ʼE Maʼuli Moʼoni Koa Te Tevolo?

KOTEĀ takotou manatu ʼo ʼuhiga mo te Tevolo? ʼI takotou manatu, ʼe maʼuli moʼoni koa, ʼo fakaneke ia te hahaʼi ke nātou agakovi, peʼe maʼa koutou ʼe ko he higoa pe ia moʼo faka ʼuhiga ʼaki te kovi? Ko te Tevolo ʼe ko he tahi koa ʼe tonu ke tou mātataku ki ai, peʼe ko he fagana pe koa ia? Ko te kupu “tevolo” ʼe faka ʼuhiga koa ki he mālohi agakovi ʼe mole ʼiloʼi tona haʼuʼaga? Peʼe ohage ko tona ʼui e te kau teolosia ʼo te temi nei, ʼe ina fakatā pe koa ia te ʼu aga ʼaē ʼe kovi ʼa te hahaʼi?

ʼE mole ko he meʼa foʼou te mole manatu tahi ʼa te hahaʼi peʼe ko ai te Tevolo. ʼE faigataʼa hata ʼiloʼi moʼoni he tahi ʼe faiva ʼi te fufū ʼo tona ʼuhiga moʼoni! Tāfito la mo kapau ʼe ina faigaʼi mālohi ke mole ʼiloʼi pe ko ai ia ia. ʼE fakahā mai ʼi te Tohi-Tapu, ʼe ko te ʼuhiga ʼaia ʼa te Tevolo. ʼE ina fakahigoaʼi ia ia ʼe ko Satana, ʼo ina ʼui fēnei: “Ko Satana totonu ʼe ina fakaliliu tuʼumaʼu pe ia ia ko he ʼāselo ʼo te mālama.” (2 Kolonito 11:​14, MN ) Ko te Tevolo ʼe agakovi, kae moʼo kākāʼi te hahaʼi, ʼe feala ke ina fai maʼa nātou he ʼu meʼa ohage ko he tahi ʼe agalelei. Pea ʼe iku tāfito tana ʼu kākā, mo kapau ʼe mole tui ia te hahaʼi ʼe ko he tahi ʼe maʼuli moʼoni.

Koia, ko ai koa te Tevolo? Ko ʼanafea ʼaē neʼe tupu ai, pea neʼe tupu feafeaʼi? E feafeaʼi tana fakahalaʼi te hahaʼi ia ʼaho nei? ʼE tou lava tekeʼi koa tana ʼu fai fakahala ʼaia? ʼI te Tohi-Tapu, ʼe tou maʼu ai te hisitolia moʼoni ʼo te kamataʼaga ʼo te Tevolo, pea mo te ʼu tali moʼoni ʼo ʼuhiga mo te ʼu fehuʼi ʼaia.

[Paki ʼo te pasina 3]

ʼE faigataʼa hata ʼiloʼi lelei he tahi ʼe ina fufū tona ʼuhiga moʼoni