Tou Haʼele Mo Te ʼAtua ʼi Te ʼu Temi Maveuveu ʼAenī

“Ko Enoke neʼe haga haʼele mo te ʼAtua moʼoni. Pea neʼe puli ia koteʼuhi neʼe toʼo ia ia e te ʼAtua.”​—Senesi 5:⁠24.

1. Koteā te ʼu meʼa ʼaē ʼe hoko ʼi totatou temi ʼe fakatupu faigataʼa ki te maʼuli?

ʼE TOU māʼuʼuli nei ʼi te ʼu temi maveuveu! ʼE hā ʼi te ʼu palalau ʼaia, talu mai te fakatuʼu ʼo te Puleʼaga Faka Mesianike ʼi te taʼu 1914, neʼe hoko ki te malamanei ia te ʼu temi maveuveu pea mo te ʼu agamālohi. Talu mai te temi ʼaia, kua maʼuli te malamanei ʼi “te u aho fakamuli.” Kua lahi ʼaupito ʼi te malamanei ia te hoge, te mahaki, te mafuike pea mo te ʼu tau. (2 Timoteo 3:1; Apokalipesi 6:​1-8) Ko te kau atolasio ʼa Sehova ʼe mole nātou hāo mai te ʼu tuʼutāmaki ʼaia. Pea ʼi hona faʼahiga ʼaluʼaga, ʼe tonu kiā tatou fuli ke tou tauʼi te ʼu faigataʼaʼia pea mo te ʼu tuʼania ʼo te temi. Pea ʼe toe faigataʼa ʼaupito ia te maʼuli ʼuhi ko te ʼu hoha faka ekonomika, te ʼu maveuveu faka politike, te ʼu faifakapō, pea mo te mahaki.

2. Koteā te ʼu fihifihia ʼaē ʼe felāveʼi mo te ʼu kaugana ʼa Sehova?

² Tahi ʼaē, tokolahi te ʼu kaugana ʼa Sehova neʼe nātou ʼutakiʼi tuʼumaʼu ia te ʼu fakafeagai ʼa Satana ʼaē neʼe ina fai kiā nātou ʼaē “ ʼe nātou mulimuli ki te ʼu fakatotonu ʼa te ʼAtua pea mo nātou maʼu te gāue ʼaē ko te fakamoʼoni kiā Sesu.” (Apokalipesi 12:​17, MN ) Logola ʼe mole ko tatou fuli ʼaē ʼe fakatagataʼi fakahagatonu, kae ko te kau Kilisitiano moʼoni fuli ʼe tonu ke nātou tauʼi ia Satana te Tevolo pea mo te manatu ʼaē ʼe ina faka mafola ʼi te malamanei. (Efeso 2:2; 6:12) ʼE tonu ke tou tōkakaga tuʼumaʼu ke ʼaua naʼa tou higa ʼi te manatu ʼaia, heʼe maʼu ia te manatu ʼaia ʼi te ʼu fale gāue, ʼi te faleako, pea mo te ʼu faʼahi ʼaē ʼe tou fakatahi ai mo te hahaʼi ʼaē ʼe mole nātou fia logo ki te tauhi maʼa.

Tou Haʼele Mo Te ʼAtua Kae Mole Ko Te ʼu Puleʼaga

3, 4. Ko te faʼahi fea ʼaē ʼe kehekehe ai te kau Kilisitiano mo te malamanei?

³ ʼI te ʼuluaki sēkulō, neʼe fakafeagai mālohi ia te kau Kilisitiano ki te manatu ʼo te malamanei, pea neʼe nātou ʼiloga kehe ʼi te hahaʼi ʼaē ʼe mole kau ki te kokelekasio faka Kilisitiano. Neʼe fakahā e Paulo ia te kehekehe ʼaia, ʼi tana faitohi ʼaenī: “Koia, ko te mea aeni e au tala atu mo au fakamooni atu i te Aliki, aua tautou toe mauli o hage ko te kau pagani, e natou mauli i te fialahi o anatou fakakaukau. Kua fakapouli onatou atamai, kua natou [mamaʼo] mai te mauli o te Atua, uhi ko te vale e ia natou, ko te fua o te fefeka o onatou loto, pea i tanatou fakaʼaoʼaoganoa, kua natou tuku ia natou ki te mauli maveuveu o fai fakavalevale [ia] te mauli uli fuape.”​—Efeso 4:​17-19.

⁴ ʼAki tana ʼu palalau ʼaia, ʼe ʼiloga mai ko te mālama ʼo te temi ʼo Paulo pea mo totatou temi, ʼe fakapōʼuli ʼaupito ʼi te faʼahi fakalaumālie pea mo te aga ʼaē ʼe tonu ke fai! Ohage ko te ʼuluaki sēkulō, ko te kau Kilisitiano ia ʼaho nei ʼe mole nātou ‘māʼuʼuli ohage ko te hahaʼi ʼo te mālama.’ Pea ʼe nātou maʼu ia te pilivilesio taulekaleka ʼaē ke nātou haʼele mo te ʼAtua. ʼIo, ʼe feala ke feʼekeʼaki niʼihi peʼe feala ki ni hahaʼi agahala ke nātou haʼele mo Sehova. Kae ʼe fakahā ʼi te Tohi-Tapu ʼe feala ke tou haʼele mo te ʼAtua. Pea ʼe fakaʼamu e Sehova ke tou fai ia te faʼahi ʼaia. ʼI te valu sēkulō ʼi muʼa ʼo totatou temi, ʼaki te tokoni ʼa te laumālie neʼe tohi e te polofeta ko Mikea ia te ʼu palalau ʼaenī: “Koteā ʼaē ʼe kole atu e Sehova kiā te koe, ʼe mole koa la ko te maʼuliʼi ʼo te faitotonu, mo te manako ki te finegaloʼofa, pea mo te haʼele mo tou ʼAtua ʼaki he fia mālalo?”​—Mikea 6:⁠8.

E Feafeaʼi Hatatou Haʼele Mo Te ʼAtua Pea Koteā Tona Tupuʼaga?

5. E feafeaʼi ki he tagata agahala hana haʼele mo te ʼAtua?

⁵ E feafeaʼi hatatou haʼele mo te ʼAtua māfimāfi pea mo fakapulipuli? ʼE mole tou palalau ʼi henī ki te faʼahiga haʼele ʼaē ʼe tou fai māhani mo te hahaʼi. ʼI te Tohi-Tapu ko te kupusiga palalau “haʼele” ʼe lava faka ʼuhiga ki hata “muliʼi he faʼahiga maʼuli.”a ʼO tou mahino ai ko he tahi ʼe haʼele mo te ʼAtua, ko tona faka ʼuhiga ʼe ina muliʼi he faʼahiga maʼuli neʼe fakatotonu age e te ʼAtua pea ʼe ina leleiʼia. Ka tou muliʼi te taʼi maʼuli ʼaia, pea ʼe tou kehekehe anai mo te hahaʼi tokolahi ʼo te malamanei. Pea ko te maʼuli pe ʼaia e tahi ʼe lelei maʼa he Kilisitiano. Koteā tona tupuʼaga? ʼE lahi tona ʼu tupuʼaga.

6, 7. He koʼe ʼe lelei ʼaupito ke tou haʼele mo te ʼAtua?

⁶ ʼUluaki, ko Sehova ʼe ko totatou Tupuʼaga, ia te Matapuna ʼo totatou maʼuli, pea ko ia ʼaē ʼe ina foaki mai ia meʼa fuli ʼe ʼaoga ki totatou maʼuli. (Apokalipesi 4:11) Pea ʼe ko ia tokotahi pe ʼe ina lava fakatotonu mai peʼe tonu ke feafeaʼi tatatou faʼahiga haʼele. Tahi ʼaē, ko te haʼele mo te ʼAtua ʼe fua lelei ki totatou maʼuli. Kiā nātou ʼaē ʼe nātou haʼele mo Sehova, neʼe ina fai te fakatuʼutuʼu moʼo fakamolemole tanatou ʼu agahala, pea ʼe ina foaki mo te ʼamanaki ki te maʼuli heʼegata, ko he ʼamanaki ʼe hoko moʼoni anai. Ko tatatou Tāmai fonu ʼi te ʼofa ʼaē ʼe ʼi selo, logola te ʼuhiga agahala ʼo nātou ʼaē ʼe haʼele mo ia pea mo tanatou māʼuʼuli ʼi te mālama ʼe puleʼi e Satana, kae ʼe ina foaki te ʼu tokoni fakapotopoto kiā nātou ʼaia ke fua lelei ki tonatou maʼuli ʼi te temi nei. (Soane 3:16; 2 Timoteo 3:​15, 16; 1 Soane 1:8; 2:25; 5:19) Ko te tahi tupuʼaga ʼo tatatou haʼele mo te ʼAtua, heʼe kapau ʼe tou tali lelei ia te faʼahi ʼaia pea ʼe tou lagolago anai ki te tokalelei pea mo te logo tahi ʼa te kokelekasio.​—Kolose 3:​15, 16.

⁷ Ko te tupuʼaga fakamuli leva, ʼaē ʼe maʼuhiga tāfito, heʼe ka tou haʼele mo te ʼAtua, ʼe tou fakahā ai tatatou lagolago ki te fehuʼi lahi ʼaē neʼe lagaʼi ʼi te ʼōloto ʼo Eteni​—te fehuʼi ʼo ʼuhiga mo te tuʼi pule faʼitaliha. (Senesi 3:​1-6) ʼAki totatou faʼahiga maʼuli, ʼe tou fakahā ai tatatou lagolago ʼāteaina kiā Sehova, pea mo tou tala ʼaki he lototoʼa ʼe ko ia tokotahi pe ʼaē ʼe tonu ke Pule Faʼitaliha. (Pesalemo 83:18) Koia ʼe tou mulimuli ki tatatou faikole ke tāpuhā te huafa ʼo te ʼAtua pea mo fai tona finegalo. (Mateo 6:​9, 10) ʼE aga fakapotopoto ia nātou ʼaē ʼe nātou fili ke nātou haʼele mo te ʼAtua! ʼE nātou lava tui papau ʼe nātou haʼele ʼi te ala ʼaē ʼe totonu, heʼe ko Sehova ‘tokotahi pe ʼe poto.’ ʼE mole he temi ʼe faihala ai.​—Loma 16:⁠27.

8. He koʼe ko te temi ʼo Enoke pea mo Noe neʼe tatau mo totatou temi?

⁸ Kae ʼe tou lava māʼuʼuli faka Kilisitiano koa ʼi he mālama ʼe maveuveu pea ʼe tokolahi ai te hahaʼi ʼaē ʼe mole nātou fia tauhi kiā Sehova? ʼE feala, heʼe ʼi te temi muʼa neʼe ʼi ai te ʼu tagata agatonu neʼe nātou nonofo agatonu ki te ʼAtua lolotoga te ʼu temi faigataʼa ʼaupito. ʼI te ʼu tagata agatonu ʼaia, ʼe kau ai te ʼu tagata e toko lua ko Enoke pea mo Noe. Neʼe nā māʼuʼuli ʼi te temi neʼe hage ko totatou temi, ʼaē neʼe lahi ai te agakovi. ʼI te temi ʼo Noe, neʼe lahi ʼi te kele ia te agamālohi pea mo te ʼu aga heʼeʼaoga. Kae ʼi te temi ʼo Enoke pea mo Noe, neʼe nā fakafeagai ki te manatu ʼa te malamanei kae nā haʼele mo Sehova. He koʼe neʼe nā lava tauʼi ia te malamanei? Moʼo tali ki te fehuʼi ʼaia, ʼe tou vakaʼi anai ʼi te alatike ʼaenī ia te faʼifaʼitaki ʼa Enoke. ʼI te alatike ka hoa mai, ʼe tou vakaʼi anai te faʼifaʼitaki ʼa Noe.

Neʼe Haʼele Ia Enoke Mo Te ʼAtua ʼi Te ʼu Temi Maveuveu

9. Koteā te fakamatala ʼaē ʼe tou maʼu ʼo ʼuhiga mo Enoke?

⁹ ʼE ʼui ʼi te Tohi-Tapu, ko te ʼuluaki tagata ʼaē neʼe haʼele mo te ʼAtua, neʼe ko Enoke. ʼE ʼui fēnei ʼi te Tohi-Tapu: “ ʼI tana ʼosi tupu ʼo Metusela, neʼe hoko atu ia te haʼele ʼa Enoke mo te ʼAtua moʼoni.” (Senesi 5:22) ʼI te hili ʼo te fakamatala ʼi te Tohi-Tapu ia te loaloaga ʼo te maʼuli ʼo Enoke​—ʼaē neʼe nounou pe ʼo ʼuhiga mo te maʼuli ʼo tona temi, kae loaloaga ia mokā ʼe fakatatau ki te temi maʼuli ʼo totatou temi​—neʼe hoko atu fēnei ia te fakamatala: “Ko Enoke neʼe haga haʼele mo te ʼAtua moʼoni. Pea neʼe puli ia koteʼuhi neʼe toʼo ia ia e te ʼAtua.” (Senesi 5:24) Koia, ʼi muʼa ʼo hona gaohi koviʼi e tona ʼu fili, neʼe toʼo ia ia e Sehova mai te kele ʼo tuku ki te faitoka. (Hepeleo 11:​5, 13) ʼE ʼi ai te tahi ʼu vaega ʼi te Tohi-Tapu ʼe toe talanoa ai ʼo ʼuhiga mo Enoke. Kae ʼaki te ʼu fakamatala ʼaē kua tou vakaʼi pea mo ʼihi age, ʼe feala ke tou ʼui neʼe maveuveu ia te temi ʼo Enoke.

10, 11. (a) ʼI te ʼosi talagataʼa ʼa Atama mo Eva, neʼe mafola lahi feafeaʼi ia te agakovi? (b) Koteā te lea faka polofeta ʼaē neʼe tala e Enoke, pea neʼe tali feafeaʼi e te hahaʼi ia te logo ʼaia?

¹⁰ Tou vakaʼi age muʼa ʼi te ʼosi agahala ʼa Atama, pe neʼe feafeaʼi te mafola fakavilivili ʼo te agakovi ki te hahaʼi. ʼE ʼui ʼi te Tohi-Tapu ʼo ʼuhiga mo te ʼuluaki foha ʼo Atama ko Kaino, neʼe ko te ʼuluaki tagata ʼaia neʼe fai fakapō he neʼe ina fakapogi tona tēhina ko Apele. (Senesi 4:​8-10) ʼI te ʼosi fakapogi ʼo Apele, neʼe tupu te tahi tama ʼa Atama pea mo Eva, ʼo nā fakahigoaʼi ko Seti. ʼO ʼuhiga mo ia, ʼe tou lau fēnei: “Mai ia Seti neʼe tupu ai te foha, pea neʼe ina fakahigoaʼi ko Enosi. ʼI te temi ʼaia, neʼe kamata fetapā te hahaʼi ki te huafa ʼo Sehova.” (Senesi 4:​25, 26) Meʼa fakaʼofaʼofa, he neʼe “fetapā te hahaʼi ki te huafa ʼo Sehova” ʼaki he ʼu aga faka ʼaposita.b ʼI he ʼu taʼu ki muli age ʼi te ʼosi tupu ʼo Enosi, ko te tagata ko Lameke neʼe kau ki te hōloga ʼo Kaino, neʼe ina fai te hiva maʼa tona ʼu ʼohoana e toko lua, ʼo ina ʼui neʼe ina fakapogi te tama neʼe ina fakalavea ia ia. Neʼe ina toe fakatokaga fēnei: “Kapau ʼe tonu ke kami tuʼa fitu ʼo ʼuhiga mo Kaino, pea ʼe liuga fitugofulu tuʼa fitu ʼo ʼuhiga mo Lameke.”​—Senesi 4:​10, 19, 23, 24.

¹¹ ʼE ʼasi mai ʼi te ʼu fakamatala fakanounou ʼaenī ohage ko te ʼu meʼa ʼaē neʼe kua tou vakaʼi, ko te agakovi ʼaē neʼe kamata fakahū e Satana ʼi te ʼōloto ʼo Eteni, neʼe kua mafola lahi ki te hōloga ʼo Atama. ʼI te mālama ʼaia, ko Enoke neʼe ko te polofeta ʼa Sehova, pea ko tana ʼu fakakikite mālohi ʼe kei ʼaoga pe ia ʼaho nei. ʼE ʼui e Suta ko Enoke neʼe ina fakakikite fēnei: “Koʼeni! Kua haʼu ia Sehova mo ʼana miliate maʼoniʼoni, moʼo fakahoko ʼo te fakamāu ki te hahaʼi fuli, pea mo fakahā te hala ʼa te hahaʼi ʼaē ʼe aga heʼe lotu ʼo ʼuhiga mo tanatou meʼa noaʼi te ʼAtua ʼi tanatou ʼu aga fakafeagai ʼo feiā mo te ʼu meʼa fakaufiufi fuli ʼaē neʼe lau e te kau agahala heʼe lotu kiā te ia.” (Suta 14, 15, MN ) Ko te ʼu palalau ʼaia ʼe hoko kātoa anai ʼi Halamaketone. (Apokalipesi 16:​14, 16) Koia, ʼe tou lava tui papau ʼi te temi ʼo Enoke, neʼe lahi “te kau agahala heʼe lotu” neʼe nātou ʼiʼita ʼi tanatou logo ki te lea faka polofeta ʼa Enoke. Koia, neʼe ko he manavaʼofa ʼa Sehova ʼi tana toʼo ia te polofeta ke ʼaua naʼa hoko kiā ia he meʼa ʼe kovi!

Te Faʼahi ʼAē Neʼe Ina Fakaloto Mālohiʼi Ia Enoke Ke Haʼele Mo Te ʼAtua

12. Koteā ʼaē neʼe kehekehe ai ia Enoke pea mo te hahaʼi ʼo tona temi?

¹² ʼI te ʼōloto ʼo Eteni, neʼe fakalogo ia Atama mo Eva kiā Satana, pea neʼe fakafeagai ia Atama kiā Sehova. (Senesi 3:​1-6) Ko tanā tama ko Apele neʼe mole ina muliʼi tanā faʼifaʼitaki kovi, pea neʼe ʼofa Sehova kiā ia. (Senesi 4:​3, 4) Kae meʼa fakaʼofaʼofa heʼe ko te tokolahi ʼo te hōloga ʼo Atama neʼe mole nātou hage ko Apele. Neʼe mole feiā ia Enoke ʼaē neʼe tupu ki muli age. Koteā ʼaē neʼe kehekehe ai ia Enoke pea mo te tokolahi ʼo te hōloga ʼo Atama? Moʼo tali ki te fehuʼi ʼaia, neʼe ʼui fēnei e te ʼapositolo ko Paulo: “Aki te tui, nee toʼo Enoke, naʼa sio ki te mate, pea nee mole mau koteuhi nee kua toʼo ia e te Atua. Pea i mua o tona toʼo, nee ina tali te fakamooni, nee leleiʼia iaʼia e te Atua.” (Hepeleo 11:5) Neʼe kau ia Enoke ʼi te toe ‘ ʼao ʼo te kau fakamoʼoni [ʼi muʼa ʼo totatou temi],’ ʼaē neʼe nātou tuku he faʼifaʼitaki lelei ʼo ʼuhiga mo tanatou tui. (Hepeleo 12:1) Ko te tui ʼaē neʼe ina faka fealagia kiā Enoke ke faʼafai pea mo ina taupau he faʼahiga aga ʼe lelei, lolotoga tona maʼuli ʼaē neʼe fakalaka ʼi te ʼu taʼu e 300. Ko te faka ʼuhiga ʼaia ʼo te tuʼa tolu ʼo te maʼuli ʼo ʼihi ia tatou ʼo totatou temi!

13. Neʼe feafeaʼi ia te tui ʼa Enoke?

¹³ ʼO ʼuhiga mo te tui ʼa Enoke pea mo ʼihi Fakamoʼoni, neʼe ʼui fēnei e Paulo: “Ko te tui ʼe ko he ʼamanaki moʼoni ki he ʼu meʼa ʼe tou falala kiai, ko te fakamoʼoni lelei ʼo te ʼu moʼoni logope la ʼe mole tou sisio kiai.” (Hepeleo 11:​1, MN ) Ei, ko te tui ʼe ko hata falala ʼo fakatalitali ki he ʼu meʼa ʼe tou fakaʼamu ʼe hoko moʼoni anai, pea ʼe fakatafito ki te ʼu fakapapau. Pea ʼe malave mālohi tatatou falala ʼaia ki totatou maʼuli. Ko te taʼi tui la ʼaia ʼaē neʼe feala ai kiā Enoke ke haʼele mo te ʼAtua logola tana tōlotōa ʼi te mālama agakovi.

14. Ko te ʼatamai mālama totonu fea ʼaē neʼe feala ke fakatafito kiai e Enoke ia tana tui?

¹⁴ Ko te tui moʼoni ʼe fakatafito ki te ʼatamai mālama totonu. Koteā ʼaē neʼe kua mālama kiai ia Enoke? (Loma 10:​14, 17; 1 Timoteo 2:4) Neʼe ina ʼiloʼi ia te ʼu meʼa ʼaē neʼe hoko ʼi Eteni. Lagi neʼe logo ki te faʼahiga maʼuli ʼaē neʼe maʼu ʼi te ʼōloto ʼo Eteni​—ʼaē neʼe lagi kei tuʼu kae neʼe mole kei fakagafua ki te hahaʼi ke nātou māʼuʼuli ai. (Senesi 3:​23, 24) Pea neʼe ina ʼiloʼi te fakatuʼutuʼu ʼa te ʼAtua ʼo ʼuhiga mo te hōloga ʼo Atama, tana fakatotonu ʼaē ke nātou fakafonu ia te kele pea mo nātou gāueʼi ke liliu ʼo matalelei ohage ko te ʼuluaki Palatiso. (Senesi 1:28) Tahi ʼaē, neʼe leleiʼia tāfito e Enoke ia te fakapapau ʼa Sehova ʼaē ke ina fakatupu he Hāko ʼe ina maumauʼi anai te ʼulu ʼo Satana pea mo pulihi te ʼu fua kovi ʼo tana kākā. (Senesi 3:15) ʼIo, ʼi te tohi ʼo Suta ʼe tuʼu ai ia te lea faka polofeta ʼa Enoke ʼaē ʼe ina fakakikite ai ia te fakaʼauha ʼo te hāko ʼa Satana. Ko Enoke neʼe ko he tagata tui, neʼe tauhi kiā Sehova pea neʼe tui ko te ʼAtua “ ʼe ina fakapale ia nātou ʼaē ʼe nātou kumi moʼoni ia ia.” (Hepeleo 11:​6, MN ) Koia logola te mole maʼu kātoa e Enoke ia te ʼatamai mālama ʼaē ʼe tou maʼu ia ʼaho nei, neʼe feʼauga pe kiā ia te ʼu meʼa ʼaē neʼe kua mahino kiai moʼo fakamālohiʼi tana tui. ʼAki tana tui ʼaia, neʼe feala ai kiā ia ke nofo agatonu lolotoga te ʼu temi maveuveu.

Tou Faʼifaʼitakiʼi Te Tui ʼa Enoke

15, 16. E feafeaʼi hatatou faʼifaʼitaki kiā Enoke?

¹⁵ Kapau ohage ko Enoke ʼe tou fia fakafiafia ia Sehova ʼi te ʼu temi maveuveu ʼaenī, pea ʼe tonu ke tou muliʼi ia te faʼifaʼitaki ʼa Enoke. ʼE tonu ke tou maʼu pea mo taupau ia te ʼatamai mālama ʼo ʼuhiga mo Sehova pea mo tana ʼu fakatuʼutuʼu. Kae ʼe ʼi ai te tahi meʼa ʼe tonu ke tou fai. ʼE tonu ke tou tuku ia te ʼatamai mālama ke ina takitaki totatou maʼuli. (Pesalemo 119:101; 2 Petelo 1:19) ʼE tonu ke takitaki tatou e te manatu ʼa te ʼAtua, ʼo tou faiga tuʼumaʼu ke tou fakafiafiaʼi ia ia ʼaki tatatou ʼu manatu pea mo tatatou ʼu aga.

¹⁶ ʼE mole ʼi ai he tahi fakamatala ʼe talanoa ai ʼo uhiga mo he tahi kehe ʼi te temi ʼo Enoke neʼe tauhi kiā Sehova, kae ʼe mahino ia lagi neʼe tokotahi peʼe neʼe nātou tokosiʼi. ʼO feiā mo tatou ʼi te temi nei, ʼe tou tokosiʼi ʼi te malamanei, kae ʼe mole ko he faʼahi e ina fakaloto vaivaiʼi tatou. ʼE tokoni mai anai ia Sehova logola te ʼu fakafeagai ʼaē ʼe fai mai kiā tatou. (Loma 8:31) Ko Enoke ʼaki he lototoʼa neʼe ina fakatokaga ki te ʼu tagata heʼe lotu, ʼe fakaʼauha anai nātou. Mo tatou foki la, ʼe tou lototoʼa mokā tou faka mafola ia “te logo lelei ʼaenī ʼo te puleʼaga” logola te ʼu manukinuki, mo te ʼu fakafeagai, pea mo te ʼu fakataga. (Mateo 24:​14, MN ) ʼO mole hage ko te tokolahi ʼo tona temi, neʼe nounou te maʼuli ʼo Enoke. Kae neʼe mole falala ia ki te malamanei. Neʼe fakatalitali ia ki te meʼa neʼe maʼuhiga tāfito age. (Hepeleo 11:​10, 35) Mo tatou foki ʼe tou fakatalitali ke fakahoko e Sehova ia tana fakatuʼutuʼu. Koia, ʼe mole tou fakaʼaogaʼi kātoa ai ia te malamanei. (1 Kolonito 7:31) Kae ʼe tou fakaʼaogaʼi tāfito ia totatou mālohi pea mo ʼotatou koloā moʼo tauhi kiā Sehova.

17. Koteā te ʼu meʼa ʼaē kua tou mālama kiai kae neʼe mole mālama kiai ia Enoke, pea koteā ʼaē ʼe tonu ke tou fai?

¹⁷ Neʼe tui ia Enoke ko te Hāko ʼaē neʼe fakapapauʼi mai e te ʼAtua ʼe haʼu anai ʼi te temi ʼaē kua fakakatofa e Sehova. Kua hili nei kiai taʼu e 2 000 talu mai te temi ʼaē neʼe haʼu ai te Hāko ʼaē ko Sesu Kilisito, ʼo foaki te totogi, pea mo tofa te ala maʼa tatou, pea mo te ʼu fakamoʼoni agatonu ʼo te temi muʼa ohage ko Enoke, ke tou maʼu ia te maʼuli heʼegata. Ko te Hāko ʼaia, ʼaē kua fakanofo Hau ʼi te temi nei ʼi te Puleʼaga ʼo te ʼAtua, neʼe ina kapu ifo ia Satana mai te lagi ki te kele, pea kua tou sio ki tona ʼu fua ʼuhi ko te ʼu maveuveu ʼaē ʼe hoko ʼi te kele. (Apokalipesi 12:12) Ei, ʼi te temi nei kua lahi age te ʼu meʼa ʼaē kua tou mālama kiai ʼi te temi ʼo Enoke. Koia ʼofa pe ke tou tui mālohi ohage ko tana tui. ʼOfa pe ke tou fai ia meʼa fuli ʼaki he loto falala ʼe fakahoko anai e te ʼAtua ia tana ʼu fakapapau. Ohage ko Enoke, ʼofa pe ke tou haʼele fakatahi mo te ʼAtua, logola ʼe tou māʼuʼuli ʼi te ʼu temi maveuveu.

[Kiʼi nota]

ʼE Koutou Tali Feafeaʼi Anai?

• Koteā te faka ʼuhiga ʼo te ʼui ʼaē ʼe tou haʼele mo te ʼAtua?

• He koʼe ʼe lelei ʼaupito ke tou haʼele mo te ʼAtua?

• Koteā ʼaē neʼe feala ai kiā Enoke ke haʼele mo te ʼAtua logola tana maʼuli ʼi te ʼu temi maveuveu?

• ʼE tou lava faʼifaʼitakiʼi feafeaʼi ia Enoke?

[Paki ʼo te pasina 15]

ʼAki te tui, “ko Enoke neʼe haga haʼele mo te ʼAtua moʼoni”

[Paki ʼo te pasina 17]

ʼE tou tui mālohi ʼe hoko anai te ʼu fakapapau ʼa Sehova

[Haʼuʼaga ʼo te paki pasina 13]

Woman, far right: FAO photo/B. Imevbore; collapsing building: San Hong R-C Picture Company