Tou Fakaʼaogaʼi Te Ako ʼAē ʼe Lelei Tokotahi!

ʼE ʼUI ʼi te Tohi-Tapu ko Sehova ʼAtua ʼe ko te Tupuʼaga ʼo meʼa fuli, pea neʼe ina fakatupu mo te tagata. (Senesi 1:27; Apokalipesi 4:11) ʼI tona ʼuhiga Faiako Lahi, neʼe ina akoʼi te ʼuluaki taumātuʼa ko Atama mo Eva, ke nā faʼufaʼu tonā maʼuli ʼi te ʼōloto matalelei ʼo Eteni. Neʼe ina fakatuʼutuʼu ke heʼegata tana akoʼi pea mo tana taupau ʼo nāua. (Senesi 1:​28, 29; 2:​15-17; Isaia 30:​20, 21) ʼI fakatuʼutuʼu lelei leva!

Kae meʼa fakaʼofaʼofa, he neʼe lītuʼa te ʼuluaki taumātuʼa ki te ʼu meʼa fuli ʼaia. ʼAki tanā talagataʼa, neʼe kamata ai leva te maʼuli agahala ʼa te tagata. (Senesi 3:​17-19; Loma 5:12) ʼO ʼuhiga mo te taʼitupu ʼaē neʼe māʼuʼuli ki muli age, ʼe ʼui fēnei ʼi te Tohi-Tapu: “Neʼe sio ia Sehova ko te agakovi ʼa te tagata kua lahi ʼaupito ʼi te kele pea ko te ʼu fakakaukau fuli ʼo tona loto neʼe kovi tuʼumaʼu pe ia.”​—Senesi 6:⁠5.

Kua hili nei kiai taʼu e 4 500 ki te ʼui ʼaē ʼa Sehova, ko te loto ʼa te tagata ʼe holi tuʼumaʼu pe ki te kovi, pea ʼi te temi nei ko te malamanei kua ʼāsili age tana agakovi. Tokolahi ʼe mole nātou fakameʼameʼa ʼi te gutuloi, ʼi te kaihaʼa, peʼe ko te gaohi koviʼi ʼo ʼihi. ʼI te ʼaho fuli, ʼe tuputupu te ʼu fihifihia, kae fakahaʼu ke puli te fetokagaʼaki ʼa te hahaʼi. Kua fakahaʼu ke puli te ʼu felogoi ʼa te hahaʼi, ʼo feiā mo te ʼu felogoi ʼi te ʼu famili. Kae ʼe mole tonu ke tukugakoviʼi te ʼAtua ʼo ʼuhiga mo te ʼu ʼaluʼaga ʼo te temi nei, pea mo ʼaua naʼa tou ʼui ʼe mole kei tokaga ki te ʼu fihifihia ʼaē ʼe hoko ia ʼaho nei. ʼE tokaga tuʼumaʼu pe ia Sehova ki te maʼuli fīmālie ʼo te tagata, pea ʼe ina fia akoʼi te hahaʼi ʼaē ʼe nātou maliu age kiā te ia, ke ina takitaki nātou ke nātou kaku ki he maʼuli fiafia. Kua hili nei kiai taʼu e 2 000, neʼe fekauʼi ifo tona ʼAlo ko Sesu Kilisito ki te kele, pea neʼe ina fakahā ia Tana tokaga ki te hahaʼi ʼaki te faʼahiga ako ʼaē neʼe feala ai ke nātou māʼuʼuli fiafia. Neʼe tuku e Sesu ia he faʼifaʼitaki lelei ʼo ʼuhiga mo te ako ʼaē ʼe tonu ke foaki ki te hahaʼi, he neʼe akoʼi ia ia e te Faiako Lahi kua hili nei kiai he ʼu taʼu ʼe mole feala hona lau.

Te Ako ʼAē ʼe Maʼu ʼi Te Lotu Faka Kilisitiano Moʼoni

Neʼe fakatuʼu e Sesu Kilisito ia te Lotu Faka Kilisitiano moʼoni, ko he faʼahiga maʼuli ʼe fakatafito ki te ʼofa. ʼI te Lotu Faka Kilisitiano moʼoni, ko te ʼu manatu pea mo te ʼu aga fuli ʼe tonu ke ʼalutahi mo te finegalo ʼo te ʼAtua, heʼe feala ai ke fakavikiviki pea mo faka kolōliaʼi tona huafa. (Mateo 22:​37-39; Hepeleo 10:7) Ko te ʼu akonaki ʼa Sesu ʼo ʼuhiga mo te maʼuli neʼe haʼu mai tana Tāmai ko Sehova. ʼO ʼuhiga mo te tokoni ʼa te ʼAtua kiā Sesu, ʼe tou lau fēnei iā Soane 8:29: “E fakatahi ia mo au, iaʼia nee ina fekaui mai au; nee mole ina tuku ke au nofo tokotahi, koteuhi e au fai aipe te mea e tâau mo ia.” Ei, ʼi te minisitelio ʼa Sesu, neʼe tokoni age pea mo takitaki ia ia e tana Tāmai. Neʼe ʼi ai te takitaki ki te ʼu ʼuluaki tisipulo ʼa Sesu moʼo tauʼi te ʼu faigataʼaʼia ʼo te maʼuli. Neʼe fakaʼaogaʼi e Sehova ia tona ʼAlo moʼo akoʼi ia nātou. Neʼe nātou liliu ko te ʼu hahaʼi agalelei he neʼe nātou fakalogo ki te ʼu akonaki ʼa Sesu pea mo muliʼi tana faʼifaʼitaki. ʼE feiā pe mo tana ʼu tisipulo ia ʼaho nei.​—Vakaʼi ʼi te pasina 6 ia te fakamatala ʼaē ʼe ʼātakai “Te Maʼuli ʼo Sesu Pea Mo Tana ʼu Akonaki.”

Ko te meʼa ʼe ʼiloga ai te Lotu Faka Kilisitiano moʼoni, heʼe ko te ako ʼaē ʼe ina foaki ʼe malave ki te ʼatamai pea mo te loto ʼo te hahaʼi, pea ʼe feala ke ina fetogi te loto ʼo te hahaʼi. (Efeso 4:​23, 24) Tou vakaʼi age muʼa te akonaki ʼaē neʼe fai e Sesu ʼo ʼuhiga mo te nofo agatonu ʼi te ʼohoana: “Nee koutou logo, nee lau: ‛Aua naa ke tono.’ Kae e au tala atu kia koutou, ko he tahi pe e sio ki he fafine mo he sio holi, kua tono mo ia i tona loto.” (Mateo 5:​27, 28) ʼAki tana ʼu palalau ʼaia, neʼe fia akoʼi age e Sesu ki tana ʼu tisipulo, ʼe tonu ki te loto ke maʼa pea ko te ʼu manatu pea mo te ʼu holi ʼaē ʼe kovi, logola ʼe mole heʼeki fakahoko, kae ʼe ʼi ai tona ʼu fua kovi ʼaupito. ʼI tona fakahagatonu, ʼe feala pe ki he ʼu manatu kovi ke nātou fakaneke tatou ke tou fai he ʼu aga ʼe nātou fakamamahiʼi ai te ʼAtua pea mo ʼihi.

Koia, ʼe fakahā ʼi te Tohi-Tapu ia te tokoni ʼaenī: “Koutou fakagata takotou muliʼi te tuʼu ʼo te ʼu faʼahiga meʼa ʼaenī, kae ke koutou fetogi ia koutou ʼo fakafoʼou tokotou ʼatamai, ke feala ai hakotou ʼiloʼi papau pe koteā te finegalo ʼo te ʼAtua, tona lelei, tona tali lelei, pea mo tona haohaoa.” (Loma 12:​2, MN ) ʼE lagi koutou feʼekeʼaki anai: ‛ʼE feala koa ke fetogi taku fakakaukau e he ʼu meʼa ʼe au ako?’ Moʼo fetogi tatatou fakakaukau, ʼe tonu ke tou uga ke manatu ki he tahi ʼu meʼa, koia ʼe tonu ai ke tou akoʼi ʼaki te ʼu pelesepeto pea mo te ʼu meʼa ʼaē ʼe foaki mai ʼi te Folafola ʼa te ʼAtua. ʼE tou lava fetogi tatatou fakakaukau mo kapau ʼe tou tali ia te ako ʼaē ʼe foaki mai e te ʼAtua ʼi tana Folafola.

Tou Uga Ke Fetogi

“E mauli te folafola a te Atua, pea e gaue.” (Hepeleo 4:12) ʼE kei mālohi te Folafola moʼo fetogi ia te maʼuli ʼo te hahaʼi, ʼo hā ʼaki mai ʼe kei ʼaoga tana ʼu tokoni ʼi te temi nei. ʼE ina lava uga he tahi ke ina fetogi tona maʼuli, ke ina maʼu te Lotu Faka Kilisitiano moʼoni, pea ke liliu ko he tahi ʼe agalelei. ʼAki te ʼu faʼifaʼitaki ʼaē ka hoa mai, ʼe tou mahino ai ki te maʼuhiga ʼo te ako faka Tohi-Tapu.

Ko Emilia, ʼaē neʼe tou talanoa kiai ʼi te alatike kua ʼosi, ʼe ina ʼui fēnei: “Neʼe mole au lava fetogi te maʼuli ʼo toku famili ʼaki pe taku ʼu faiga tokotahi. ʼI taku kamata ako ia te Tohi-Tapu mo te kau Fakamoʼoni ʼa Sehova, neʼe au mahino leva ʼe ʼi ai te ʼamanaki pea mo au fetogi ai taku aga. Neʼe au ako te faʼa kātaki pea mo te loto lolomi. ʼAki te temi, neʼe toe kau mo toku ʼohoana ki te ako ʼo te Tohi-Tapu. Neʼe mole ko he meʼa faigafua hana līaki ʼo tana ʼinu, kae neʼe feala pe ke ina tuku. ʼAki te fetogi ʼaia, neʼe toe feala ai ke hoko atu tomā maʼuli faka taumātuʼa. ʼI te temi nei, kua mā liliu ko te ʼu Kilisitiano ʼe fiafia pea ʼe mā akoʼi ki tamā fānau ia te ʼu pelesepeto lelei ʼo te Tohi-Tapu.”​—Teutalonome 6:⁠7.

ʼE feala ki he tahi ke ʼāteaina mai ni ʼu vaivaiʼaga pea mo he faʼahiga maʼuli heʼeʼaoga ʼaki pe te ako ʼaē ʼe foaki ʼi te Lotu Faka Kilisitiano moʼoni. Neʼe hoko te faʼahi ʼaia ki te tagata ko Manuel.a ʼI tona taʼu 13, neʼe hola ʼi tona ʼapi pea neʼe ina kamata fakaʼaogaʼi te toloke. ʼAki te temi, neʼe ina fakaʼaogaʼi te toloke ʼaē ko te héroïne. Neʼe ina fai mo te ʼu felāveʼi fakasino mo te ʼu tagata pea mo te ʼu fafine ke maʼu hona nofoʼaga pea mo hana falā. ʼI ʼihi temi, neʼe ina ʼohofiʼi te hahaʼi ke foaki age hana falā moʼo taupau tona maʼuli. ʼI te temi fuli pe neʼe toloke. Pea neʼe pilisoniʼi tuʼumaʼu he neʼe agamālohi. ʼI te tahi temi, neʼe pilisoni ia taʼu e fā, pea neʼe kau kiā nātou ʼaē ʼe nātou faʼu fakafufū te ʼu mahafu tau. ʼI tana ʼosi ʼohoana, neʼe hoko atu pe te maʼuli tokakovi ʼa Manuel. ʼE ina ʼui fēnei: “Neʼe mā nonofo ʼi te fale neʼe ko te fale moa ʼi te tahi temi. Kei au manatuʼi te ʼu temi ʼaē neʼe kuka ai toku ʼohoana ʼi te ʼu tuʼuga maka. ʼI te fakaʼofaʼofa ʼaupito ʼo tomā maʼuli, neʼe ʼui age e toku famili ki toku ʼohoana ke ina līaki au.”

Koteā ʼaē neʼe ina fetogi tona maʼuli? ʼE tali fēnei e Manuel: “Neʼe haʼu toku feʼilo ki tomā ʼapi ʼo palalau mai ki te Tohi-Tapu. Neʼe au tali pe tana ʼu ʼaʼahi he neʼe au fia fakahā age kiā ia, ʼe mole tokaga te ʼAtua ki te hahaʼi. Neʼe au talanoa ki te faʼahi ʼaia ʼuhi ko te ʼaluʼaga ʼo toku maʼuli. Kae neʼe au punamaʼuli ki te aga ʼa te Fakamoʼoni he neʼe faʼa kātaki pea mo aga fakaʼapaʼapa, koia neʼe au tali ai leva ke au ʼalu ki te ʼu fono ʼi te Fale ʼo Te Puleʼaga. Logola ko ʼihi ʼi te fale fono neʼe nātou ʼiloʼi toku maʼuli, kae neʼe nātou tali au ohage ko honatou kaumeʼa. Neʼe nātou palalau mai kiā au ohage pe ʼe nātou palalau ki he tahi Fakamoʼoni. Neʼe au maʼu ai he fakaloto fīmālie lahi. Neʼe au fakatotonu ai leva ke au līaki te toloke kae au kumi haku gāue lelei. Hili māhina e fā ki te kamata ʼo taku ako, neʼe kua feala leva haku fai faka mafola, pea hili ʼaia māhina e fā, pea neʼe au papitema ʼo liliu ko he Fakamoʼoni ʼa Sehova.”

Koteā te fetogi ʼaē neʼe maʼu e Manuel pea mo tona famili ʼaki te Lotu Faka Kilisitiano moʼoni? “Kanapaula neʼe mole au ako te Tohi-Tapu, ʼe mahino ia lagi kua fualoa taku mate. Ko te faʼahiga maʼuli ʼaē neʼe akoʼi mai e Sesu, neʼe ina faka fealagia mai ke au toe maʼuli mo toku famili. Ko toku foha pea mo toku ʼofafine neʼe mole toe hoko kiā nāua ia te maʼuli ʼaē neʼe tau mo au ʼi toku temi tūpulaga. ʼE au fiafia pea mo loto fakafetaʼi kiā Sehova ʼi taku felogoi lelei mo toku ʼohoana ʼi te temi nei. Ko ʼihi ʼi toku ʼu kaumeʼa ʼāfea neʼe nātou vikiʼi taku aga pea mo ʼui mai ko toku maʼuli ʼi te temi nei ʼe lelei age.”

ʼI te maʼuli Faka Kilisitiano, ʼe toe pipiki ia te aga maʼa ki te maʼa fakasino. Ko John, ʼaē ʼe maʼuli ʼi te kolo masiva ʼo te Afelika Saute, neʼe toe mahino mo ia ki te faʼahi ʼaia. ʼE ina ʼui fēnei: “ ʼI ʼihi temi, ko tamā taʼahine neʼe mole maʼanu lolotoga he vāhaʼa kātoa, pea kiā māua neʼe mole ko he meʼa ia ʼe kovi.” Neʼe ʼui e tona ʼohoana ko tonatou ʼapi neʼe ʼuli saliko. Kae ʼaki te ako faka Kilisitiano, neʼe fetogi leva tonatou maʼuli. Neʼe mole toe fakakaugā ia John ki te kūtuga neʼe nātou kaihaʼa te ʼu motokā pea neʼe tokaga ʼo taupau fakalelei tona famili. “Neʼe mahino kiā mātou ʼi tomatou ʼuhiga Kilisitiano, ʼe tonu ke maʼa ʼomatou sino pea mo ʼomatou mutuʼi meʼa. ʼE au leleiʼia te ʼu palalau ʼaē ʼe tuʼu iā 1 Petelo 1:​16, ʼaē ʼe fakaloto mālohiʼi ai tatou ke tou maʼoniʼoni heʼe ko Sehova ʼAtua ʼe maʼoniʼoni. ʼI te temi nei, ʼe mātou faiga ke matalelei tomatou kiʼi ʼapi.”

ʼE Koutou Lava Maʼu Te Ako ʼAē ʼe Lelei

ʼE lahi te tahi ʼu faʼifaʼitaki feiā. ʼAki te ako ʼo te Tohi-Tapu, kua lelei age te maʼuli ʼo te hahaʼi e toko lauʼi afe. ʼI tanatou agatonu pea mo tanatou faʼa gāue, ʼe leleiʼia nātou e tonatou ʼu patolo. Kua nātou felogoi lelei mo tonatou ʼu vāhaʼa fale pea mo tonatou ʼu kaumeʼa, ʼo nātou tokaga ki te maʼuli fīmālie ʼo tonatou ʼu tatau. ʼE nātou faiga mālohi ke nātou tekeʼi te ʼu vaivaiʼaga pea mo te ʼu holi ʼo te kakano, ke feala hanatou tōkakaga lelei age ki tonatou maʼuli ʼi te faʼahi fakasino, mo fakaʼatamai, pea mo te loto. ʼE mole kei nātou fakaʼaogaʼi tanatou ʼu koloā moʼo fai ʼaki tanatou ʼu aga heʼeʼaoga, kae kua nātou fakaʼaogaʼi lelei maʼa nātou pea mo tonatou famili. (1 Kolonito 6:​9-11; Kolose 3:​18-23) Ei, ko te ʼu fua ʼo tatatou maʼuliʼi te ʼu tokoni ʼaē ʼe tuku mai e Sehova ʼi te Tohi-Tapu, ʼe nātou fakamoʼoni mai ʼe lelei age te maʼuli ʼaē ʼe foaki ʼi te Lotu Faka Kilisitiano moʼoni, heʼe ina foaki te ako ʼe lelei tokotahi. ʼO ʼuhiga mo he tahi ʼe ina maʼuliʼi te ʼu lao ʼa te ʼAtua, ʼe ʼui fēnei ʼi te Tohi-Tapu: “Ko meʼa fuli ʼaē ʼe ina fai ʼe lava anai.”​—Pesalemo 1:⁠3.

ʼE tou lotomālohi ʼi tatatou ʼiloʼi ʼaē ʼe fia akoʼi tatou e te ʼAtua Māfimāfi ko Sehova. ʼE ina ʼui mai: “Ko au, Sehova, ko au tou ʼAtua, ia Ia ʼaē ʼe ina akoʼi koe ke ʼaoga kiā te koe, ia Ia ʼaē ʼe ina taki koe ʼi te ala ʼaē ʼe tonu ke ke haʼele ai.” (Isaia 48:17) Ei, neʼe fakahā mai e Sehova ʼaki tana faʼifaʼitaki pea mo te ʼu akonaki ʼa tona ʼAlo ko Sesu Kilisito ia te ala ʼaē ʼe tonu ke tou haʼele ai. Ko tana ʼu akonaki neʼe ina fetogi te maʼuli ʼo te tokolahi ʼaē neʼe nātou ʼiloʼi ia ia ʼi tana kei maʼuli ʼi te kele, pea ʼe toe feiā ki te tokolahi ia ʼaho nei ʼaē ʼe nātou maʼuliʼi tana ʼu akonaki. He koʼe koa ʼe mole koutou toʼo he temi ke koutou ako tana ʼu akonaki ʼaia? Ko te kau Fakamoʼoni ʼa Sehova ʼaē ʼe ōvi atu kiō koutou, ʼe nātou fiafia anai ʼi te tokoni atu ke koutou maʼu ia te ako lelei ʼaia.

[Kiʼi nota]

[Talanoa/Paki ʼo te pasina 6]

Te Maʼuli ʼo Sesu Pea Mo Tana ʼu Akonaki

ʼAki tona tuʼulaga pule ʼo te kau tānaki tukuhau, neʼe liliu ia Sakeo ʼo koloaʼia he neʼe faiva kākā pea mo ina kaihaʼa te falā ʼa te hahaʼi. Kae ʼaki tana maʼuliʼi ia te ʼu akonaki ʼa Sesu neʼe fetogi ai leva tona maʼuli.​—Luka 19:​1-10.

Neʼe tuku e Saulo ʼo Talesi tana fakatagaʼi ia te kau Kilisitiano pea neʼe tafoki ki te Lotu Faka Kilisitiano, ʼo liliu ko te ʼapositolo ko Paulo.​—Gaue 22:​6-21; Filipe 3:​4-9.

Ko ʼihi ʼi te kau Kilisitiano ʼi Kolonito neʼe ko te kau ‛folonikasio, te kau tauhi tamapua, te hahaʼi fai tagata pea mo fai fafine, te hahaʼi kaihaʼa, te hahaʼi mānumānu, te hahaʼi konāhihia, te hahaʼi leakovi, te hahaʼi kākā.’ Kae ʼi tanatou ʼiloʼi te Lotu Faka Kilisitiano moʼoni, neʼe ‛fufulu nātou, mo fakamaʼa, mo fakamaʼoniʼoni pea mo tala kua nātou agatonu ʼaki te huafa ʼo tonatou ʼAliki ko Sesu Kilisito.’​—1 Kolonito 6:9-11.

[Paki ʼo te pasina 7]

ʼE feala ke tokoni atu te Tohi-Tapu ke koutou maʼuli fiafia