Koutou Fakafeagai Kiā Satana, Pea ʼe Hola Mamaʼo Anai!
“Koutou fakalogo ki te Atua, pea koutou fakafehagai ki te [“Tevolo,” MN ] pea e hola mamao anai maià koutou.”—Sakopo 4:7.
1, 2. (a) Koteā te agaaga ʼo te Tevolo ʼe hā ʼi te ʼu palalau ʼaē ʼe tuʼu iā Isaia kapite 14? (b) Ko te ʼu fehuʼi fea ʼaē ka tou vakaʼi anai?
KO TE Tevolo ʼaē neʼe ʼuluaki fialahi. ʼE hā tana fialahi ʼi te ʼu palalau ʼaē neʼe tohi e Isaia, te polofeta ʼa te ʼAtua. Iā taʼu e 100 tupu ʼi muʼa ʼo te liliu ʼa Papiloni ko te mālohi faka malamanei, neʼe tohi e Isaia te ʼu palalau ʼaē ʼe fai e te hahaʼi ʼa Sehova ki “te hau ʼo Papiloni”: “Neʼe ke ʼui ʼi tou loto: ‘ ʼE au hake anai ki selo. ʼE au fakatuʼu anai toku ʼafioʼaga ke māʼoluga age ʼi te ʼu fetuʼu ʼa te ʼAtua [te ʼu hau ʼi te hōloga hau ʼo Tavite] . . . ʼE au fakaliliu anai ia au ke au tatau mo te Māʼoluga ʼAupito.’ ” (Isaia 14:3, 4, 12-15; Faka au 24:17) Ko te fialahi ʼa “te hau ʼo Papiloni” neʼe tatau mo te fialahi ʼa Satana, “te atua o te malama-nei.” (2 Kolonito 4:4) Kae ʼe fakagata anai te fialahi ʼa Satana, ohage pe ko te fakaʼosi ʼo te mālohi ʼo Papiloni ʼi te lainoa.
2 Kae ʼi te kei maʼuli ʼa te Tevolo, ʼe feala ke tou fai te ʼu fehuʼi ʼaenī: ʼE tonu koa ke tou mātataku ia Satana? He koʼe ʼe ina uga te hahaʼi ke nātou fakatagaʼi te kau Kilisitiano? Koteā ʼaē ʼe tonu ke tou fai ke mole kākāʼi tatou e te Tevolo?
ʼE Tonu Koa Ke Tou Mātataku ʼi Te Tevolo?
3, 4. He koʼe ko te kau Kilisitiano fakanofo pea mo tanatou ʼu kaumeʼa ʼe mole nātou mātataku ʼi te Tevolo?
3 Neʼe fakaloto mālohi ʼaupito te kau Kilisitiano fakanofo ʼi te ʼu folafola ʼaenī ʼa Sesu Kilisito: “Aua tau tuania ia mea e maua ke ke tali mamahi ai. Koeni, e amanaki te tiapolo ke ina laku ihi o koutou ki te pilisoni, koteuhi ke ahiahiʼi koutou, pea e aho hogofulu anai toutou ahiahiʼi. Agatonu o kaku ki te mate, pea e au foaki atu anai kia te koe te kolona o te mauli.” (Apokalipesi 2:10) Ko te kau fakanofo pea mo tonatou ʼu kaumeʼa ʼaē ko tanatou ʼamanaki ko te māʼuʼuli ʼi te kele, ʼe mole nātou mātataku ʼi te Tevolo. ʼE mole nātou mātataku ʼuhi ko he lototoʼa neʼe nātou tutupu ake mo ia, kae ʼe tupu heʼe nātou manavasiʼi ki te ʼAtua pea mo nātou ‘fēnonoʼi ʼi te malumalu ʼo tona ʼu kapakau.’—Pesalemo 34:9; 36:7.
4 Ko te ʼu ʼuluaki tisipulo lototoʼa ʼa Sesu Kilisito neʼe nātou agatonu ʼo aʼu ki te mate, logola te ʼu mamahi ʼaē neʼe tau mo nātou. Neʼe mole nātou mātataku ʼo ʼuhiga mo te meʼa ʼaē neʼe feala ke fai e Satana te Tevolo, he neʼe nātou ʼiloʼi ʼe mole he temi ʼe lītuʼa anai ia Sehova kiā nātou ʼaē ʼe nonofo agatonu kiā te ia. ʼO toe feiā pe iā ʼaho nei, ka fai ni ʼu fakataga fakamataku ki te kau fakanofo pea mo tanatou ʼu kaumeʼa, ʼe nātou fakatotonu mālohi ke nātou nonofo agatonu ki te ʼAtua. Kae neʼe fakahā e te ʼapositolo ko Paulo neʼe feala ki te Tevolo ke ina matehi he kau Kilisitiano. ʼE mole tou mātataku ai koa?
5. Koteā te ako ʼaē ʼe tou tāʼofi iā Hepeleo 2:14, 15?
5 Neʼe ʼui e Paulo ko Sesu ‘neʼe kau ki te toto pea mo te kakano’ ke “feala ʼaki tana mate ke ina maumauʼi ia ia ʼaē ʼe ina fakatupu te mate, ia te Tevolo, pea ke feala ke ina faka ʼāteainaʼi ia nātou fuli ʼaē ʼi tanatou mātataku ʼi te mate, neʼe fakapōpulaʼi nātou ʼi tonatou maʼuli kātoa.” (Hepeleo 2:14, 15, MN ) Ko Satana, “ia ia ʼaē ʼe ina fakatupu te mate,” neʼe ina hūfi ia Sutasi Isikaliote pea neʼe ina fakaʼaogaʼi te kau takitaki Sutea pea mo te kau Loma moʼo matehi ia Sesu. (Luka 22:3; Soane 13:26, 27) Kae ʼaki tana mate faka sākilifisio, ʼe faka ʼāteainaʼi anai e Sesu ia te hahaʼi agahala mai te pule ʼa Satana pea ʼe feala anai ke nātou maʼu te maʼuli heʼegata.—Soane 3:16.
6, 7. ʼE feala koa kiā Satana ke ina fakapōgi he tahi ʼi te temi pe ʼaē ʼe ina loto kiai?
6 ʼE feala koa ki te Tevolo ke ina fakapōgi he tahi ʼi te temi pe ʼaē ʼe ina loto kiai? Talu mai te kamataʼaga ʼo te ʼu gāue agakovi ʼa Satana, neʼe ina fakapōgi te hahaʼi ʼaki tana ʼu loi pea mo tana takitaki. Neʼe hoko te faʼahi ʼaia heʼe ko Atama neʼe agahala pea neʼe mafola ai te agahala pea mo te mate ki te malamanei kātoa. (Loma 5:12) Tahi ʼaē meʼa, ko te ʼu kaugana ʼa Satana ʼi te kele ʼe nātou fakatagaʼi te kau atolasio ʼa Sehova, ʼi ʼihi temi neʼe nātou matehi nātou, ohage pe ko tanatou fai kiā Sesu Kilisito.
7 Kae ʼe mole tonu ke tou manatu ʼe feala ke fakapōgi e te Tevolo he tahi ʼi te temi pe ʼaē ʼe ina loto kiai. ʼE puipui e te ʼAtua ia tana hahaʼi pea ʼe mole ina tuku anai ia Satana ke ina molehi kātoa tana kau atolasio moʼoni fuli ʼi te kele. (Loma 14:8) ʼE moʼoni, ʼe fakagafua e Sehova ke fakatagaʼi tana hahaʼi kātoa, pea ʼe ina fakagafua ke mamate ʼihi iā tatou ʼi te ʼu fakafeagai ʼa te Tevolo. Kae ʼe foaki ʼi te Tohi-Tapu te ʼamanaki taulekaleka ʼo te fakatuʼuake kiā nātou ʼaē ʼe tohi tonatou higoa ʼi “te tohi fakamanatu” ʼa te ʼAtua—pea ʼe mole feala ki te Tevolo ke ina tāʼofi ia te fakatuʼuake ʼaia!—Malakia 3:16; Soane 5:28, 29; Gaue 24:15.
He Koʼe ʼe Fakatagaʼi Tatou e Satana?
8. He koʼe ʼe fakatagaʼi e te Tevolo ia te ʼu kaugana ʼa te ʼAtua?
8 Kapau ʼe tou tauhi agatonu ki te ʼAtua, pea ʼe ko te tupuʼaga tāfito ʼaia ʼo totatou fakatagaʼi e te Tevolo. Ko tana fakatuʼutuʼu ke ina fakavaivaiʼi tatatou tui. ʼE tou felogoi lelei mo tatatou Tāmai ʼaē ʼi selo, pea ʼe loto e Satana ke ina maumauʼi tatatou ʼu felogoi ʼaia. ʼE mole tonu ke tou punamaʼuli ki te faʼahi ʼaia, heʼe ʼi Eteni, neʼe fakakikite e Sehova ʼe ʼi ai anai he fehiʼa ʼi tana “fafine” fakatātā pea mo te “gata” mo tonā ‘ ʼu hāko.’ (Senesi 3:14, 15) ʼE ʼui ʼi te Tohi-Tapu ko te Tevolo ʼe ko “te gata olisinale” pea mo ina fakahā mai ko tona temi kua nounou pea ʼe lahi tona ʼita. (Apokalipesi 12:9, 12) ʼI te hoko atu ʼo te fēfehiʼaʼaki ʼa te ‘ ʼu hāko’ ʼaia e lua, ʼe tonu ke fakatagaʼi ia nātou ʼaē ʼe tauhi agatonu kiā Sehova. (2 Timoteo 3:12) ʼE koutou mahino koa ki te tupuʼaga tāfito ʼo te fakatagaʼi ʼo tatou e Satana?
9, 10. Koteā te fakafifihi ʼaē neʼe lagaʼi e te Tevolo, pea koteā tona pikipikiga mo te aga ʼa te hahaʼi?
9 Neʼe fakafihiʼi e te Tevolo te pule ʼa Sehova ʼi te ʼatulaulau. ʼO fakapipiki kiai, neʼe ina toe fakafihiʼi mo te nofo agatonu ʼa te hahaʼi ki tonatou Tupuʼaga. Neʼe fakatagaʼi e Satana te tagata agatonu ko Sopo. Koteā tona tupuʼaga? Neʼe ina fia maumauʼi te agatonu ʼa Sopo kiā Sehova. Ko te ʼohoana ʼo Sopo pea mo tona ʼu kaumeʼa “[ʼaē neʼe] ko te ʼu tagata faka lotovaivai,” neʼe nātou fakahoko ʼi te temi ʼaia te fakatuʼutuʼu ʼa te Tevolo. Ohage ko tona fakahā ʼi te tohi ʼo Sopo, neʼe fakafihiʼi e te Tevolo ia te ʼAtua, ʼo ina lau ʼe mole he tahi ʼe nofo agatonu anai kiā te Ia mo kapau ʼe ina fakagafua kiā Satana ke ina ʼahiʼahiʼi ia nātou. Kae neʼe taupau mālohi e Sopo tana agatonu, ʼo ina fakahā ai ko Satana ʼe gutuloi. (Sopo 1:8–2:9; 16:2; 27:5; 31:6) Iā ʼaho nei, ʼe fakatagaʼi e te Tevolo ia te kau Fakamoʼoni ʼa Sehova, heʼe ina faigaʼi ke ina maumauʼi tanatou nofo agatonu pea mo fakahā ʼe moʼoni te ʼu meʼa ʼaē neʼe ina lau.
10 Ko tatatou ʼiloʼi ʼaē ʼe fakatagaʼi tatou e te Tevolo ʼuhi ko tana loto ʼaupito ʼaē ke ina maumauʼi tatatou nonofo agatonu ki te ʼAtua, ʼe tokoni moʼoni anai kiā tatou ke tou lototoʼa pea mo mālolohi. (Teutalonome 31:6) Ko totatou ʼAtua ʼe ko te Tuʼi ʼAliki ʼo te ʼAtulaulau, pea ʼe tokoni mai anai ke tou taupau tatatou agatonu. Tou faiga tuʼumaʼu ke tou fakafiafia te loto ʼo Sehova ʼo tou taupau tatatou agatonu, ke feala hana tali kiā Satana te Tevolo, te fasituʼu lahi.—Tāʼaga Lea 27:11.
“Ke Fakamaʼuli Mātou Mai Te Agakovi”
11. Koteā te faka ʼuhiga ʼo te kole ʼaē ke “ ʼaua naʼa ke tuku mātou ki te fakahala”?
11 ʼE mole faigafua hatatou taupau tatatou agatonu, koia ʼaē ʼe tonu ai ke tou faikole fakamalotoloto. ʼE tokoni tāfito mai te faikole ʼaē neʼe akoʼi mai e Sesu ohage ko he faʼifaʼitaki. Neʼe ina fai ai te ʼu palalau ʼaenī: “ ʼAua naʼa ke tuku mātou ki te fakahala, kae ke ke fakamaʼuli mātou mai te agakovi.” (Mateo 6:13, MN ) ʼE mole fakahalaʼi tatou e Sehova ke tou agahala. (Sakopo 1:13) Kae ʼi ʼihi temi ʼe talanoa ʼi te Tohi-Tapu ki te ʼu meʼa ʼaē neʼe ina fai peʼe ki te ʼu meʼa ʼaē ʼe ina eke ke hoko, kae ʼi tona faka ʼuhiga moʼoni ʼe ina tuku pe ia ke hoko. (Lute 1:20, 21) Koia ka tou faikole ohage ko tona fakahā mai e Sesu, ʼe tou kole ai kiā Sehova ke mole ina tuku tatou ke tou tō ki te fakahala. Pea ʼe ina logoʼi anai tatatou faikole, heʼe fakapapau fēnei mai ʼi te Tohi-Tapu: “E agatonu te Atua, e mole ina fakagafua anai ke lahiʼage toutou fakahalaʼi i te mea e koutou lavaʼi, kae e ina tuku atu anai fakatahi mo te fakahala te faigamalie ke koutou hao ai pea mo te malohi ke koutou faa tali.”—1 Kolonito 10:13.
12. He koʼe ʼe tou faikole fēnei: “Ke ke fakamaʼuli mātou mai te agakovi”?
12 ʼI tana ʼosi talanoa ki te fakahala ʼi tana faikole, neʼe ʼui fēnei e Sesu: “Ke ke fakamaʼuli mātou mai te agakovi.” ʼE fakaliliu fēnei ʼi ʼihi Tohi-Tapu: “Haofaki matou mai te kovi” (Tauhi Foou) peʼe “Puipui mātou mai te kovi.” (Contemporary English Version) Kae ʼi te Tohi-Tapu, ko te kupu ‘fakamaʼuli mai’ ʼe fakaʼaogaʼi tāfito ʼo ʼuhiga mo te hahaʼi, pea ʼe ʼui ʼi te Evaselio ʼo Mateo ko te Tevolo ia “te fai fakahala.” (Mateo 4:3, 11) Koia ʼe maʼuhiga ke tou faikole ke fakamaʼuli tatou mai “te agakovi,” ia Satana te Tevolo. ʼE ina fakaoloolo tatou ke tou agahala ki te ʼAtua. (1 Tesalonika 3:5) Ka tou kole “ke fakamaʼuli [tatou] mai te agakovi,” ʼe tou kole ai ki tatatou Tāmai ʼaē ʼi selo ke ina takitaki tatou pea mo tokoni mai ke ʼaua naʼa kākāʼi tatou e te Tevolo.
Ke ʼAua Naʼa Kākāʼi Tatou e Te Tevolo
13, 14. He koʼe neʼe tonu ke fetogi e te kau Kolonito tanatou aga ki te tagata ʼaē neʼe aga heʼeʼaoga ʼi te kokelekasio?
13 ʼI te fakaloto mālohiʼi e Paulo ia te kau Kilisitiano ʼo Kolonito ke nātou loto fakamolemole, neʼe ina tohi fēnei: “Ko te meʼa ʼaē ʼe koutou fia fakamolemole ki he tahi, ʼe au fakamolemole mo au. Ei, kiā au, ko te meʼa ʼaē neʼe au fia fakamolemole, kapau neʼe au fia fakamolemole he meʼa, ʼe tupu ko koutou iā muʼa ʼo Kilisito; ke ʼaua naʼa kākāʼi tatou e Satana, heʼe mole pulipuli kiā tatou tana ʼu fakatuʼutuʼu.” (2 Kolonito 2:10, 11, MN ) ʼE lahi te ʼu faʼahiga ʼaluʼaga ʼe feala ke kākāʼi ai tatou e te Tevolo, kae he koʼe neʼe ʼui e Paulo ke ʼaua naʼa kākāʼi tatou e Satana?
14 Neʼe fakatonutonuʼi e Paulo te kau Kolonito, he neʼe nātou tali lelei ʼi te loto kokelekasio ia te tagata aga heʼeʼaoga. Neʼe fiafia moʼoni ia Satana ʼi te ʼaluʼaga ʼaia, he neʼe tupu ai te ʼu laukovi ki te kokelekasio ʼi tana tali “te faahiga feauaki e mole maù pe la i te hahai pagani.” Ki muli age, neʼe fakamavae te tagata agahala ʼaia. (1 Kolonito 5:1-5, 11-13) Pea neʼe fakahemala te tagata. Kapau neʼe mole fia fakamolemole e te kau Kolonito ki te tagata ʼaia pea mo toe tali ia ia ʼi te kokelekasio, pea ʼe toe kākāʼi anai nātou e te Tevolo ʼi te tahi ʼaluʼaga. ʼO feafeaʼi? ʼE nātou liliu anai ʼo aga fefeka pea mole nātou loto manavaʼofa anai, ohage pe ko Satana totonu. Kapau neʼe liliu te tagata ʼaē neʼe fakahemala ʼo “taʼomia . . . ʼuhi ko tona lotomamahi,” pea mo lītuʼa ʼosi ki te tauhi ʼaē kiā Sehova, pea ʼe ko te hala tāfito anai ʼa te kau tagata ʼāfea iā muʼa ʼo Sehova, ʼaē ko te ʼAtua loto manavaʼofa. (2 Kolonito 2:7, MN; Sakopo 2:13; 3:1) ʼE mahino ia ʼe mole he Kilisitiano moʼoni ʼe fia hage anai ko Satana, ʼo agakovi, mo aga fefeka, pea mo heʼe manavaʼofa.
ʼE Puipui Tatou ʼAki Te Teu Tau ʼo Te ʼAtua
15. Ko te tau fea ʼaē ʼe tou kau ai, pea koteā ʼaē ka ina faka fealagia anai ke tou mālo?
15 Kapau ʼe tou loto ke fakamaʼuli tatou mai te Tevolo, pea ʼe tonu ke tou tau ʼi te tau fakalaumālie, ʼo fakafeagai ki te ʼu mālohi fakalaumālie agakovi. Ke feala hatatou mālo ʼi te ʼu mālohi fakalaumālie agakovi ʼaia, ʼe tonu ke tou kofuʼi “te teu tau kātoa ʼo te ʼAtua.” (Efeso 6:11-18, MN ) ʼE kau ʼi te teu tau ʼaia “te kofu ukamea ʼo te faitotonu.” (Efeso 6:14, MN ) Ko Saulo, te Hau ʼo Iselaele, neʼe talagataʼa ki te ʼAtua pea neʼe mole kei ina maʼu ia te laumālie maʼoniʼoni. (1 Samuele 15:22, 23) Kae kapau ʼe tou maʼuliʼi te faitotonu pea mo tou kofuʼi te teu tau kātoa fakalaumālie, pea ʼe tou maʼu anai te laumālie maʼoniʼoni ʼo te ʼAtua pea mo te puipui ʼaē ʼe ʼaoga kiā tatou moʼo tauʼi ia Satana pea mo tana kau ʼāselo agakovi, ia te kau temonio.—Tāʼaga Lea 18:10.
16. E feafeaʼi hatatou haga puipui ʼo tatou mai te ʼu mālohi fakalaumālie agakovi?
16 Ke lava puipui tuʼumaʼu tatou mai te ʼu mālohi fakalaumālie agakovi, ʼe tonu tāfito ke tou lau pea mo ako tuʼumaʼu te Folafola ʼa te ʼAtua, ʼo tou fakaʼaogaʼi lelei te ʼu tohi ʼaē ʼe foaki mai e “te tagata tauhi ʼapi agatonu.” (Luka 12:42, MN ) Koia ʼe tou fakafonu anai totatou ʼatamai ʼaki he ʼu manatu fakalaumālie, ʼo mulimuli ki te tokoni ʼaenī ʼa Paulo: “U tehina, ko meafuape e mooni, ko meafuape e fakaapaapaʼia ko meafuape e tonu, ko meafuape e maa, ko meafuape e tuha mo te ofa, ko meafuape e lelei tona palalaui, kapau e ko he vilitute pea kapau e ko he mea e vikivikiʼia, koutou tokaga kia mea aia.”—Filipe 4:8.
17. Koteā ʼaē ka tokoni mai ke tou popoto lelei ʼi te faka mafola ʼo te logo lelei?
17 ʼE faka fealagia e Sehova ke tou ‘fakatui totatou ʼu vaʼe ʼaki te logo lelei ʼo te tokalelei.’ (Efeso 6:15) ʼI tatatou kau tuʼumaʼu ki te ʼu fono, ʼe tou maʼu ai ia meʼa fuli ʼaē ʼe ʼaoga moʼo tala ia te logo lelei ʼo te Puleʼaga ʼa te ʼAtua. ʼE tou maʼu he fiafia lahi mokā tou tokoni ki te hahaʼi ke nātou ako te moʼoni ʼa te ʼAtua pea mo nātou ʼāteaina ʼi te faʼahi fakalaumālie! (Soane 8:32) Ko “te heletā ʼo te laumālie, ʼaē ko te folafola ʼa te ʼAtua,” ʼe maʼuhiga ʼaupito moʼo puipui tatou mai te ʼu akonaki hala pea mo “holoʼi te u fakakaukau fakafialahi.” (Efeso 6:17, MN; 2 Kolonito 10:4, 5) Kapau ʼe tou popoto ʼi te fakaʼaogaʼi fakalelei ʼo te Folafola ʼa te ʼAtua, te Tohi-Tapu, pea ʼe feala anai ke tou akoʼi te moʼoni ki te hahaʼi pea mo puipui tatou mai te ʼu kākā ʼa te Tevolo.
18. ʼE lava feafeaʼi hatatou “tutuʼu mālohi ʼo fakafeagai ki te ʼu kākā ʼa te Tevolo”?
18 Neʼe kamata fēnei e Paulo tana talanoa ʼo ʼuhiga mo tatatou teu tau fakalaumālie: “Ke koutou haga maʼu te mālohi ʼi te ʼAliki pea mo te mālohi ʼo tona māfimāfi. Ke koutou kofuʼi te teu tau kātoa ʼo te ʼAtua ke feala ai hakotou tutuʼu mālohi ʼo fakafeagai ki te ʼu kākā ʼa te Tevolo.” (Efeso 6:10, 11, MN ) Ko te kupu faka Keleka ʼaē neʼe fakaliliu ʼaki te kupu “tutuʼu mālohi” ʼe faka ʼuhiga ki te tuʼu maʼu ʼa te tagata solia. ʼE tou tutuʼu mālohi ʼi te tau fakalaumālie, logola ko Satana ʼe ina fakaʼaogaʼi te ʼu hele kehekehe moʼo fakamaveu tatatou logo tahi, peʼe moʼo ʼulihi tatatou ʼu akonaki, peʼe moʼo maumauʼi tatatou agatonu ki te ʼAtua. Kae ʼo aʼu mai ki te temi nei, neʼe mole lava te ʼu faiga ʼaia ʼa te Tevolo, pea ʼe mole lava anai ʼi he temi!a
Tou Fakafeagai Ki Te Tevolo, Pea ʼe Hola Mamaʼo Anai
19. Koteā te faʼahiga ʼaluʼaga ʼaē ʼe feala ai ke tou fakafeagai ki te Tevolo?
19 ʼE feala ke tou mālo ʼi tatatou tau fakalaumālie moʼo fakafeagai ki te Tevolo pea mo te ʼu mālohi fakalaumālie agakovi ʼaē ʼe ina puleʼi. ʼE mole tonu ke tou mātataku ia Satana, he neʼe tohi fēnei e te tisipulo ko Sakopo: “Koutou fakalogo ki te Atua, pea koutou fakafehagai ki te [“Tevolo,” MN ] pea e hola mamao anai maià koutou.” (Sakopo 4:7) Ke feala hatatou fakafeagai mālohi kiā Satana pea mo tana kau ʼāselo agakovi, ʼe mole tonu ke tou kau ki te ʼu meʼa faifakalauʼakau pea mo tou fakatahi mo te hahaʼi ʼaē ʼe nātou fai te ʼu meʼa ʼaia. ʼE fakahā lelei ʼi te Tohi-Tapu ko te ʼu kaugana ʼa Sehova ʼe mole tonu ke nātou fia ʼiloʼi te ʼu fai kikite ʼaē ʼe tohi ʼo mulimuli ki te sivisivi ʼo te ʼu fetuʼu, te tivinasio, pea mo te faifakalauʼakau. Kapau ʼe tou haga gāue pea mo mālolohi ʼi te faʼahi fakalaumālie, ʼe mole tou mātataku anai naʼa fai e he tahi he lotokovi kiā tatou.—Faka au 23:23; Teutalonome 18:10-12; Isaia 47:12-15; Gaue 19:18-20.
20. ʼE tou lava fakafeagai feafeaʼi ki te Tevolo?
20 ʼE tou “fakafeagai ki te [“Tevolo,” MN ]” mokā tou mulimuli ki te ʼu lēkula pea mo te ʼu moʼoni ʼa te Tohi-Tapu pea mo tou tutuʼu mālohi ʼo fakafeagai kiā ia. ʼE mulimuli te mālama kiā Satana heʼe ko tona ia ʼatua. (2 Kolonito 4:4) ʼE ʼiloga tatatou fakafeagai ʼaia, ʼi tatatou līaki ia te ʼu agaaga ʼo te malamanei, ohage ko te fiatuʼu, mo te manatu pe ʼaē kiā kita, mo te aga heʼeʼaoga, mo te aga mālohi, pea mo te kumi ʼo te ʼu koloā. ʼE tou ʼiloʼi neʼe hola te Tevolo ʼi te fakaʼaogaʼi ʼa Sesu ia te Tohi-Tapu moʼo fakafeagai ki tana ʼu fai fakahala ʼi te toafa. (Mateo 4:4, 7, 10, 11) ʼO toe feiā, ʼe hola anai Satana iā tatou mo kapau ʼe tou fakalogo kātoa kiā Sehova pea mo falala kiā te ia ʼi te faikole. (Efeso 6:18) ʼAki te tokoni ʼa Sehova ʼAtua pea mo tona ʼAlo ʼofaina, ʼe mole he tahi ʼe feala ke ina fai mai he meʼa ʼe kovi ʼo talu ai, māʼiape la mo te Tevolo!—Pesalemo 91:9-11.
[Kiʼi nota]
a Kapau ʼe koutou fia maʼu he tahi ʼu fakamahino ʼo ʼuhiga mo te teu tau fakalaumālie ʼo te ʼAtua, koutou vakaʼi Te Tule Leʼo ʼo te ʼaho 15 ʼo Sepetepeli 2004, ʼi te pasina 15 ki te 19.
Koteā Takotou Tali?
• ʼE tonu koa ke tou mātataku ia Satana te Tevolo?
• He koʼe ʼe fakatagaʼi e Satana te kau Kilisitiano?
• He koʼe ʼe tou faikole ke fakamaʼuli tatou mai “te agakovi”?
• ʼE lava feafeaʼi hatatou mālo ʼi te tau fakalaumālie ʼaē ʼe tou kau ai?
[Paki ʼo te pasina 12]
Ko te ʼu ʼuluaki tisipulo lototoʼa ʼa Kilisito neʼe nātou agatonu ʼo aʼu ki tonatou mate
[Paki ʼo te pasina 13]
ʼE mole feala ke tāʼofi e te Tevolo te fakatuʼuake ʼo nātou ʼaē ʼe manatuʼi e Sehova