Ka Tou Kumi Te Faitotonu Pea ʼe Ina Puipui Anai Tatou

“Ke koutou haga kumi muʼa te . . . faitotonu [ʼa te ʼAtua].”​—Mateo 6:​33, MN.

1, 2. Koteā te tonu ʼaē neʼe fai e te tuagaʼane kei finemui, pea he koʼe neʼe ina fai ia te tonu ʼaia?

ʼI ASIA, ko te tuagaʼane kei finemui neʼe sekeletea ʼi te pilo gāue ʼo te puleʼaga. Neʼe tokaga fakalelei ki tana gāue, ʼo kamata tautonu pea mo fai fakahagatonu. Kae neʼe tonu ke fai he sivi moʼo vakavakaʼi peʼe feala hana hū ʼosi ki te fale gāue ʼaia. Ko te tagata pule ʼo te fale gāue neʼe ina ʼui age ki te tuagaʼane, kapau ʼe nā fai he ʼu felāveʼi fakasino pea ʼe ina fakahū anai ia ia pea mo hiki tona tuʼulaga. Ko te faʼahi ʼaia neʼe fakafisi mālohi ʼosi te tuagaʼane kiai, logola tana ʼiloʼi ʼaē neʼe feala ai hona fakamavae ʼi tana gāue.

² ʼE kovi koa te tonu ʼaē neʼe fai e te tuagaʼane? Kailoa ia, he neʼe fakalogo kātoa ia ki te ʼu palalau ʼaenī ʼa Sesu: “Ke koutou haga kumi muʼa te . . . faitotonu [ʼa te ʼAtua].” (Mateo 6:​3, MN) Maʼa te tuagaʼane, neʼe maʼuhiga age tana fakalogo ki te ʼu pelesepeto faitotonu ʼi hana maʼu ʼaki he ʼu felāveʼi fakasino he ʼu lelei ʼo te mālama.​—1 Kolonito 6:⁠18.

Te Maʼuhiga ʼo Te Faitotonu

3. Koteā koa te faitotonu?

³ Ko te “faitotonu” ʼe pipiki ki te ʼu pelesepeto ʼo ʼuhiga mo te agatonu ʼi te ʼu aga ʼaē ʼe tonu ke kita fai. ʼI te Tohi-Tapu, ko tonā ʼu kupu faka Keleka pea mo faka Hepeleo ʼe nā faka ʼuhiga ki te faitotonu. ʼE mole ko he faitotonu ʼaki pe te ʼu lēkula ʼa kita totonu. (Luka 16:15) ʼE ko te faitotonu ʼaē ʼe mulimuli ki te ʼu lēkula ʼa Sehova. ʼE ko te faitotonu ʼaē ʼe haʼu mai te ʼAtua.​—Loma 1:17; 3:⁠21.

4. He koʼe ʼe maʼuhiga ia te faitotonu ki he Kilisitiano?

⁴ He koʼe ʼe maʼuhiga ia te faitotonu? ʼE maʼuhiga heʼe ko Sehova, ia te “ ʼAtua faitotonu” ʼe ina leleiʼia tana hahaʼi mokā nātou maʼuliʼi te faitotonu. (Pesalemo 4:1; Tāʼaga Lea 2:​20-22; Hapakuke 1:13) ʼE mole feala ki he tahi ʼe ina fai he ʼu aga heʼe faitotonu ke felogoi mo ia. (Tāʼaga Lea 15:8) Koia ʼaē, ko te ʼapositolo ko Paulo neʼe ina fakaloto mālohiʼi fēnei ia Timoteo: “Hola mai te u fiafiaʼaga fakatupulaga, tulikaki te faitotonu,” pea mo te tahi ʼatu ʼu kalitātē maʼuhiga. (2 Timoteo 2:22) Pea ʼi te temi ʼaē neʼe talanoa ai Paulo ki te ʼu koga kehekehe ʼo totatou teu tau fakalaumālie, neʼe ina fakakau kiai ia “te kofu ukamea ʼo te faitotonu.”​—Efeso 6:​14, MN.

5. E feafeaʼi ki he ʼu hahaʼi agahala hanatou kumi ia te faitotonu?

⁵ ʼE moʼoni, ʼe mole he tagata ʼe faitotonu kātoa. Ko tatou fuli neʼe tou maʼu te agahala mai iā Atama, pea ʼe tou agahala fuli, mo heʼe faitotonu talu mai tatatou tutupu. Kae ko Sesu neʼe ina ʼui ʼe tonu ke tou kumi ia te faitotonu. ʼE tou lava fai koa ia te faʼahi ʼaia? Ei, heʼe ko Sesu neʼe ina foaki tona maʼuli haohaoa moʼo totogi tatatou ʼu agahala, koia kapau ʼe tou tui ki te sākilifisio ʼaia, pea ʼe fakamolemole anai e Sehova tatatou ʼu agahala. (Mateo 20:28; Soane 3:16; Loma 5:​8, 9, 12, 18) ʼO fakatafito ki te sākilifisio ʼaia, ʼe tali anai e Sehova ia tatatou tauhi ʼaē kiā te ia, mo kapau ʼe tou ako tana ʼu lēkula faitotonu pea mo faiga mālohi ke tou maʼuliʼi, pea mo kole tokoni kiā te ia moʼo tekeʼi totatou ʼu vaivaiʼaga. (Pesalemo 1:6; Loma 7:​19-25; Apokalipesi 7:​9, 14) ʼE ko he meʼa fakafiafia kiā tatou!

Tou Faitotonu ʼi He Mālama ʼe Heʼe Faitotonu

6. He koʼe neʼe fakamataku ia te mālama ki te kau ʼuluaki Kilisitiano?

⁶ ʼI te fakatotonu age ʼaē ʼa Sesu ki tana ʼu tisipulo ke nātou liliu ko tana kau fakamoʼoni “ ʼo kaku ki te potu taupotu ʼo te kele,” neʼe mole ko he gāue faigafua ia. (Gaue 1:​8, MN ) Ko tonatou ʼu telituale fuli neʼe “takoto ia ʼi te mālohi ʼo te agakovi,” ia Satana. (1 Soane 5:​19, MN ) Ko te mālama neʼe mulimuli ki te agakovi ʼaē neʼe fakaneke e Satana, pea ko te kau Kilisitiano neʼe feala hanatou tō ki tana ʼu fai fakahala. (Efeso 2:2) Maʼa te kau Kilisitiano, ko te malamanei ʼe ko he potu ʼe nātou tuʼutāmaki ai. Kae neʼe feala pe ke nātou nonofo agatonu mo kapau ʼe nātou kumi muʼa ia te faitotonu ʼa te ʼAtua. Tokolahi ʼi te kau ʼuluaki Kilisitiano neʼe nātou nonofo agatonu, kae ko te tokosiʼi neʼe nātou mavae kehe mai “te ala ʼo te faitotonu.”​—Tāʼaga Lea 12:28; 2 Timoteo 4:⁠10.

7. Koteā te ʼu maʼua ʼo te kau Kilisitiano ʼaē ʼe tonu ai ke nātou fakafeagai mālohi ki te ʼu fakahala ʼa te malamanei?

⁷ ʼE lelei age koa te mālama ʼo te temi ʼaenī ki te kau Kilisitiano? Kailoa ia! Kua kovi age ia ʼi te mālama ʼo te ʼuluaki sēkulō. Tahi ʼaē meʼa, kua lī ifo Satana ki te kele pea ʼe ina tauʼi mālohi te kau Kilisitiano fakanofo, ia “te toe ʼo [te] hāko [ʼo te fafine], ʼaē ʼe nātou mulimuli ki te ʼu fakatotonu ʼa te ʼAtua pea mo nātou maʼu te gāue ʼaē ko te fakamoʼoni kiā Sesu.” (Apokalipesi 12:​12, 17, MN ) ʼE toe tauʼi foki e Satana mo nātou fuli ʼaē ʼe nātou lagolago ki te “hāko” ʼaia. Kae ʼe mole feala ki te kau Kilisitiano ke nātou mavae kehe ʼi te malamanei. Koia, logola ʼe mole nātou mulimuli ki te ʼu aga heʼeʼaoga ʼa te malamanei, kae ʼe tonu ke nātou nonofo ai. (Soane 17:​15, 16) Pea ʼe tonu ke nātou fai faka mafola ʼi te malamanei moʼo kumi ia te hahaʼi ʼaē ʼe nātou lotolelei, pea mo akoʼi nātou ke nātou liliu ko ni ʼu tisipulo ʼa Kilisito. (Mateo 24:14; 28:​19, 20) Koia, ʼe tonu ki te kau Kilisitiano ke nātou fakafeagai mālohi ki te ʼu fakahala ʼo te malamanei, heʼe mole feala hanatou mavae ʼosi mai ai. Tou vakaʼi age muʼa ia te ʼu fai fakahala e fā.

Te Fakahala ʼAki Te ʼu Felāveʼi Fakasino Heʼeʼaoga

8. He koʼe neʼe tauhi te kau Iselaele ki te ʼu ʼatua ʼa te kau Moapite?

⁸ ʼI te fakaʼosiʼosi ʼo te ʼu taʼu e 40 ʼo tanatou hēhē ʼi te toafa, tokolahi ʼi te kau Iselaele neʼe nātou mamaʼo ʼi te ala ʼo te faitotonu. Neʼe tuʼa lahi tanatou sisio ki tonatou hāofaki e Sehova, pea neʼe nātou ʼamanaki hū ki te Kele ʼo Te Fakapapau. Kae ʼi te temi maʼuhiga ʼaia, neʼe nātou kamata tauhi ki te ʼu ʼatua ʼa te kau Moapite. Koteā tona tupuʼaga? Neʼe nātou tō ki te fakahala ʼo “te holi a te kakano.” (1 Soane 2:16) ʼE ʼui fēnei ʼi te Tohi-Tapu: “Ko te hahaʼi neʼe nātou kamata fai te ʼu felāveʼi fakasino heʼeʼaoga mo te ʼu taʼahine ʼo Moape.”​—Faka au 25:⁠1.

9, 10. Ko te ʼu ʼaluʼaga fea ʼo totatou temi ʼaē ʼe tonu ai ke tou haga manatuʼi te mālohi fakahala ʼo te ʼu holi ʼaē ʼe kovi ʼo te kakano?

⁹ ʼE ʼasi mai ʼi te ʼaluʼaga ʼaia neʼe hoko ki te kau Iselaele, ko te ʼu holi heʼeʼaoga ʼo te kakano ʼe feala ke nātou kākāʼi te loto ʼo te hahaʼi ʼaē ʼe mole nonofo tōkakaga. ʼE tonu ke tou tāʼofi te ako mai te faʼahi ʼaia, tāfito la heʼe kua liliu ʼi te temi nei ia te ʼu felāveʼi fakasino heʼeʼaoga ko he aga ʼe mafola ʼi te mālama. (1 Kolonito 10:​6, 8) ʼE ʼui fēnei ʼi te alatike mai Amelika: “ ʼO aʼu ki te taʼu 1970, neʼe mole fakagafua ʼi Amelika kātoa ia te nonofo fakatahi ʼa he tagata mo he fafine kae mole heʼeki nā ʼohoana. ʼI te temi nei, ko he meʼa ia kua fai e te tokolahi. ʼE teitei ko te toko 50 ʼi te teau ʼi te ʼu taumātuʼa ʼaē kua ʼohoana neʼe nātou ʼuluaki nonofo feiā muʼa.” Kua fai pe ʼi te ʼu fenua fuli ia te taʼi maʼuli fakatahi ʼaia kae heʼeki ʼohoana. ʼI te malamanei kātoa kua kaugamālie te hahaʼi ʼe nātou māʼuʼuli feiā, pea ko he meʼa fakaʼofaʼofa heʼe ko ʼihi Kilisitiano ʼe nātou fai te taʼi aga ʼaia​—ʼo iku ai mo tanatou mavae ʼi te kokelekasio.​—1 Kolonito 5:⁠11.

¹⁰ Tahi ʼaē, ʼi te malamanei kātoa kua fakaneke te hahaʼi ki te ʼu felāveʼi fakasino heʼeʼaoga. ʼE fakahā ʼi te ʼu ʼata pea mo te ʼu polokalama ʼo te televisio ʼe feala pe ki te kau tūpulaga hanatou fai ni ʼu felāveʼi fakasino ʼi muʼa ʼo tanatou ʼohoana. Pea ko te fai tagata ʼa he tagata pea mo te fai fafine ʼa he fafine ʼe mole ko he meʼa kovi ia. ʼE lahi te ʼu fakahāhāʼaga meʼa ʼe fakahāhā lelei ai te ʼu felāveʼi fakasino heʼeʼaoga. ʼI te Internet ʼe maʼu gafua ai te ʼu pāki ʼo te ʼu felāveʼi fakasino. Ohage la, ʼi te sulunale neʼe fakamatala ai e te tāmai, ko tona foha ʼe taʼu fitu neʼe haʼu mai te faleako pea neʼe ina ʼui fakafiafia age ki tana tāmai ko tana kaugā ako neʼe ina maʼu ʼi te Internet ʼe fakahāhā ai te ʼu fafine telefua ʼe nātou fai te ʼu felāveʼi fakasino, pea neʼe punamaʼuli ʼosi te tāmai. Kae tokolahi te tamaliki ʼe nātou sioʼi te ʼu pāki ʼaia ʼi te Internet kae mole ʼiloʼi e tanatou ʼu mātuʼa. Pea tokolahi te ʼu mātuʼa ʼe mole nātou ʼiloʼi te ʼu meʼa ʼaē ʼe ʼasi ʼi te ʼu gaoʼi viteo ʼo tanatou ʼu tamaliki. ʼE lahi te ʼu gaoʼi viteo ʼiloa ʼe fakahāhā ai te ʼu felāveʼi fakasino fakalialia, ʼo feiā mo te ʼu aga faka temonio pea mo agamālohi.

11. ʼE lava feafeaʼi ki he famili hana nofo maʼa mai te ʼu aga heʼeʼaoga ʼo te malamanei?

¹¹ ʼE lava feafeaʼi ki he famili hana tekeʼi te ʼu fakafiafia kovi ʼaia? ʼE ina lavaʼi anai mo kapau ʼe ina kumi muʼa ia te faitotonu ʼa te ʼAtua, pea mo fakafisi ki te ʼu aga heʼeʼaoga. (2 Kolonito 6:​14, Efeso 5:3) Ko te ʼu mātuʼa ʼaē ʼe nātou leʼoleʼo lelei te ʼu aga ʼo tanatou ʼu fānau pea mo akoʼi kiā nātou ia te ʼofa ʼaē kiā Sehova pea mo tana ʼu lao faitotonu, ʼe nātou maʼu ai anai he lotomālohi moʼo fakafeagai ki te ʼu felāveʼi fakasino heʼeʼaoga, mo te ʼu gaoʼi viteo ʼaē ʼe fakahāhā ai te ʼu felāveʼi fakasino fakalialia, pea mo te ʼu ʼata heʼeʼaoga, pea mo ʼihi ʼatu ʼu aga heʼe faitotonu.​—Teutalonome 6:​4-9.a

Te ʼu Fai Fakahala Mai Te Hahaʼi

12. Koteā te fihifihia ʼaē neʼe malaga ʼi te ʼuluaki sēkulō?

¹² ʼI te nofo ʼa Paulo ʼi Lisitala ʼi Asia Veliveli, neʼe ina fakamālōlō faka milakulo ia te tagata. ʼE ʼui fēnei ʼi te fakamatala: “I te mamata a te hahai ki te mea kua fai e Paulo, nee natou hiki ake onatou leo i te lea fakalukania: ‘Kua hifo mai te u atua kia tatou, ke natou fakaʼata ki te u tagata!’ Nee natou fakahigoa Palenapa ko ‘Siase,’ mo Paulo ko ‘Helemesi,’ koteuhi e ko ia ae e akonaki.” (Gaue 14:​11, 12) Kae ki muli age, ko te hahaʼi pe ʼaia ʼaē neʼe nātou fia matehi ia Paulo pea mo Palenapa. (Gaue 14:19) ʼE ʼasi mai, ko te hahaʼi ʼe nātou muliʼi gafua niʼihi. Ko ʼihi ʼi te hahaʼi ʼo te kolo ʼaia neʼe kua liliu ko te kau Kilisitiano, kae neʼe kei nātou tui pe ki tanatou ʼu meʼa faifakalauʼakau. ʼI tana faitohi ki te kau Kilisitiano ʼo Kolose, neʼe fakatokagaʼi nātou e Paulo ʼo ʼuhiga mo te “tauhi ki te kau aselo.”​—Kolose 2:⁠18.

13. Ko te ʼu agaʼi fenua fea ʼaē ʼe tonu ke fakafeagai kiai te kau Kilisitiano, pea ko ai ʼaē ka ina foaki anai ia te fakaloto mālohi moʼo fai ia te faʼahi ʼaia?

¹³ ʼI te temi nei, ʼe tonu mo te kau Kilisitiano moʼoni ke nātou fakafeagai ki te ʼu agaʼi fenua ʼaē ʼe fai e te hahaʼi kae ʼe fakatafito ki te ʼu akonaki faka lotu hala pea ʼe fakafeagai ki te ʼu pelesepeto faka Kilisitiano. Ohage la ʼi ʼihi fenua, ʼe lahi te ʼu toʼotoʼoga faka lotu ʼo ʼuhiga mo te ʼaho tupu pea mo te mate, ʼe haʼu mai te akonaki loi ʼaē ʼe ʼui ko totatou laumālie ʼe hoko atu tona maʼuli mokā tou mamate. (Tagata Tānaki 9:​5, 10) ʼE ʼi ai mo te ʼu fenua, ʼe ko tanatou agaʼi fenua te tuʼusi ʼo te sino tapu ʼo te ʼu kihiʼi tamaliki fafine.b ʼE ko he aga fakapō, pea ʼe mole hona ʼuhiga heʼe mole ʼalutahi mo te ʼofa ʼaē ʼe tonu ke fakahā e te ʼu mātuʼa Kilisitiano ki tanatou ʼu fānau. (Teutalonome 6:​6, 7; Efeso 6:4) ʼE lava tekeʼi feafeaʼi e te kau Kilisitiano te ʼu fakaneke ʼa te hahaʼi pea mo līaki ia te ʼu agaʼi fenua ʼaia? ʼE hoki nātou lava tekeʼi te ʼu fakaneke ʼaia mo kapau ʼe nātou falala kātoa kiā Sehova. (Pesalemo 31:6) Ko te ʼAtua faitotonu ʼe ina fakaloto mālohiʼi anai pea mo puipui ia nātou ʼaē ʼe nātou ʼui mo tonatou loto kātoa: “Ko koe toku holaʼaga pea mo toku tule mālohi, toku ʼAtua, ʼaē ʼe au falala anai ki ai.”​—Pesalemo 91:2; Tāʼaga Lea 29:⁠25.

ʼAua Naʼa Galo Iā Tatou Ia Sehova

14. Koteā te fakatokaga ʼaē neʼe fai e Sehova ki te kau Iselaele ʼi muʼa ʼo tanatou hū ki te Kele ʼo Te Fakapapau?

¹⁴ ʼI muʼa ʼo te hū ʼa te kau Iselaele ki te Kele ʼo Te Fakapapau, neʼe fai age e Sehova te fakatokaga ke nātou manatuʼi tuʼumaʼu ia ia. Neʼe ina ʼui fēnei: “Tokaga kiā koe, naʼa galo iā koe ia Sehova tou ʼAtua, naʼa mole ke taupau tana ʼu fakatotonu, tana ʼu tonu faifakamāu pea mo tana ʼu lao, ʼaē ʼe au fakatotonu atu ʼi te ʼaho nei; naʼa ke kai pea mo mākona, pea mo laga he ʼu ʼapi matalelei ʼo nofo ai; naʼa tuputupu tau faga manu lalahi pea mo tau faga manu liliki, pea mo tuputupu maʼa koe ia te paʼaga pea mo te aulo, pea mo tuputupu ia tau ʼu meʼa fuli; naʼa liliu tou loto ʼo fia māʼoluga pea mo galo ai leva iā koe ia Sehova tou ʼAtua.”​—Teutalonome 8:​11-14.

15. E feafeaʼi hatatou ʼiloʼi ʼe mole tou galoʼi ia Sehova?

¹⁵ ʼE lava hoko koa he meʼa feiā iā ʼaho nei? Ei, mo kapau ʼe takimuʼa kiā tatou he ʼu meʼa ʼe mole lelei. Kae kapau ʼe takimuʼa kiā tatou ia te faitotonu ʼa te ʼAtua, pea ʼe liliu anai te tauhi maʼa ko te meʼa ʼaē ʼe maʼuhiga tāfito ʼi totatou maʼuli. Ohage ko totatou fakaloto mālohiʼi e Paulo, ʼe tou ‘totogi anai te temi faigamālie’ pea mo fai fakalelei tatatou minisitelio. (Kolose 4:5; 2 Timoteo 4:2) Kae kapau ʼe tōtō tatatou kau ki te ʼu fono pea mo tatatou kau ki te fai faka mafola, heʼe maʼuhiga age kiā tatou tatatou ʼu mālōlō peʼe ko te ʼu fakafiafia, ʼe feala anai ke tou galoʼi ia Sehova heʼe mole tou fakamuʼamuʼa ia ia ʼi totatou maʼuli. Neʼe ʼui e Paulo ʼo ʼuhiga mo te ʼu ʼaho fakamuli, ko te hahaʼi ʼe nātou “kaumeʼa [anai] mo te ʼu fakafiafia kae mole [nātou] kaumeʼa mo te ʼAtua.” (2 Timoteo 3:​4, MN ) Koia ʼe tonu ki te kau Kilisitiano moʼoni ke nātou vakavakaʼi ia nātou totonu peʼe mole nātou mulimuli ki te taʼi manatu ʼaia.​—2 Kolonito 13:⁠5.

Tou Tōkakaga Ki Te Loto Fia Faʼitaliha

16. Koteā te manatu kovi ʼaē neʼe maʼu e Eva pea mo ʼihi ʼi te temi ʼo Paulo?

¹⁶ ʼI te ʼōloto ʼo Eteni, neʼe fua te fakaneke ʼa Satana ia te loto fia faʼitaliha ʼa Eva. Neʼe fia filifili tonu e Eva ia te meʼa ʼaē ʼe lelei pea mo te meʼa ʼaē ʼe kovi. (Senesi 3:​1-6) ʼI te ʼuluaki sēkulō, ko ʼihi ʼi te kokelekasio neʼe nātou maʼu ia te loto fia faʼitaliha ʼaia. Neʼe nātou manatu ʼe popoto age nātou ia Paulo, kae ʼaki he aga vāvā, neʼe ʼui e Paulo, ko nātou ko te ʼu ʼapositolo makehe.​—2 Kolonito 11:​3-5; 1 Timoteo 6:​3-5.

17. Koteā ʼaē ʼe tonu ke tou fai ke mole tupu iā tatou ia te loto fia faʼitaliha?

¹⁷ ʼI te malamanei kātoa, tokolahi ʼe nātou “fiatuʼu, [mo] fonu ʼi te fialahi,” pea ko ʼihi Kilisitiano kua nātou tō ki te ʼu vaivaiʼaga ʼaia. Ko ʼihi kua nātou liliu ko he ʼu hahaʼi fakafeagai ki te moʼoni. (2 Timoteo 3:​4, MN; Filipe 3:18) ʼO ʼuhiga mo te tauhi maʼa, ʼe maʼuhiga ke tou kumi ia te takitaki ʼa Sehova pea mo kaugā gāue mo “te tagata kaugana agatonu mo poto” pea mo te ʼu tagata ʼāfea ʼo te kokelekasio. ʼE ko he faʼahiga kumi ʼaia ʼo te faitotonu, pea ʼe ina puipui anai tatou mai te loto fia faʼitaliha. (Mateo 24:​45-47, MN; Pesalemo 25:​9, 10; Isaia 30:21) Ko te kokelekasio ʼa te kau fakanofo ʼe ko “he pou pea mo he lagolago ʼo te moʼoni.” Neʼe fakatuʼu e Sehova ia te kokelekasio moʼo puipui pea mo takitaki ʼo tatou. (1 Timoteo 3:​15, MN ) Kapau ʼe tou fakamoʼoni ki te gāue maʼuhiga ʼaia ʼa te kokelekasio, pea ʼe ‘mole tou fai anai he meʼa ʼaki he fia matamuʼa,’ kae ʼaki he agavaivai ʼe tou fakalogo anai ki te finegalo faitotonu ʼa Sehova.​—Filipe 2:​2-4; Tāʼaga Lea 3:​4-6.

Tou Faʼifaʼitaki Kiā Sesu

18. Ko te ʼu ʼaluʼaga fea ʼaē ʼe tonu ai ke tou faʼifaʼitaki kiā Sesu?

¹⁸ ʼO ʼuhiga mo Sesu, neʼe fakakikite fēnei ʼi te Tohi-Tapu: “Neʼe ke manako ki te faitotonu, pea ʼe ke fehiʼa ki te agakovi.” (Pesalemo 45:7; Hepeleo 1:9) ʼE lelei ke tou faʼifaʼitakiʼi tana aga ʼaia! (1 Kolonito 11:1) Ko Sesu neʼe mole gata pe ʼi tana ʼiloʼi ia te ʼu lēkula faitotonu ʼa Sehova, kae neʼe toe manako foki kiai. Koia ʼi te temi ʼaē neʼe fai fakahala ai ia Satana kiā ia ʼi te toafa, neʼe mole lotolotolua ia Sesu pea neʼe mole fia mavae mai “te ala ʼo te faitotonu.”​—Tāʼaga Lea 8:20; Mateo 4:​3-11.

19, 20. Koteā te ʼu fua lelei ʼe tou maʼu mokā tou kumi ia te faitotonu?

¹⁹ ʼE moʼoni, ʼe feala ke mālohi ʼaupito ia te ʼu holi heʼe faitotonu ʼo te kakano. (Loma 7:​19, 20) Kae kapau ʼe maʼuhiga kiā tatou ia te faitotonu, pea ʼe ina fakaloto mālohiʼi anai tatou ke tou fakafeagai ki te ʼu aga ʼaē ʼe kovi. (Pesalemo 119:165) Ka fai mai ni ʼu fai fakahala, pea ko tatatou ʼofa mālohi ki te aga faitotonu ʼaē ka ina puipui anai tatou. (Tāʼaga Lea 4:​4-6) Tou manatuʼi, ʼi te ʼu lakaga fuli ʼaē ʼe tou tō ai ki te fakahala, ʼe mālo ai ia Satana. Koia, ʼe lelei age hatatou fakafeagai kiā Satana ke mālo ia Sehova.​—Tāʼaga Lea 27:11; Sakopo 4:​7, 8.

²⁰ ʼE kumi e te kau Kilisitiano moʼoni ia te faitotonu, ko te tupuʼaga ʼaia ʼo tanatou “fonu ʼi te fua ʼo te faitotonu ʼaē ʼe haʼu ʼaki ia Sesu Kilisito, ʼi te kolōlia pea mo te fakavikiviki ki te ʼAtua.” (Filipe 1:​10, 11, MN ) ʼE nātou kofuʼi “te ʼulugaaga foʼou ʼaē neʼe fakatupu ʼo mulimuli ki te finegalo ʼo te ʼAtua ʼi he faitotonu pea mo he agatonu moʼoni.” (Efeso 4:​24, MN ) Kua nātou foaki tonatou māʼuli kiā Sehova pea ʼe nātou māʼuʼuli moʼo tauhi kiā te ia, kae ʼe mole nātou māʼuʼuli maʼa nātou. (Loma 14:8; 1 Petelo 4:2) ʼE takitaki tanatou ʼu manatu pea mo tanatou ʼu gāue e tanatou tauhi ʼaē kiā te ia, ʼo fakafiafia ʼaupito ai te loto ʼo tanatou Tāmai ʼaē ʼe ʼi selo!​—Tāʼaga Lea 23:⁠24.

[Kiʼi nota]

ʼE Feala Koa Hakotou Fakamahino?

• He koʼe ʼe maʼuhiga ke tou kumi ia te faitotonu?

• E lava feafeaʼi ki he Kilisitiano heʼe haohaoa hana kumi ia te faitotonu?

• Ko te ʼu aga fea ʼo te mālama ʼaē ʼe tonu ke fakafeagai kiai te kau Kilisitiano?

• ʼE puipui feafeaʼi tatou mo kapau ʼe tou kumi ia te faitotonu?

[Paki ʼo te pasina 26]

Maʼa te ʼu tisipulo ʼa Sesu, ko te malamanei ʼe ko he potu ʼe nātou tuʼutāmaki ai

[Paki ʼo te pasina 27]

Ko te ʼu kiʼi tamaliki ʼaē ʼe akoʼi age te ʼofa kiā Sehova, ʼe nātou mālolohi anai moʼo fakafeagai ki te ʼu aga heʼeʼaoga

[Paki ʼo te pasina 28]

ʼI te ʼosi maʼu koloā ʼa ʼihi Iselaele ʼi te Kele ʼo Te Fakapapau neʼe galo leva kiā nātou ia Sehova

[Paki ʼo te pasina 29]

Ohage ko Sesu, ʼe fēhihiʼa te kau Kilisitiano ki te heʼe faitotonu