ʼE Tonu Koa Ke Tou Tokagaʼi—Te Manatu ʼa Te Hahaʼi ʼo ʼUhiga Mo Tatou?
ʼE MOʼONI, tokolahi iā tatou ʼe tou leleiʼia mokā vikiʼi tatou. Ko te fakavikiviki ʼe feala ke ina fakafiafia totatou loto pea mo fakatupu iā tatou he fiafia ʼuhi ko te ʼu gāue aē neʼe tou fai. Ko te fakavikiviki ʼe ina uga tatou ke tou hikihiki tatatou ʼu gāue. Kae kapau ʼe fakamālaloʼi tatou, pea ʼe mole kei lelei tatatou gāue. Ko he tali fefeka pea mo he fatufatu ʼe ko he ʼu palalau fakaloto vaivai. Ko te ʼu manatu ʼo te hahaʼi ʼo ʼuhiga mo tatou ʼe feala pe ke nātou fetogi tatatou ʼu manatu aē ʼo ʼuhiga mo tatou totonu.
ʼE tou faihala mo kapau ʼe mole tou tokagaʼi te manatu ʼa te hahaʼi ʼo ʼuhiga mo tatou. ʼE feala ke fua lelei kiā tatou mokā sivi fakaleleiʼi tatou e ʼihi kehe. Kapau ko te sivi ʼaia ʼe fakatafito ki he ʼu pelesepeto ʼo ʼuhiga mo te ʼu aga ʼaē ʼe lelei pea mo tonu ke fai, ʼe feala ke ʼaoga tanatou ʼu manatu kiā tatou, pea mo uga tatou ke tou fai te meʼa ʼaē ʼe lelei. (1 Kolonito 10:31-33) Kae ko te ʼu manatu ʼa te hahaʼi ʼe mole faʼa totonu tuʼumaʼu. Tou manatuʼi te ʼu manatu hala ʼaē neʼe maʼu e te ʼu pelepitelo pule pea mo te hahaʼi ʼo ʼuhiga mo Sesu Kilisito, ʼi te temi aē “neʼe nātou kalaga [ai] ʼo ʼui maʼa nātou: ‘Haʼi ki he pou! Haʼi ia ia ki he pou!’ ” (Luka 23:13, 21-25, MN ) ʼAua naʼa tou tokagaʼi te ʼu loi pea mo te ʼu manatu hala ʼaē ʼe maʼu e ʼihi ʼuhi ko tanatou maheka pea mo tanatou fakapalatahi. Koia ʼe tonu ke tou maʼu he fakasiosio poto pea mo tou tali lelei te ʼu manatu ʼo te hahaʼi.
Ko Te Manatu ʼo Ai ʼAē ʼe Tonu Ke Tou Tokagaʼi?
ʼE tou loto ke tali leleiʼi tatou e nātou ʼaē ʼe tou fakatahi mo nātou ʼi te tauhi moʼoni, ohage ko totatou ʼu famili totonu ʼaē i te moʼoni pea mo totatou ʼu tēhina mo tuagaʼane faka Kilisitiano. (Loma 15:2; Kolose 3:18-21) ʼE tou faka maʼuhigaʼi ʼaupito te ʼofa pea mo te fakaʼapaʼapa ʼo te ʼu tēhina, pea mo tanatou “fefakaloto mālohiʼaki.” (Loma 1:11, 12, MN ) ʼAki ‘he loto fia mālalo, ʼe tou faka ʼuhiga ia nātou ʼaē ohage ʼe nātou māʼoluga age iā tatou.’ (Filipe 2:2-4) Pea tahi ʼaē, ʼe tou faigaʼi pea mo tou faka maʼuhigaʼi te ʼofa “ ʼo nātou ʼaē ʼe nātou takitaki” ia tatou—te kau tagata ʼāfea ʼi te kokelekasio.—Hepeleo 13:17, MN.
ʼE ko he tahi meʼa lelei ‘te fakamoʼoni lelei ʼaē ʼe fai e te hahaʼi ʼo tuʼa’ ʼo ʼuhiga mo tatou. (1 Timoteo 3:7) ʼE ko he meʼa lelei mokā fakaʼapaʼapaʼi tatou e totatou ʼu kāiga ʼaē ʼe mole ʼi te moʼoni, mo totatou ʼu kaugā gāue pea mo totatou ʼu vahaʼa fale! Pea ʼe tou fia tuku he faʼifaʼitaki lelei ki te hahaʼi ʼaē ʼe tou fai faka mafola ki ai, ke feala hanatou tali lelei ia te logo ʼo te Puleʼaga. ʼE faka kolōliaʼi te ʼAtua, mo kapau ʼe ʼiloʼi tatou e te hahaʼi, ʼe tou aga maʼa, mo fai te aga ʼaē ʼe lelei pea mo aga fakahagatonu. (1 Petelo 2:12) Kae ʼe mole tonu anai ke tou fakafeagai ki te ʼu pelesepeto ʼo te Tohi-Tapu ke feala hotatou ʼofainaʼi e te hahaʼi, pea ʼe mole tou aga malualoi anai ke nātou tali tatou. ʼE tonu ke mahino kiā tatou ʼe mole feala ke tou fakafiafia te loto ʼo te hahaʼi fuape. Neʼe ʼui fēnei e Sesu: “Kanapaula neʼe koutou kau ki te malamanei, kanaʼauala ʼe ʼofa te malamanei ki te meʼa ʼaē ʼaʼana. Kae mai tona ʼuhiga ʼaē ʼe mole koutou kau ʼi te malamanei, kae neʼe au filifili koutou mai te lotolotoiga ʼo te malamanei, ko te tupuʼaga la ʼaia ʼo te fehiʼa ʼa te malamanei kiā koutou.” (Soane 15:19, MN ) Koteā ʼaē ʼe tonu ke tou fai ke fakaʼapaʼapaʼi tatou e nātou ʼaē ʼe fakafeagai mai kiā tatou?
ʼE Fakaʼapaʼapaʼi Tatou e Nātou ʼAē ʼe Fakafeagai Mai
Neʼe fai e Sesu ia te fakatokaga ʼaenī: “ ʼE fehiʼaʼinaʼi anai koutou e te hahaʼi fuli ʼuhi ko toku huafa, kae ko ʼaē ka faʼa kātaki anai ʼo kaku ki te fakaʼosi, ʼe ko ia ia ʼaē ka maʼuli anai.” (Mateo 10:22, MN ) ʼI ʼihi temi ko te fehiʼa ʼaia ʼe ina fakatupu te ʼu tukugakovi hala. ʼE feala pe ki he ʼu tagata ʼe gāue ʼi te puleʼaga ke nātou lau ko tatou ko “te ʼu hahaʼi fakafeagai” ʼe nātou fia “holoʼi te puleʼaga.” ʼE lagi lau e te hahaʼi aē ʼe fakafeagai mai kiā tatou, ko tatou ʼe ko te magaʼi lotu fakatupu tokakovi pea ʼe tonu ke molehi. (Gaue 28:22) Ko te ʼu tukugakovi hala ʼaia ʼe feala pe ʼi ʼihi temi ke fakagata. ʼO feafeaʼi? Kapau ʼe tou mulimuli ki te tokoni ʼo te ʼapositolo ko Petelo: “Koutou nonofo teuteu tuʼumaʼu moʼo tali ki te tagata fuape ʼaē ʼe ina fehuʼi atu te tupuʼaga ʼo takotou ʼamanaki ʼaē iā koutou, kae koutou tali ʼaki he agamālū pea mo he fakaʼapaʼapa lahi.” (1 Petelo 3: 15, MN ) Pea tahi ʼaē meʼa, ʼe tonu ke tou fai “he palalau maʼoniʼoni ʼe mole feala hona faka lākahalaʼi; ke ufiufi ia te tagata ʼaē ʼe fakafeagai, ʼi tana mole maʼu he meʼa ke leakovi ai kiā tatou.”—Tito 2:8, MN.
Logola tatatou faiga ʼaē ke mole laukoviʼi tatou, ʼe mole tonu leva ke tou lotovaivai peʼe tou tuʼania fau mokā fai mai he ʼu fasituʼu kiā tatou. Ko Sesu, te ʼAlo ʼo te ʼAtua, neʼe tukugakoviʼi ʼe ina laukoviʼi te ʼAtua, ko he tagata agatuʼu, pea mo gaohi meʼa faka temonio. (Mateo 9:3; Maleko 3:22; Soane 19:12) Neʼe fai te ʼu fasituʼu ʼo ʼuhiga mo te ʼapositolo ko Paulo. (1 Kolonito 4:13) Neʼe mole tokagaʼi e Sesu pea mo Paulo te ʼu laukovi ʼaia, kae neʼe nā fakahoko tanā ʼu gāue. (Mateo 15:14) Neʼe nā iloʼi neʼe mole feala ke ʼofainaʼi nāua e tona ʼu fili, mai tona ʼaluʼaga ʼaē “ko te malamanei kātoa ʼe takoto ia ʼi te mālohi ʼo te agakovi.” (1 Soane 5:19, MN ) Ia ʼaho nei, ʼe tou felāveʼi mo te ʼu faigataʼaʼia ʼaia. Kae ʼe mole tonu ke tou mātataku mokā lau he ʼu loi ʼo ʼuhiga mo tatou, e te hahaʼi ʼaē ʼe nātou fēhihiʼa kiā tatou.—Mateo 5:11.
Te ʼu Manatu Aē ʼe Maʼuhiga Tāfito
Ko te ʼu manatu ʼo te hahaʼi ʼe kehekehe ia, ʼo fakalogo ki tonatou loto pea mo te ʼu meʼa aē neʼe nātou logoʼi ʼo ʼuhiga mo tatou. Ko ihi hahaʼi ʼe nātou fakavikiviki pea mo fakaʼapaʼapa kiā tatou, kae ko ʼihi ʼe nātou laukoviʼi pea mo fēhihiʼa kiā tatou. Kae ʼe tonu ke tou lotofiafia pea mo tokalelei, mo kapau ʼe tou ʼiloʼi ʼe tou muliʼi te ʼu pelesepeto ʼo te Tohi-Tapu.
Neʼe tohi fēnei e te apositolo ko Paulo: “Ko te Tohi-Tapu kātoa ʼe haʼu mai te ʼAtua pea ʼe ʼaoga moʼo akoʼi, moʼo fakatonutonuʼi, moʼo fakatokatoka ʼo te ʼu meʼa, moʼo akonakiʼi ʼi te faitotonu, koteʼuhi ke kātoa lelei te tagata ʼa te ʼAtua, pea mo teuteu lelei ki te ʼu gāue lelei fuli pe.” (2 Timoteo 3:16, 17, MN ) ʼE tapuakina anai tatou e Sehova ʼAtua pea mo tona ʼAlo, ia Sesu Kilisito, mo kapau ʼe tou tali lelei ke takitaki tatou e te folafola ʼo te Atua iā meʼa fuli. Ko te meʼa ʼaē ʼe maʼuhiga tāfito, ko te faʼahiga manatu ʼaē ʼa Sehova pea mo tona ʼAlo ʼo ʼuhiga mo tatou. Ko te manatu ʼaē ʼe nā maʼu ʼo ʼuhiga mo tatou, ʼe ʼiloga moʼoni ia totatou ʼuhiga totonu. ʼI tona fakahagatonu, ko totatou maʼuli ʼe fakalogo pe ki tanā tapuakina.—Soane 5:27; Sakopo 1:12.
[Fakamatala ʼo te pasina 30]
“ ʼE au ufiufi mokā fai mai he ʼu fakavikiviki, heʼe ko he faʼahi ʼe au kole fakafūfū ʼi toku loto.”—TE TAGATA INITIA FAI TUKETUKE KO RABINDRANATH TAGORE
[Paki ʼo te pasina 31]
ʼE tonu ke tou tokagaʼi te manatu ʼo totatou ʼu tēhina pea mo tuagaʼane ʼi te tui
[Haʼuʼaga ʼo te paki ʼo te pasina 30]
Culver Pictures