ʼE Nātou Kumi Te Tokalelei ʼo Te Loto

KO ALBERT ʼe ko te tagata ʼohoana fiafia pea ko tana ʼu tamaliki tūpulaga e lua. Kae neʼe mole heʼeki fiafia kātoa. ʼI te temi faigataʼa ʼaē neʼe kumi gāue ai, neʼe kau ki te ʼu meʼa faka politike pea neʼe mulimuli ki te ʼu manatu faka sosialisi. ʼI te tahi temi, neʼe kau ki te ʼu gāue faka Kominisi ʼo tona fenua.

Kae neʼe mole maʼu e Albert te meʼa ʼaē neʼe ina kumi ʼi te Kominisi. Neʼe lītuʼa ki te fai politike pea neʼe tokaga ʼāteaina pe ki tona kiʼi famili. Neʼe tokaga tāfito ke nātou maʼuli fiafia. Kae neʼe kei logoʼi pe e Albert neʼe ʼi ai te meʼa neʼe mole ina maʼu ʼi tona maʼuli; neʼe mole heʼeki ina maʼu te tokalelei ʼo te loto.

Tokolahi te hahaʼi ʼe nātou hage ko Albert. Ke feala hanatou maʼu he fakatuʼutuʼu ʼi tonatou maʼuli, ko te ʼu lauʼi miliona hahaʼi neʼe nātou mulimuli ki te ʼu filosofia, mo te ʼu lotu, pea mo te ʼu faʼahiga manatu kehekehe. ʼI te Potu Uesite, ʼi te ʼu taʼu 1960, neʼe ʼi ai te hahaʼi neʼe fakahigoaʼi ko te kau hippies, neʼe nātou fakafeagai ki te ʼu aga ʼaē ʼe tonu ke fai pea mo te ʼu meʼa faka sosiale. Neʼe kumi tāfito e te kau tūpulaga te fiafia pea mo te faka ʼuhiga ʼo te maʼuli, ʼi te toloke ʼaē neʼe fakatupu kovi ki te ʼatamai, pea mo te ʼu manatu faka filosofia ʼo tonatou ʼu pule takitaki pea mo tanatou kau takitaki fakalaumālie. Neʼe mole maʼu te fiafia moʼoni ʼi te kūtuga hippie ʼaia, kae neʼe nātou fakatupu te ʼu hahaʼi toloke pea mo te kau tūpulaga neʼe nātou fai he ʼu felāveʼi fakasino heʼeʼaoga, pea mo fakaʼāsili te aga heʼeʼaoga ʼi te sosiete fakatagata.

Lolotoga ni ʼu sēkulō, tokolahi neʼe nātou kumi te fiafia ʼi te maʼu koloā, ʼi te ʼu tuʼulaga lalahi, peʼe ʼi te maʼu pepa ʼi te ako. Kae neʼe mole nātou maʼu te fiafia ʼi te ʼu faʼahi ʼaia. Neʼe ʼui fēnei e Sesu: “E mole fakalogo te mauli o he tagata ki te u koloa e ina mau.” (Luka 12:15) Ko he tahi ʼe faiga ke maʼu koloā, ʼi te agamāhani ʼe mole ina maʼu ai te fiafia. ʼE ʼui fēnei ʼi te Tohi-Tapu: “Ko nātou ʼaē kua nātou fakapapau ke nātou maʼu koloā ʼe nātou higa ki te fakahala, ki he hele pea mo te ʼu holi fakavale lahi pea mo fakatupu kovi, ʼe nātou fakauku te tagata ki te fakaʼauha pea mo te pulinoa. Heʼe ko te manako ki te paʼaga ʼe ko te aka ʼaia ʼo te ʼu meʼa kovi fuli, pea ko ʼihi, ʼi tanatou fakaʼamu ki te holi ʼaia, neʼe . . . nātou fehukiʼaki ia nātou totonu ʼaki te ʼu mamahi lahi.”​—1 Timoteo 6:​9, 10, MN.

Koteā ʼaē ʼe tonu ke fai e he tahi ke feala hana maʼu te tokalelei ʼo te loto pea mo he fakatuʼutuʼu ʼi tona maʼuli? ʼE tonu koa ke tou ʼahiʼahi he ʼu faʼahi kehekehe ʼo aʼu ki tatatou maʼu te loto tokalelei? Kailoa ia. Ohage ko te meʼa ʼaē ka tou vakaʼi ʼi te alatike ka hoa mai, ʼe ʼi ai te faʼahi maʼuhiga ʼaupito ʼe ʼaoga ki te tagata.

[Paki ʼo te pasina 3]

ʼE feala koa ke koutou maʼu te tokalelei ʼo te loto ʼi te maʼu koloā, ʼi te ʼu tuʼulaga lalahi peʼe ʼi te maʼu pepa ʼi te ako?