Ko Te Faʼahiga Ako Fea ʼAē ʼe Fua Lelei Ki Tokotou Maʼuli?

KA KOUTOU tau mo he ʼu fihifihia, kua hage ia kiā koutou ʼe koutou tafea ʼi he vai e tatafe. Koutou fakakaukauʼi age muʼa te mamahi ʼaē ka tau mo koutou heʼe mole koutou maʼu he puleʼaki moʼo fakatokatoka ia te ʼu fihifihia ʼaia? ʼE mole he tahi ia tatou ʼe fānauʼi ake kua poto ʼi te fakatokatoka ʼo tona ʼu fihifihia fuli, pea mo maʼu tuʼumaʼu he ʼu tonu ʼe lelei. Koia ʼaē ʼe ʼaoga ai ke akoʼi tatou. ʼE koutou lava maʼu koa ʼifea te ako ʼaē ʼe ʼaoga kiā koutou moʼo fakatokatoka te ʼu fihifihia ʼo te maʼuli?

Tokolahi, tūpulaga pea mo mātutuʼa, ʼe nātou ʼiloʼi te maʼuhiga ʼo he ako ʼe ina faka fealagia anai ke nātou maʼu hanatou gāue. Ko ʼihi hahaʼi popoto, ʼe nātou “tui papau ʼe mole koutou maʼu anai hakotou gāue mo kapau neʼe mole maʼu hokotou pepa.” Kae ʼe lahi te ʼu meʼa ʼe ʼaoga ki te tagata ʼe mole lava maʼu ʼaki te ʼu koloā. Ohage la, ko te ʼu ako lalahi ʼe nātou fakaliliu anai koa ia koutou ko he ʼu mātuʼa, mo he hoa peʼe ko he kaumeʼa lelei? Ko te hahaʼi ʼaē ʼe vikiʼi heʼe nātou popoto, ʼe ʼi ai mo tanatou ʼu aga ʼe mole lelei, ʼe mole nātou tokaga ki tonatou famili, pea ko ʼihi iā nātou ʼe nātou fakamate.

Ko ʼihi ʼe nātou fakaʼaogaʼi te lotu moʼo takitaki ʼo nātou, mo akoʼi ʼo nātou, kae ʼe nātou lotomamahi heʼe mole tokoni age te lotu kiā nātou moʼo tauʼi te ʼu fihifihia ʼo te maʼuli. Tou toʼo te faʼifaʼitaki ʼo Emiliaa ʼi Mekesike, ʼaē ʼe ina ʼui fēnei: “Kua hili kiai taʼu e 15, neʼe au ʼiloʼi neʼe mole kei feala hamā nonofo fakatahi mo toku ʼohoana. ʼE mā kē tuʼumaʼu pe. Neʼe mole au lava tāʼofi ia tana ʼinu. Neʼe au tuku tuʼumaʼu taku ʼu toe kae au ʼalu ʼo kumi mai toku ʼohoana. Neʼe au lotomamahi ʼaupito. Neʼe au ʼalu tuʼumaʼu ki te ʼēkelesia ʼo kumi tokoni ki toku fihifihia. Logola te fakaʼaogaʼi tahitahiga ʼo te Tohi-Tapu ʼi te misa, neʼe mole au logo pe la ki he tokoni ʼe ina lava fakatokatoka toku fihifihia; peʼe ko he tahi ʼe haʼu ʼo ʼui mai te meʼa ʼaē ʼe tonu ke au fai. Neʼe mole au maʼu pe la hoku fīmālie ʼi taku faikole ʼi te ʼēkelesia.” ʼE feala mo ʼihi ke nātou lotomamahi heʼe nātou sio, māʼiape la mo te kau takitaki lotu ʼe mole nātou tuku he faʼifaʼitaki lelei ʼi tonatou maʼuli. Koia ʼe mole kei falala ai te tokolahi ki te lotu, ʼaē ʼe ʼui ʼe ko he matapuna moʼo ako ki te hahaʼi te ʼu meʼa ʼaē ʼe ʼaoga ki tonatou maʼuli.

Koia, ʼe feala ke koutou fai te fehuʼi ʼaenī: ‛Ko te faʼahiga ako fea ʼaē ʼe ʼaoga kiā au ke fua lelei ki toku maʼuli?’ ʼO ʼuhiga mo te fehuʼi maʼuhiga ʼaia, ko te Lotu Faka Kilisitiano moʼoni ʼe ina maʼu koa he tali kiai? ʼE tou vakaʼi anai te faʼahi ʼaia ʼi te alatike ʼaē ka hoa mai.

[Kiʼi nota]