Neʼe Mole He Tupuʼaga ʼo Tonatou Fehiʼaʼinaʼi

“Nee mole he tupuaga o tonatou fehia ia te au.”​—Soane 15⁠:⁠25.

1, 2. (a) He koʼe ʼe mole mahino ʼihi mokā fai he ʼu fakamatala loi ʼo ʼuhiga mo te kau Kilisitiano, kae he koʼe ʼe mole tou punamaʼuli ki te faʼahi ʼaia? (b) Koteā anai ka tou vakaʼi ʼi te alatike ʼaenī ʼo ʼuhiga mo te kupu “fehiʼa”? (kiʼi nota ʼi te lalo pasina.)

KO TE kau Fakamoʼoni ʼa Sehova ʼe nātou faiga ke nātou maʼuliʼi te ʼu pelesepeto ʼo te Tohi-Tapu, koia ʼaē ʼe palalau lelei ai te hahaʼi kia nātou ʼi te ʼu fenua. Kae ʼi ʼihi temi, ʼe fai te ʼu fakamatala loi ʼo ʼuhiga mo nātou. Ohage la, ko te tagata ʼe gāue ʼi te puleʼaga ʼi te kolo ʼo St. Pétersbourg ʼi Lusia, ʼe ina ʼui fēnei ʼo ʼuhiga mo te ʼu taʼu kua hili: “Neʼe fakahā mai kia mātou, ko te kau Fakamoʼoni ʼa Sehova ʼe ko te magaʼi lotu ʼe ina fai te ʼu meʼa ʼe mole ʼiloʼi e te hahaʼi, ʼe nātou fakapogi te tamaliki pea mo nātou fematematehiʼaki ia nātou.” Ko te tagata ʼaia, ʼi tana ʼosi kaugā gāue leva mo te kau Fakamoʼoni ʼa Sehova ʼi te fakatahi faka malamanei, neʼe ina ʼui fēnei: “Ko te hahaʼi ʼaē neʼe ʼau sio ki ai ʼe nātou hage pe ko tatou, ʼe nātou mata malimali . . . ʼE nātou maʼuli tokalelei pea mo fīmālie, pea ʼe nātou feʼofaniʼaki ʼaupito.” Neʼe ina toe ʼui fēnei: “ ʼE mole ʼau ʼiloʼi pe koʼe ʼe fai te ʼu fakamatala loi kia nātou.”​—1 Petelo 3⁠:⁠16.

² ʼE mole leleiʼia e te ʼu kaugana ʼa te ʼAtua mokā ʼui ʼe nātou agakovi, kae ʼe mole nātou punamaʼuli ki te ʼu fakamatala loi ʼaia ʼe fai e te hahaʼi ʼo ʼuhiga mo nātou. Neʼe fakatokagaʼi fakatomuʼa fēnei e Sesu ki tana ʼu tisipulo: “Kapau e fehia te malama-nei ia koutou, iloi e koutou nee uluaki fehia ia te au, ia koutou. . . . Ke fakahoko te kupu nee tohi i tanatou lao: ‘Nee mole he tupuaga o tonatou fehia ia te au.’ ”a (Soane 15⁠:​18-20, 25; Pesalemo 35⁠:19; 69⁠:⁠4) ʼI muʼa atu, neʼe ina ʼui age kia nātou: “Kapau nee natou fakahigoa te pule o te api ko Pelesepu, pe e feafeai anai hanatou talanoa o uhiga mo tona kauga api.” (Mateo 10⁠:25) ʼE ʼutakiʼi e te kau Kilisitiano te ʼu fakamatala loi ʼaia heʼe mahino kia nātou ʼe tonu ke nātou ʼamo tonatou “pou fakamamahi” ʼaē neʼe nātou tali ʼi te temi neʼe nātou liliu ai ko te ʼu tisipulo ʼa Kilisito.​—Mateo 16⁠:​24, MN.

3. Neʼe feafeaʼi te fakatagaʼi ʼo te kau atolasio moʼoni?

³ Neʼe fualoa ʼaupito te fakatagaʼi ʼo te kau atolasio moʼoni, ʼo kamata mai te tagata “agatonu ko Apele.” (Mateo 23⁠:​34, 35, MN ) Neʼe mole hoko pe te ʼu fakataga ʼaia ki he tokosiʼi. Neʼe ʼui e Sesu ki tana ʼu tisipulo ʼe “fehia anai te tagata fuape” ia nātou ʼuhi pe ko tona huafa. (Mateo 10⁠:22) Neʼe toe ʼui e te ʼapositolo ko Paulo ko te ʼu kaugana fuli ʼa te ʼAtua​—ʼo feiā mo tatou takitokotahi​—ʼe fakatagaʼi anai. (2 Timoteo 3⁠:12) Koteā te ʼui ki te faʼahi ʼaia?

Te Tupuʼaga ʼo Te Fehiʼaʼinaʼi

4. Koteā ʼaē ʼe fakahā mai e te Tohi-Tapu ʼo ʼuhiga mo te tupuʼaga ʼo totatou fehiʼaʼinaʼi?

⁴ Talu mai te kamata neʼe fakahā e te Folafola ʼa te ʼAtua ʼe ʼi ai te meʼa fai fakahala fakapulipuli. Koutou fakatokagaʼi te fakapogi fakamataku ʼo te ʼuluaki tagata tui ko Apele. ʼE fakahā e te Tohi-Tapu ko tona tēhina fai fakapō, ko Kaino, “neʼe haʼu mai te agakovi,” ia Satana te Tevolo. (1 Soane 3⁠:​12, MN ) Neʼe fakalogo ia Kaino ki te fakatuʼutuʼu ʼa Satana, pea ko te Tevolo neʼe ina fakaʼaogaʼi ia ia moʼo fakahoko tana ʼu fakatuʼutuʼu kovi. ʼE toe fakahā mai e te Tohi-Tapu te gāue ʼa Satana ʼi te ʼu mamahi ʼaē neʼe ina fai kia Sopo pea mo Sesu Kilisito. (Sopo 1⁠:12; 2⁠:​6, 7; Soane 8⁠:37; 13⁠:27) ʼE fakahā fakalelei mai e te tohi ʼo Apokalipesi te tupuʼaga ʼo te fakatagaʼi ʼo te kau tisipulo ʼa Sesu, ʼo ina ʼui fēnei: “E amanaki te [“Tevolo,” MN ] ke ina laku ihi o koutou ki te pilisoni, koteuhi ke ahiahiʼi koutou.” (Apokalipesi 2⁠:10) Ei, ko Satana ʼaē ʼe tupu ai te fehiʼaʼinaʼi ʼo te hahaʼi ʼa te ʼAtua.

5. He koʼe ʼe fehiʼa ia Satana ki te kau atolasio moʼoni?

⁵ He koʼe ʼe fehiʼa ia Satana ki te kau atolasio moʼoni? ʼAki tana fakatuʼutuʼu kovi ʼe fakahā e Satana tona loto ʼaē ke faka maʼuhigaʼi ia ia, koia neʼe fakafeagai ai ki “te Hau ʼo te heʼegata,” ia Sehova ʼAtua. (1 Timoteo 1⁠:17; 3⁠:​6, MN ) ʼE ina ʼui ʼe fefeka fau te pule ʼa te ʼAtua ki tana ʼu meʼa ʼaē neʼe ina fakatupu pea ʼe mole he tahi ia nātou ʼaia ʼe tauhi mo tona loto katoa kia Sehova, kae ko te hahaʼi ʼaia ʼe nātou tauhi kia ia ʼuhi pe ke ina tapuakiʼi nātou. ʼE ʼui e Satana, kapau ʼe tuku age e te ʼAtua ke ina ʼahiʼahiʼi te hahaʼi, pea ʼe ina lava fakamamaʼo ia nātou mai ia te ia. (Senesi 3⁠:​1-6; Sopo 1⁠:​6-12; 2⁠:​1-7) Neʼe faiga ia Satana ke ina faʼao te pule faʼitaliha ʼa Sehova ʼi tana loi ʼaē ko Sehova ʼe aga fefeka, ʼe gutuloi, pea ʼe mole ina fakahoko tana ʼu fakapapau. Koia, ʼi tona ʼita ki te ʼu kaugana ʼa te ʼAtua, neʼe ina fai ai he meʼa ke atolasioʼi ia ia.​—Mateo 4⁠:​8, 9.

6. (a) ʼE malave feafeaʼi kia tatou takitokotahi te fehuʼi ʼo ʼuhiga mo te pule faʼitaliha ʼa Sehova? (b) E feafeaʼi hatatou nofo agatonu mo kapau ʼe tou mahino ki te fehuʼi ʼaē neʼe lagaʼi? (Vakaʼi te talanoa, pasina 16.)

⁶ ʼE malave feafeaʼi kia koutou te fihi ʼaia? ʼE lagi koutou fakatokagaʼi ʼi tokotou ʼuhiga kaugana ʼa Sehova, ʼe tonu anai ke tou faiga mālohi moʼo fai te finegalo ʼo te ʼAtua, kae ʼe lahi ʼaupito te ʼu tapuakina ʼe tou maʼu ai. Ka koutou tau mo ni ʼu fihifihia, peʼe koutou mamahi, ʼe koutou hoko atu anai koa takotou fakalogo ki te ʼu lao pea mo te ʼu pelesepeto ʼa Sehova? Pea e feafeaʼi la mo kapau ʼe koutou fakatokagaʼi ʼe mole tapuakinaʼi takotou ʼu faiga? ʼE koutou ʼui anai koa ʼe mole he ʼuhiga ʼo takotou tauhi kia Sehova? Peʼe koutou haga ʼofa anai kia Sehova pea mo fakafetaʼi lahi ki tona ʼu kalitate māʼoluga ʼi tana faka fealagia ke hoko atu takotou haʼele ʼi tona ʼu ala? (Teutalonome 10⁠:​12, 13) ʼAki te fakagafua ʼaē e Sehova ke fakatagaʼi tatou e Satana, ʼe ina foaki mai kia tatou takitokotahi te faigamālie ʼaē ke tou foaki he tali ki te fihi ʼaē neʼe lagaʼi e Satana.​—Tāʼaga Lea 27⁠:⁠11.

“Mokā Valoki Koutou”

7. Koteā te kākā ʼaē ʼe fakaʼaogaʼi e te Tevolo moʼo fakamamaʼo tatou mai ia Sehova?

⁷ Tou talanoa muʼa ki te kākā ʼi te ʼu kākā ʼaē ʼe fakaʼaogaʼi e Satana moʼo fakaneke ʼo tatou ke tou lagolago kia te ia​—tana fakaʼaogaʼi te ʼu fakamatala loi. ʼE higoaʼi e Sesu ia Satana ko “te tāmai ʼo te loi.” (Soane 8⁠:​44, MN ) Ko te higoa Tevolo, ʼaē ko tona faka ʼuhiga ko he “Tahi ʼe Fakafeagai,” ʼe hā ʼaki ʼe fakafeagai mālohi ki te ʼAtua, ki tana folafola, pea mo tona huafa maʼoniʼoni. ʼE fakaʼaogaʼi e te Tevolo te ʼu tukugakovi loi, pea mo te ʼu loi moʼo fakafeagai ki te pule faʼitaliha ʼa Sehova, pea ʼe ina fakaʼaogaʼi tana ʼu kākā māhani moʼo fakamamahiʼi te ʼu kaugana agatonu ʼa te ʼAtua. ʼAki te lahi ʼo te ʼu fakamatala loi ʼaē ʼe ina fai ki te kau Fakamoʼoni ʼaia, ʼe feala hana fakaliliu he ʼu ʼahiʼahi ke faigataʼa ʼaupito tona tauʼi.

8. Neʼe tukugakoviʼi feafeaʼi e Satana ia Sopo, pea neʼe koteā tona fua?

⁸ Koutou fakatokagaʼi te meʼa ʼaē neʼe hoko kia Sopo, ʼaē ko tona higoa ʼe faka ʼuhiga “Ko He Meʼa Fehiʼaʼinaʼi.” Ko Satana neʼe ina pulihi te ʼu koloā ʼo Sopo, mo matehi tana fānau, pea mo tuku kiai te mahaki kovi, pea neʼe ina toe fai foki mo te meʼa ke ʼui ko Sopo neʼe agahala pea neʼe fakatūʼa e te ʼAtua. Logola te fakaʼapaʼapa lahi ʼaē ʼa te hahaʼi kia Sopo, kae neʼe fehiʼaʼinaʼi, māʼiape la mo tona ʼu kāiga pea mo tona ʼu kaumeʼa totonu. (Sopo 19⁠:​13-19; 29⁠:​1, 2, 7-11) Neʼe faigaʼi e Satana ʼaki te ʼu tagata fai fakaloto fīmālie loi, ke ina ‘fakaloto vaivaiʼi ia Sopo ʼaki te ʼu palalau’ ʼo ina ʼui, neʼe lagi fai e Sopo he ʼu agahala mamafa pea neʼe ina ʼui ʼe ko te tagata agakovi. (Sopo 4⁠:​6-9; 19⁠:2; 22⁠:​5-10) Neʼe ko he meʼa neʼe fakaloto vaivai kia Sopo!

9. Koteā ʼaē neʼe hage ai ko Sesu neʼe ko he tagata agahala?

⁹ ʼI tona ʼuhiga tagata ʼaē ʼe lagolago tāfito ki te pule faʼitaliha ʼa Sehova, neʼe gaohi koviʼi ʼaupito te ʼAlo ʼo te ʼAtua e Satana. ʼI te haʼu ʼa Sesu ki te kele, neʼe faigaʼi e Satana ke ina fakaloto vaivaiʼi ia ia ʼi te faʼahi fakalaumālie, ohage ko tana fai kia Sopo, ke ʼui ko Sesu neʼe ko te tagata agahala. (Isaia 53⁠:​2-4; Soane 9⁠:24) Neʼe ʼui e te hahaʼi neʼe ko te tagata konahia pea mo kai vale, pea neʼe nātou ʼui ʼe ‘nofo mo te temonio.’ (Mateo 11⁠:​18, 19; Soane 7⁠:20; 8:48; 10⁠:20) Neʼe tukugakoviʼi hala ia ia neʼe laukovi ki te ʼAtua. (Mateo 9:2, 3; 26:63-66; Soane 10:33-36) Ko te meʼa ʼaē neʼe tuʼaniaʼi e Sesu, he neʼe ina ʼiloʼi ʼe valokiʼi anai tana Tāmai. (Luka 22⁠:​41-44) ʼOsi ʼaia, neʼe tutuki ia Sesu ki te pou ohage ko he tagata agakovi. (Mateo 27⁠:​38-44) ʼAki tana nofo agatonu, neʼe ʼutakiʼi e Sesu “te ʼu palalau fakafeagai.”​—Hepeleo 12⁠:​2, 3, MN.

10. He koʼe neʼe gaohi koviʼi tāfito e Satana te toe ʼo te kau fakanofo ʼo te temi nei?

¹⁰ ʼO toe feiā pe ʼi te temi nei, ko te Tevolo ʼe fehiʼa ki te toe ʼo te kau tisipulo fakanofo ʼa Kilisito. ʼE ʼui ko Satana ʼe ina “fakakoviʼi [te] ʼu tēhina ʼo [Kilisito], ʼe ina fakakoviʼi ia nātou ʼi te ʼaho mo te po ia muʼa ʼo totatou ʼAtua!” (Apokalipesi 12⁠:​9, 10, MN ) Talu tona kapu ifo mai te lagi ki te kele, kua mālohi te ʼu faiga ʼa Satana moʼo fai he ʼu fasituʼu ʼo ʼuhiga mo nātou. (1 Kolonito 4⁠:13) ʼI ʼihi fenua, ohage pe ko te kau Kilisitiano ʼo te ʼuluaki sēkulō, neʼe fai te ʼu loi ʼo ʼuhiga mo nātou, ʼo ʼui ʼe nātou kau ki te magaʼi lotu fakamataku. (Gaue 24⁠:​5, 14; 28⁠:22) Ohage ko te kamata ʼo te alatike, neʼe tukugakoviʼi nātou ʼaki te ʼu fakamatala loi. Kae “aki te kololia mo te fehia, aki te matagafua kovi mo te matagafua lelei,” ko te ʼu tēhina fakanofo ʼo Kilisito, ʼaē neʼe lagolago ki ai tonatou ʼu tēhina te “tahi ʼu ōvi,” ʼaki te agavaivai neʼe nātou faiga mālohi ke “natou taupau te u fekau a te Atua pea mo taupau te fakamooni a Sesu.”​—2 Kolonito 6⁠:8; Soane 10⁠:​16, MN; Apokalipesi 12⁠:⁠17.

11, 12. (a) Koteā te ʼu tukugakovi ʼe fai ki te kau Kilisitiano? (b) Koteā te ʼu meʼa ʼe feala ke mamahi ai he Kilisitiano ʼuhi pe ko tana tui kae neʼe mole ina fai he meʼa ʼe kovi?

¹¹ ʼIo, ʼe mole hoko te ʼu tukugakovi fuli ki te ʼu kaugana ʼa te ʼAtua ʼuhi pe ko tanatou “faitotonu.” (Mateo 5⁠:10) ʼE hoko ʼihi fihifihia ʼuhi ko totatou ʼuhiga heʼe haohaoa. Kapau ‘ ʼe tou agahala, pea mo tā ia tatou, ʼe tou kātakiʼi’ heʼe tonu ke tou tūʼa. Kae kapau ko he Kilisitiano “ ʼi tana mahino ki te ʼAtua, ʼe ina ʼutakiʼi tona ʼu mamahi pea mo faigataʼaʼia kae neʼe mole ina fai he meʼa ʼe kovi, ʼe ko he meʼa lelei” kia mata ʼo Sehova. (1 Petelo 2⁠:​19, 20, MN ) ʼE lava hoko feafeaʼi te faʼahi ʼaia?

¹² ʼE feala ke tukugakoviʼi te kau Kilisitiano takitokotahi ʼuhi ko tanatou tui. Neʼe gaohi koviʼi ia nātou he neʼe mole nātou lagolago ki te ʼu toʼotoʼoga faka fenua ʼo ʼuhiga mo te ʼavaifo. (Teutalonome 14⁠:⁠1) Neʼe gaohi koviʼi tāfito te kau Fakamoʼoni tūpulaga​—pea mo tauveleʼi ʼuhi ko tanatou pipiki ki te ʼu lekula ʼa Sehova. (1 Petelo 4⁠:⁠4) Neʼe tukugakoviʼi ʼihi mātuʼa Kilisitiano ʼuhi ko tanatou mole tali ke ʼai te ʼu foʼi huki toto ki tanatou fānau, ʼo ʼui ʼe “mole nātou ʼoʼofa” peʼe nātou “gaohi koviʼi” tanatou fānau. (Gaue 15⁠:29) Ko te kau Kilisitiano neʼe fakafisi kiai tonatou ʼu famili pea mo tonatou ʼu kaumeʼa ʼuhi pe heʼe kua nātou kaugana kia Sehova. (Mateo 10⁠:​34-37) Ko nātou fuli ʼaia ʼaki tonatou ʼu mamahi, ʼe nātou muliʼi te faʼifaʼitaki ʼa te kau polofeta pea mo Sesu logola neʼe mole nātou fai he meʼa ʼe kovi.​—Mateo 5⁠:​11, 12; Sakopo 5⁠:10; 1 Petelo 2⁠:⁠21.

Tou ʼUtakiʼi Te ʼu Tukugakovi

13. Koteā ʼaē ʼe lava tokoni mai kia tatou ke tou nofo fakapotopoto ʼi te faʼahi fakalaumālie mokā fai mai he ʼu tukugakovi lahi?

¹³ Ohage ko te polofeta ko Selemia, ʼe feala ke tou lotovaivai mokā tukugakoviʼi tatou ʼuhi ko tatatou tui, pea ʼe tou logoʼi ʼe mole kei feala ke tou tauhi ki te ʼAtua. (Selemia 20⁠:​7-9) Koteā ʼaē ʼe lava tokoni mai kia tatou ke tou nonofo fakapotopoto ʼi te faʼahi fakalaumālie? Tou taupau maʼu te manatu ʼa Sehova ʼo ʼuhiga mo te faʼahi ʼaia. Ko nātou ʼaē ʼe nonofo agatonu lolotoga te ʼahiʼahi ʼe faka ʼuhiga e Sehova ʼe nātou mālo, kae mole ina faka ʼuhiga ia nātou ko he kau vikitima. (Loma 8⁠:37) Koutou fakakaukauʼi age muʼa te hahaʼi ʼaē neʼe nātou lagolago ki te pule faʼitaliha ʼa Sehova logola te ʼu tuʼuga mamahi ʼaē neʼe fai e te Tevolo kia nātou​—te ʼu tagata pea mo te ʼu fafine ohage ko Apele, mo Sopo, pea mo ʼihi kau matuʼa agatonu, ʼo feiā ki totatou ʼu kaugā fagona ʼo te temi nei. (Hepeleo 11⁠:​35-37; 12⁠:⁠1) Koutou metitasioʼi tonatou maʼuli agatonu. Ko te mālo ʼo te hahaʼi tui ʼaia ʼe ina uga tatou ke mālo tatatou tui ʼi te tauʼi ʼo te malamanei.​—1 Soane 5⁠:⁠4.

14. ʼE lava fakamālohiʼi feafeaʼi tatou e te faikole ke tou nofo agatonu?

¹⁴ Kapau ‘ ʼe tou hoha lahi’ ʼe tou lava faikole fakamalotoloto kia Sehova, pea ʼe ina fakaloto fīmālie anai tatou pea mo fakaloto mālohiʼi tatou. (Pesalemo 50⁠:15; 94⁠:19) ʼE ina foaki mai anai te poto ʼaē ʼe ʼaoga kia tatou moʼo tauʼi te fihifihia, pea ʼe tokoni mai anai ke tou manatuʼi tuʼumaʼu te pule faʼitaliha ʼa Sehova heʼe ko te tupuʼaga la ʼaia ʼo te fehiʼaʼinaʼi ʼo tana ʼu kaugana. (Sakopo 1⁠:⁠5) ʼE ina toe lava foaki mai “te tokalelei o te Atua [ʼaē] e fakalaka i te atamai fuape.” (Filipe 4⁠:​6, 7) Ko te tokalelei fakaʼatua ʼaia, ʼe ina faka fealagia mai ke tou maʼuʼuli ʼi te fakatokatoka pea mo nonofo agatonu mokā hoko mai he ʼu fihifihia, ʼo mole tou lotolotolua peʼe matataku. ʼAki tona laumālie, ko Sehova ʼe lava tokoni mai ʼi te ʼu temi ʼaē ʼe tou tau ai mo te ʼu faigataʼaʼia ʼaē ʼe ina fakagafua ke hoko mai kia tatou.​—1 Kolonito 10⁠:⁠13.

15. Koteā ʼaē ʼe lava tokoni mai kia tatou ke ʼaua naʼa tou ʼiʼita mokā ʼe tou tau mo he ʼu mamahi?

¹⁵ Koteā ʼaē ʼe lava tokoni mai kia tatou ke mole tou ʼiʼita kia nātou ʼaē ʼe fehihiʼa kia tatou kae mole hona tupuʼaga? Tou manatuʼi ko totatou ʼu fili ʼe ko Satana pea mo te kau temonio. (Efeso 6⁠:12) ʼE fakatagaʼi tatou e ʼihi kae ʼe nātou ʼiloʼi lelei neʼe mole tou fai he meʼa ʼe kovi, kae ko te tokolahi ʼe nātou fakafeagai ki te hahaʼi ʼa te ʼAtua heʼe mole nātou ʼiloʼi te meʼa ʼaē ʼe tou fai peʼe uga nātou e niʼihi ke nātou gaohi koviʼi tatou. (Taniela 6⁠:​4-16; 1 Timoteo 1⁠:​12, 13) ʼE loto ia Sehova ke maʼu e te “tagata fuape” te faigamālie ke “fakamauli . . . pea ke natou kaku ki te iloi o te mooni.” (1 Tim. 2⁠:⁠4) ʼIo, ko ʼihi kau fakafeagaʼi ʼāfea kua nātou liliu ʼi te temi nei ko ʼotatou tēhina he neʼe nātou sio mata ki tatatou agatonu. (1 Petelo 2⁠:12) Tahi ʼaē meʼa, ʼe tou maʼu te ako mai te faʼifaʼitaki ʼa Sosefo ia te foha ʼo Sakopo. Logola neʼe mamahi ʼaupito ia Sosefo ʼuhi ko tona ʼu tēhina, kae neʼe mole ʼita kia nātou. Koteā tona tupuʼaga? Koteʼuhi neʼe mahino kia ia neʼe ko Sehova ʼaē neʼe ina fakatuʼutuʼu ke hoko te ʼu meʼa ʼaia, moʼo fakahoko tona finegalo. (Senesi 45⁠:​4-8) ʼE feala kia Sehova ke ina tuku ke hoko kia tatou he faʼahiga mamahi ʼe tou lava ʼutakiʼi moʼo faka kolōliaʼi tona huafa.​—1 Petelo 4⁠:⁠16.

16, 17. He koʼe ʼe mole tonu ke tou tuʼaniaʼi fau mokā faiga te kau fakafeagai ke nātou tāʼofi tatatou gāue faka mafola?

¹⁶ ʼAua naʼa tou tuʼaniaʼi fau te ʼu faiga ʼa te kau fakafeagai moʼo tāʼofi te tala ʼo te logo lelei, tatau aipe peʼe tou sio ʼe hoko tanatou ʼu faiga. ʼE luluʼi e Sehova te ʼu puleʼaga ʼaki te faka mafola ʼaē ʼe fai ʼi te malamanei katoa, pea ʼe ʼōmai te ʼu meʼa manakoʼia kia te ia. (Asea 2⁠:⁠7) Ko Kilisito Sesu, te Tagata Tauhi Ōvi Agalelei, neʼe ina ʼui fēnei: “E fakalogo taku u ovi ki toku leo, pea e au iloi natou, pea e natou mulimuli mai ia te au. Pea e au foaki kia natou te mauli heegata, . . . pea e mole he tahi e ina ave kehe natou mai toku nima.” (Soane 10⁠:​27-29) ʼE toe kau mo te kau ʼaselo ki te tānaki ʼo te taʼukai lahi fakalaumālie. (Mateo 13⁠:​39, 41; Apokalipesi 14⁠:​6, 7) Koia, ʼe mole he ʼu palalau peʼe ko he ʼu gāue ʼa te kau fakafeagai, ʼe ina lava tāʼofi te fakatuʼutuʼu ʼa te ʼAtua.​—Isaia 54⁠:17; Gaue 5⁠:​38, 39.

¹⁷ ʼI ʼihi temi ʼe punamaʼuli te kau fakafeagai ki te meʼa ʼaē ʼe hoko. ʼI te kolo ʼi Afelika, ʼe lahi te ʼu fakamatala loi neʼe fai ʼo ʼuhiga mo te kau Fakamoʼoni ʼa Sehova, ohage la neʼe lau ʼe nātou atolasio ki te Tevolo. Ohage ko te fafine ko Grace, ʼi te temi ʼaē neʼe ʼōmai ai te kau Fakamoʼoni ki tona ʼapi, neʼe lele ʼo nono ʼi tona muli fale ʼo aʼu ki tanatou mavae. ʼI te tahi ʼaho, ko tanatou pasitea neʼe ina fakahā age kia nātou te tohi faka Tohi-Tapu ʼi tatatou ʼu tohi, pea neʼe ina ʼui age ke ʼaua naʼa nātou lau heʼe feala ai ke nātou maliu kehe ʼi tanatou tui. Neʼe tupu ai leva te fia mahino ʼa Grace ki tatatou ʼu akonaki. ʼI te tahi ʼolo age ʼa te kau Fakamoʼoni, neʼe mole toe nono kae neʼe fai palalau mo nātou pea neʼe ina tali te tohi faka Tohi-Tapu. Neʼe kamata te ako Tohi-Tapu, pea neʼe papitema ʼi te taʼu 1996. ʼI te temi nei, ʼe faka mafola ia Grace ki te hahaʼi ʼaē neʼe lohiʼi ia nātou ʼo ʼuhiga mo te kau Fakamoʼoni ʼa Sehova.

Koutou Fakamālohiʼi Takotou Tui ʼi Te Temi Nei

18. He koʼe ʼe tonu ke fakamālohiʼi tatatou tui ʼi muʼa ʼo te hoko mai ʼo te ʼu ʼahiʼahi, pea ʼe tou lava fai feafeaʼi te faʼahi ʼaia?

¹⁸ ʼE tonu ke tou fakamālohiʼi tatatou tui ʼi te temi nei, heʼe feala pe kia Satana ke ina ʼohofiʼi tatou ʼaki he ʼu tukugakovi kae mole hona tupuʼaga. ʼE tou lava fakamālohiʼi feafeaʼi tatatou tui? Ko te sivi mai te fenua ʼe tapuʼi ai te gāue ʼa te hahaʼi ʼa Sehova, ʼe ʼui fēnei: “Neʼe ʼi ai te meʼa neʼe ʼiloga lelei: ʼE nonofo agatonu ʼi te ʼu ʼahiʼahi ia nātou ʼaē neʼe lelei tanatou ʼu agamāhani fakalaumālie pea mo nātou leleiʼia ʼaupito te ʼu moʼoni. Kae ʼe higa gafua ʼi te ʼu temi ‘faigataʼa’ ia nātou ʼaē ʼi ‘te temi faigamālie’ neʼe tō fono, neʼe tahitahiga tanatou fai faka mafola, pea mo nātou higa ʼi te ʼu meʼa ʼe mole faʼa maʼuhiga.” (2 Timoteo 4:2) Kapau ʼe koutou fakatokagaʼi he faʼahi ʼe koutou tōtō ai, koutou foimo fetogi te faʼahi ʼaia.​—Pesalemo 119⁠:⁠60.

19. Koteā ʼaē neʼe fakahoko e te ʼu kaugana agatonu ʼa te ʼAtua ʼi te temi ʼaē neʼe nātou tau ai mo te ʼu tukugakovi hala?

¹⁹ Ko te agatonu ʼa te kau atolasio moʼoni ʼi te ʼu fehiʼa ʼa Satana, ʼe ko he fakamoʼoni tāfito ʼaia ki te agatonu, pea mo te faitotonu ʼa te pule faʼitaliha ʼa Sehova. ʼE nātou fakafiafia te loto ʼo te ʼAtua. Tatau aipe peʼe lahi te ʼu fasituʼu ʼe fai ʼo ʼuhiga mo nātou, kae ko ia ʼaē ʼe māʼoluga ʼi te kele pea mo te lagi “ ʼe mole ufiufi . . . ia nātou, mokā nātou toʼo ia ia ko tonatou ʼAtua.” ʼE mahino ia, ʼo ʼuhiga mo te hahaʼi agatonu fuli ʼaia, ʼe feala ke tou ʼui fēnei: “Neʼe mole tau te malamanei mo nātou.”​—Hepeleo 11⁠:​16, 38, MN.

[Kiʼi nota]

ʼE Feala Koa Hakotou Fakamahino?

• He koʼe ʼe fehiʼa ia Satana ki te kau atolasio moʼoni?

• Neʼe fakaʼaogaʼi feafeaʼi e Satana te ʼu fakamatala loi moʼo maumauʼi te agatonu ʼa Sopo pea mo Sesu?

• ʼE fakaloto mālohiʼi feafeaʼi tatou e Sehova ke tou nonofo agatonu ʼi te ʼu fakafeagai ʼa Satana?

[Talanoa ʼo te pasina 16]

Neʼe Nātou ʼIloʼi Te Tupuʼaga Moʼoni ʼo Tonatou ʼu Mamahi

Ko te Fakamoʼoni ʼa Sehova ʼi Ukelenia, ʼaē neʼe tapuʼi ai te faka mafola ʼo te Puleʼaga ia taʼu e 50, neʼe ina ʼui fēnei: “ ʼAua naʼa tou sioʼi te meʼa ʼaē neʼe hoko ki te kau Fakamoʼoni ʼa Sehova ʼaki he sio fakatagata. . . . Tokolahi ʼi te kau gāue neʼe nātou fai pe tanatou gāue. Ka fetogi te puleʼaga, pea ʼe toe fetogi mo te kau gāue, kae kia mātou ia ʼe mole mātou fetogi. Neʼe mātou mahino lelei ʼaki te Tohi-Tapu pe ko ai ʼaē ʼe tupu ai tomatou fakatagaʼi.

“Neʼe mole mātou ʼui ko mātou ko te kau vikitima ʼo he ʼu hahaʼi agamālohi. Ko te meʼa ʼaē neʼe tokoni kia mātou ke mātou ʼutakiʼi tomatou ʼu mamahi, ko tamatou mahino ki te fehuʼi ʼaē neʼe lagaʼi ʼi te ʼōloto ʼo Eteni​—te pule faʼitaliha ʼa te ʼAtua. . . . Neʼe mātou filifili peʼe ko ai ʼaē ʼe mātou lagolago ki ai ʼi te fihi ʼe pipiki kiai te tagata pea mo te ʼu meʼa ʼo te Pule ʼAliki ʼo te ʼatulaulau. Neʼe mahino lelei kia mātou te ʼu tupuʼaga moʼoni ʼo te ʼu mamahi ʼaia. Koia neʼe mātou mālolohi ai pea neʼe mātou nofo agatonu ʼi te ʼu temi mamahi ʼaupito.”

[Paki]

Ko Victor Popovych neʼe puke ʼi te taʼu 1970

[Paki ʼo te pasina 13]

Ko ai ʼaē neʼe tupu ai te ʼu tukugakovi ʼaē neʼe fai kia Sesu?

[Paki ʼo te pasina 15]

Ko Sopo, mo Malia, pea mo te ʼu kaugana ʼa te ʼAtua ʼo te temi nei ohage ko Stanley Jones neʼe nātou lagolago ki te pule faʼitaliha ʼa Sehova