʼe nātou fakamaliu kehe anai tonatou ʼu taliga mai te moʼoni.”​—2 Timoteo 4:​3, 4, MN.

ʼI hona ʼaluʼaga fakatā, ko te kau takitaki lotu ʼe nātou alaala te ʼu taliga ʼo te hahaʼi ʼi tanatou fakagafua ke nātou fai te ʼu aga ʼaē ʼe fakafimālie ai tanatou ʼu holi kovi, ohage ko te fai feʼauʼaki, te fai tagata, pea mo te ʼinu kava fakavale. ʼE tuʼu fakalelei ʼi te Tohi-Tapu, ko nātou ʼaē ʼe nātou fakagafua te ʼu aga ʼaia pea mo nātou ʼaē ʼe nātou fai te ʼu aga ʼaia, “e mole natou tofià i te Puleaga o te Atua.”​—1 Kolonito 6:​9, 10; Loma 1:​24-32.

Ka vāʼi koutou, ʼe mahino ia ʼe tonu ke koutou lototoʼa moʼo mulimuli ki te ʼu lēkula ʼa te Tohi-Tapu, pea ʼe ko he faʼahi ʼe feala ke koutou fai. ʼI te kau Fakamoʼoni ʼa Sehova, tokolahi neʼe nātou toloke, mo ʼinu kava fakavalevale, mo fai feʼauʼaki, mo fia fuhu, mo aga kaihaʼa, pea mo gutuloi. Kae neʼe malave te Folafola ʼa te ʼAtua ki tonatou loto pea ʼaki te tokoni ʼa te laumālie maʼoniʼoni, neʼe nātou fai he ʼu fetogi ʼi tonatou maʼuli “ke taau [tonatou] mauli mo te Aliki.” (Kolose 1:​9, 10; 1 Kolonito 6:11) ʼI tanatou kua tokalelei mo te ʼAtua, neʼe nātou toe maʼu mo te tokalelei ʼo te loto, pea ohage ko te meʼa ʼaē ka tou vakaʼi, kua nātou maʼu he ʼamanaki moʼoni ki te ka haʼu.

Te ʼAmanaki ʼo ʼUhiga Mo Te Puleʼaga

Ko te ʼamanaki ʼaē ʼe tuku mai ʼi te Tohi-Tapu ʼo ʼuhiga mo he tokalelei heʼegata maʼa te hahaʼi fakalogo, ʼe fakahoko anai e te Puleʼaga ʼo te ʼAtua. Neʼe ʼui fēnei e Sesu ʼi tana faikole ʼaē neʼe akoʼi mai ke tou faʼifaʼitaki kiai: “Ke aumai tau pule, ke fai tou finegalo i te kelekele o hage ko Selo.” (Mateo 6:10) Ei, ʼe ko te Puleʼaga ʼo te ʼAtua tokotahi pe ʼaē ʼe feala ke ina fakahoko moʼoni te finegalo ʼo te ʼAtua ʼi te kele. Koteā tona tupuʼaga? Heʼe ko te Puleʼaga ʼaia ʼaē ʼi selo​—ʼaē ʼe pule ai ia Sesu Kilisito​—ʼe fakaʼaogaʼi e te ʼAtua moʼo fakafofoga Tona pule faitotonu ki te kele.​—Pesalemo 2:​7-12; Taniela 7:​13, 14.

ʼI tona ʼuhiga Hau ʼo te Puleʼaga ʼaia ʼaē ʼe ʼi selo, ko Sesu Kilisito ʼe ina faka ʼāteainaʼi anai te hahaʼi fakalogo mai te faʼahiga maʼuli pōpula kehekehe, ʼo kau ai mo te maʼuli pōpula ki te agahala ʼaē neʼe tou maʼu mai iā Atama, pea mo tona ʼu fua kovi ʼaē ko te mahaki pea mo te mate. ʼE ʼui fēnei iā Apokalipesi 21:​3, 4: “Koeni te nofoaga o te Atua fakatahi mo te hahai . . . [Ko Sehova ʼAtua] e ina holoholo anai ia loimata fuape i onatou fofoga, pea e mole toe mau anai te mate. E mole toe mau anai he putu, pe ko he lauga, pe ko he mamahi, koteuhi [“ko te ʼu meʼa ʼāfea,” MN ] kua puli.”

ʼE maʼu anai te tokalelei heʼegata ʼi te kele kātoa. He koʼe ʼe tou tui papau ʼe hoko anai ia te faʼahi ʼaia? Heʼe tohi fēnei iā Isaia 11:9: “[Ko nātou ʼaē ka fakalogo ki te Puleʼaga] ʼe mole nātou fai anai he meʼa ʼe kovi pea ʼe mole nātou fakatupu anai he maumau ʼi toku moʼuga maʼoniʼoni kātoa, heʼe fonu moʼoni anai te kele ʼi te ʼatamai mālama ʼo ʼuhiga mo Sehova ohage ko te ʼuʼufi ʼo te tai e te ʼu vai.” Ei, ko te hahaʼi fuli pe ʼi te kele ʼe nātou maʼu anai te ʼatamai mālama totonu ʼo ʼuhiga mo te ʼAtua pea mo nātou fakalogo kiā te ia. ʼE mole malave koa te faʼahi ʼaia ki tokotou loto? Kapau koia ʼaia, pea ʼe lelei ʼi te temi nei ke koutou kamata ako te “ ʼatamai mālama [maʼuhiga] ʼo ʼuhiga mo Sehova.”

ʼE Koutou Fakalogo Anai Koa Ki Te Logo ʼo Te Puleʼaga?

ʼAki te Puleʼaga, ʼe molehi anai e te ʼAtua te ʼu gāue fuli ʼa Satana pea mo ina akoʼi anai ki tana hahaʼi Tona ʼu ala faitotonu. Koia ʼaē ʼe mole tou punamaʼuli ai ki te faiakonaki tāfito ʼa Sesu ʼo ʼuhiga mo te Puleʼaga. Neʼe ina ʼui fēnei: “E tonu ke au fagonogono ai te Logolelei o te Puleaga o te Atua, ko te tupuaga aia o toku fekauʼi mai.” (Luka 4:43) Neʼe fakatotonu e Kilisito ki tana kau tisipulo ke nātou tala te logo ʼaia ki te hahaʼi. (Mateo 28:​19, 20) Neʼe ina fakakikite fēnei: “Ko te logo lelei ʼaenī ʼo te puleʼaga ʼe faka mafola anai ʼi te kele kātoa, ko he meʼa fakamoʼoni ia ki te ʼu puleʼaga kātoa; pea hoko mai ai leva te fakaʼosi.” (Mateo 24:​14, MN ) Kua ōvi mai te fakaʼosi. Koia ʼe maʼuhiga ʼaupito ki te hahaʼi ʼaē ʼe loto moʼoni, ke nātou fakalogo ki te logo lelei ʼaē ka ina hāofaki te maʼuli ʼa te hahaʼi!

Ko Albert ʼaē neʼe tou talanoa ki ai ʼi te ʼuluaki alatike, neʼe logo ki te logo ʼo te Puleʼaga ʼi te temi ʼaē neʼe kamata ako ai e tona ʼohoana pea mo tona foha ia te Tohi-Tapu mo te kau Fakamoʼoni ʼa Sehova. ʼI te kamata, neʼe mole faʼa tui kiai ia Albert. Neʼe ina kole ki te tagata takitaki lotu ke ina ʼaʼahi tona ʼohoana, pea mo tona foha ke ina fakahā age ʼe loi te kau Fakamoʼoni. Kae neʼe mole loto kiai ia te tagata takitaki lotu. Pea neʼe fia logo Albert ki te fai palalau ki te Tohi-Tapu, ke ina fakahā ai te ʼu manatu ʼaē ʼe hala. ʼI te ʼosi ʼo te ʼuluaki ako, neʼe kau Albert ki te ako Tohi-Tapu, he neʼe ina fia ʼiloʼi te tahi ʼu manatu. Ki muli age neʼe ina fakamahino te tupuʼaga ʼo tana fia ako, ʼo ina ʼui fēnei: “Kua fualoa taku kumi ia te meʼa ʼaenī kua au ako.”

Kua maʼu e Albert te ʼu meʼa ʼaē neʼe ʼaoga kiā ia ʼi te faʼahi fakalaumālie, pea neʼe mole toe fia lītuʼa kiai. ʼAki te moʼoni ʼa te Tohi-Tapu, kua ina maʼu te meʼa ʼaē neʼe ina kumi ʼi tona maʼuli kātoa​—te puleʼaki ki te heʼe faitotonu pea mo te aga fakahehema ʼaē kua mafola ʼi te sosiete fakatagata pea mo te ʼamanaki ki te ka haʼu. ʼAki te moʼoni ʼa te Tohi-Tapu, kua ina maʼu ai te tokalelei ʼo te loto. ʼE koutou maʼu koa te ʼu meʼa ʼaē ʼe ʼaoga kiā koutou ʼi te faʼahi fakalaumālie? He koʼe ʼe mole koutou toʼo hokotou temi ke koutou lau te ʼu fehuʼi ʼaē ʼe tuʼu ʼi te fakamatala ʼaē ʼe ʼātakai ʼi te pasina 6. Kapau ʼe koutou fia maʼu he tahi ʼu fakamahino, pea ʼe fia tokoni atu anai ia te kau Fakamoʼoni ʼa Sehova ʼo ʼuhiga mo te faʼahi ʼaia.

[Talanoa/Paki ʼo te pasina 6]

ʼE KOUTOU MAʼU KOA TE ʼU MEʼA ʼAĒ ʼE ʼAOGA KIĀ KOUTOU ʼI TE FAʼAHI FAKALAUMĀLIE?

ʼE koutou leleiʼia koa te ʼu manatu fakalaumālie ʼaē ʼe akoʼi atu? ʼE mātou fakaafe atu ke koutou lau te ʼu fehuʼi ʼaenī pea mo koutou fakaʼiloga te ʼu fehuʼi ʼaē ʼe koutou popoto ʼi tona tali kiai.

□ Ko ai te ʼAtua, pea ko ai tona huafa?

□ Ko ai ia Sesu Kilisito? He koʼe neʼe tonu ke mate? ʼE fua lelei feafeaʼi tana mate kiā koutou?

□ ʼE ʼi ai koa he Tevolo? Kapau ʼe ʼi ai he Tevolo, pea neʼe tupu feafeaʼi?

□ Koteā ʼaē ʼe hoko kiā tatou mokā tou mamate?

□ Koteā te fakatuʼutuʼu ʼa te ʼAtua ʼo ʼuhiga mo te kele pea mo te malamanei?

□ Koteā te Puleʼaga ʼo te ʼAtua?

□ Koteā te ʼu lēkula ʼa te ʼAtua ʼo ʼuhiga mo te ʼu aga ʼaē ʼe tonu ke fai?

□ ʼI te famili, ko te tuʼulaga fea ʼaē neʼe tuku e te ʼAtua ki te tagata pea koteā te maʼua ʼa te fafine ʼohoana? Koteā he ʼu pelesepeto faka Tohi-Tapu ʼe nātou tokoni ki te fiafia ʼo te maʼuli faka famili?

Kapau ʼe ʼi ai he ʼu fehuʼi ʼe mole koutou ʼiloʼi papau tonatou tali, pea ʼe feala hakotou fakaʼui hakotou kaupepa lahi Koteā ʼAē ʼe Fakamaʼua Mai e Te ʼAtua Kia Tatou? Ko te kaupepa ʼaia neʼe tā e te kau Fakamoʼoni ʼa Sehova ia lea e teitei 300, pea ʼe talanoa ai ki te ʼu puani faka Tohi-Tapu e 16 pea mo ina foaki te ʼu tali ʼaki te Tohi-Tapu ki te ʼu fehuʼi fuli ʼaē ʼe tuʼu ʼi ʼoluga.

[Paki ʼo te pasina 4]

ʼE mole hage te tagata ko te ʼu manu, heʼe holi ki te ʼu meʼa fakalaumālie

[Paki ʼo te pasina 5]

“ ʼE nātou tānaki anai he kau faiakonaki maʼa nātou totonu, ke feala he alaala ʼo tonatou ʼu taliga.”​—2 Timoteo 4:​3, MN.

[Paki ʼo te pasina 7]

ʼE fakatuʼu anai e te Puleʼaga Faka Mesianike ʼa te ʼAtua te tokalelei heʼegata