He Koʼe e Mole Tali Tuʼumaʼu e Te Kau Fakamoʼoni ʼa Sehova Ki Te ʼu Tukugakovi ʼAe ʼe Fai Kia Natou?
ʼE mulimuli te kau Fakamoʼoni ʼa Sehova ki te tokoni ʼa te Tohi-Tapu ke mole tou tali tuʼumaʼu ki te ʼu tukugakovi mo te ʼu manuki fuli. ʼE ui fenei e te taʼaga lea Fakatohi-tapu: “Ko ae e ina valoki te tagata nukinuki, e ina ʼaumai te ufiufi kia ia.” (Taaga Lea 9:7, 8; 26:4) Kapau ʼe tou tokagaʼi te ʼu tukugakovi loi, ʼe feala ke iku ki he kē. Koia ʼae ʼe mole ʼaoga ai hatatou tokagaʼi fau te ʼu faʼahi ʼaia. Kaʼe tou faiga ke tou fakafiafiaʼi ia te Atua.—Pesalemo 119:69.
ʼE moʼoni, ʼe iai “he temi ke fakalologo ai, pea mo he temi ke palalau ai.” (Ekelesiasi 3:7) ʼE matou faipalalau mo te ʼu hahaʼi ʼae ʼe natou kumi fakamalotoloto te moʼoni. Kaʼe e mole matou fia kau ki te ʼu faipalalau ʼae ʼe mole ʼi ai honatou ʼaoga. Koia, ʼe matou mulimuli ki te ʼu ako mo te ʼu faʼifaʼitaki ʼa Sesu pea mo te ʼu ʼuluaki Kilisitiano.
Neʼe mole gu ia Sesu ʼi te temi ʼae neʼe tukugakoviʼi ia ia e te hahaʼi, ia muʼa ʼo Pilato. (Mateo 27:11-14; 1 Petelo 2:21-23) Neʼe toe ui e te hahaʼi e kau ia Sesu ki te kai mo te inu fakavale. Kaʼe neʼe mole fai e Sesu hana tali ki ai. Neʼe hoko atu pe tana aga mahani, o mulimuli ki te manatu ʼaeni: “ʼE ha te poto ʼi ʼana gaue.” (Mateo 11:19, nota) Kaʼe, i te ʼu temi leva ʼae neʼe ʼaoga ki ai he tali, neʼe ina tali ʼaki he lototoʼa kia natou ʼae neʼe laukovi kia ia.—Mateo 15:1-3; Maleko 3:22-30.
Neʼe ui e Sesu ki ʼana tisipulo ke ʼaua naʼa natou lotovaivai ʼuhi ko te ʼu tukugakovi loi. Neʼe ina ui fenei: “Manuʼia ia koutou moka laukoviʼi pea mo fakatagaʼi koutou e te hahaʼi pea moka natou loi mo palalau kovi ʼo ʼuhiga mo koutou ʼuhi ko au.” (Mateo 5:11, 12) Pea neʼe toe ui e Sesu moka tukugakoviʼi ʼana tisipulo, ko he faigamalie ʼaia kia natou ke natou faifakamafola. Pea ʼe ina fakahoko anai tana fakapapau ʼaeni: “ʼE au foaki atu anai te ʼu palalau mo te poto ʼae ʼe mole feala anai ke fakafeagai peʼe ke fakafifihi ki ai ʼokotou fili fuli.”—Luka 21:12-15.
Neʼe tokoniʼi e te apositolo ko Paulo ia te ʼu Kilisitiano ke mole natou kau ki te ʼu kē ʼae ʼe fakatupu ʼe natou ʼae ʼe fakafeagai kia natou, “he ʼe mole hona fua mo hona ʼaoga.”—Tito 3:9; Loma 16:17, 18.
Neʼe fakalotomalohiʼi e te apositolo ko Petelo ia te ʼu Kilisitiano ke natou haga tauʼi tanatou tui moka ʼe feala. (1 Petelo 3:15) Neʼe mahino ia Petelo ʼe lelei age hatatou tauʼi tatatou tui ʼaki he ʼu gaue ʼi te palalau. Neʼe ina tohi fenei: “Kotou fakagata te ʼu palalau vaʼiganoa ʼae ʼe fai e te ʼu tagata vavale, ʼaki takotou fai te ʼu meʼa ʼae ʼe lelei.”—1 Petelo 2:12-15.