Tou Fakamahino Tatatou Tui

“Koutou tāpuhā ʼi tokotou ʼu loto ia Kilisito ʼaē ko te ʼAliki, koutou nonofo teuteu tuʼumaʼu moʼo tali kia nātou ʼaē ʼe nātou fehuʼi atu te tupuʼaga ʼo takotou falala.”​—1 Petelo 3:​15.

1, 2. He koʼe ʼe mole punamaʼuli te kau Fakamoʼoni ʼa Sehova ki te ʼu fakafeagai ʼaē ʼe hoko kia nātou, kae koteā ʼaē ʼe nātou loto kiai?

ʼE LAHI te ʼu fenua kua ʼiloa ai te kau Fakamoʼoni ʼa Sehova, ʼe ko he ʼu hahaʼi agatonu, pea mo maʼa ʼi tonatou maʼuli. Ko te tokolahi ʼe nātou ʼui ʼe ko he ʼu vāhaʼa fale agalelei pea ʼe mole nātou fakatupu maveuveu. Kae meʼa faikehe foki, he neʼe fakatagaʼi te kau Kilisitiano tokalelei ʼaia kae neʼe mole hona tupuʼaga​—ʼi te ʼu temi tokakovi pea mo te ʼu temi tokalelei. ʼE mole nātou punamaʼuli ki tonatou fakatagaʼi ʼaia. ʼI tona fakahagatonu, ʼe nātou ʼiloʼi ʼe hoko anai te meʼa ʼaia, heʼe nātou ʼiloʼi neʼe “fehiʼaʼinaʼi” te kau Kilisitiano agatonu ʼo te ʼuluaki sēkulō. Koia ʼaē, ʼe ʼiloʼi e te hahaʼi ʼaē ʼe fia liliu ko he ʼu tisipulo moʼoni ʼa Kilisito, ʼe hoko anai kia nātou te ʼu meʼa ʼaia. (Mateo 10:22) Tahi ʼaē meʼa, ʼe ʼui fēnei e te Tohi-Tapu: “Ko nātou fuli ʼaē ʼe fia maʼuʼuli ʼaki te aga faka lotu ʼi te lototahi mo Kilisito Sesu ʼe toe fakatagaʼi anai mo nātou.”​—2 Timoteo 3:​12.

² ʼE mole kumi e te kau Fakamoʼoni ʼa Sehova ke fakatagaʼi nātou, pea ʼe mole nātou leleiʼia te ʼu mamahi ʼaē ʼe hoko kia nātou​—te ʼu tūʼa, tonatou pilisoniʼi, peʼe ko tonatou gaohi koviʼi. ʼE nātou fia ‘maʼu he maʼuli fīmālie pea mo tokalelei’ ke feala hanatou faka mafola faʼitaliha te logo lelei ʼo te Puleʼaga ʼa te ʼAtua. (1 Timoteo 2:​1, 2) ʼE nātou leleiʼia te ʼāteaina faka lotu ʼaē ʼe nātou maʼu ʼi te ʼatu fenua, ke feala hanatou hoko atu tanatou tauhi pea ke feala hanatou “tokalelei mo te tagata fuape,” ʼo kau ai mo te kau takitaki ʼo te ʼu puleʼaga. (Loma 12⁠:18; 13:​1-7) Kae he koʼe koa ʼe “fehiʼaʼinaʼi” nātou?

3. Koteā te tahi tupuʼaga ʼo te fehiʼa ʼa te hahaʼi ki te kau Fakamoʼoni ʼa Sehova?

³ ʼI tona ʼuhiga moʼoni, ko te ʼu meʼa ʼaē ʼe tupu ia te fehiʼa ʼa te hahaʼi ki te kau Fakamoʼoni ʼa Sehova, ʼe tatau mo te ʼu meʼa ʼaē neʼe tupu ai te fakatagaʼi ʼo te kau ʼuluaki Kilisitiano. ʼUluaki, ʼe fehiʼaʼinaʼi te kau Fakamoʼoni ʼa Sehova, ʼuhi ko tanatou maʼuliʼi te ʼu meʼa ʼaē ʼe nātou tui kiai. Ohage la, ʼe lahi tanatou faka mafola te logo lelei ʼo te Puleʼaga ʼa te ʼAtua, kae ʼe mole mahino te hahaʼi ki te tupuʼaga ʼo tanatou gāue mālohi ʼaia, ʼo nātou manatu ʼe ko he ʼu hahaʼi ʼe nātou “fakakinauʼi te hahaʼi ke nātou tafoki.” (Vakaʼi ia Gāue 4:​19, 20.) Pea ʼe mole nātou kau ki te ʼu meʼa faka politike pea mo te fetauʼaki ʼo te ʼu puleʼaga, pea ʼi ʼihi temi neʼe manatu te hahaʼi ko te kau Fakamoʼoni ʼa Sehova ʼe ko he ʼu hahaʼi ʼe heʼe agatonu.​—Mikea 4:​3, 4.

4, 5. (a) Koteā te ʼu tukugakovi hala ʼaē ʼe fai ki te kau Fakamoʼoni ʼa Sehova? (b) ʼI te agamāhani ko ai tāfito ʼaē neʼe nātou fakatupu te fakatagaʼi ʼo te kau kaugana ʼa Sehova?

⁴ Lua, neʼe fai te ʼu tukugakovi hala ki te kau Fakamoʼoni ʼa Sehova​—ʼuhi ko te ʼu loi pea mo te ʼu fakamahino hala ʼaē neʼe fai ʼo ʼuhiga mo tanatou ʼu akonaki. Koia, ʼe lau ai ʼi ʼihi fenua ʼo ʼuhiga mo nātou, ʼe ko he magaʼi lotu kovi. Tahi ʼaē meʼa, ʼi tanatou kumi he ʼu faitoʼo ʼe mole fakaʼaogaʼi ai te toto ʼuhi ko tanatou fakalogo ki te fakatotonu ʼa te Tohi-Tapu ke nātou ‘fakamamaʼo mai te toto,’ neʼe laukoviʼi ai nātou ʼe ko he ʼu hahaʼi ʼe “nātou matehi te ʼu tamaliki,” pea ʼe ko “he magaʼi lotu ʼe ina uga te hahaʼi ke nātou fakamate.” (Gāue 15:29) Kae ʼi tona fakahagatonu, ko te maʼuli ʼe ko he meʼa maʼuhiga ki te kau Fakamoʼoni ʼa Sehova, pea ʼe nātou kumi te faitoʼo ʼaē ʼe ʼaoga kia nātou pea mo tanatou fānau. ʼE mole moʼoni te ʼui ʼaē ʼe tokolahi te ʼu fānau ʼa te kau Fakamoʼoni ʼa Sehova ʼe mamate ʼi te taʼu fuli ʼuhi ko tanatou fakafisi ki te ʼu foʼi huki toto. Pea tahi ʼaē, ʼe mole ko te famili fuli ʼaē ʼe nātou tali te moʼoni, koia neʼe ʼui ai ko te kau Fakamoʼoni ʼe nātou fakamavetevete te ʼu famili. Kae ko nātou ʼaē ʼe nātou ʼiloʼi te kau Fakamoʼoni ʼa Sehova, ʼe nātou ʼiloʼi ʼe maʼuhiga ʼaupito kia nātou te maʼuli faka famili pea ʼe nātou faiga ke nātou mulimuli ki te ʼu fakatotonu ʼa te Tohi-Tapu, ke feʼofaʼaki pea mo fefakaʼapaʼapaʼaki te taumatuʼa, pea ke fakalogo te fānau ki ʼanatou ʼu mātuʼa, peʼe nātou lotu tahi peʼe kailoa.​—Efesi 5:⁠21–6:⁠3.

⁵ ʼE lahi te ʼu lakaga, ko nātou tāfito ʼaē neʼe nātou fakatupu te fakatagaʼi ʼo te kau kaugana ʼa Sehova neʼe ko te hahaʼi lotu fakafeagai, ʼaē neʼe nātou fakaʼaogaʼi tanatou ʼu felogoi mo te ʼu pule faka politike pea mo te ʼu sulunale moʼo fakagata te ʼu gāue ʼa te kau Fakamoʼoni. ʼE tou tali feafeaʼi ki te ʼu fakafeagai ʼaia​—tatau aipe peʼe tupu ʼuhi ko tatatou tui peʼe ʼuhi ko te ʼu tukugakoviʼi hala ʼaē ʼe fai kia tatou?

“Ke ʼIloʼi Takotou Aga Fakapotopoto e Te Hahaʼi Fuli Pe”

6. He koʼe ʼe maʼuhiga ke fakafuafua lelei tatatou manatu ʼo ʼuhiga mo nātou ʼaē ʼe mole kau ki te kokelekasio faka Kilisitiano?

⁶ Moʼo kamata, ʼe tonu ke tou maʼu he manatu lelei​—te manatu ʼa Sehova​—ʼo ʼuhiga mo nātou ʼaē ʼe mole lotu tahi mo tatou. Heʼe feala ke tupu totatou gaohi koviʼi pea mo totatou laukoviʼi e te hahaʼi, ʼuhi ko tatou. Neʼe tohi fēnei e te ʼapositolo ko Paulo: “Ke ʼiloʼi takotou aga fakapotopoto e te hahaʼi fuli pe.” (Filipe 4:5) Koia ʼe fakaloto mālohiʼi tatou e te Tohi-Tapu ke tou fakafuafua lelei tatatou manatu ʼo ʼuhiga mo nātou ʼaē ʼe mole kau ki te kokelekasio faka Kilisitiano.

7. Koteā ʼaē ʼe tonu ke tou fai ke tou “ ʼāteaina ʼi te mele fuli pe ʼo te malamanei”?

⁷ ʼI te tahi faʼahi, ʼe tokoniʼi fakahagatonu mai te Tohi-Tapu ke tou “ ʼāteaina ʼi te mele fuli pe ʼo te malamanei.” (Sake 1:​27; 4:4) ʼI henī, ko te kupu “malamanei,” ohage ko tona tuʼu ʼi te tahi ʼu vaega ʼo te Tohi-Tapu, ʼe faka ʼuhiga ki te hahaʼi tokolahi ʼaē ʼe mole ko he kau Kilisitiano moʼoni. ʼE tou maʼuʼuli ʼi te lotolotoiga ʼo te hahaʼi ʼaia; ʼe tou felāveʼi mo nātou ʼi te gāue, ʼi te faleako, pea ʼi ʼotatou tafaʼaki. (Soane 17:11, 15; 1 Kolonito 5:​9, 10) Kae ʼe tou ʼāteaina ʼi te ʼu mele ʼo te malamanei heʼe tou tekeʼi te ʼu aga, pea mo te ʼu faʼahiga palalau ʼaē ʼe fakafeagai ki te ʼu ala faitotonu ʼa te ʼAtua. ʼE toe maʼuhiga foki ke tou ʼiloʼi papau te tuʼutāmaki ʼo te fakakaugā māhani mo te malamanei, tāfito la mo nātou ʼaē ʼe nātou meʼa noaʼi te ʼu lekula ʼa Sehova.​—Tāʼaga Lea 13:20.

8. He koʼe ko te tokoni ʼaē ke tou ʼāteaina mai te ʼu mele ʼo te malamanei ʼe mole faka ʼuhiga ke tou meʼa noaʼi te hahaʼi?

⁸ Kae ko te tokoni ʼaē ʼe ina ʼui ke tou ʼāteaina mai te ʼu mele ʼo te malamanei, ʼe mole faka ʼuhiga leva ke tou meʼa noaʼi ia nātou ʼaē ʼe mole ko he kau Fakamoʼoni ʼa Sehova. (Tāʼaga Lea 8:​13) Koutou manatuʼi te faʼifaʼitaki ʼo te kau takitaki lotu Sutea, ʼaē neʼe tou talanoa ki ai ʼi te ʼuluaki alatike. Neʼe mole leleiʼia e Sehova te faʼahiga lotu ʼaē neʼe nātou fakatuʼu; pea neʼe mole tokoni te faʼahi ʼaia kia nātou ke nātou felogoi lelei mo te hahaʼi ʼaē neʼe mole Sutea. (Mateo 21:43, 45) ʼI tanatou manatu ʼaē ʼe nātou faitotonu, koia neʼe meʼa noaʼi e te ʼu tagata aga fefeka ʼaia te kau Senitile. ʼE mole tonu ke tou manatu feiā mo tatou, ʼo tou meʼa noaʼi ia nātou ʼaē ʼe mole ko he kau Fakamoʼoni ʼa Sehova. Ohage ko te ʼapositolo ko Paulo, ʼe tou loto ke maʼu, te ʼofa ʼo te ʼAtua, e nātou fuli ʼaē ʼe nātou logo ki te moʼoni ʼa te Tohi-Tapu.​—Gāue 26:29; 1 Timoteo 2:​3, 4.

9. ʼI tatatou palalau ʼo ʼuhiga mo nātou ʼaē ʼe mole lotu tahi mo tatou, ʼe tonu ke hā feafeaʼi ʼe fakapotopoto tatatou manatu pea ʼe mulimuli ki te Tohi-Tapu?

⁹ Kapau ʼe tou maʼu he manatu fakapotopoto pea mo fakatafito ki te Tohi-Tapu, pea ʼe tonu ke hā ʼi tatatou palalau ʼo ʼuhiga mo nātou ʼaē ʼe mole ko he kau Fakamoʼoni. Neʼe fakatotonu e Paulo kia Tito ke ina fakamanatuʼi ki te kau Kilisitiano ʼo te motu ʼo Kelete “ke ʼaua naʼa nātou laukovi ki he tahi, ke ʼaua naʼa nātou liliu ko ni ʼu hahaʼi fakatupu kē, kae ke nātou popoto, ʼo nātou fakahā he agamālū ki te tagata fuli pe.” (Tito 3:2) Koutou fakatokagaʼi, neʼe mole tonu ki te kau Kilisitiano ke nātou laukovi ki “he tahi”​—ʼo kau ai mo nātou ʼaē neʼe mole ko he kau Kilisitiano ʼi Kelete, ʼaē ko ʼihi, neʼe ʼiloa ʼe ko he ʼu hahaʼi gutuloi, mo kai fakavale, pea mo pipiko. (Tito 1:​12) Koia ʼe mole tou mulimuli anai ki te Tohi-Tapu mo kapau ʼe tou laukovi ʼo ʼuhiga mo te hahaʼi ʼaē ʼe mole lotu tahi mo tatou. Ko tatatou fiameʼalahi ʼe mole ina uga anai te hahaʼi ke nātou ʼōmai ʼo tauhi kia Sehova. Kae kapau ʼe ʼalutahi tatatou manatu pea mo tatatou aga mo te ʼu pelesepeto fakapotopoto ʼa te Folafola ʼa Sehova, pea ʼe tou “fakamataleleiʼi [anai] te akonaki” ʼa te ʼAtua.​—Tito 2:​10.

He Temi Ke Kita Fakalogologo Ai Pea Mo He Temi Ke Kita Palalau Ai

10, 11. Neʼe fakahā feafeaʼi e Sesu ʼe ʼi ai (a) “te temi ke [kita] fakalogologo ai”? (b) mo “te temi ke [kita] palalau ai”?

¹⁰ ʼE ʼui ia Tagata Tānaki 3⁠:​7, ʼe ʼi ai “he temi ke kita fakalogologo ai pea mo he temi ke kita palalau ai.” Kae ʼe faigataʼa tatatou ʼiloʼi te temi ʼaē ʼe mole tonu ai ke tou tokagaʼi te ʼu palalau ʼa te hahaʼi fakafeagai, pea mo te temi ʼaē ʼe tonu ke tou palalau ai moʼo fakamahino tatatou tui. ʼE lahi te ʼu meʼa ʼe feala ke tou ako ʼaki te faʼifaʼitaki ʼa Sesu, he neʼe ko he tagata neʼe poto ʼi te palalau. (1 Petelo 2:​21) Neʼe ina ʼiloʼi te “temi [ʼaē neʼe tonu] ke fakalogologo ai.” Ohage la, ʼi tona tukugakoviʼi hala e te kau pelepitelo pule pea mo te ʼu tagata ʼāfea ia muʼa ʼo Pilato, ‘neʼe mole fai e Sesu hana tali.’ (Mateo 27:11-​14) Neʼe mole ina fia ʼui he meʼa neʼe feala ke ina tāʼofi ai tana fakahoko te finegalo ʼo te ʼAtua. Kae neʼe ko tana aga ʼaē neʼe ina tali ki te faʼahi ʼaia. Neʼe ʼiloʼi e Sesu, tatau aipe peʼe ina tala te moʼoni, kae ʼe mole fetogi anai tanatou manatu pea mo tanatou loto fialahi. Ko te tupuʼaga la ʼaia ʼo tana mole palalau moʼo tali ki tanatou tukugakoviʼi ia ia.​—Isaia 53:7.

¹¹ Kae neʼe toe ʼiloʼi foki e Sesu te “temi [ʼaē neʼe tonu] ke palalau ai.” ʼI te tahi lakaga, neʼe ina tali fakahagatonu ki te ʼu hahaʼi ʼaē neʼe nātou fatufatuʼi ia ia, ʼo ina fakatonutonuʼi tanatou ʼu tukugakovi hala. Ohage la, ʼi te faiga ʼa te kau sekelipa pea mo te kau Faliseo ke nātou talanoa kovi kia te ia ʼi muʼa ʼo te hahaʼi, ʼo nātou ʼui ʼe ina kapu te ʼu temonio ʼaki ia Pelesepu, neʼe mole tuku feiā e Sesu te ʼu tukugakovi hala ʼaia. Neʼe ina faka lākatonuʼi te ʼu loi ʼaia, ʼo ina fakamahino ʼaki te ʼu lea fakatātā mālohi. (Maleko 3:​20-​30; vakaʼi mo Mateo 15:​1-​11; 22:17-​21; Soane 18:37) ʼO toe feiā pe, hili te lavakiʼi pea mo te puke ʼa Sesu, neʼe toho ki muʼa ʼo te Sanetualio, pea ʼaki he manatu fakakākā, neʼe fehuʼi fēnei age e te Pelepitelo Lahi ko Kaifa: “ ʼAki te ʼAtua maʼuli ʼe ʼau fakamaʼua atu kia te koe te fakapapau, koteʼuhi ke ke fakahā mai peʼe ko koe ia Kilisito te ʼAlo ʼo te ʼAtua!” Neʼe ko te “[tahi] temi [ʼaia kia Sesu] ke palalau ai,” heʼe kapau neʼe nofo fakalogologo pea neʼe feala ke nātou manatu ai ʼe fakafisi ki tona ʼuhiga Kilisito. Koia neʼe tali fēnei ai e Sesu: “Ko ʼau ia ia.”​—Mateo 26:63, 64; Maleko 14:61, 62.

12. ʼI Ikoniome, koteā te meʼa ʼaē neʼe tupu ai te palalau ʼaki he lototoʼa ʼa Paulo pea mo Palenapasi?

¹² Tou vakaʼi mo te faʼifaʼitaki ʼa Paulo pea mo Palenapasi. ʼE ʼui fēnei ia Gāue 14:​1, 2: “ ʼI Ikoniome, neʼe nā hū fakatahi ki te sinakoka ʼo te kau Sutea pea ʼi tanā faiakonaki neʼe tui ai te tokolahi ʼo te kau Sutea pea mo te kau Keleka. Kae ko te kau Sutea ʼaē neʼe mole tui, neʼe nātou fakaneke pea mo fakalotoʼi te ʼu nefesi ʼo te hahaʼi ʼo te ʼu puleʼaga.” ʼE tou lau fēnei ʼi te Tohi-Tapu The New English Bible: “Kae ko te kau Sutea ʼaē neʼe mole tafoki, neʼe nātou uga te kau Senitile pea mo fakahalaʼi tonatou ʼatamai ke nātou fakafeagai ki te kau Kilisitiano.” Neʼe mole gata pe tanatou fakafisi ki te logo, kae neʼe fakatuʼutuʼu e te kau Sutea fakafeagai ke nātou fai he ʼu tukugakovi, ʼo nātou faiga ke agakovi te kau Senitile ki te kau Kilisitiano.a Neʼe lahi ʼaupito tanatou fehiʼa ki te Lotu Faka Kilisitiano! (Vakaʼi ia Gāue 10:28.) ʼI te temi ʼaia, neʼe manatu ai ia Paulo pea mo Palenapasi ʼe ko “he temi ke [nā] palalau ai,” naʼa lotovaivai te ʼu tisipulo foʼou ʼaki te ʼu palalau fakafeagai ʼa te hahaʼi. “Koia ko [Paulo pea mo Palenapasi] neʼe nā nonofo ai ʼi he temi ʼo nā palalau ʼaki he lototoʼa ʼaki te mālohi ʼa Sehova,” ʼaē neʼe ina fakahā tona ʼofa ʼi tana foaki kia nāua te mālohi ke nā fakahoko he ʼu milakulo. Neʼe tupu ʼaki ai te lagolago ʼa ʼihi “ki te kau Sutea kae ko ʼihi ki te kau ʼapositolo.”​—Gāue 14:⁠3, 4.

13. ʼO ʼuhiga mo te laukoviʼi ʼo tatou, ko te temi fea ʼaē ʼe tonu “ke [kita] fakalogologo ai”?

¹³ Koia ʼe tonu ke tou tali feafeaʼi mokā talanoa kovi te hahaʼi kia tatou? ʼE fakalogo te faʼahi ʼaia ki te ʼu meʼa ʼaē ʼe hoko. ʼI ʼihi ʼu ʼaluʼaga ʼe tonu ai ke tou mulimuli ki te pelesepeto ʼaē ʼe ina ʼui ʼe ʼi ai “he temi ke [kita] fakalogologo ai.” Tāfito la mokā faiga mālohi te hahaʼi fakafeagai ke tou fai he ʼu fakamahino ʼe mole hona ʼaoga. ʼE tonu ke tou manatuʼi ko ʼihi hahaʼi ʼe mole nātou fia ʼiloʼi te moʼoni. (2 Tesalonika 2:​9-​12) ʼE mole he fua ʼo hatatou faiga ke tou palalau mo nātou ʼaē ʼe loto fefeka. Pea kapau ʼe lahi fau tatatou tokaga ʼaē ke tou faka lākatonuʼi te ʼu tukugakovi hala fuli ʼaē ʼe fai mai kia tatou, pea ʼe feala ke mole tou fakahoko te gāue ʼaē ʼe maʼuhiga age pea mo fakafiafia lahi age​—ʼaē ko te tokoni ki te hahaʼi ʼaē ʼe nātou loto fakamalotoloto ke nātou ako te moʼoni ʼo te Tohi-Tapu. Koia ka tou palalau mo he ʼu hahaʼi ʼe nātou lotomālohi ke nātou loi ʼo ʼuhiga mo tatou, pea ʼe tonu ke tou mulimuli ki te tokoni ʼaenī: “Koutou fakamamaʼo mai ia nātou ʼaia.”​—Loma 16:17, 18; Mateo 7:6.

14. ʼE tonu ke tou fakamahino feafeaʼi tatatou tui ia muʼa ʼo te hahaʼi?

¹⁴ ʼE mahino papau ia, ʼe mole faka ʼuhiga leva ke mole tou fakamahino tatatou tui, heʼe toe ʼi ai foki mo te “temi ke [kita] palalau ai.” ʼE tonu ke tou manatu kia nātou ʼaē ʼe logo ki te ʼu fasituʼu ʼaē ʼe fai ʼo ʼuhiga mo tatou. ʼE tou fia foaki he fakamahino lelei ki te hahaʼi ʼo ʼuhiga mo te ʼu meʼa ʼaē ʼe tou tui kiai ʼaki totatou loto katoa; pea ʼe tou fiafia mokā tou maʼu te fealagia ke tou fai te faʼahi ʼaia. Neʼe tohi fēnei e Petelo: “Koutou tāpuhā ʼi tokotou ʼu loto ia Kilisito ʼaē ko te ʼAliki, koutou nonofo teuteu tuʼumaʼu moʼo tali kia nātou ʼaē ʼe nātou fehuʼi atu te tupuʼaga ʼo takotou falala, kae koutou tali ʼaki he agamālū pea mo he fakaʼapaʼapa lahi.” (1 Petelo 3:​15) Ka fia ʼiloʼi moʼoni e te hahaʼi fakamalotoloto he ʼu fakamoʼoni ʼo ʼuhiga mo te ʼu meʼa ʼaē ʼe tou tui kiai, mo nātou feʼekeʼaki ʼo ʼuhiga mo te ʼu tukugakovi hala ʼaē ʼe fai kia tatou e te hahaʼi fakafeagai, pea ʼe ko tatatou maʼua ke tou fakamahino tatatou tui, ʼo tou tali ʼaki te Tohi-Tapu. Tahi ʼaē meʼa, ʼe feala ʼaki te aga ʼaē ʼe tou fakahā ke tou tuku he fakamoʼoni lelei. Ka fakatokagaʼi e te hahaʼi fakamalotoloto tatatou faiga moʼoni ke tou mulimuli ki te ʼu lekula faitotonu ʼa te ʼAtua, pea ʼe feala ke nātou mahino atu aipe ko te ʼu tukugakovi ʼaē ʼe fai kia tatou ʼe ko he ʼu loi.​—1 Petelo 2:​12-​15.

E Feafeaʼi Mokā Laukoviʼi Tatou?

15. Koteā te ʼu fakamatala loi ʼaē neʼe fai e te sulunale ʼo ʼuhiga mo te kau Fakamoʼoni ʼa Sehova?

¹⁵ ʼI ʼihi temi, neʼe hala te ʼu fakamatala ʼaē neʼe fai e te ʼu sulunale ʼo ʼuhiga mo te kau Fakamoʼoni ʼa Sehova. Ohage la, ʼi te ʼaho 1 ʼo ʼAukusito 1997, ʼi te sulunale Lusia neʼe tohi ai te alatike fasituʼu ʼe ina ʼui, ʼe fakamaʼua ki te kau Fakamoʼoni ke ‘nātou līaki tonatou ʼohoana, pea mo tanatou ʼu mātuʼa mo kapau ʼe mole nātou lotomahino ʼo ʼuhiga mo tanatou lotu peʼe kapau ʼe mole nātou tali te faʼahi ʼaia.’ Ko nātou ʼaē ʼe nātou ʼiloʼi lelei te kau Fakamoʼoni ʼa Sehova, ʼe nātou ʼiloʼi ko te tukugakovi ʼaia ʼe ko he loi. ʼE fakahā mai e te Tohi-Tapu ko te kau Kilisitiano ʼe tonu ke nātou ʼofa pea mo fakaʼapaʼapa kia nātou ʼaē ʼe mole tauhi tahi mo nātou ʼi tonatou loto fale, pea ʼe faiga te kau Fakamoʼoni ke nātou mulimuli ki te fakatotonu ʼaia. (1 Kolonito 7:​12-​16; 1 Petelo 3:​1-4) Logola te faʼahi ʼaia, kae neʼe tā te alatike ʼaia, pea neʼe lahi te hahaʼi ʼaē neʼe nātou lau te ʼu fakamatala loi ʼaia ʼo ʼuhiga mo te kau Fakamoʼoni ʼa Sehova. ʼE tou lava fakamahino feafeaʼi tatatou tui mokā talanoa kovi te hahaʼi ʼo ʼuhiga mo tatou?

16, 17, mo te talanoa ʼo te pasina 16. (a) Koteā ʼaē neʼe ʼui e Te Tule Leʼo moʼo tali ki te ʼu fakamatala loi ʼaē ʼe fai ʼi te ʼu sulunale? (b) Ko te ʼu ʼaluʼaga fea ʼaē ʼe feala ai ke tali e te kau Fakamoʼoni ʼa Sehova ki te ʼu fakamatala loi ʼo te ʼu sulunale?

¹⁶ ʼO toe feiā pe, ʼe ʼi ai “te temi ke kita fakalogologo ai pea mo he temi ke kita palalau ai.” Neʼe fakahā fēnei ʼi te tahi Tule Leʼo ʼo ʼuhiga mo te faʼahi ʼaia: “Ko te mole tokagaʼi ʼo te ʼu fakamatala loi ʼaē ʼe fai ʼi te sulunale pea mo te puipui ʼo te moʼoni, ʼe fakalogo ia ki te ʼu meʼa ʼaē ʼe hoko, ki te faʼahiga hahaʼi ʼaē ʼe nātou fasituʼu, pea mo te ʼu meʼa ʼaē ʼe tupu ai tanatou fai ia te faʼahi ʼaia.” ʼI te tahi ʼu ʼaluʼaga, ʼe lelei age ke mole kita tokagaʼi te ʼu fakamatala loi ʼaia, ke mole ʼāsili ai te ʼu loi.

¹⁷ ʼE ʼi ai te tahi ʼu lakaga ʼe feala “ke [kita] palalau ai.” Neʼe lagi fai he ʼu fakamatala loi ki he tagata gāue sulunale ʼo ʼuhiga mo te kau Fakamoʼoni ʼa Sehova, pea ʼe lagi ina tali lelei te ʼu fakamatala moʼoni ʼo ʼuhiga mo tatou. (Vakaʼi te talanoa “ ʼE Fakatonutonuʼi Te Fakamatala Loi.”) Kapau ʼe tupu te fakagata ʼo tatatou gāue fai faka mafola ʼuhi ko he ʼu fakamatala loi ʼi te ʼu sulunale, pea ko te filiale ʼo te Sosiete Watch Tower ʼe feala ke ina fai he fakatuʼutuʼu moʼo fakatonutonuʼi te faʼahi ʼaia ʼi te tokalelei.b Ohage la, ʼe feala ke fili he kau tagata ʼāfea popoto ke nātou tala te moʼoni ʼi te televisio, he kapau ʼe mole nātou fai te faʼahi ʼaia pea ʼe feala ke faka ʼuhiga ʼe mole maʼu e te kau Fakamoʼoni ʼa Sehova he tali ki te ʼu loi ʼaia. ʼI te ʼu faʼahi ʼaia, ʼe lagolago te kau Fakamoʼoni fuli ki te takitaki ʼa te Sosiete Watch Tower pea mo tana ʼu fakafofoga.​—Hepeleo 13:17.

ʼE Fakaʼaogaʼi Te Lao Moʼo Fakamahino Te Logo Lelei

18. (a) He koʼe ʼe mole ʼaoga kia tatou te fakagafua ʼa te ʼu puleʼaga fakatagata ke tou fai faka mafola? (b) Koteā te meʼa ʼaē ʼe tou fai mokā tapuʼi tatatou gāue fai faka mafola?

¹⁸ ʼE haʼu mai selo te fakagafua ʼaē ke tou faka mafola te logo lelei ʼo te Puleʼaga ʼa te ʼAtua. Ko Sesu, ʼaē neʼe ina fakatotonu mai ke tou fai te gāue ʼaia, neʼe foaki age kia te ia ‘te pule katoa ki te lagi pea mo te kele.’ (Mateo 28:18-​20; Filipe 2:​9-​11) Koia ʼe mole ʼaoga ke tou maʼu te fakagafua ʼo te ʼu puleʼaga fakatagata ki tatatou gāue fai faka mafola. Kae ʼe tou ʼiloʼi ko te ʼāteaina faka lotu ʼaē ʼe tou maʼu ʼe tokoni ki te mafola ʼo te logo ʼo te Puleʼaga. ʼI te ʼu fenua ʼaē ʼe tou fakahoko faʼifaʼitaliha ai tatatou tauhi, ʼe tou fakaʼaogaʼi anai te ʼu lao moʼona puipui. ʼI te ʼu fenua ʼaē ʼe mole foaki ai te ʼāteaina ʼaia, ʼe tou fakaʼaogaʼi anai te ʼu lao ke feala hatatou maʼu te ʼāteaina ʼaia. ʼE mole tou loto ke hoko he fetogi faka sosiale, kae ke tou “fakamahino te logo lelei pea ke fakamoʼoni kiai te lao.”c​—Filipe 1:7.

19. (a) Koteā ʼaē ʼe feala ke hoko ʼi tatatou ‘liufaki te ʼu meʼa ʼa te ʼAtua ki te ʼAtua’? (b) Koteā te meʼa ʼaē ʼe tou lotomālohi ke tou fai?

¹⁹ ʼI totatou ʼuhiga kau Fakamoʼoni ʼa Sehova, ʼe tou fakamoʼoni ko Sehova te Tuʼi ʼo te ʼAtulaulau. Ko tana lao ʼe māʼoluga ʼaupito. ʼE tou fakalogo lelei ki te ʼu puleʼaga fakatagata, ʼo tou “liufaki te ʼu meʼa ʼa Sesale kia Sesale.” Kae ʼe mole tou fakagafua anai ki he meʼa ke ina tāʼofi tatou ke tou fakahoko tatatou maʼua ʼaē ʼe maʼuhiga ʼaupito​—te ‘liufaki ʼo te ʼu meʼa ʼa te ʼAtua ki te ʼAtua.’ (Mateo 22:21) ʼE tou mahino lelei ko te fai ʼo te gāue ʼaia ʼe tupu ai te “fehiʼaʼinaʼi” ʼo tatou e te ʼu puleʼaga, kae ʼe tou tali te faʼahi ʼaia heʼe tonu ke hoko kia ia ʼaē ʼe liliu ko he tisipulo ʼa Kilisito. Ko te ʼu fakamāuʼi ʼo te kau Fakamoʼoni ʼa Sehova ʼo te 20 sēkulō, ʼe ko he fakamoʼoni ʼo tatatou lotomālohi ke tou fakamahino tatatou tui. ʼAki te tokoni ʼa Sehova, ʼe tou haga hoko atu anai te “akoʼi pea mo te tala [ʼo] te logo lelei.”​—Gāue 5:​42.

[Nota ʼi te lalo pasina]

ʼE Kei Koutou Manatuʼi Koa?

◻ He koʼe ʼe “fehiʼaʼinaʼi” te kau Fakamoʼoni ʼa Sehova?

◻ Koteā te manatu ʼaē ʼe tonu ke tou maʼu ʼo ʼuhiga mo nātou ʼaē ʼe mole lotu tahi mo tatou?

◻ ʼI te ʼu fakafeagai ʼaē neʼe fai kia te ia, koteā te faʼifaʼitaki fakapotopoto ʼaē neʼe tuku mai e Sesu?

◻ Ka fai he ʼu laukovi kia tatou, pea ʼe tou lava fakaʼaogaʼi feafeaʼi te pelesepeto ʼaē ʼe ʼi ai “he temi ke [kita] fakalogologo ai pea mo he temi ke [kita] palalau ai”?

[Talanoa ʼo te pasina 16]

ʼE Fakatonutonuʼi Te Fakamatala Loi

“ ʼI te kolo ʼo Yacuiba, ʼi Bolivie, neʼe fakatuʼutuʼu ai e te kūtuga lotu ke fakahā e te fale televisio te ʼata neʼe fai e te kau ʼaposita. ʼUhi ko te fua kovi ʼaē neʼe hoko ʼaki, neʼe fakatotonu e te ʼu tagata ʼāfea ke nātou ʼolo ki te ʼu fale televisio e lua pea mo nātou totogi te fakahā ʼo te ʼu foʼi fime viteo Les Témoins de Jéhovah — Un nom, une organisation mo te La Bible : Un récit historique exact, des prophéties dignes de foi. ʼI tana ʼosi sio ki te ʼu foʼi fime ʼaia ʼa te kau Fakamoʼoni ʼa Sehova, neʼe ʼita ai te tagata pule ʼo te fale lātio ʼi te loi ʼo te ʼata ʼaē neʼe fai e te kau ʼaposita, pea neʼe ina ʼui ʼe ina fakahā anai ʼi te lātio te fakatahi faka tisitilike ʼa te kau Fakamoʼoni ʼa Sehova ʼaē neʼe ʼamanaki hoko. Neʼe kaugamālie ʼaupito te hahaʼi ʼaē neʼe kau kiai, pea tokolahi te hahaʼi fakamalotoloto neʼe nātou fai te ʼu fehuʼi ki te kau Fakamoʼoni ʼaē neʼe nātou ʼaʼahi nātou ʼi te fai faka mafola.”​—Annuaire des Témoins de Jéhovah 1997, ʼi te pasina 61 ki te 62.

[Paki ʼo te pasina 17]

ʼI te tahi lakaga, neʼe fakatonutonuʼi fakahagatonu e Sesu te ʼu tukugakovi hala ʼa te hahaʼi ʼaē neʼe nātou valoki ia ia